الى أين ذاهب يا أهلى!!

[NoRmAl]

السلام عليكم

بجد أنا أتحرق دمى النهارده
والاهلى مستواه بينزل مش بيطلع
والاخطاء الفرديه لما تزيد يبقى دى لعيبه متلعبش فى فريق كبير
عمالين نخسر فى نقط لغايه ما الزمالك هيجبنا و ساعتها مش هنترحم من القطر الى مش شايف حاجه قدامه ده
بجد لازم يتصرفوا بدل ما الواحد نازل شتيمه فى العيبه على حسام البدرى
ومش قادر أستوعب ليه حارس مرمى بيلعب نص موسم كامل
أجى أشيله وأحط واحد غيره
ويقلك مش عارف أصل أحمد عادل عبد المنعم عنده شد فى ودانه
ايه القرف دا
أهو الى حصل دا يدل على أنها بزرميت ولا حد فاهم حاجه
ولو خسرنا الدورى السنادى مش مسمحك يا بدرى على حوار أكرامى دا
ومش عشان نزلنا أتنين شباب جابو جونين يفترى بقى
أنا طهقت

[karim fathy]

كلامك 10/10 بخصوص اكرامى والشباب انا معاة انى يدفع بالشباب بس مش على طول يعنى مش كل ماتش ينزلهم وبعدين البدرى خرب الماتش لما خرج سيد معوض و احمد شكرى لانة كانو اكتر اتنين فايقين فى الماتش وبرضو غلط لما طلع متعب ومش عارف اكرامى دة اية لزمتة اصلا انا مش مقتنع بية كحارس مرمى يحرس الاهلى والله احمد عادل احسن منة ب 100000000 مرة
يا شماتة الزمالكوية فينا دلوقتى

[mahmoud_magdy]

واحد زملكاوي ......
اقدر اقول ان ابتدى عصر الكبوات للأهلي ؟؟ (مجرد سؤال)
بهزر
الكوره مكسب وخساره والاهلي مش لازم يكسب اي ماتش يقابله
ومتنسوش ان دي ضريبة لعيبه شباب في الملعب

[MohaMed_Refaat]

واحد زملكاوي ......
اقدر اقول ان ابتدى عصر الكبوات للأهلي ؟؟ (مجرد سؤال)
بهزر
الكوره مكسب وخساره والاهلي مش لازم يكسب اي ماتش يقابله
ومتنسوش ان دي ضريبة لعيبه شباب في الملعب

+111111111111111111

[Terrible_DaRsH]

سبحان الله !

ده افضل موسم لعبه الاهلى من 5 سنين اساسا .

احمد عادل كان حل مؤقت لغاية لما يتعاقدوا مع حارس اساسي , و زى ما شفتوا مستواه كان زبالة ده انا بصد احسن منه ..

شريف اكرامى النهارده كان عنده حماس زيادة عن اللزوم خلاه زى الزفت بس هيتظبط و دائما احسن حارس مرمي فى افريقيا بيبقي من الاهلى فشريف اكرامى هيثبت نفسه .

حسام البدرى بيلاعب لاعيبة اول مرة نسمع عنهم و بيكسب بيهم , الشوط الاول النهارده كان افضل شوط ممكن تشوفه , تجانس فظيع بين اللاعيبة و تقسيم و لعب جماعى محصلش و هدفين دون مقابل يبقي ازاى الاهلى بيسقط !!

حسام البدرى دافع الشوط التانى و للاسف الفريق كان نازل من اول الماتش هجوم و اسلوب هجومى فمحدش تأقلم مع الاسلوب الدفاعى و غلطة شريف اكرامى اهدت نقطتين لطلائع الجيش ..

الاهلى بيتجدد و لازم يقع منه نقاط و ده شيء عادى جدا و ان شاء الله هناخد الدورى , و لكن الاهلى الحقيقى شوفوه السنة الجاية بعد ما يجنى ثمار الشباب اللى بتزيد خبرة اللى لولا حسام البدرى كان زماننا مشوفناش واحد منهم ..

