اتسرقت قبل كدة !!!

[Mohamed.Ramah]

الموضوع لية علاقة بينا احنا مش بعربياتنا يعنى افتراضا حد اتثبت فى الشارع اتسرق منة شخصيا فلوس موبايل محفظة كلها بتهديد مثلا او اتنشلت فى المواصلات العامة ميكروباص مترو اتوبيس توك توك ههههههه سواء كبير صغير او من فترة كبيرة او قليلة والموضوع ليس لة علاقة بالعربيات

[Mostafa.Mahran]

الحمد لله لا

[waelfarid]

ايوة اتنشلت في قطار زحمة موت وبعد فترة الحمد لله عرفت اجيب المحفظة والمشكلة كانت في البطاقة لو استخدمها حد استخدام سيء المهم حاولت اعمل محضر في القسم قالو لي روح طلع غيرها والله ناس محترمة بجد وكنت من أوائل الناس اللي طلعت بطاقة رقم قومي في مكان عملي وطلعتها من القاهرة والكلام ده من عشر سنين تقريبا وربنا يسترها مع الجميع

[Ralliart]

اتثبت مرتين مرره بمطوه ومره بموس والحمد لله طلعت سليم ومن غير ما اتقلب في حاجه
وكان الفضل بعد ربنا اني مبينتش اني خايف وفهمته اني بايع (كنت لسه شاري موبايل جديد مكملش يوم) ومش هطلع حاجه والحرامي اساساً بيبقى في قمة الرعب فلما يلاقيك واثق من نفسك هيسيبك ويدور على حد غيرك لان الخوافين ماليين البلد بس دا ميمنعش ان فيه حراميه بايعين بس الحمد لله مقابلتهمش

[هيثم]

مش فاكر الحقيقه

[magyver]

اتثبت مرتين مرره بمطوه ومره بموس والحمد لله طلعت سليم ومن غير ما اتقلب في حاجه
وكان الفضل بعد ربنا اني مبينتش اني خايف وفهمته اني بايع (كنت لسه شاري موبايل جديد مكملش يوم) ومش هطلع حاجه والحرامي اساساً بيبقى في قمة الرعب فلما يلاقيك واثق من نفسك هيسيبك ويدور على حد غيرك لان الخوافين ماليين البلد بس دا ميمنعش ان فيه حراميه بايعين بس الحمد لله مقابلتهمش

دة حراامي خوااف قوي
طيب ماتقلنا قلك اية وقلتلوا اية

[mahmoodallam]

محفظتي اتسرقت قبل كده والحرامي رجعهالي علشان كنت كاتب عليها رقم التليفون بس بعد نشل ال 220جنيه اللي كانو فيها !!!!!!!!!
ولسه الاستبن مسروق من شنطة العربية الاسبوع اللي فات !!!

[Xander2010_Evo]

إتسرق مني mp3 قبل كده
باقي معايا بس سماعاته

[Mohamed.Ramah]

انا بقى اتسرق منى موبيلى وانا كنت فى اعدادى وندمت جدااااااا لما اتسرق ومن ساعتها كل اما افتكر دمى يتحرق

[bmya]

