Heaven glucose جلوكوز السماء هل حيجيب لمصر جايزة نوبل

[Ahmed A Rahman]

Heaven glucose



الحامل الجديد اسمه (جلوكوز السماء - heaven glucose) تم بيع الاختراع لكل مستشفيات العالم تقريبا بعد ان احدث ضجة في جميع الاوساط الطبية, واثبت كفائته وادائة المتميزين




والاختراع المبهر يوفر المميزات التالية




1 – توفير درجة حرارة مناسبة للجلوكوز (نفس درجة حرارة اللمبة)




2 – التحكم في درجة حرارة الجلوكوز (اطفي لمبة وولع لمبة)




3– استخدام عجلة الجاذبية الارضية بصورة افضل (15.3 بدلا من 9.8)




4 – استخدام ظاهرة الاشعاع الحراري في افساد الجلوكوز (عشان هو كدة كدة بايظ, فلما المريض يموت ينفع يكون عندنا حجة وسبب)




5 – كما هو موضح في الصورة, اجبار المريض المسكين علي ان يكون في وضع جلوس, وهو وضع صحي افضل خصوصا في حالات الجلطة والشلل




6 – الجلوكوز اتجاهه دخول وخروج من المريض وليس دخول فقط (انظر الصورة), بواسطة الصمام العبقري الذي اسماه العلماء (تيدهوم لي نيلي نيلي, ارجعهم لك شريهان شريهان), وبذلك العبوة لا تنتهي الا بموت الضحية (اقصد المريض)




7 – اروع ما في الموضوع هو استخدام الحامل القديم المتخلف في تعليق المتعلقات الشخصية كما في الصورة (سندوتشات – كيس جوافة – الي اخره), او التبرع به للدول النامية المتخلفة التي لم تستطع شراء الاختراع




هذا ,و من المتوقع بعد هذا السبق الطبي المتفرد, ان ينتقل المختبر الرئيسي لمنظمة الصحة العالمية الي للقصر العيني ويتم تحويل مقر المنظمة ليكون في مستشفي الامراض العقلية بالعباسية




واكد كلا من منظمة الصحة العالمية والدكتور احمد زويل, ان الاختراع يعتبر نقلة كبيرة في عالم الطب, وان فرصة مصر باتت شبه مؤكدة في الحصول علي جائزة نوبل والاحتفاظ بها للابد هذه المرة




وقد قام السيد الرئيس المصري, بتكريم اعضاء هيئة البحث, ومنحهم جائزة الدولة التقديرية من الطبقة الاولي في مجال البحث العلمي, وذلك من اجل جهودهم المضنية في تحسين اوضاع الوطن, والمساهمة في تقدم البشرية, وسعيهم الدائم والمستمر لرفع اسم مصر عاليا




في الصورة حسب وصف منظمة الصحة العالمية:




السيد هريدي عبد الواحد المشرف العام علي اختبار جلوكوز السماء (يشرب حمص شام احتفالا بالانجاز الغير مسبوق) وبجوارة مريض يستخدم الجهاز وتبدو عليه علامات الفرح والبهجة الشديدين, تم التقاط الصورة قبل ان يلقي المريض مصرعه بساعات قلائل, متاثرا بانفجار مدمر في الاوردة




وقد رفض اعضاء الهيئة التصوير وذلك لانشغالهم الشديد بتطوير الاختراع الحالي الي (الجلوكوز الفضائي), والذي سيكون بمثابة قفزة كبري الي سطوح المستشفي, ولم يخبرنا اعضاء الهيئة باكثر من هذا لمنع تسرب الاختراع


منقول من ايميلي

[إبراهيم.صادق]

تصدق يا دكتور انا قريت العنوان افتكرت ان احنا وصلنا لاختراع جديد بجد ولا حاجة، وقلت اشوف فيه ايه

اتاري الموضوع انجاز علمي بصحيح :)

[Ahmed A Rahman]

