موبايلي اتسرق-اعمل ايه

[اسلام المصرى]

والله متشكر لكل ردودكم وتفاعلكم
اللهم رد عليا ضالتي

لا شكر على واجب يا كريم.
امين يارب.
ان شاء الله خير يا كريم أهم حاجه ماتزعلش نفسك المؤمن مصاب , ربنا يعوض عليك بأحسن منه المهم أنك بخير.
يبقى طمنا أول بأول لوسمحت تطورات الموضوع ايه.
ربنا معاك.

[oshy]

بص يا كريم لو ليك حد جامد فى النيابه ممكن يرعملك اذن التتبع لكن لو ملكش حد يبقى للاسف مستحيل ترجع الموبيل أنا صاحبى أكبر منى ب 4 سنين ماسك القسم اللى فيه منطقتى كنت قاعد معاه و قاللى ان موضوع التتبع اتلغى خلاص ......
احمد ربنا يا كريم كويس انها جت فى الموبيل و قدر الله و ما شاء فعل
ممكن تقوللى يا كريم الموبيل اتسرق منك فين بالظبط و أنا هشوف ممكن أعمل أيه ..

[bassam nagy]

ربنا يعوض عليك أهم حاجه ماتزعلش وان شاء اللة باذن اللة ربنا يكرمك بالاحسن

[Karim_Monir]

الحمد لله مش هاقدر اقولكم اني مش زعلان هابقى بضحك على نفسي
وزميلنا محمد علاء اكتر واحد عارف هو واستاذ مهاب انا تعبت قد ايه على ما عرفت اجيبه
بس الحمد لله برضه الواحد لما بيتخيل انه كان ممكن يحصله حاجة او لحد عزيز عليه يقول ان فعلا لا يرد القدر الا الدعاء
واكيد كانت مصيبة كبيرة وخففها الدعاء الصالح
شكرا لكل تجاوبكم بس حتى اللحظ ما وصلتش لاي حاجة
واخر حاجة عملتها حطيت اعلان علي باب المسجد ومكافاة جامدة وقلت انه وقع مني وعليه بيانات مهمة عشان اللي سرقة لو معرفش يبيعة يمكن يتكلم ويطمع في المكافاة
--------
احمد هو اتسرق مني في المسجد جنب بيتي في شارع جمال عبد الناصر من جسر السويس
وعملت محضر في قسم السلام التابع لنيابات شرق في التجمع الخامس

[Nader]

لا حول ولا قوة الا بالله، دا انت كنت لسة جايبة من ايام بس.

قدر الله وما شاء فعل و الحمد لله انة اتسرق " نشل " مش سرقة بالاكراة وانت اعزل بدون حتى الاليكتريك تشوكر.

اللهم يا رب الضالة رد علية ضالتة ... دة اللي انا اقدر اساعدك بة

احنا في ايام مفترجة حاول تخفف عن نفسك علشان اسرتك متحسش بحزنك في الايام دي وربنا يصبرك ويعوضك خيراً منة.

[ابوحميد]

لا حول ولا قوة الا بالله
والله زعلت لما قريت اللى قلته
ربنا يعوضك بخير منه واحتسبه عند ربنا ربنا يردهولك هوا او فى الاخرة ثواب لاحتسابك
اتمنى انى كان فى ايدى حاجة اساعدك بيها بس والله مفيش فى ايدى حاجة
ربنا يعوضك احسن منه

[Powert]

معلش ياكريم ماتزعلش نفسك موبايل وراح

انا برضه الموبايل بتاعى اتسرق يوم الخميس اللي فات بس كنت في ميكروباص:o

كنت راجع من الشغل الساعة 10 بليل وجه واحد قاعد ورايا وكان مش قاعد على بعضه

المهم لاقيته بيقول لسواق نزلي هنا , السواق قاله هنا ولا قدام قالوه اي حاجة هنا وبسرعة

وطلع يجري لاقيت الناس بتقول اللي معاه حاجة يتاكد من موبيله ومن محفظته ببص مالقيتش

الموبايل طلعت اجري وراه بس هو كان جري وخلع خلاص , انا مش فارقه معايا لان الموبايل اللي

اتنشل كان قديم والخط اتصلات لسه جايبه من كام شهر ومالحقتش اسجل عليه حاجة بس الموبايل

التاني والغالى وخط القديم اللي عاليه كل حاجة كان في جيب البدله الناحية التانية :D:Dانا اتصلت

بشركة ووقفت الخط وجبت خط تاني وهجيب موبايل قديم علشان لو حد طلعلي وقالي هات

موبايلك اديله القديم :D:D

[ابوحميد]

اعتقد فكرة مش سليمة
كدا بدل ما حيثبتك فى موبايل واحد حيثبتك فى اتين