قصه عليه محافظه اوي

[romeo_6887]

يدخل الأب إلى حجرة ولده ليوقظه للذهاب إلى الجامعة فيربت على ظهره
الوالد : طارق ... طارق .... قوم يا حبيبى
فيفتح الولد عيناً واحدة ينظر بها إلى أبيه فى استغراب و كأن أباه قد انتهك مقدساً
طارق : إيه يا بابا فيه إيه ؟
الوالد : قوم يا حبيبى عشان تلحق تروح كليتك ؟
طارق : يا بابا كلية إيه اللى بتصحينى عشانها وش الفجر
الوالد : وش الفجر إيه بس... يا بنى الساعة داخلة على عشرة ... قوم يا حبيبى عشان تلحق محاضراتك
طارق : يابابا نفض
الوالد : أعمل إيه
طارق : يعنى كبر يا بابا
الوالد : الله أكبر
طارق : لا يا بابا مش قصدى ... أن بقولك كبر دماغك يعنى
الولد : يا ابنى قوم متتعبنيش .... مش انت عندك محاضرات مهمة النهاردة ؟
طارق : يا بابا مهمة إيه بس ... ده كله فى الكلتشة
الوالد ( متعجباً ) : يعنى إيه كلتشة يا بنى .... انت مش عندك محاضرات مهمة النهاردة
طارق : يا بابا ... فكك من كلام الستينات ده.... أنا مش قادر أفك رموز وشى
الوالد : يا بنى قوم أخوك بيقول ان المحاضرات النهاردة عندك مهمة
طارق : يابابا سيبك منه ... ده واد بيهيس
الوالد : يعنى إيه .... كلامه صح ولا غلط ؟
طارق : يا بابا ... ابنك ده دماغه مخرومة ... عمالة تنقط .... متسمعلوش و لما يكلمك سد ودانك لحسن ياكلها .... و الودان اليومين دول غالية يابابا ... ملهاش قطع غيار
الوالد : يا بنى انت بتتكلم كده ليه ؟
طارق : يعنى بكلمك بالسيم يعنى .... بص يا بابا عشان خاطر ربنا ... سيبنى أنام كمان خمس ست ساعات عشان أقوم فايق .... أنا كنت سهران طول الليل ... سيبنى أأنتخ شوية
الوالد : تأنتخ ؟ ... الله يخرب بيتك مش فاهم منك ولا كلمة لا انت و لا أخوك
طارق : و الله يابابا أن مأفور خالص و مش قادر ... سيبنى
الوالد : يا بنى كلمنى زى ما بكلمك ... إيه اللى انت بتقوله ده
طارق : يا بابا هو انت عشان صاحى بدرى لازم تصحينى أنا كمان بدرى ،سيبنى يا بابا أنا عارف مصلحتى .
الوالد : مصلحتك ؟ يا بنى انت بقالك ثلاث سنين فى سنة ثانية
طارق : ظلم يا بابا ، الدكاترة بتاعة الكلية حاطينى فى دماغهم لحد ما عفنت
الوالد : (وقد بدأ يغتاظ ) طيب قوم يا معفن ... خد لك دوش و افطر و روح الكلية
طارق : بابا.. اقفل النور و خد الباب وراك .... و أما أقوم نبقى نشوف موضوع الدش ده
الوالد ( بصوت مرتفع ) : أنت حتقوم و لا حقومك بالجزمة
طارق ( يجلس على السرير ) : يا فتاح يا عليم .... الواحد لسة معملش استمورننج و بيتهزأ على الصبح
يخرج الأب و يدخل أخوه وائل فينظر إليه شذراً
طارق : لازم تديها جاز على الصبح .... شعللتها ؟ ... ماشى
وائل : هو اللى بيسألنى
طارق : قوله معرفش ... قوله معندوش زفت محاضرات
وائل : أكذب يعنى ؟
طارق : (يضحك سخرية ).... لأ إنت متعرفش تكدب ... تحب أقوله انك ساقط ، و منجحتش زى ما قلتله و انك بتعيد السنة من غير ما تعرفه ؟
وائل : ( و قد اصفر وجهه ) لا يا طارق اوعى ....
