رايح دبي في رحلة عمل .... حد يعرف حاجة عن دبي ؟

[amrbakly]

مساء الفل يا شباب

انا مسافر دبي بعد 10 أيام في رحلة عمل

مفترض ان حقعد هناك 4 أيام و حبقي تقريبا كل يوم من العصر فاضي، و بصراحة الرحلة دية جايالي كتغيير مهم في حياتي بعد حالة إكتئاب شديدة فعايز احاول اخرج من مود الإكتئاب و خاصة اني مسافر لوحدي

يتعمل فيها اية دبي و يتجاب منها اية ؟ لأني معرفش اي حد في دبي ولا حد من صحابي سبق له السفر لها

لما لعبت شوية علي النت لاقيتها تقريبا أغلي من مصر في الإلكترونيات و إن بعض الناس بتقولي ان الموبايلات المستعملة هناك ممتازة و بتبقي جديدة تقريبا (أكيد مش حعمل زي النائب المحترم اللي حاول يهرب 500 تليفون)

كمان أنا من هواة الشوبينج و خاصة بعد ما أسعار الهدوم في مصر بقت استعباط مؤخرا، فين بقي الأماكن اللي بيبقي فيها تخفيضات و اسعارها كويسة

كمان اية المناطق اللي ممكن يتخرج فيها غير المزارات الأساسية زي برج دبي الكوكبي دة و المترو المرعب بتاعهم و الحاجات الغريبة دية

بإختصار عايز استغل السفرية دية في الخروج من الملل بأقصي طاقة ممكنة

[rockana9112007]

ياباشا احب اهنيك واطمنك ...انتا هتنبسط هناك يعنى هتنبسط
وهتكرة اليوم اللى رجعت فية مصر
انا الحقيقة مروحتهاش شخصياااا بس عمتى الله يرحمهااا كانت مقيمة ومعاها كمان الجنسية وابويااا راح قعد فيهااا فترة وبعض اشخاص من العيلة ومحدش مبيحكيش عليهااا وعلى جمال البلد

نصحتى ليك go with the flow يعنى لما تكون هناك اتعامل وصدقنى مش هتغلب بس اوعى تقعد فى الاوتيل هتندم كتير
وبالنسبة للاسعار البلد غالية فعلااااااااا عشان كلهااا اجانب وسياحية من الدرجة الاولى دة اللى اعرفة
وبالنسبة للموبايلات كلامك صح فعلاااا وحتى الموبايلات الجديدة هتلاقى حاجات مبنشوفهاش فى مصر

[Hossam_Hassan]

مبدئيا اشترى دراهم من هنا، هتخسر لو اشتريت هناك سواء بالجنيه او الدولار و لو فضل معاك حاجة غيرهم هنا برضوا.

[akramlail]

ابوس ايدك ادعيلنا وانت هنااااك ربنا يكتبهالنا يارب
وترجعلنا بالسلامة

[ehabradwan]

بص يا باشا
موبايلات يعني سوق نايف هتلاقي كل حاجة بمعنى الكلمة وزي مانت قلت المستعمل احسنلك لان الجديد تقريبا واحد بس اعتقد باردو هناك ارخص شويتين
الهدوم ماتشيلش هم تشتري منين خش اي هايبر جنب الفندق بتاعك وهتلاقي حاجات هتعجبك و اسعارها تحفة . انا جبت بنطلون من هناك قعد معايا حوالي اربع سنين ماتخدش ... بجد اربع سنين مش بهزر
طبعا ده لو مش فارق معاك الماركة . انما لو عايز ماركة روح كارفور هتلاقي محلات كتير جدا ماركات هناك و ربنا يوفقك و تروح وترجع بالسلامة ان شاء الله

[Karim_Monir]

في منتدى اسمه ترافلز اراب دور علية وهاتعرف كل المعلومات الي انت عايزها
مش عارف عايز تشتري ايه المولات تحفة هناك مش عارف انت عايز في حدود كام بس مول ديرة من ارخص المولات
التنقل غاللي والتاكسيات غالية جدا
الالكترونيات هناك مش غالية زي ما بتقول وكان في حاجات لقط كتير جبتها من هناك
الموبايلات المستعملة هناك كتير في سوق نايف بس الخم اكتر خد بالك
كنت بشوفهم بيلزقو الاستيكر بتاع ميد ان فنلندا بتاع نوكيا ب 10 درهم
كماليات السيارت في شارع مصلى زي دمشق هنا بس جبار والفصال فيه عالي جدا
بالتوفيق ورحلة سعيدة
لو معاك جي بي اس في موبايلاك زل الخريطة بتاعت دبي هاينفعك قوي لانها حديثة جدا هناك ومغطية كل الشوارع

