مين هو المصري؟

[Ahmed Sharaf]

لو عمل حاجة حلوة يبعت لجاره طبق يدوقه

وهو اللي

لو لقى الدنيا بتشتّي يجري يخبّط عليك يقولك لمّ الغسيل

وهو اللي

لو شم عندك حاجة بتتحرق يجري يطمن عليك لا تكون اتخنقت

وهو اللي

لو سمع صوت زعيق وخناق عندك يجي يصلح

وهو اللي

لو لقى خناقة في الشارع يقف يحوش مش بس يتفرّج

وهو اللي

لو لقى حد بيغرق يجري ينط في الميه حتى لو هيغرق معاه

وهو اللي

لو اتفرط منك كيس الجوافة في الشارع يقف يلمّ معاك

....................

المصري هو اللي

لو حس انك مزنوق يعملك جمعية مخصوص و يقبّضك الأول

و هو اللي

يقف معاك في الأحزان و الأفراح زي مايكون من بقية اهلك

و هو اللي

يلمّلك من الركاب فلوس لو مرتبك اتسرق منك في الأتوبيس رغم انه مايعرفكش

و هو اللي

لو لقاك في مواصلة و كان عارفك يحلف ميت يمين ليدفعلك الأجرة

حتى لو مافيش في جيبه غير نص جنيه

....................

المصري هو اللي

يقعد معاك ع الفطار في رمضان

المصري اللي

يشتري بالونات لولادك في العيد

المصري اللي

يقف جنبك وانت بتدبح الاضحية

المصري اللي

يباركلك لما ابنك يجيب مجموع ويساعدك يجيبله شغلانة

المصري اللي

ييجي يقولك تجيب كشاكيل و أقلام بالجملة عشان توفر المصاريف

....................

طيبة المصري مش ممكن تلاقي زيّها فى اي بلد تانية

[Ahmed Nouh]

ومنهم لله اللى طحنوه ووصلوه لأنه يبدأ يتخلى عن كل الطيبه دى بس علشان يعرف يعيش فى وسط الغابه

[ahmedsamir79]

والله عندك حق

[NFS]

ومنهم لله اللى طحنوه ووصلوه لأنه يبدأ يتخلى عن كل الطيبه دى بس علشان يعرف يعيش فى وسط الغابه

+1000000

[النوبي]

مع الاسف العادات دي اصبحت بتاعه جدي وجدك دلوقتي مع الاسف المصري اللي بتدور عليه حاسس انه اصبح اثري مش هتلاقيه غير في المعابد
الا من رحم ربي

[Eng_Mostafa_89]

المصرى دة انفرض من فترة
دلوقتى اخلاق المصرى
كلم عيل صغير طول ركبت وشوف ردة عليك
كلم عربجى سايق ميكروباص وشوف ردة

ياريت بجد اخلاقنا ترجع زى زماااااااااااااااااااااااااااااااااااااااااان

[بحري]

المصريين طول عمرهم عندهم أخلاقيات جميلة جدا ومنها بالطبع الواردة في الموضوع، لكن فعلا للأسف الفترة اللي فاتت حاجات كتير قوي قوي اتغيرت، وهناك كتاب للدكتور جلال أمين يرصد فيه تغيرات كبيرة حدثت في المجتمع المصري اسمه (ماذا حدث للمصريين)
نقطة أخيرة أحب أن أنبه عليها أنه برغم أن للمصريين فعلا أخلاق وسمات حسنة كثيرة إلا أن هذا لا ينبغي أن يكون سببا للفخر على غير المصريين لسببين
الأول أن هذه عصبية جاهلية
الثاني أن الخير في الدنيا غير قاصر على المصريين، بل ستجد الأخلاق الحسنة موجودة في كل الشعوب بنسب متفاوتة حتى غير المسلمين والدول غير الإسلامية ستجد فيها الكثير من الأخلاقيات الحسنة برغم الانحرافات العقدية والسلوكية الخطيرة

شكرا لك يا أستاذ أحمد شرف على الموضوع الجميل
ويارب يفضل الموضوع هادئ كده ولطيف وميكونش فيه كلام زي هتافات مدرجات الدرجة الثالثة

[mostafabakry]

منه لله الللي بيحاول يمحي الهوية المصرية المعروفه برجولتها و شجاعتها و بطيبتها و جدعنتها و خفة دمها

حسبي الله و نعم الوكيل

[ahmed ismail]

للاسف احنا كمصريين بنعانى من النرجسية الشديدة و جنون العظمة

مش المصرى بس اللى عنده الحاجات ديه

اى تجمع انسانى بشرى بتظهر فيه الصفات اللى حضرتك ذكرتها و الصفات ديه تسمى الصفات الانسانية و هى الفرق بين كونك انسان متواصل مع الاخرين مجتمعيا و بين كونك كائن همجى لكن شعورك ان الحاجات ديه تلاقيها فى المصرى بس شعور كاذب اوهمنا بيه اعلام الريادة
زى موضوع ان المصرى ذكى و محصلش و اعلى نسبة ذكاء فى العالم

[SeiffoZ]

كان زمان و جبر!

[Terrible_DaRsH]

كان زمان و جبر!

كنت داخل اكتب ال 3 كلمات دول

[Samah AbdAllah]

يا جماعة الراجل عامل موضوع ملئ بالمدح والتفاوؤل بيعدد فيه صفات المواطن المصرى البسيط اللى مش بيدور على مال ولا جاه ولا سلطة
والحمدلله المصرى ده لسة موجود وكتير كمان مش قليل ولا نادر زى ما بتقولوا
واكبر دليل على كده
موجود فى اجابة سؤال هسألهولكم
(ويارب ما اتصدمش فى الرد)

انت مصرى من دول؟؟؟؟؟؟؟؟؟؟

[M.Osman]

عادات حلوة و جميلة .. مع ان فيه بعض منها بحس انه تعدي على خصوصية الفرد

[romeo_6887]

المصري اللي بالمواصفات دي
معتش متوافر في المحروسه

[Eng.Sameh]

المصري هو اللي بيرضى بقليله ويستحمل الشقى والذل ويشتغل ليل ونهار عشان ياكل عياله ، ويقف في طابور العيش ساعات يمكن يخرج سليم ومعاه بجنيه عيش ، بس وقت الشدة ينسى ده كله ويفدي بلده بدمه وينسى كل الأسوة ، المصري اللي يفضل يدرس 16 سنة لحد ما ياخد البكالوريوس او الليسانس وبعد كده يشتغل سواق تاكسي وعامل محاره ونقاش ، المصري اذكى طفل في العالم الى ان يٌعتقل ذكائه في نظام التعليم العقيم ولكنه لو اتيحت له الفرص والمجال هيكون عالم ومخترع ومفكر ومبتكر .

المصري كنز لم يكتشف بعد !!!