عايزة أبقى عادي كده يعني

[OlaOsman]

• لو عندي معاد بانزل قبل المعاد بفترة تخليني أوصل يا إما في المعاد بالظبط يا إما قبله.
• لو لقيت نفسي هاتأخر عن المعاد بلاقي نفسي باعمل المستحيل عشان ما أتأخرش و حد يستناني.
• لو عرفت ان حد مستنيني و انا متأخرة عن المعاد باحس بأحاسيس فظيعة و توتر غير طبيعي
• لما باروح المعاد متأخرة باعتذر بشدة و نشاط
• مجرد ما حد يقوللي مثلا عايز كذا بعد نص ساعة، أقوم باصة في ساعتي و احسب نص ساعة بالظبط و بعد ال 30 دقيقة الموضوع بيكون خلصان
  
• لما باكون سايقة مـــســتـــحـــيــــل أقف في وسط الشارع أكلم حد و أعطل الطريق
• مــســتــحــيــل أركن صف تاني في شارع عمومي ضيق و أخلي العربيات تمشي حارة واحدة بسببي
• موووووووووووستاااااااااااااحييييييييييييييل أمشي أدور على ركنة و انا مش مشغلة الانتظار
• لو جيت أركن و لقيت الركنة هتاخد وقت شوية و احس إني معطلة الشارع باتخلص من الموقف ده فورا بإني باطلع من المكان خالص و أخلي الشارع يمشي و بعدين أدور على ركنة تانية
• باتوتر جدا لما احس اني معطلة حد أو حد مستنيني.
• مافيش ولا مرة حصلت إني راحت علية نومة الصبح و انا مدية معاد لحد أو وانا ورايا معاد.. عالبا باصحى قبل المعاد بكتير.
  

طبعا كل ده عامل لي مشاكل مع الناس.. هو أنا آه مش باعمل مشاكل مع حد مش بيتعامل مع الأمور زيي و بافوت طبعا و أعدي.. بس انا حاساني جاية من كوكب تاني و بالاقي صعوبة في التعايش مع البرود و اللا مبالاة و المواعيد البايظة.

نفسي أبقى عادي كده يعني.. كووووووووووول

[M.Alshafie]

انا على فكره زيك يا علا فى موضوع المواعيد ده بس مش اوى كده بس بحب احترم مواعيدى جدا و بحب احترم النظام بس للاسف ساعات الواحد بيتاخر على مواعيد و بيبقى فعلا غصب عنه
بس ده بيعملى مشاكل لانى بقع مع ناس كتير جدا مش بيحترموا المواعيد فاروح انا فى ميعادى و هو ييجى بعدها بنص ساعه او اكتر فده طبعا بيعصبنى بضايق جدا من اللى مش بيحترم المواعيد و خصوصا لما ده يبقى طبع فيه
فى ناس كتير اعرفهم كده و بالرغم من كده مش بعرف اروحلهم متاخر ولازم هما اللى يتاخرو عليا و كل مره بمشكله بينى و بينهم
يا ريت و الله كلنا نحترم المواعيد و نحترم النظام زيك كده حاجات كتير اوى هتفرق ساعتها و هنبطل نقول اليوم مافهوش بركه

[Rembrandt]

اللى عندك دة مثالية مفرطة مكانها يوتوبيا افلاطون مش هنا
هنا الناس لسة بتعوم فى مية البطيخ

[M.Mosaad]

• لو عندي معاد بانزل قبل المعاد بفترة تخليني أوصل يا إما في المعاد بالظبط يا إما قبله.
• لو لقيت نفسي هاتأخر عن المعاد بلاقي نفسي باعمل المستحيل عشان ما أتأخرش و حد يستناني.
• لو عرفت ان حد مستنيني و انا متأخرة عن المعاد باحس بأحاسيس فظيعة و توتر غير طبيعي
  
  أخري ساعتك 15 دقيقه و هتستريحي من كل الحاجات دي لاني كنت كدة و كنت كل خروجة يتحرق دمي دلوقتي بقيت عادي خالص خفيت الحمد لله
  
• لما باروح المعاد متأخرة باعتذر بشدة و نشاط
  
  مش محتاجة لان محدش هياخد باله
• مجرد ما حد يقوللي مثلا عايز كذا بعد نص ساعة، أقوم باصة في ساعتي و احسب نص ساعة بالظبط و بعد ال 30 دقيقة الموضوع بيكون خلصان
  
  
  نص ساعه في عرف الناس يعني ساعتين او تلاته حسب الشخص اللي بيقولك
• لما باكون سايقة مـــســتـــحـــيــــل أقف في وسط الشارع أكلم حد و أعطل الطريق
• مــســتــحــيــل أركن صف تاني في شارع عمومي ضيق و أخلي العربيات تمشي حارة واحدة بسببي
• موووووووووووستاااااااااااااحييييييييييييييل أمشي أدور على ركنة و انا مش مشغلة الانتظار
• لو جيت أركن و لقيت الركنة هتاخد وقت شوية و احس إني معطلة الشارع باتخلص من الموقف ده فورا بإني باطلع من المكان خالص و أخلي الشارع يمشي و بعدين أدور على ركنة تانية
  دول مش لاقيلك حل فيهم
• باتوتر جدا لما احس اني معطلة حد أو حد مستنيني.
• مافيش ولا مرة حصلت إني راحت علية نومة الصبح و انا مدية معاد لحد أو وانا ورايا معاد.. عالبا باصحى قبل المعاد بكتير.
  

