مش عارف انا صح ولا غلط

[mrwho1982]

السلام عليكم اولا

من غير كتركلام انا امبارح كنت راجع من الشغل الساعة 8 باليل وعلي اول طريق ال na اللي بيكون رابط زهراء مدينة نصر بالتجمع الخامس

واذ فجاة عن الشرطة العسكرية وفي سواق نقل رمي علي رمية كان هايطرلي فيها الكبوت قمت مديلة

تييييييييييييييييت تتت تتات

بعدين لقيتة بيرجع علي وكان هايريح عالكبوت المهم قمت مديلو كلاكس عالي وطويل المهم طول الطريق قاعد يقفل علي لحد ماسيبتو خالص
وقفلت نو العربية ولحمت في عربية ماتريكس هو ماشفنيش وقمت فااااتح 140 المهم علي اخر الطريق في كمين معمول للنقل بس بيكونو راكنين العربية عالطريق وكان فيها امين شرطة وضابط حاطط نجمتين و2 عساكر

روحت للضابط جري وقلتلو في سواق نقل خبطني من قدام ولازم تمسكهولي وهو جاي وراي وشكلو شارب حاجة

المهم الضابط قال للعسكري نزل العربية واقل الطريق ووقفلي كل النقل
الراجل كان محترم لحد دلوقتي قاللي معاك نمر العربية قلتلو ايوة

المهم صاحبنا جاي شافني واقف جنب الكمين والطريق مكهرب كان هايعمل حمام علي نفسه
المهم سواق النقل سمع مني شتايم اول مرة يسمعها بني ادم ونسيت كل التربية اللي انا اتربيتها الضابط قاللي بس اهدي وسيبهولنا

انا هاظبطهوللك قلتلو العيب مش عليه العيب عليكو ازاي سايبين واحد زي ده يسوق اصلا افرض موتني اعمل انا ايه

المهم الضابط روقو وطلع ممعهوش روق العربية ووقفو جنبيها لقيت السواق بيبصلي قوي فطلعت الموبايل وكلمت اخويا قلتلو عاللي حصل قاللي ماتتحركش انا جايللك جاللي وقاللي خلاص انت اخدت حقك بس نعملو محضر عدم تعرض الضابط قللي طيب تيجي معايا علي القسم روحت القسم عملتو محضر عدم تعرض وخلص الموضوع بس انا عايز اعرف هو انا كده غلطان

علي فكرة اتعملو كمان محضر بالعربية واتروق

[mahmoud_magdy]

انت صح وموقفك ايجابي ( انت بتدافع عن نفسك)
واحمد ربنا ان كان في ظابط محترم واقف لو كان مش محترم كان اتخد موقف تاني
مش كفايه انهم بيمشوا عالطريق السريعه 140 فاكرين نفسهم ريشه وبيعرضوا ارواح الاخرين للخطر

[yasso2010]

+11111111111111

[A7MED_PHARMA]

انت صح وموقفك ايجابي ( انت بتدافع عن نفسك)
واحمد ربنا ان كان في ظابط محترم واقف لو كان مش محترم كان اتخد موقف تاني
مش كفايه انهم بيمشوا عالطريق السريعه 140 فاكرين نفسهم ريشه وبيعرضوا ارواح الاخرين للخطر

دي بقا الي غريبه بجد
ساعات بكون ماشي ع السريع ..وغير السريع
بكون ماشي على 120 أو 130
وفجأه
ألاقي نقل طاير من جمبي..بستغرب والله منهم
وكأنهم مركبين نيتروووو المساطيل دول

.
انا كنت عرفت ان في حملات ع الاسفلت ..بتعمل تحليل فوري للسواقين
عشان يظبطوا الي بيشرب منهم حاجه
وسمعت انهم مسكوا ناس كتير جدا في الحملات دي
وسمعت برضووو ان امناء الشرطه عملوا قرشين كويسين في الحملات دي


.

