عايز رايكم فى مشكلة ..!

[Terrible_DaRsH]

هدخل فى الموضوع على طول :)

حاليا يا جماعة بعانى من مشكلة قارفانى بصراحة فى حياتى و خنقانى جدا و مش عارف هل كده صح و لا الغلط فين !

حاليا 85 % من اراء الناس بتقول انى ( تنك ) يعنى صحابي و الناس اللى اعرفها و اللى معرفهمش كمان كله رايه انى تنك ..

اولا كده انا مش اجتماعى يعنى اختلاطى بالناس قليل و كلامى قليل برده , بس دى طبيعتى و حاولت اغيرها و الله بس معرفتش ..

و لما بتكلم مع حد اول مرة اعرفه او مليش اختلاط بيه لازم ياخد انطباع انى تنك , مع انى الحمد لله لا بغلط فى حد و لا بستهزء بحد و لا اى حاجة !

هل انا كده غلط ولا ايه ؟! و لو غلط يا ريت حد يقولى ايه الصح لانى و الله قرفان بغباء :(

معلش قارفكم معايا :)

[fouady]

بص دايما أول انطباع ده بينتشر يعني لو أول واحد من شلة خد عنك انطباع إنك تنك فـال باي كله زي لحبل هيقول كده زي تامر حسني بالضبط هههههه فـإنت حاول دايما تتعوض إنك متكونش منطاوي مع الناس علشان ده بتيتاخد تنكا ممكن تكون إنت مش كده بس هي بتتاخد كده فـحاول إنك تكون مش منطاوي بس ده اللي أقدر اقولهولك

[husseinodeba]

بص انت لو فعلا تنك مكنتش كتبت الموضوع ده من اصله
انا عن نفس مبحبش احكم على حد من اول مره
وبحترم شخصيه كل انسان وطباعه

[Mohamed.Ramah]

بص حاول تبقى اجتماعى اكتر هزر اتكلم افتح مواضيع ناقش كدة اصل الناس بتاخد الفكرة دة لية لانك ممكن تكون مبتتكلمش معاهم مثلا كلامك قليل ردك على قد السؤال ليك قعدة معينة طريقة فى اللبس او المشى مش شرط الكلام فقط ودة بيدى انطباع سلبى عند الناس ولان اللى قدامك شايفك كدة فبالتالى مش حيتكلم معاك ولا حيعرف شخصيتك اكتر وحيحس منك بالتجاهل وحيقول عليك تنك

[waelfarid]

خليك علي طبيعتك بس بلاش سبرايت عامل الناس بما تحب ان يعاملوك به و الابتسامة لها مفعول السحر او علي الاقل متكونش مكشر وعقلك يكون كبير ويستوعب عقليات اللي قدامك كأنك بتلعب شطرنج طول الوقت وربنا يصلح حالنا وحالك

[romeo_6887]

انا عندي نفس مشكلتك و خصوصا اني بتكلم شويه انجليزي في وسط الكلام فشوف بقه الناس بتقول ايه ؟

[Abo_Lina]

اللي يقولك إنك تنك إتنك عليه بزيادة هايستقيم معاك

[metenawy]

انا برده شايف كده

[karim fathy]

والله انا بعانى نفس معانتك كدة بالظبط بس انا باخد فترة شويى على ما اخد على الناس بس هما بيفتكرونى برضو انى تنك وبحب اعيش فى الدور مع انى مش كدة خالص والله واللى بيعرفنى بجد بيحبنى جدا فانت حاول انك لما حتى يبقو ناس جداد لما تاخد عليهم ابقى معاهم فرى واضحك وعيش حياتك

[magyver]

ياجماعة اصل التناكة دة مش بقلة الكلام
ليها معاايير تانية ماشية ممكن لبس طريقة كلامك كدة يعني

[HanyHanyHany]

لا تكن غير نفسك ابدا
مع تطوير نفسك للافضل دوما
والله يحفظك ويرعاك وايانا جميعا امين

[Terrible_DaRsH]

شكرا جزيلا يا جماعة , انا مش بيهمنى راى حد فيا لان اللى بسعي له حاجة واحدة بس هى رضاء ربنا سبحانه و تعالى فقط .

