حد جرب جيليت mach3: ؟؟

[HeMa_LanCeR]

انتو جيتوا علي الجرح والله
انا بقي دقني اكتر من كلمه حساسه بشويتين تلاته
واخويا نفس الحوار لدرجه ان احنا روحنا لكذا دكتور وكان القرار ان احنا ما نحلق دقننا
وده سر خوفي من الجيش
المهم انا اكتشفت حاجه جامده جدا وبحلق بيها زي الفل
وهي المكنه الجيليت العاديه
بس كل مره بغير الموس هي تمنها 6 جنيه والموس يبقي تلاته مع بعض ب 5 جنيه
مافيش اوفر من كده
بس السر بقي انك ماتستخدمش المعجون العادي ده
استخدم الجيل اللي نازل جديد وهات بتاع البشره الحساسه بجد اكتر من رائع
وعن تجربه بقيت احلق وانا مطمن

[M.Osman]

انتو جيتوا علي الجرح والله
انا بقي دقني اكتر من كلمه حساسه بشويتين تلاته
واخويا نفس الحوار لدرجه ان احنا روحنا لكذا دكتور وكان القرار ان احنا ما نحلق دقننا
وده سر خوفي من الجيش
المهم انا اكتشفت حاجه جامده جدا وبحلق بيها زي الفل
وهي المكنه الجيليت العاديه
بس كل مره بغير الموس هي تمنها 6 جنيه والموس يبقي تلاته مع بعض ب 5 جنيه
مافيش اوفر من كده
بس السر بقي انك ماتستخدمش المعجون العادي ده
استخدم الجيل اللي نازل جديد وهات بتاع البشره الحساسه بجد اكتر من رائع
وعن تجربه بقيت احلق وانا مطمن

سبحان الله..
انا بستخدم الجل و برضه بتكون نار!

[eng.octooo]

حاولت احلق مره بالماكينه الثابته المصري
والله لو كنت حلقت بسكينه مكانش وشي حيتقطع كده

ماتفكرنيش ههههههههههههه مرة كنت مستعجل واتصلت بالسوبر ماركت وجابلى واحدة من شركة (بك الى بتعمل الاقلام تقريبا) ولغيت مشوارى بسببها اة والله وشى بقا كلة لزق بسبب الجروح حرام فيها انك تاخدها ببلاش

[Dr_AHMAD]

.. بس هى فيوجن باور دى بكام؟؟؟ و هل هى أفضل من الMach3؟؟

<br />
<br />
شوف يا باشا انا جربت الاتنين
ماك ثري معاها 3 رؤس امواس كل موس فيه 3 شفرات كل شفرة ترتكز على سوست علشان متجرحش الحبوب الصغيرة اللي في الوش وكان سعرها من كام سنة تقريبا 30 جنيه
تمام
فيوجن باور
اكبر في الحجم ومريحة لما تمسكها لوجود طبقة مطاط طري
معاها خمس رؤس امواس كل موس فيه خمس شفرات (يارب اقدراكون وصلتلكم حكاية رؤس الامواس والشفرات دي) وكل شفرة ترتكز على سوست لسهولة الحركة مع الانحناءات
فيها ايضا خاصية الفايبريشن زي المحمول كده علشان الناس اللي بشرتها حساسه وفعلا لما تشغلو تبقى الحلاقة ولا الهوى يشتغل على بطارية انرجيزر
معرفش اذا كان ليها توكيل للصيانة ولا لأ بس هسأل لما ييجي ميعاد الصيانة
انا اشتريتها من سنة كان في عرض ابو خمس امواس وكان سعرها في العرض على ما اتذكر 115 جنيه والسعر معقول لان شكلها هتكمل معايا سنة ونص اذا ربنا مد في العمر
المحصلة ان الفيوجن بور اجمد كثير من ماك ثري
اما المحصلة النهائية فان اسهل مكنة حلاقة على الاطلاق ولا تكاد تشعر معها بأي الم هي موس الحلاق ومع اني جراح الا اني خايف استخدمو بنفسي مع ان انتم عارفين ان الجراحين افضل حلاقين وافضل ترزية بس برضو خايف

الظاهر ان انا فايق النهارده مش عارف فيه ايه !!

[HeMa_LanCeR]

سبحان الله..
انا بستخدم الجل و برضه بتكون نار!

خليه بكميه حلوه
وكل وش اغسل وشك وحط جل تاني بحيث ان الموس مايلمسش الدقن من غير جل

[جمال]

انا بستعمل ماخ 3 من اول ماطلعت ( مش فاكر من امتى ) وبستعمل الموس لمدة شهر ( باحلق كل يوم )
والآن بستعمل فيوجن بور من شهرين بس وهى ممتازة جدا و لاتكاد تشعر بالموس وانت بتحلق والموس بقاله معايا شهرين ولسه بحالته ( استعمال مهندس )
انا اشتريتها فى عرض كانت المكنة + 5 امواس ب 105 ج
هو فيه منها نوعين فيوجن ( ودى بدون بطارية و بدون فيبريشن ) و فيوجن بور ودى ببطارية وفيبريشن , وطبعا البور احسن لانك يدوب بتمر بالماكينة على ذقنك مرة واحدة وخلاص وتدى نعومة ممتازة ولاتحتاج انك تكحت دقنك و تتعور

على فكرة الموس اللى فى ظهر المكنة ممتاز جدا فى تحديد السوالف و حلاقة الاماكن المزنوقة زى اسفل الانف