انا حصلي موقف زي الفل
كنت مره راكب المترو من محطه فيصل ورايح الشغل الصبح وطبعا زحمه جدااا مدارس وموظفين وجامعه
المهم انا دايما بحوط معايا فلوس فكه في جيب القميص مثلا بدل ما كل شويه اطلع المحفظه وكده وكان معايا 5 جنيه فكه حاططها في جيب القميص وحاسبت منها على التزكره بتاعت امترو
وركبت المترو وكان في واد كده شكله مريب شويه واقف ورايا وحاطط ايديه الاتنين في جيبه ولابس نظاره شمس جوه المترو وباصص في السقف وعمال يتلفت يمين وشمال
المهم ضربت في دماغي فجأه اطمن على المحفظه في جيب البنطلون الخلفي واذ اتفاجأ انها مش موجوده ..
طبعا الدنيا لفت بيه ده فيها كل الورق بتاعي بغض النظر عن الفلوس
يعني كان فيها البطاقه ورخصه القياده ورخصه العربيه وكمان كارنيه الشغل اللي مش هعرف ادخل من غييره كمان
المهم بصيت ورايا لقيت على يمين راجل كبير وشكله محترم وعلى شمالي الواد الامور ابو نظاره شمس طبعا قلت اكيد ابو نظاره شمس خصوصا ان انا كنت متنحله وده ولا هو هنا وعامل فيه عبدو العبيط وباصص في السقف وايده الاتني في جيوبه وعمال يتلفت ومش معبرني خالص
المهم الدم ضرب في نافووخي وروحت قايله وش
كابتييييييييييين انت مغلطتش وحطيت ايدك في جيبي ؟!!
قالي نعم ..
قلتله منن الاخر مختش المحفظه بتاعتي ؟
الواد طبعا اتجنن وقالي انت بتقول ايه ياعم انت قلتلته مهو من الاخر المحفظه كانت في جيبي اللي وره وانا راكب بيها المترو ومتأكد انها كانت معايا قبل مركب المترو ومفيش غيرك واقف ورايا من ساعت مركبت وانا مش مرتحالك
قالي ياعم اتكلم على قدك ومش عارف ايه
قلتله طيب طلع ايدك من جيبك وريني كده
قالي مش مطلع
قلتله يبقى انت يا أمور اللي اخدتها
طبعا الناس اتلميت اكتر مهوما ملموين وفيه ايه وخير يبني وايه اللي حصل
روحت حكيلهم الحكايه
طبعا كله تتطوع بالتدوير واللي بنده بعلو صوته محدش لقه محفظه يا خوانااااا
وانا ماسك في الواد عمال احنطر معه عشان يطلع ايده من جيبه وهو مش راضي
المهم واحد تتطوع في الزحمه وقالي ماجايز يا استاذ نسيتها في البيت
طبعا رديت بكل شجاعه واصرار لا دي كانت معايا وانا راكب المترو بها
المهم اقنعوني اني اتصل اشوفها في البيت وانا اصلا هتجنن لاني خايف المترو يوصل المحطه والناس تنزل وابقه خلاص كده فرطت مني
المهم طعا اتصلت على صحبي اللي قاعد معايا في الشقه وطبعا كان ميت قصدي نايم لان شغله كان شفت ليلي كان شغال في المطار وفين على ما رد عليه وقعدت اقنعه ان انا شريف اللي معه في الشقه مش واحد بيعاكس ههههههههههه
وقالي طيب هدورلك عليها
قعد يدور وبعدين كلمني والمترو يدوب بيقف في المحطه وانا كنت خلاص ايدي على قلبي وهتجنن وانا واقف
وقعد يتاوب شويه وبعدين قالي لقيتها تحت السريررررررر
هههههههههههههههههههههههههههههههههه
طبعا انا قالي كده وكل الناس بقه واقفه معايا وكله باصص لي عشان يطمن عليه ههههههههههه
وانا مش عارف ارود اقول ايه
المهم روحت قايله بصوت عالي طيب يا محمد خلاص اشكر لنا عم عبدو قوي قوي وقولوا ليك الحلاوه لما ارجع من الشغل كويس ان عم عبدو اللي لقاها مش واحد غريب
وطبعا صحبي مش فاهم انا بقول ايه اصلااا ومين عم عبدو ده اصلا وروحت قافل مع صحبي
وكله بقه هااااااااااااا لقيتها يا استاذ ؟
قلتلهم اه اصلها وقعت مني يظهر قدام المترو وعم عبدو لقاها وجابها على البيت
وطبعا بصيت للأمور ابونظاره شمس وقلتله معلش يبو الكباتن حصل خيرر وهوب روحت ناطط وتوهت في زحمه المحطه ويا فاكيييييييك قبل ما حد يتهور من الركاب عليه
وطبعا روحت الشغلل معرفتش ادخل لاني مش معايا الكارنيه ولا البطاقه حتى عشان ادخل زائر ولا اي حاجه وخته اجازه ولفيت ورجعت تاني واخدت اليوم نوووم ونا واخد المحفظه في حضني

بس استفدت حاجه جميله من الموقف

اني معونتش اسيب المحفطه في جيب البطلون ابداااااااااااا
يعني بقيت قبل مركب اي مواصله زحمه مترو او اتوبيش او قطر
بشيل المحفظه من جيبي اللي وره واحوطها في جيبي اللي قدااامي
ههههههههههههه
بس ده الموقف اللي انا عمري منساه

[mr_sameh]

الحمد لله لا

[pro_samir]

مرة كنت مسافر مكانش معايا عربية ومفيش مواصلات فا ركبت القطر القشاش دة كان الساعة 11 بالليل تقريبا والقطر شبة فاضي ، وحاطط جنبي هارد في الجراب بتاعة وفوقية الموبيل و ورايا علي طول باب القطر ، وفي حتة في الطريق القطر هدي حاجة بسيطة بس ماشي عادي ومرة واحدة لقيت واحد راح جاي جري من ورايا خطف الموبيل ونط من القطر وهو ماشي في وسط الغيطان ! انا قمت جري لفيت وراة طبعا بس علي ما وصلت للباب كان هو نط وخلاص علي كدة


