سحب الرخص

[mohamed_rhem]

السلام عليكم ورحمه الله وبركاته
صادفتني مشكله حبيت الكل يشارك معانا فيها
لجنه واقفه تسحب رخص تفتكرو ليه
اولا لو ملاقكش لاابط الحزام يبقي مخالفه حزام سهله ده
والله انا رخصتي اتسحبت امبارح وواحد جنبي بيقول للضابط ياباشا انا والله رابط الحزام
رد عليه الضابط قاله انت حتكذب قاله ياباشا والله كنت رابطه
قاله طيب متزعلش نفسك امن ومتانه ولا طمس نمره
والله العظيم حسيت انه بياخد نسبه زي الكمساري بالظبط
ايه حكايه اللجان ده
انا ملاحظ انها تستهدف فثه معينه
مره مركزين علي النقل التقيل مره علي النص نقل مره ميوقفوش الا الملاكي
حد عنده تفسير للي بيحصل ده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
حته كده كوميدي علشان الموضوع ميبقاش بايخ اصل انا بموت في افشات الافلام
اول ما الضابط قال امن ومتانه افتكرت محمد سعد في فيلم بوحه وجه في بالي قفشه من قفشات الافلام
تخيلي للمشهد بوحه واقف في لجنه وراكب عربيه زباله وشكلها يقرف ومخبطه من كل ناحيه
الضابط بيقوله رخصك كتب الوصل وقاله سبب السحب (امن ومتانه) يرد بوحه ويستهبل (امل ونتانه ايه سعاتك) العربيه ده نضيفه ولسه مفليها الصبح ههههههههههههههههههههههههههههه

[tmz9111]

لجان السحب بتبقى بمزاج الظابط

[Eng.Ahmed]

مره وانا على كورنيش المعادى الصبح وانا رايح الشغل لقيت فى المرايه موتوسيكلين شرطه عمالين يجروا وراحوا مزنقين على زى ما يكونوا بيطاردوا مجرم هارب و واحد فيهم قالى اقف اقف ( مع العلم انى كنت ماشى هادى جدا مكنتش بجرى خالص ) وطلب الرخص علشان النمره مش عجباه قالى مطموسه شكيت فى نفسى و بصيت على النمره لحسن تكون شبكت فى حاجه و اتعوجت لقيتها واضحه جدا فا انا لسه هاتناقش معاه ان النمره سليمه و ازاى تسحب الرخصه لقيت زميله كان شاف واحد راكن على جنب مكان ما انا وقفت وعجله العربيته مفكوكه ورافع العربيه بالكوريك فا قاله برضه رخصك فرد عليه الراجل و قاله ليه انا عملت ايه قاله راكن فى الممنوع ، قاله راكن ايه و ممنوع ايه مسمار دخل فى العجله فاتخرمت و انا دلوقتى بغيرها ، قاله مش مشكلتى رخصك لو سمحت ، قاله يعنى اكنس الشارع قبل ما امشى عليه ، قاله انت هاتهرج معايا انا ممكن اعملك محضر .
انا لما سمعت الحوار ده كان الوصل بتاع رخصتى اتعمل و مفكرتش اتكلم معاه اصلا بعد الى سمعته
و عمار يا مصر

[analyzer]

فى رئى الشخصى وعن تجربه
فى المواقف دى لازم تظبطهم باى طريقه على حسب الطريقه الى تانسبك
تليفون لواحد شديد وبعدها هتلاقى الامين او الظابط بيقولك اتفضل يا باشا واسفين على الازعاج .

او مساء الخير ايه بس الى مزعلك استنى بس هنتفاهم ( وتحت الرخصه عشرينايه او حتى عشرليه )
وتنفد بجلدك منهم .
وتحيا مصر
وربنا يعميهم عننا ويبعدهم امين

[3mr Farrag]

مش عارف ليه انا بقيت اقلق من اللجان......و بحس انهم هيلبسوني اي مصيبه
او اي غرامه مالهاش اي لازمه......
يعني انا رخصت العربيه باسم والدتي و بصراحه عايزها بقي تعملي توكيل.....علشان كذا مره حد يسألني العربيه ديه بتاعت مين؟؟؟
و بعدين يسألني معاك توكيل؟؟؟؟
بس بتكون لجان سهله و بيعدوني.....فمقلق لحسن البس في لجنه غبيه ....و يقرفوني بالحوار ده

[Eng.Ahmed]

ما انا بعد كده بقيت ماشى بالطريقه دى و مره فى ميدان التحرير نسيت و كنت بتكلم فى الموبايل فى الاشاره جالى الامين وانا بتكلم و قالى رخصك فا قلت لى الى معايا على التليفون ثانيه واحده ورحت مطلع 20 جنيه للامين و قولتله مساء الفل قالى مساءك فل يا باشا و كملت المكالمه عادى جدا فى الاشاره لغايه ما فتحت و مشيت.