[D . a .\ AYMAN]

أنا باستعمل جيليت سنسور من أول ما نزلت السوق من حوالي 17 سنة وكان أول مرة أحلق فيها كانت بيها ... وفضلت على هذا المنوال لغاية مانزلت الماك 3 وجربتها بس مسكتها ماريحتنيش ورجعت تانب للسنسور وفضلت أستخدمها لغاية مانزلت الفيوجن وجبتها تقريبا بـ 75 جنيه من كارفور (كان عليها عرض خاص) بس فعلا في فرق كبير بينها وبين الماك 3 وبين السنسور اللى عفا عليها الزمن

الموس بتاع السنسور كان بقعد زمان معايا حوالي 3 شهور تقريبا حلاقة كل يوم أو يومين بالكتير قوي (مع إن بشرتي برضه بتتجرح بسهولة) بس كان غصب عني لازم أحلق يوميا ... بس من ساعة الماك مانزلت ووراها الفيوجن حسيت إنهم مابقوش يهتموا يصناعة أمواس السنسور لأن الموس مابقاش يكمل شهرين وأبتدي أحس إنه بقى بيجرح قوي برغم إن الحلاقة مرتين إسبوعيا فقط تقريبا

الموس بتاع الفيوجن لغاية دلوقتي مغيرتوش من أول ماجبتها من حوالي أربع شهور فقط ولسة كويس ممكن يكمل شهر أو شهرين كمان حلاقة بمعدل مرتين أسبوعيا برضه


نصيحة مهمة جدا .... أي كريم حلاقة تستخدموه لازم تحرصوا على إنه يكون من مكوناته الجلسرين لأنه أكتر مادة مرطبة ممكن تتحط على الجلد أثناء الحلاقة ... وبعد الحلاقة بحط شوية معجون تاني على الجزء الذي تمت حلاقته وأسيبه شوية لغاية الجلد مايشربه وكمان الجروح اللى حصلت (لو كان في أي جروح) تكون لمت وبطلت نزف وبعديها بغسل وشي كويس بالمية فقط بدون صابون ... ولازم أحط في الآخر بلسم بعد الحلاقة أي نوع مش مهم نوع معين

ياجماعة احنا لغاية امتى هيبقى عندنا عقدة الخواجة مش معقول يبقى عندنا شركة مصرية كبيرة فى صناعة الأمواس و ماكينات الحلاقة ونروح نحلق بجيليت اللى هى كلها صينى لازم نشترى منتج بلدنا مادام كويس وعلى فكرة منتجات نظيفة جدا على عكس ما الناس فاكرة انها منتجات حلاقين بس لا طبعا دى منتجات نظيفة وهتلاقوها فى كارفور و هايبر و سبينيس وأسعارها منافسة جدا واكيد الاخوة الاسكندرانية خبرة اكتر منى لان الشركة اصلا عندهم

حاولت احلق مره بالماكينه الثابته المصري
والله لو كنت حلقت بسكينه مكانش وشي حيتقطع كده

هية إيه الشركة المصري دي أنا معرفهاش خالص

بس أنا جربت المكنة الثابتة عموما في أوقات كتير كنت مضطر ليها وبأنواع كتير مش نوع معين وفي منها كان مستورد كمان وجيليت برضه ساعات ... والنتيجة .. فاشلة لأبعد الحدود بتوجع جدا أثناء الحلاقة غير الجروح الكتير جدا اللى بتسببها

[M.Osama]

انا جربت الجيليت بس مشفاكر اي نوع بس هوا في فيبريشن ومريحنيش اطلاقا !!! يمكن لاني معرفتش استعمله كانت ب 80 جنيه ومحلقتش بيها ولا مره واتركنت

وجبت مكنه كهربه زي بتاعت الحلاق ومستعملتهاش برده !! لانها مبتنعمش الدقن وانا محبش كدا وفي التهابات عندي اسفل الدقن ودي بتبهدلها.. المهم اتركنت برده !

وحاليا بستعمل جيليت بلو ii الي فيها من فوق شريط اخضر زي مرطب كدا والوحده بحلق بيها مره وحده وتترمي ! هي ب 3 جنيه وبتريحني بس مش اوي ومش لاقي حل لان دقني حساسه جدا جدا جدا جدا جدا لابعد الحدود

[kimo911]

انا باستعمل سنسو اكسيل من مدة طويلة وكنت زيك كدة مستغليها بصراحة لكن لما جربتها لقيت انها احسن واسهل واوفر كمان

ربنا يكرمنا ونجرب match 3 والفيوجن باور

[sherif_84]

هية إيه الشركة المصري دي أنا معرفهاش خالص

ياباشا ازاى ماتعرفهاش !!
شركة لورد طبعا اشهر شركة مصرية من سنة 1930 ومنتجاتها جميلة جدا واسعار منافسة لجيليت ودى صورة كده عالماشى من احد منتجاتها :

[SHNORY]

ياباشا ازاى ماتعرفهاش !!
شركة لورد طبعا اشهر شركة مصرية من سنة 1930 ومنتجاتها جميلة جدا واسعار منافسة لجيليت ودى صورة كده عالماشى من احد منتجاتها :

ماهي دي السينسور يا باشا او شبيهه ليها
كنت بستعملها وانا صغير

[Haitham10]

لورد دي تخصص في الجروح وتقطيع الوجه هههههههه