[ahmedfd]

متخليش الشوبنج هوا الأساس لإني شايف إن ميزة السعر مبقتش موجودة زي زمان... إستمتع بدبي نفسها..
أهم حاجة علشان متندمش بعد كدة تروح مول دبي و تخش الأكواريم و تشوف نافورة دبي الراقصة.. وهم من هنا لحد بكرة و كمان هتشوف جنب المول على الجانب الآخر من النافورة برج خليفة الجديد أعلى برج في العالم. دي كدة الخروجة الأساسية اللي إن شاء الله متفوتهاش.
بعد كدة في Mall of the Emirates و برجمان مول و سيتي سنتر بس مول دبي غطى على كل ده.
لو ربنا بقى سهلك و إتبقى معاك قرشين زيادة ممكن تضرب بلنص على أتلانتس و في أكواريم هناك برضه.. أنا مرحتش أتلانتس بس أسمع عنها كلام جامد جداً.

و ربنا يوفقك في رحلتك و ترجع بخير و سلامة إن شاء الله.

[Ahmed Selim]

في منتدى اسمه ترافلز اراب دور علية وهاتعرف كل المعلومات الي انت عايزها
مش عارف عايز تشتري ايه المولات تحفة هناك مش عارف انت عايز في حدود كام بس مول ديرة من ارخص المولات
التنقل غاللي والتاكسيات غالية جدا
الالكترونيات هناك مش غالية زي ما بتقول وكان في حاجات لقط كتير جبتها من هناك
الموبايلات المستعملة هناك كتير في سوق نايف بس الخم اكتر خد بالك
كنت بشوفهم بيلزقو الاستيكر بتاع ميد ان فنلندا بتاع نوكيا ب 10 درهم
كماليات السيارت في شارع مصلى زي دمشق هنا بس جبار والفصال فيه عالي جدا
بالتوفيق ورحلة سعيدة
لو معاك جي بي اس في موبايلاك زل الخريطة بتاعت دبي هاينفعك قوي لانها حديثة جدا هناك ومغطية كل الشوارع

يعنى يبقى عيب عليك تنصحة يروح منتدى تانى...........خصوصاً أنك رحت دبى قبل كده

متخليش الشوبنج هوا الأساس لإني شايف إن ميزة السعر مبقتش موجودة زي زمان... إستمتع بدبي نفسها..
أهم حاجة علشان متندمش بعد كدة تروح مول دبي و تخش الأكواريم و تشوف نافورة دبي الراقصة.. وهم من هنا لحد بكرة و كمان هتشوف جنب المول على الجانب الآخر من النافورة برج خليفة الجديد أعلى برج في العالم. دي كدة الخروجة الأساسية اللي إن شاء الله متفوتهاش.
بعد كدة في Mall of the Emirates و برجمان مول و سيتي سنتر بس مول دبي غطى على كل ده.
لو ربنا بقى سهلك و إتبقى معاك قرشين زيادة ممكن تضرب بلنص على أتلانتس و في أكواريم هناك برضه.. أنا مرحتش أتلانتس بس أسمع عنها كلام جامد جداً.

و ربنا يوفقك في رحلتك و ترجع بخير و سلامة إن شاء الله.

فعلاً المولين دول أهم 2 لازم تروحهم
Dubai Mall و Mall of the Emirates ( أو أختصاراً Emirates mall )
المترو العجيب متحطش أمل عليه لأنه لسه شغال قريب و شغال لمسافة 7 محطات بس
طبعاً أتلانتس ده مينفعش مترحهوش.............فندق و مول وهميييييييييييييييييين من هنا لبعد بكرة............بس هو بعيد شوية عن باقى الدنيا و طبعاً متحلمش أنك تشترى حاجة من هناك..........تتفرج بس

التاكسيات غالية شوية فعلاً......أعتقد فتح العداد على 3.5 درهم أن مكنش أكتر.....و فى مشوار 10 كم و بفرض ان الطريق ماشى هتلاقى نفسك دافع حوالى 30 درهم

سعر الدولار هنا 3.65 أحسبها أنت بقى أذا كان أحسن تشترى دولارات من مصر ولا دراهم

الهدوم هتلاقى كل اللى أنت عاوزه فيه الرخيص و معقول H&M و Max
و طبعاً فى كل البراندات اللى فى العالم من quicksilver الى burberry
و فيه ماركات تانية برضه كويسة و معقولة شوية زى Giordano و Bosini