و لكن كنت عايز اعرف يعنى انتوا لو اتعاملتوا مع حد و حسيتوا انه تنك بتعملوا ايه ؟؟

[Ahmed Nouh]

لو متكلمتش غير قليل هيتقال عليك تنك

ولو اتكلمت مع اى حد لسه متعرف عليه وهزرت معاه هيتقال عليه هايف ولزقه

هو الشباب فى سننا كدا مبيرحموش نفسهم من الكلام على اى حد وصدقنى لو حطيت فى دماغك هتتعب , ليك صحابك بتقعد معاهم وخلاص واللى نفسه يقول عليك حاجه يقول , ودول عاده اللى تلاقيهم مش وراهم حاجه غير القعده مع بعض والكلام عن باقى الناس عيال هايفه ميتصاحبوش اساسا

انا عندى نفس مشكلتك فى الجامعه والحمد لله الكل بيقول على عايش الدور علشان مبقعدش مع حد غير هما 4 ولا حاجه صحابى من برا الجامعه اساسا ومعايا ولو قعدت معاهم يبقى لازم تقعد طول النهار وتحضر حفلاتهم ومناسباتهم ومتفوتش خروجه معاهم وتسيب كل حياتك وبكدا تبقى مش تنك

وكذلك فى الشغل علشان مبتعاملش غير مع الناس اللى فى قسمى بس ومليش اى علاقه بأى حد تانى مبيتقالش على طول الوقت غير انى مستكبر اشتغل هنا ومش عاجبنى المكان وانى مش محتاج الشغل وكلام كتير من دا

الحل ,,, كبر دماغك وعيش زى ما انت عايز

[Ahmed Nouh]

شكرا جزيلا يا جماعة , انا مش بيهمنى راى حد فيا لان اللى بسعي له حاجة واحدة بس هى رضاء ربنا سبحانه و تعالى فقط .

و لكن كنت عايز اعرف يعنى انتوا لو اتعاملتوا مع حد و حسيتوا انه تنك بتعملوا ايه ؟؟

بعكس ما كلهم بيقولوا التنك متعرفوش غير لما تتعامل معاه , التنك مش شخص غير اجتماعى بالمره لأنه بيتكلم مع كل الناس عادى بحكم انهم اقل منه فلو صدف وحصل تعامل هيتكلم لكن بطريقه فيها تناكه

التناكه بشكل عام هى التكبر وملهاش اى دعوه بموضوع اجتماعى او منعزل او هادئ الطباع

[Terrible_DaRsH]

بعكس ما كلهم بيقولوا التنك متعرفوش غير لما تتعامل معاه , التنك مش شخص غير اجتماعى بالمره لأنه بيتكلم مع كل الناس عادى بحكم انهم اقل منه فلو صدف وحصل تعامل هيتكلم لكن بطريقه فيها تناكه

التناكه بشكل عام هى التكبر وملهاش اى دعوه بموضوع اجتماعى او منعزل او هادئ الطباع

تفرق يا باشا , لو كلامك قليل زيي كده الناس هتحس ان انت مستكبر تتكلم معاهم , كان مطالب منك تقول لكل واحد كلامى قليل :)

و انت اصبت النقطة الاساسية ان سن الشباب فعلا كله مورهوش غير القيل و القال , يعنى انا لغاية الان معرفش حد ف جامعتى غير كام واحد بالعدد بسلم عليهم لما اشوفهم و خلاص فانا كده تنك بالنسبة للباقى ..

و كمان فى حاجة بقيت اشك فى نفسي من وراها , هو لازم علشان شاب اتعرف على بنت كل يوم !!

يعنى انا اصلا شايف ان صداقة البنت و الولد دى ملهاش لازمة الا لو فى عمل رسمي او مخطوبين او واحد جاد و ناوى على الجواز علشان ربنا يكرمه بنص دينه , لكن علشان مبتعرفش على بنات بقيت معقد نفسياً كمان :):)

بكتشف يوميا مميزات حصرية موجودة فيا ..