ماهو انجاز طبعا حيخلينا كلنا نجيب جاز
ههههههههههههههههههه

[medo2o1o]

طب يا دكتور شفت الجلوكوز المضغوط المتحرك

ده موجود فى الدمرداش العيان من دول مش لاقى سرير يقوم حلاق الصحة (قصدى دكتور الامتياز)يديله الجلوكوز فى ايده و يوصلهوله بالكانيولا و يقوله عيش

و طبعا برضه من اكتشافات الدمرداش ان الكانيولا يمكن اعادة استخدامها و بيعها (مش عارف الشركات اللى بتقول disposable بتقول على اساس ايه)

ايضا من اكتشافات الدمرداش بس ده عندنا احنا فى عيادة الحشو بالتحديد
ان مياه suction بتاعت كل الكراسى اللى فيها كل البكتيريا اللى خلقها ربنا دخلت على coolant بتاع الكونترا(المكنة اللى بنشتغل بيها ) فى كل الكراسى و لما عرفنا اشتكينا للصيانة قالولنا محنا قولن للوكيل بتاع الكلية و هو قال سيبوها ماحنا هاننقل الكلية الجديدة و طبعا الراجل بتاع الصيانة الظريف كمل و قال مالمجارى دخلت على مية الشرب و الناس عايشة طبعا من ساعتها ما بشتغلش حشو

تانى حاجة جهاز الاشعة البانوراما بيسرب و لما طلبنا هيئة الطاقة الذرية طلع مش مترخص

واضح ان اختراعتنا هاتتواصل

[Ahmed A Rahman]

طب يا دكتور شفت الجلوكوز المضغوط المتحرك

ده موجود فى الدمرداش العيان من دول مش لاقى سرير يقوم حلاق الصحة (قصدى دكتور الامتياز)يديله الجلوكوز فى ايده و يوصلهوله بالكانيولا و يقوله عيش

هههههههههههههههههههههه لا حول ولا قوة الا بالله
فكرتني بايام الامتياز
مرة ساعت راوند النساء واحدة كان عندها نزيف بعد الولادة
بس محدش كان بيزورها وكان نسبة الهيموجلوبين بتاعتها 7 (بدل 14)
واحنا قاعدين بالليل في البلكونة كل الدكاتره بنات وولاد نتكلم على المستشفى جت تقعد معانا عشان كانت زهقانة , طبعا غلط بس خبرتنا كانت معدومة
شوية وطلبت معانا حاجه ساقعة
مخدناش بالنا من اللي قاعدة معانا وبعتناها تجيب حاجه ساقعة وكراسي عشان نقعد عليها (افتكرناها ممرضة وبتتسامر معانا)
لما اكشتفنا الموضوع ده كنا حنموت من الخوف عليها وقعدنا ندور عليها
بس شوية ولقيناها راجعه بالحاجه
مصريات يا با
و طبعا برضه من اكتشافات الدمرداش ان الكانيولا يمكن اعادة استخدامها و بيعها (مش عارف الشركات اللى بتقول disposable بتقول على اساس ايه)

الاكتشاف ده قديم على فكرة, زي قساطر البول من العيان ده للعيان ده

ايضا من اكتشافات الدمرداش بس ده عندنا احنا فى عيادة الحشو بالتحديد
ان مياه suction بتاعت كل الكراسى اللى فيها كل البكتيريا اللى خلقها ربنا دخلت على coolant بتاع الكونترا(المكنة اللى بنشتغل بيها ) فى كل الكراسى و لما عرفنا اشتكينا للصيانة قالولنا محنا قولن للوكيل بتاع الكلية و هو قال سيبوها ماحنا هاننقل الكلية الجديدة و طبعا الراجل بتاع الصيانة الظريف كمل و قال مالمجارى دخلت على مية الشرب و الناس عايشة طبعا من ساعتها ما بشتغلش حشو



تانى حاجة جهاز الاشعة البانوراما بيسرب و لما طلبنا هيئة الطاقة الذرية طلع مش مترخص


يا نهار اسود اشعاع !!!!