[newuser2009]

حد يقول للظابط كده ...
"الضابط قاللي بس اهدي وسيبهولنا
انا هاظبطهوللك قلتلو العيب مش عليه العيب عليكو ازاي سايبين واحد زي ده يسوق اصلا افرض موتني اعمل انا ايه "

[M.Mosaad]

لا طبعا صح و صح الصح كمان
لو اتنين من كل 10 التقل بيضايقوهم عملوا زيك كل بتوع التقل و الميكروباص و الملاكي اللي بيستهونوا بارواح الناس هيقفوا عند حدهم
احسن بكتير ماكنت تشتمه او تمسك فيه انت اخدت حقك بالقانون

[Eng.Geo]

مش عارف
في حاجة مش فاهمها
انت قلت انه كان هيريح علي العربية وبعدين انت طفيت النور ورحت ورا عربية ماتركس عشان ميشوفكش وبعد ما وصلت للكمين قلت للظابط انه خبطك
هو خبطك ؟؟
لو علي انك رحت للظابط عشان تشتكيه عشان كان هيخبطك يبقي انت صح جدا
انما لو كانت العربية مخبوطة ورحت قلتله انه هو اللي خبطك يبقي غلط
ارجو التوضيح

[mrwho1982]

لا بصراحة العربية كانت مخبوطة

[mrwho1982]

حط نفسك مكاني سواق نقل بيرجع عليك هاتعمل ايه هاتسقفلو ولا هاتنزل تقولو شكرا

:b4_592:

[Eng.Geo]

طيب ماهو كدة غلط
بس معلش حاول تشوف حل ترضي بيه جميع الاطراف وأولهم ربنا

[mahmoud_magdy]

دي بقا الي غريبه بجد
ساعات بكون ماشي ع السريع ..وغير السريع
بكون ماشي على 120 أو 130
وفجأه
ألاقي نقل طاير من جمبي..بستغرب والله منهم
وكأنهم مركبين نيتروووو المساطيل دول

.
انا كنت عرفت ان في حملات ع الاسفلت ..بتعمل تحليل فوري للسواقين
عشان يظبطوا الي بيشرب منهم حاجه
وسمعت انهم مسكوا ناس كتير جدا في الحملات دي
وسمعت برضووو ان امناء الشرطه عملوا قرشين كويسين في الحملات دي


.

يا دكتور تخيل من كتر الجراءه اللي هما فيها وعدم الضمير
بيسدوا الطريق علشان يعدو بعض من سرعه 100 مثلا وبيبقوا قافلينه تماما
وفيها ربع ساعه عقبال اما يعدي لحد ما الواحد بيطق من الغيظ
لا وكمان اما يعدي جمبك بالظبط وتلاقي عربيتك بتحدف من الهواء اللي جاي من جمب النقل
ينهار ابيض
دول المفروض يتعلقوا كدا ادام الشعب كله ويتكهربوا في اطرافهم
علشان يبقوا عبره

[mohamedbook]

دة لو طالك كان ام معاك بالواجب بس انت روقتوا من ناحيت المحضر
بس موضوع عدم التعرض دة مش ولبد يعني كان هيعملك ايه هو انت هتتبل عليه
لكن موضوع الشتيمه دة مش حلو خالص لان سلوكك غير سلوكة مينفعش تتعامل باسلوب السوقين والناس البيئه خالص الاسلام بيقول كدة
في حديث لرسول الله صلي الله عليه وسلم قال
لايسب الرجل والديه فقال الصحابه اويسب الرجل والديه فقال الني صلي الله عليه وسلم نعم
يسب الرجل اب الرجل فيسب اباة ويسب امه وبذلك يكون قد سبهما
والمؤمن ليس فاحشا ولا متفحشا
فيما معني الحديث

[A.Saad]

هوة غلطان فى اللى عمله طبعا
بس خد بالك انه فى اليمين ساعات مش بيشوفك
فخد بالك من دى

[mrwho1982]

مع احترامي

ماحدش يعرف يروقني امال الصاعق الكهربائي بيعمل ايه

انا جايبو علشان الناس دي
وعلي فكرة انا كنت ماش علي الشمال ولو هو مش شايفني وانا ماشي علي الشمال يبقي المفروض مايسوقش

ويبقيقعد في بيتهم احسن

[تامر.محمد]

انا كمان محتاج افهم
هو خبطك ولا لأ ؟
و المحضر اللي اتعمل محضر عدم تعرض بناء على ايه ؟