[wkisho2005]

انا زملكاوي
كنت بتفرج علي الشوط الاول وخلص 2 صفر فقدت الامل في الماتش وقمت خرجت لان طول عمر الاهلي(او انا مقتنع بكدا يعني)لو جاب اجوان هو الاول يبقي بنسبة 90 في المية الماتش خلص لو الفرقة اللي اصاده جابت الاول يبقي لسة في كلام
لكن عد ماعرفت النتيجة والماتش خلصان كدا يبقي في حاجة غلط في الاهلي يعني اخر اربع ماتشات 2تعادل وهزيمة ومكسب واحد ودا مش رتم الاهلي ابدا

[bmya]

مش قوي كده ياباشا
انت مشوفتش لعبهم الشوط الاول بجد كنت حاسس انه فريق من الفرق الكبيره بتاعت بره
التقسيم والباصات والكوره عارفه هي رايحه فين ولمين كان شوط ملوش حل
وسبحان الله كنت لسه بشتم في متعب لقيته بيجيب جون وانا قلت هيضيعها كالعاده بس جاب الجونين
مش عارف بقه اليه اللي حصل الشوط التاني هرتله وتغيرات واللعيبه نامت
بس خير الاهلي برده حديد

[M.Mosaad]

الاهلي فعلا لعب حلو اوي امبارح بس التوفيق مكانش معاه

احمد عادل كان ماشي كويس كان المفروض يستني شوية علي شريف علشان ميحسش انه جاي انقاذ للفريق يعني يجتهد في التدريبات و يتعذب لحد ما ياخد فرصته

و حسام البدري يمكن دة اقل ماتش عمله مع الاهلي لان تغييراته مكنتش حلوة كان فيها استهتار شوية يعني مكنش لية لازمه عفروتو و لا ابوتريكه بصراحه خالص امبارح

المشكله ان كل المواقع عماله تقطع في الاهلي و لو كان كسب كان كله قعد يتغزل في حسام البدري و طريقه تدريبه

و اخيرا احنا الدوري السنه دي كنا متوقعين انه يضيع لان الاهلي بيبني فريق جديد بس الفريق كان ماشي كويس فياريت نصبر شوية لان الفريق فعلا في مرحله نجديد و انشاء الله لما احمد شكري و عفروتو و الناس الجديدة تثبت رجلها هتشوفوا اداء تاني .

[OlaOsman]

يا جماعة الصبر على إكرامي، ده أول ماتش يلعبه مع الأهلي، و شكله كان عنده شوية رهبة.. مش عايزين ندبحه زي ما ما حصل مع أمير عبد الحميد و نضغط عليه و نضيع ثقته بنفسه.

[M.ABDEEN]

انا زملكاوي بس فعلا مش ده الاهلي بتاع زمان مفيش روح وغلطات بالهبل ولاعيبه مستواها في النازل ولا تعليق طبعا على حراسة المرمى ؟؟؟؟؟؟؟

[Eslam_moustafa]

غلطة حسام البدري انه طلع سيد و شكري و قتل الناحية الشمال بعد ما كانت مصدر قوة في الشوط الاول و حتى عفروتو لما دخل كان وحش و تقريبا ملعبش ولا تمريرة صح عشان ملعبش في مكانه متجنح دة كان بيلعب في النص تحت المهاجمين و غير كدة كان دخل في جو شدة اعصاب و برده بخروج متعب كدة ماتت الفعالية الهجومية تماما و كان شبه متوقع اللي حصل دة.

[zaza_lanos]

ما طار طير وارتفاع
حتى كما طار وقع

ويارب دائماً

[Abo_Lina]

مقعد المدير الفني للأهلي كبير على البدري
دي الخلاصة ..
فرق كبير بين إنك تبقى رقم 2 لمدرب زي جوزيه و إنك تبقى مدرب مسؤول عن كل حاجة

[Hossam_Hassan]

اللى عاجبنى ان الدورى سخن و الماتشات ليها طعم غير الأول عند كل الفرق، مش مهم مين يكسب، المهم نستمتع بلعب حلو.

[cheetos_892005]

يا جدعان هو الاهلي كده من يوم ما وعيت عالكوره يتصدر و يشد حيله في الاول
وبعديها لازم ياخد درس قاسي شويتين
و ينتفض بعديها و حدش يقف قصاده
الخلاصه هو موضوع غرور و بيركب اللعيبه
و شبع من البطولات و زهق
اه الزمالك شد حيله دلوقتي و ابتدي يفوق
بس علي مين ده الزمالك كلها ماتشين و هيرجع الله اعلم
بس مشكله الزمالك انه طالع كل الماتشات الصعبه بره
الحرس و الاسماعيلي و المصري و بيتروجيت ..........
و في حاجه بس احب الناس تفهمها الانديه مبقتش زي زمان
زمان كنا بنتفرج عشان نعرف الاهلي و الزمالك هيكسبوا كام
دلوقتي كله شد حيلو جامد
و بقي صعب انك تكسب اكتر من فرق جون او جونين ده لو كسبت
عشان كده قدرنا نعمل منتخب قوي مكون من كل انديه الدوري مش اهلي و زمالك بس
متخافوش ان شاء الله الدوري للاهلي بس نكون استوعبنا الدرس و صحينا
البدري بيبني فريق قوي و محترم و لو تلاحظوا انو بيقعد الكبار بالراحه وواحده واحده