طبعا كل ده عامل لي مشاكل مع الناس.. هو أنا آه مش باعمل مشاكل مع حد مش بيتعامل مع الأمور زيي و بافوت طبعا و أعدي.. بس انا حاساني جاية من كوكب تاني و بالاقي صعوبة في التعايش مع البرود و اللا مبالاة و المواعيد البايظة.

نفسي أبقى عادي كده يعني.. كووووووووووول

[Khaled_Nowaihy]

دى مشكلتى مع كل المحيطين بى
وفى المقابل : لو حد اتأخر على ميعاد متفقين عليه اثور عليه وممكن تقلب بخناقة
دلوقت التأخير على المواعيد من مظاهر الشياكة الفارغة

[icehearted girl]

معاكي

وبالذات

• لو جيت أركن و لقيت الركنة هتاخد وقت شوية و احس إني معطلة الشارع باتخلص من الموقف ده فورا بإني باطلع من المكان خالص و أخلي الشارع يمشي و بعدين أدور على ركنة تانية
• باتوتر جدا لما احس اني معطلة حد أو حد مستنيني.
• مافيش ولا مرة حصلت إني راحت علية نومة الصبح و انا مدية معاد لحد أو وانا ورايا معاد.. عالبا باصحى قبل المعاد بكتير.

اهئ اهئ

[AMA]

ياااااااااااااااااه خلتينى أحس بالذنب
دا أنا صحابى بيقولولى أحنا نازلين الساعة 8 بنزل الساعة 10
بتفق مع ناس أكون عندهم و بنسى فى نفس اللحظة وبالتالى بنام و مش بصحى
بقالى قرن عايز أطلع الرخصة و من كتر الكسل مطنش
نتيجة أمتحانى بانت و شوفتها بعد شهر و نجحت الحمد لله و الشكر لله

عايزة كمان ؟ أنا عادى جدا كل حاجة بالنسبه للمواعيد عندى بايظة 100% لأن حاسس أنها حاجات مش مهمه يعنى كدة كدة هعرفها أو هعملها أو تعتبرى أننا عايش الأيام دى بشكل عشوائى

ببقى جد و كل حاجة عندى منظمه بطريقة مستفزة فى حاله واحدة فقـــــــط
لو حاجة متوقف عليها مصير أو فرصة مش هتتكرر أو ساعات المواقف الى مفيهاش هزار

[نور القمر]

بصي اول نقطتين دول على يديييي ههههههههههههههههه
فاكرة مقابلة معرض السيارات لما رنا كانت كل شوية بتتصل بيكي

[karimmelegy]

أكيد الكلام ده ممكن نلاقية فى المدينة الفاضلة عند أفلاطون


أكيد أنت مش من مصر ... من أى كوكب آخر



الدنيا إتغيرت واللى زيك حيتعب كتير

[eino666]

كووووووووووووووول سنة وحضرتك طيبة
مستحييييييييييييييييل
........................
محمود عينو

[ahmad--ezzat]

هيا دى المثاليه

[أبومعاذ]

ياريت لما تلاقي حل تقوليلي

[shaddadfalcon1]

انا شرحك تمام واكتر كمان

بس انا الحمد لله بحاول اعود نفسي اني ابقي بارد بس مش عشان ارخم علي حد لكن عشان استحمل الرخامه

لسه البارح انا طالع عيني عشان الاقي ركنه جنب الشغل ولاقي واحد واقف في نص الشارع ييجي دقيقه وبعديها التلات ابواب اتفتحو ونزلت المدام ومن ورا الاولاد وبعديها راحو جنب بابا عشان يسلمو عليه ويبوسوه علي خده وتقريبا المدام راحت هي كمان وانا كل ده واقف اتفرج

[Abdm]

و بالاقي صعوبة في التعايش مع البرود و اللا مبالاة و المواعيد البايظة.

أنتى كدة كل كلامك صح وتصرفاتك كلها صح وخليكى دائما كدة صح
وملكيش دعوة بالعالم البردة ومفيش حل غير التعايش مع العالم دية
يعنى لازم تكونى عارفة الناس اللى مواعيدها بايظة ما تتعامليش معاها الا فى أضيق الحدود وتكونى مضطرة غير كدة ما تتعامليش معاهم

حاولى الناس اللى بالشكل دة تكونى عارفة ومتأكدة أن مواعيدهم بايظة هتستريحى شوية لكن عموما طبعا الموضوع بيكون غير مريح
والله المستعان

[romeo_6887]

انا زي حضرتك كده في المواعيد و مبعرفش ارفض طلب لاي حد صديق ليا لكن في موضوع العربيات عادي جدا بركنها ساعات في نص الشارع انا كده كول