[oshy]

أنا دافع 100 جنيه لحد دلوقتى عشان موضوع الفاميه دفعتهم على خمس مراحل :-
1 - شارع أحمد عرابى فى المهندسين عند عمر أفندى
2 - شارع شهاب فى المهندسين برضه
3 - أمام كنتاكى اللى قدام كلية أسنان ناحية كوبرى الجامعه
4 - على الدائرى عند كمين المنيب
5 - شارع الهرم ناحية كايرو مول
و فى كل مره 20 جنيه ياخدها و يقوللى مع ألف سلامه يا باشا ماعادا بتاع كمين المنيب الأمين خد ال 20 جنيه و قاللى آه منكوا يا شباب اليومين دول

[ابوحميد]

معلش يا جماعة
بس انا مش مستسيغ موضوع انك تدفع فلوس
اخويا اوشى متزعلش منى
بدل ما تدفع فلوس حلال فى حاجة مش مستاهلة شيل الفيميه وريح بالك
او ركب الفيميه بس لاقى طريقة متدفعش فلوس

[badblood]

طب انا مرة ضابط سحب رختصي عشان حاطط شعار النادي الاهلي ع الزجاج من وره
المهم سحب رخصه العربيه رحت افحص عشان اخد الرخص بعد كده قلت لضابط الفحص تصور سحب الرخصه مني ليه قالي ليه قولتوا عشان كذا
قالي ده اهيل طيب وعندا فيه الرخصه بتاعتك ايه؟

[oshy]

معلش يا جماعة
بس انا مش مستسيغ موضوع انك تدفع فلوس
اخويا اوشى متزعلش منى
بدل ما تدفع فلوس حلال فى حاجة مش مستاهلة شيل الفيميه وريح بالك
او ركب الفيميه بس لاقى طريقة متدفعش فلوس

و أنا برخص فى شهر 8 اللى جاى واحد حبيبى جامد ماسك فى قسم العجوزه قاللى هنزلهولك على الرخصه
شكرا يا حبيب قلبى على الاهتمام :):)

[dr_3eshoo]

يعني العيد و يلمو الغله كل سنه و انت طيب

[Ahmed Hassan]

و فى كل مره 20 جنيه ياخدها و يقوللى مع ألف سلامه يا باشا ماعادا بتاع كمين المنيب الأمين خد ال 20 جنيه و قاللى آه منكوا يا شباب اليومين دول

امين شرطه "حمش" صحيح... هيه دي الرجاله و لا بلاش.

انا باتبع اسلوب انا شايف انه الوحيد اللي ينفع (على الأقل بالنسبه ليه)... لو اي ضابط او امين شرطه وقفني و طلب الرخص اديلو الرخص... يا اما يشوفهم و يرجعهم.. او جنابه يختار اي مخالفه ظريفه و يسحب الرخصه.. باستنى في العربيه لغايه ما يكتب الوصل و يجبهولي العربيه واخده و امشي من غير ولا كلمه. انا شايف ان دي احسن طريقه لأن مفيش اي مجال لحوار او مناقشه منطقيه.. يبقى اريح اعصابي و ابعد عن الاشكال دي احسن.

[Jato.33]

بما إن كل واحد حكى حكايته مع سحب الرخص
أحكي أنا كمان
أصلي بحب الحكاوي دية
أنا إتسحبت رخصتي مرة واحدة على كمين على الدائري قبل المريوطية بسبب السرعة ودية معرفتش أعمل فيها حاجة ولا كنت ناوي ولا أعرف أعمل حاجة (أصل أنا غلبان)
المرة التانية كنت رايح مول الكومبيوتر بتاع السخاوي ودخلت من شارع غلط المفروض إنه خارج بس فلاقيت 3 أمناء شرطة واحد منهم وقفني وقالي الرخص وإنتا كده ماشي عكسي وهنسحب الرخص يا إما تدفع المخالفة وكانت كبيرة أوي مش فاكر تقريباً أكتر من 100 جنية وسابني أفكر المهم
قعدت أفكر وإستشرت واحد صديقي كان جنبي وقررت أديله 20 جنية وأنا بطلع الفلوس لاقيته رجع وقالي حاجة غريبة أوي : إتفضل رخصتك وألف سلامة
الحمد لله

المرة الأخيرة كنت رايح المهندسين ودخلت ميدان لبنان لاقيت أمين برده أخد الرخص وقالي مش رابط الحزام ليه
ده بأه قالي تدفع دلوقتي أو نسحب الرخص قولتله هدفع كام قال 20 جنية
إدتهوملوا وأخدت وصل كبير ومختوم ومذكروة فيه بياناتي وبيانات العربية والمبلغ كمان
والحمد لله

والتعليق
اللهم إنا نعوذ بك من شر كل ذي شر من خلقك
اللهم أغننا عن شرار خلقك

[Nile Heart]

معلش انا لى ملاحظتين

1- عدد كبير منكم بيدى الرخص لأميناء الشرطه اوحتى للعساكر.. وده غلط كبير جدآ لأن القانون بيعطى الظابط فقط حق سحب الرخص. الأمين ده اخرته يكتبلك مخالفه فقط.. اما ياخد الرخص لا والف لا

2- معظمكم بيخاف من رجال الشرطه حتى وهو مش عامل حاجه! انت لو عربيتك سليمه حط صباعك فى عينه ولو زودها هدده انك حاتشكى لمساعد وزير الداخليه لشؤون التفتيش, والله بيخافوا على مكافأتهم وترقياتهم وخصوصآ ان كلنا متعلمين ولسنا جهله أو سوابق.

[m_aash]

معلش انا لى ملاحظتين

1- عدد كبير منكم بيدى الرخص لأميناء الشرطه اوحتى للعساكر.. وده غلط كبير جدآ لأن القانون بيعطى الظابط فقط حق سحب الرخص. الأمين ده اخرته يكتبلك مخالفه فقط.. اما ياخد الرخص لا والف لا

2- معظمكم بيخاف من رجال الشرطه حتى وهو مش عامل حاجه! انت لو عربيتك سليمه حط صباعك فى عينه ولو زودها هدده انك حاتشكى لمساعد وزير الداخليه لشؤون التفتيش, والله بيخافوا على مكافأتهم وترقياتهم وخصوصآ ان كلنا متعلمين ولسنا جهله أو سوابق.

هو معظمنا و أنا واحد منهم ما عندوش خلفية بالقانون و محترم زيادة شوية و مابيعرفش يتعامل مع الأشكال النصابة دى