واضح ان اختراعتنا هاتتواصل

للأمام دائما

[Dr Ahmed]

إيه ده

إلا الكانيولا والقسطرة دول إنتم أكيد غلطانين ولا يمكن تكون ظاهرة ، يعنى لو حصلت مرة أو أتنين وخطأ وتم محاسبة المسئول إنما باعتبره مستحيل تكون قاعدة فى أى مكان فى مصر

إنما الإختراع أنا سبقت صاحبه فى إختراعه لكن فاتنى تصويره ساعتها وكنت معلق المحلول فى الشباك علشان ياخد الطراوة من الهوا اللى داخل

[Ahmed Samy]

ااااااااااااااه

شر البلية

[Karim_Mohy]

هههههههههههههه مبسوط اوي اللي بيشرب حمص ده

فعلا شر البلية ما يضحك

[Ahmed Nouh]

يا ساتر يارب

ربنا يكفينا شر مستشفيات مصر وعذرا بعض دكاتره مصر

الواحد حاسس ان الموت فجأه ارحم من الوقوع فى ايد الناس دى

[factorialx]

يا ساتر يارب

ربنا يكفينا شر مستشفيات مصر وعذرا بعض دكاتره مصر

الواحد حاسس ان الموت فجأه ارحم من الوقوع فى ايد الناس دى

+1111111111

[romeo_6887]

انا بجد مش عارف اقول ايه ... لا حول و لا قوه الا بالله ... اقروا الفاتحه علي روح مصر

[hazoom2006]

اختراعات عالميه علميه معمليه فاسده

[SeiffoZ]

تصدق شربتها فى الأول

[M.Osman]

لا فقير و لا غني عارف يتعالج في البلد دي

[abo_hosni]

إنما الإختراع أنا سبقت صاحبه فى إختراعه لكن فاتنى تصويره ساعتها وكنت معلق المحلول فى الشباك علشان ياخد الطراوة من الهوا اللى داخل

طيب طراوة على طرواة هابقى أحط المحلول في قلة جنب الشباك

أنا شفت حاجات

1- فوانيس عربيات قديمة معلقة بالسقف على قاعدة خشب لإضاءة سرير العمليات مع استخدام أوزان و روافع لإماكنية الضبط :)
2- جهاز شفط بلدي عبارة عن 2 جركن باستخدام الجاذبية يتم تبديل وضعهما كلما امتلأ الجركن السفلي
3- جوانتيات لاتكس يتم (إعادة) تعقيمها و (إعادة) تبديرها -يحط جواها بودرة يعني- لا داعي لذكر تركيب الجهاز المستخدم في التعقيم :)
4- استخدام (ماكينة حلاقة قديمة من اللي بتحط فيها موس) لأخذ رقع الجلد الرفيعة لاستخدامها في الترقيع
5- أكياس كولوستومي عبارة عن كيس بلاستيك محاط بالجزء الأعلى من علبة صفيح تم قطعها(زي لبن نيدو أو علب لبن الرضع الصناعي) و يربط على جسم المريض
6- tourniquet رباط لوقف النزف مصنوع من الكاوتش الداخلي -شنبر- لموتوسيكل مقعوطع بطريقة معينة (كاوتش العربية ما ينفعش لأنه قوي أكثر من اللازم و يزيد فرص إصابة الأعصاب)
7- خياطة الجروح بخيط سنارة صيد نايلون و تلضمه في إبرة عادية. و الخيوط مقاسات و متعلقة في بكر على الحيطة و شد و الضم هه
8- مستلزمات جراحة العظام و الوجه و الفكين من محلات الحدايد و البويات و المخارط
و غيره و غيره


الكلام ده مش في مصر يا جماعة زي ما تصورتم
الكلام ده شفته و معترف به بشروط معينة ضمن برامج إنجليزية/ألمانية للنهوض بالرعاية الطبية في المناطق الحارة بإفريقيا

يعني الصورة هنا مش سوداء قوي يعني