طارق : طيب يا حلو .... روح هاتلى سجارة من علبة أبوك أعمل بيها دماغ الصباحية
وائل : ( يخرج سيجارتين من جيبه ) خد اثنين أهم ... بس اخلص بسرعة قبل ما ييجى تانى .
طارق : طيب يا إتم .... اختفى من قدامى دلوقت
يخرج وائل ، و يبدأ طارق فى تدخين إحدى السجائر و هو بعد ما زال على السرير
ثم ينظر بجواره على الكمودينو و يتناول التليفون و يتصل بأحد زملائه
طارق : ألو ... أيوه يا هيما .... انت لسة مِكَّحول ... ما تقوم ياواد خليك نشيط
هيما : يا بنى حد يتصل بحد دلوقت مفيش زوق .... الساعة لسة عشرة و نص
طارق : فوق بقى .... إيه النظام ؟ الحياة أخبارها إيه النهاردة ؟
هيما : زى امبارح .... نروح المول ... و ندخل الكافى شوب .... نطلب شيشة ... نشرب لنا كام ستون ..... نعلق حتتين طراى .... أو نلف نعاكس فى المزز
طارق : طيب نتقابل الساعة واحدة .... متحلقليش
هيما : حتعمل إيه دلوقت
طارق : أنا حاخلع من البيت دلوقت و اخرج أصيع لحد ما نتقابل ، عشان أبويا عاملى فيها أبو الغضب و الأشكيف ... و لو فضلت موجود حيعملى فيها بروسلى و يضربنى .
هيما : الحمد لله يا عم... أنا أبويا ميت
طارق : يا بختك ... استكانيس براحتك ..... طول عمرك محظوظ .... شاو
يغلق الخط ... و يدخل أخوه وائل
وائل : اوعى يا طارق تقول لابوك .... لحسن يرحلنى
طارق : (ينظر إليه بتعال و كأنه ملك روحه ) خليك حلو معايا أحسنلك ... لحسن أنا لسانى بياكلنى ... و الندالة بتنقح على
وائل : ( باستجداء ) اوعى يا طارق
طارق : طيب روح هاتلى الجل بتاعك ... عشان الجل بتاعى بياكل فى دماغى زى مية النار
وائل : احنا حنبدأ استغلال .... و بعدين انت اللى مابتغسلش دماغك لحد ما باظت
طارق : خلص يا عم الأمور ... روح هاتى الجل .... إنجز
وائل : يا طارق ما انت عندك إزازة لسة مفتحتهاش
طارق : ياد روح هاتها متبقاش إيحة ... و بعدين انت لابس فانلة فى البرد ده ... عاملى فيها هركليز
وائل : ( يصرخ و هو يجرى خارج الحجرة ) يا نهار اسود ... دا المكوة على القميص
يأخذ طارق نفساً من السيجارة و قبل أن يخرجه من صدره يدخل والده
الوالد : إنت لسة نايم ؟
طارق : ( لا يرد حتى لا يخرج الدخان من فمه فيراه أبوه و يخفى السجارة تحت البطانية )
الوالد : يعنى مش عايز تجيبها لبر .... آدى آخرة دلع أمك . هى اللى فسدتك ... لو مخرجتش من البيت و رحت كليتك حالاً حكسر دماغك دى ... إنت فاهم ؟
طارق : ينظر إلى والده و قد احمرت عيناه و انتفخ وجهه
الوالد : انت بتبص كده ليه يا واد انت .... جتك البلا فى منظرك
( يخرج الوالد )
طارق : ( يخرج نفسه الذى كتمه حتى كاد أن يموت ، و يسعل بشده )
يدخل وائل أخوه فيجده على هذه الحال
وائل : إيه مالك ؟ حتفطس ولا إيه
طارق : روح هاتلى كباية مية أبوك كان حيموتنى .... كنت حسافر
يخرج وائل فيستلقى طارق على السرير يسترجع أنفاسه و يغمض عينيه ... و بعد قليل يرتفع صوت شخيره