المرة التانية كنت في الموقف ومفيش عربيات وزحمة جدا جدا وعربية دخلت الموقف ، في الحالات اللي زي دي كل اللي تعملة انك تروح ناحية العربية و بقوة الدفع هتلاقي الناس شالتك وركبتك العربية ، ودة اللي حصل دخلت في وسط الناس وزنقة رهيبة طبعا وحسيت بحاجة في جيبي اللي ورا ، انا عادة بحط البطاقة و الرخصة في جراب فقط في الجيب الخلفي مبشيلش محفظة أصلا ، المهم حطيت ايدي علي جيبي ملاقيتهمش فا رفعت ايدي ورا ضهري بشوية كدة راح الحرامي حاططلي البطاقة في ايدي ههههههههههههههههه ، انا اصلا من الزنقة مكنتش عارف ابص ورايا حتي

[Khaled_Nowaihy]

كنا بنتغذى مره فى بتزا هت أنا والمدام والأولاد ... وكنا عاوزين نجيب دواء لابنتى .. فأنا قلت لزوجتى روحوا انتم اعملوا طبق السلطات على ما اروح اجيب الدواء من أى اجزخانة قريبة وسألت الجرسون عن اقرب صيدلية لقيت شاب قاعد فى الترابيزة اللى جنبى بيقول لى : فيه واحدة حضرتك فى الشارع ده ... طبعاً الولد لابس كويس وراسم نفسه زى ما يكون طالب محترم مثلاً
زوجتى علقت شنطتها فى مسند الكرسى بتاعها ,,, وللحظ الغريب الولد كان قاعد فى الكرسى اللى وراه
المهم روحت الصيدلية ورجعت لقيت زوجتى والاولاد لسه فى بوفيه السلطات ولما جيت اقعد لقيت شنطتها مفتوحة وهى متعلقة على مسند الكرسى.... ناديت عليها وجت بصت لقت المحفظة بتاعتها اختفت ...
العمال اخدوا بالهم .. وقلت لهم احنا اتسرقنا عندكم هنا .... وكان فيه عامل واقف قريب من الكرسى واتجهت الانظار والظنون اليه انه هو اللى سرقها "طبعاً أقرب واحد لمسرح الجريمة!!!" الولد انكر وزمايله دافعوا عنه واقتنعنا فعلاً أنه مش هو.
وبعدين افتكرت الولد اللى كان جالس فى الترابيزة اللى جنبنا ,, قلت لهم كان فيه شاب قاعد فى الترابيزة اللى جنبنا ... هو فين ؟ قالوا لى دا كان منتظر ناس ييجوا يقعدوا معاه ...وماجوش ومشى فتأكدنا انه هو.
العمال ماكدبوش خبر وخرجوا معايا بسرعة على المطعم المقابل ليه (تقريباُ كان تكا) وسألوا الجرسونات اذا كانوا شافوا الولد ده قالوا لنا فعلاً هو دخل عندنا وقعد يلف بين الترابيزات وخرج على طول ,,, وان شكله ما ريحهمش .... خرجنا وقعدنا نجرى فى المربع حول المطعم لعل وعسى نلاقيه لكن هيهـــــــــــــــــــات
المهم رجعنا المطعم وادارة المطعم مشكورين رفضوا بشدة ان ادفع فاتورة الحساب ,,, والحمد لله المحفظة كان فيها 200 جنيه فقط وكانت المشكلة فى الأوراق والكارنيهات اللى ضاعت.

وطبعا اتعلمنا من الموقف ده ما نسيبش حاجاتنا على الترابيزات واحنا فى المطعم ونروح التواليت مثلاً ... لازم حد يقعد ياخد باله منها

[Khaled_Nowaihy]

المرة التانية كنت في الموقف ومفيش عربيات وزحمة جدا جدا وعربية دخلت الموقف ، في الحالات اللي زي دي كل اللي تعملة انك تروح ناحية العربية و بقوة الدفع هتلاقي الناس شالتك وركبتك العربية ، ودة اللي حصل دخلت في وسط الناس وزنقة رهيبة طبعا وحسيت بحاجة في جيبي اللي ورا ، انا عادة بحط البطاقة و الرخصة في جراب فقط في الجيب الخلفي مبشيلش محفظة أصلا ، المهم حطيت ايدي علي جيبي ملاقيتهمش فا رفعت ايدي ورا ضهري بشوية كدة راح الحرامي حاططلي البطاقة في ايدي ههههههههههههههههه ، انا اصلا من الزنقة مكنتش عارف ابص ورايا حتي

ودى كمان حصلت لى انا كمان ... بس الفرق انى لم اشعر بأى شئ ... لما قعدت فى المكروباس لقيت الجيب الخلفى للبنطلون مشروط بالموس وفاضى طبعاً

لغاية دلوقت مش قادر اتخيل الاستاذ الدكتور الجراح ازاى شق الجيب البنطلون الجينز بالمهارة دة من غير ............. بنج !!!!!

[mohamedbook]

اكيد في البلد دية مفيش حد متسرقش
وعيني عينك
بكل بجاحة والته ادب