درس للجميع واولهم العبد لله !

[فادى محمد]

من فتره كنت في الاسكندريه بتسوق لمحلاتي وكان زميلي منتظرني في ميدان المنشيه باكياس البضاعه وانا بجيب العربيه من الجراج ورايحله ولما وصلت عنده بمجرد ماوقفت لثواني لقيت واحد لابس ملكي بيقوللي رخصك ( مباحث مرور) . انا من النوع اللي نادر جداا اني اعمل مخالفه وببقي حريص علي الصح دايما .المهم حاولت افهمه اني غريب وانها ثواني وماعطلتش فيها المرور انما ماتفاهمش معايا . طلعت 5ج وجيت اديهاله قاللي انا باعمل شغلي وماظلمتكش ليه عاوز تاكل اولادي حرام ؟؟ روح الله يسهللك وسابني فعلا امشي .. بصراحه اتمنيت الارض تنشق وتبلعني وحسيت اني صغير جدا قدام راجل كبير باخلاقه . الحمد لله انا براعي ربنا وبخاف منه , بس مش عارف انا اتصرفت كده ازاي؟؟ المهم طول الطريق وانا راجع وانا باستغفر الله وعاهدته سبحانه اني لو غلطت اتحمل نتيجه غلطي مهما كانت لان من يتقي الله يجعل له مخرجا ..
معلش انا طولت عليكم بس انا حابب انقل الدرس ليكم للافاده العامه وابتغاء مرضاه الله وربنا يتقبل مني ومنكم ..

[النوبي]

ربنا يباركلك ويرزقك الخير كله

[Fouad Ezz]

بجد ربنا يباركلك ... ويبارك للشخص ده إللي لو فية مليون واحد مثلة في ال 80 مليون كان حالنا بقى غير كدة خالص..

[abou_ruqi]

ويبارك في رجل المباحث ويكتر من أمثاله

طبعا موقف محرج وللأسف البلد علمت الناس إن الطريق الملتوي أسهل وأرخص فبقينا بنفكر فيه الأول ونسينا المُثل العليا ومكارم الأخلاق

منهم لله اللي كانوا السبب

[Abdm]

ربنا يباركلك ويرزقك الخير كله

وربنا يبارك للراجل بتاع مباحث المرور ويكثر من أمثالة ويرزقة الخير كلة وينعم علية بفسيح جناتة الراجل دة يستاهل كل خير ومتلقيش زية كتيير فى البلد دية الا من رحم ربى ولا نزكى على الله أحدا ويرزقنا ويباركلنا جميعا ويهدينا ويصلح حالنا يا كريم يا رب العالمين

[Ghamrawy]

ربنا يتقبل منك و يغفرلك ان شاء الله
و يبارك للراجل ده و يصلح حال الناس

[I.S.L.A.M]

:b4_388: تحية الى كل الرجال الشرفاء :b4_388:

[I.S.L.A.M]

:b4_388: تحية الى كل الرجال الشرفاء :b4_388:

[Sameh]

كلامك صح فى بلد ماينفعش يتعمل فيها الصح للأسف
أنا برضوا بقول لنفسى إن الغرامة أهون من الرشوة

المشكلة بقا إنى عملتها مرة زى ما بتحكى وقام مرجعلى الفلوس برضه بس مش عشان محترم لأ عشان مش كفاية وبيقولى إيه ده ؟ ده أنا نصيبى اللى هاخده من المخالفة أكتر من كدة !! فتخيل لما تتعامل مع ناس زى دى ؟ أو تتعامل مع أمين ولا صول سايب الدنيا والتقاطعات والمرور وكل حاجة تضرب تقلب ورايح راشق قدام حتة عارف إن الناس بتضطر تقف قدامها ولو دقيقة من غير ماتعطل الشارع زى ماكينة فيزا أو كشك جرايد أو حتى عربية فول وهاتك يا تسجيل فى المخالفات بداعى وبدون داعى ـ طب والله مرة اتكتبت مخالفة من صول فى محافظة من المحافظات عشان بص لقا النمر مش أقاليم وبص حتة بصة بحقد غريب ولقيته بيسجل ماعرفش إيه وانا شايفه فى المرايا ! تعمل إيه فى حد مريض نفسى و ماعندوش زمة زى ده ؟
مش عارف إيه الصح فى البلد دى الصراحة حاجة تحير

[romeo_6887]

معلش يا باشا
و ربنا غفور رحيم

[youssefmustang]

اهو النوع ده من الشرطة النظيفة المحترمة اللى متربية
مش ناااااااااااااااااس

[فادى محمد]

انا باشكركم جميعا علي مروركم الكريم وحسن اخلاقكم .. وكل واحد فينا لو دور في حياته هيلاقي دروس كتيره المهم بقي اننا نستفيد من اخطائنا ونحاول مانكررهاش ويبقي ضميرنا من النوع الصاحي اللي يحاسب صاحبه علطول يمكن ده يشفعله عند رب العباد في اليوم اللي ماينفعش فيه لا مال ولا بنون الا من اتي الله بقلب سليم . ربنا يتقبل منا جميعا .

[Ahmed Sharaf]

وربنا يبارك للراجل بتاع مباحث المرور ويكثر من أمثالة ويرزقة الخير كلة وينعم علية بفسيح جناتة الراجل دة يستاهل كل خير ومتلقيش زية كتيير فى البلد دية الا من رحم ربى ولا نزكى على الله أحدا ويرزقنا ويباركلنا جميعا ويهدينا ويصلح حالنا يا كريم يا رب العالمين

آمين.

[KoDaK_Gti]

شوف كام دعوة اتقالت للراجل ده بالغيب علشان محترم (ودى كفاية اووى)

وشوف كام واحد منهم بيتشتم وبيتدعى عليه علشان معندوش ضمير

[wmz]

اللهم ولى علينا من يصلح

المشكلة أن القيادات الى ماسكه المرور بتترك الامر للاخلاق وده مش صح أنا لازم اعمل نظام رقابة يضبط المخالفات ديه وميكونش الموضوع متروك للاخلاق
بعد كده لو فيه اخلاق يبقى ونعم ولو حد معندوش يبقى غصب عنه برضه هيلتزم

ده راجل عنده اخلاق يبقى لو القانون اجبره على فعل صحيح هو مش هيخسر حاجه لان ده طبعه أنما لو حد تانى مش كده يبقى لازم القانون يوقفه عند حده