[mahmoud_magdy]

هههههههههههههه
حلوه
بجد حلوه

[M.Mosaad]

عجبتني اوي لسة مفكتش رموز وشي دي جديدة

[romeo_6887]

هههههههههههههه
حلوه
بجد حلوه

عجبتني اوي لسة مفكتش رموز وشي دي جديدة

ميرسي علي التعليق يا جماعه
و هما دول بعض شباب مصر الحلوين

[gouda]

هوه انت اللى كاتب الكلام ده

[I.S.L.A.M]

هوه انت اللى كاتب الكلام ده

؟؟؟؟؟؟؟؟؟
بس بجد جامة اخر حاجة

[Akram]

أنا حاخلع من البيت دلوقت و اخرج أصيع لحد ما نتقابل ، عشان أبويا عاملى فيها أبو الغضب و الأشكيف ... و لو فضلت موجود حيعملى فيها بروسلى و يضربنى .

استكانيس براحتك .....

جامدين قوي

[abogogo]

للأسف ده حال شباب كتير في مصر ربنا يصلح الحال بس بصراحه جامده تسلم ايدك

[Mohamed.Ramah]

هههههههههه والله موتني ضحك اضحك الله سنك

[romeo_6887]

هوه انت اللى كاتب الكلام ده

لا طبعا الموضوع منقول و يا رب يكون الموضوع عجبك

[maka]

حلوة

وده حال شباب كتيير

[nabaster]

القصه دي انا قريتها قبل كده كامله من سنه تقريبا

ودي اصلا من حوالي17 مشهد

وكانت المفروض تبقي 25 مشهد بس صاحبها امتنع عن كتابة الباقي لان اصلا القصه بيوريك الشباب الضايع بقي حاله ازاي لما ربنا هداه

لاكن بعد لما لقي القصه اتنشرت في المنتديات وبقيت التعليقات من عينة يا ثكر ويا عثل مكملهاش

وكان ليه اسباب تانيه كتير دي اهمها وده اقتباس مباشر من كلامه

لقد أخذ بعضهم القصة و نسبها إلى نفسه بل و غير أسماء الأبطال من (طارق) و (ووائل) إلى (محمد) و (محمود).... و يشهد الله أن هذا لم يضايقنى أبداً ، بل أضحكنى
الذى يضايقنى - و أظن أنكم ستشاركونى فى ذلك – أن الإخوة أو بعضهم تجدهم فى منتدانا فى منتهى التقوى و الورع ، فإذا ما خرجوا من منتدانا إلى غيره من المنتديات غير الملتزمة التى فيها ما فيها من الاختلاط و قلة الورع و التحدث بما لا يليق بين الفتى و الفتاة ، إذا بالشيخ يخلع ثوب المشيخة و يرتدى ثوباً (سبور ) ، فيكلم هذه برقة و هذه بليونة و هذه بمزاح و هذه تكلمه بدلع و هذه تقول له يا عثل و هذا يقول لها يا ثكر (دمهم خفيف) و الأخت تقول بحبك فى الله يا أحمد و أشياء من هذا القبيل الذى يرفع الضغط و يصيب بالفالج

.

الي عايز القصه كامله يقولي واحاول اجبهاله كامله ان شاء الله او انزلها هنا في المنتدي في موضوع واحد اجزاء

A.Yakout

[romeo_6887]

القصه دي انا قريتها قبل كده كامله من سنه تقريبا

ودي اصلا من حوالي17 مشهد

وكانت المفروض تبقي 25 مشهد بس صاحبها امتنع عن كتابة الباقي لان اصلا القصه بيوريك الشباب الضايع بقي حاله ازاي لما ربنا هداه

لاكن بعد لما لقي القصه اتنشرت في المنتديات وبقيت التعليقات من عينة يا ثكر ويا عثل مكملهاش

وكان ليه اسباب تانيه كتير دي اهمها وده اقتباس مباشر من كلامه

.

الي عايز القصه كامله يقولي واحاول اجبهاله كامله ان شاء الله او انزلها هنا في المنتدي في موضوع واحد اجزاء

a.yakout

يا باشا انا منسبتش حاجه لنفسي طبعا
و كان المفروض اكتب ان الموضوع منقول
و ياريت تجيبلنا القصه كامله
و ميرسي علي تعليقك

[ahmad5997]

فوكك مني والحقني بالقصة الكاملة يا امور

[gouda]

ياريت القصه كامله
عشان العظه
هههههه