المراتب الجاهزة

[D . a .\ AYMAN]

على مدى 20 سنة تجارب شخصية مع عدة مراتب ... في الأول وأنا صغير كان طبعا زي كل البيوت في مصر المراتب اللى عندنا كلها قطن وكنت بنزل أنام على الأرض أريح لي من النوم عليها (برغم إن تقريبا كانت بتتنجد كل سنة) لكن كلها شهر وترجع عبارة عن صخر مليئ بالتضاريس (ومع تجربة أغلى أنواع القطن المصري وأرخصها في كل مرة)

وبعد كدة والدتي غيرت كل حاجة بمراتب جاهزة من تاكي (ماكانش في غيره في مصر ساعتها) سوست وإسفنج مضغوط ... وطبعا الفرق إني إبتديت أعرف أنام أخيرا

بالنسبة للعمر بقى تاكي السوست دلوقتي حالتها وحشة والسوست بتاعتها بقت بايظة الى حد ما (بس بصراحة كنت بعاملها معاملة غير آدمية على الإطلاق ... كنت باحطها على الأرض وفوقيها واحدة كمان وأتنطط عليهم من إرتفاعات بتوصل لـ 3 متر) لكن الأسفج مازالت بحالة جيدة جدا بعد ما يقرب من ال15 سنة فعلا (يمكن عشان أنا ماكنتش باتعامل معاه)

لما إتجوزت بقى حماتي بما إنها كانت هية المتصرف في جزئية المراتب أصرت على القطن وجابت تقريبا قطن مصري من أغلى أنواع القطن اللى هوة أساسا طويل جدا وتدوس عليه وتكبسه يرجع يتفرد ويتنفخ تاني يعني عامل زي السوست من الآخر ... لكن رجعت لمعاناتي تاني مع النوم ... المرتبة بتبقى مليانة تضاريس بطريقة غريبة وبقوم من النوم حاسس إني ماشي في الشارع وجسمي واخد شكل المرتبة لسة ..

وبعد معاناة لمدة سنتين و4 علميات إعادة تنجيد عن منجدين مختلفين وكل واحد منهم المفروض إنه معلم ومتوصي عليه بشكل غير طبيعي ... رميت القطن اللى عندي كله وروحت جايب واحدة يانسن سوست كانت وقتها بحوالي 750 جنيه مقاس 2 متر في 160 سم وماشاء الله عليها عندي أهه بقالها حوالي 7 سنوات تقريبا وزي الفل كالجديدة تماما ولم تختلف عن يوم ماجبتها وبصراحة إحترمتها عن التاكي (مع ملاحظة إن دي فئة أعلى برضه من التاكي اللى عندي لأن تاكي برضه عنده فئات عالية وجميلة جدا) وبيبقى معاها ضمان لمدة 10 سنوات

المهم إني رجعت أعرف أنام تاني

وتصبحوا على خير بقى عشان داخل أنام

[Sh_sunsea]

انا جبت مرتبة تاكي دايموند (أقوى حاجة في السوست عند تاكي) بس للأسف مش مريحة - بتغطس بالواحد كده وبتبقى الحركة فوقيها متعبة جدا - هي معايا بقالها سنة أهي

النصيحة الي هاعمل بيها قريب ان شاء الله اني أجيب مرتبة سفنج طبي من هابيتات - ويمكن أجرب ال New cotton - الي كنتم بتتكلموا عليها فوق وربنا يسهل