الألكترونيات فى حاجات غالية و حاجات أرخص من مصر بكتير
يعنى لو عاوز تشترى بلاك بيرى مثلاً أحسن أشتريه من مصر
لو عاوز نوكيا هتلاقى أرخص من مصر شوية
لو عينك على ألكترونيات تانية حاول تحدد نوعها أيه
يعنى أنا مثلاً من فترة قليلة جبت لاب توب ديل من مصر ب 4000 جم لقيته هنا بحوالى 3600 جم يعنى فرق 400 جنيه.....بس فى مصر من غير نسخة ويندوز و هنا بنسخة ويندوز

فى برضه مول أسمه dragon mall فى دبى و ده سوق صينى فى طبعاً كل ما لذ و طاب من الحاجات الصينى المضروبة من الأيفون الصينى الى الأيبود الى gps الى لبس مضروب

و فى حاجات بتبقى زى الأصلى تماماً أو Copy original زى ما بيقولو و خصوصاً من الشنط الحريمى و المحافظ و تيشرتات الأندية و الكابات و خلافه.

أبقى قولى أنت جاى أمتى و أنا هحاول أظبط ظروفى و نتقابل بس ربنا يسهل لأنى لسه واصل من 3 أسابيع و لسه مش معايا رخصة.....ده غير أنى قاعد فى أمارة تانية تبعد عن دبى 80 كم

[Ahmed Selim]

نسيت أقولك أن Emirates Mall فيه قاعة تزحلق على الجليد عملاقة


لو عاوز تسأل على اى حاجة تانى قول

[hobiko]

بص دبي من أحلى البلدان العربية

مدام حتبقى فاضي من العصر جهز شنطة فيها مايوه و اطلع على ويلد وادي دة من أحلى الملاهي المائية في الشرق الأوسط و حيخليك تغير جو جامد

عايز shopping حلو يبقى الديرة سيتي سنتر و بلاش دراجون مول إلى لو غاوي الصيني

إلي الخروج فيها ظريف جداً دبي فستيفال سيتي جزء open air و جزء محلات و shopping

طبعاً emirates mall لازم يتراح بس مش حتعرف تشتري منو اسعاره غالية شوية

في mall كمان تحفة اسمو إبن بطوطة مول دة قريب أوي من emirates mall متقسم على شكل البلاد إلي زارها إبن بطوطة بديكورات مختلفة حسب ستيل و طابع كل بلد تحفففة

حاول في اللبس دايماً تشتري brand name فيه محل إسمه ماكس ممكن تدخل تشتري ٣٠ ت شيرت و ٢٠ بنطلون ب-٣٠٠ درهم مثلاً بلاش دة

محل تاني إسمه سبلاش مستواه أعلى شوية

لما تلاقي محلات تمبرلاند أو اديداس أو نيكي أو تومي أو لا كوست أدخل اشتري على طول أكيد أكيد أرخص من مصر

[yasserelsayad]

ايوة فعلا اللبس هناك احسن و ارخص من مصر والموبيلات ارخص باردوا من مصر بس بفروق بسيطة يعنى 200 او 300 جنيه بس كمان حسب المكان اللى هتشترى منه .. انا اشتريت n95 من منطقة اسمها الحمرا كان ارخص من مصر ب700 جنيه فعشان كدا بتكون حسب المنطقة
فى بقى Ski Dubai اللى الاعضاء قالوا عليها اللى هى مدينة التزحلق على الجليد دى تحفة بس غالية شوية يعنى ممكن تكلفك عشان تدخلها 400 جنيه مثلا بس هتنبسط جامد يعنى.
الgps هناك شغال تمام اوى و سريع كمان يعنى انا لما كنت ببقى ماشى فى مكان مش عارفه ومثلا عايز اكل كنت بدور على المطاعم فى الgps وكان بيطلعلى معظم الحاجات اللى فى الشارع اللى انا فيه والشوارع المجاورة.
التاكسى هناك غالى جدا خصوصا فى الزحمة يعنى لو مشوار طويل شوية ممكن تدفعلك 100 جنيه مثلا.
وخالى بالك فى الشوبينج عشان الموضوع ممكن يفتح منك عشان فى هناك حاجات ممكن تكون مشوفتهاش فى مصر قبل كدا.
واتمنالك رحلة سعيدة ان شاء الله.