احذروا محل موستاش عباس العقاد مدينة نصر !!

[liquidator]

السلام عليكم ,
أنا مريت بتجربة مريرة مع المحل ده و لقيت ان الأمانه تحتم عليا اني أنقلكم اللي حصل معايا بالضبط عشان تاخدو بالكو من النصابين
دول ...
أولا المحل اسمه موستاش ( Mostache ) بعباس العقاد مدينة نصر أمام محل زلط بتاع الأحذية ...
طول عمري كنت بشتري من عندهم من أيام ماكنت صغير لما كان اسمه بيرزي ( Berzi ) و كان لحد قريب فعلا بيقدم جودة ملابس عاليه
و غالية و أنا ماكنتش باشتري اللا من عندهم لحد ما حصل اللي حصل ...
أخر مره من كام يوم رحت جبت من عنده تي شيرت و بنطلون و جاكت و لما روحت البيت اكتشفت ان البنطلون في قطعه كبيره و مش هو
اللي كنت بقيسه في البروفا ....
قلت يمكن حصل غلط معاهم و رحت رايحلهم تاني يوم و أنا متأكد انهم هايغيروه من غير أي مشاكل و ان دي حاجه عادية و انه محل
محترم لكني فوجئت بما يلي ....
دخلت بقول لهم البنطلون روحت لقيته مقطوع و مش هو اللي أنا قسته لقيت الهانم صاحبة المحل طالعه تجري من جوه مكتبها و تقوللي
البنطلون كان سليم و انتا اللي قطعته و جاي تتبلي علينا !!! مع انها عارفاني كويس و عارفه ان كل لبسي من عندها و لما بادخل مابدفعش
أقل من ألف جنيه !!! قلتلها يعني ايه بتبلي عليكو راحت مزعقه فيا و قالتلي كان مقطوع و بعناه و انت اشتريت و مالكش عندنا حاجه ..
الحقيقه أنا استغربت من التصرف من صاحبة محل المفروض انه كبير و محترم و ليه سمعه .. اتعصبت و زعقت فيها و قلتلها انتو نصابين
ردت عليا و قالتي امشي اخرج بره يا زباله !!!!
مش مهم بقي ايه اللي حصل بعد كده بس المهم اني حبيت أقول لكم التصرف الغريب اللي لقيته ده من محل المفروض انه محترم
أنا فعلا مستغرب علي اللي حصل من أوله لأخره و لقيت ان أحسن رد علي اللي حصل ده هو اني أحظر الناس من شركة النصب العالمية دي
اللي تحت اسم موستاش ... خاللوا بالكوا كويس و محدش يقع في اللي أنا وقعت فيه ... و مين عارف يمكن ليهم وسائل تانيه للنصب غير
اللي حصل معايا ....
الغريب انك تتفرج علي زوقهم و رقتهم و انت بتشتري من عندهم و الضحك و الهزار , و أنا هنقيلك من زوقي و ألبسك علي زوقي ... كل
ده كان قناع قذر لوجه أقذر ... احذروا المحل دا يا جماعه و أحسن عقاب ليهم ان ماحدش يشتري من عندهم أي حاجه و اي حد يقدر
يوصل الرساله دي لأي حد يوصلها و يكون فيكوا الخير ... ممكن ناس منكوا ماتصدقنيش بس أنا ماليش أي مصلحه اني أعمل كده و أقسملكم
بالله ان هو ده اللي حصل معايا بالضبط ....
أسف علي الاطاله و شكرا لاهتمامكم ....

تم النقل للاجتماعي
الادارة (1)

[mharidi]

الأخ الكريم
هوه ده اسلوب التعامل عندنا صاحب المحل بيعتبر نفسه انه بيمن عليك مش الفعلي انك انت اللي فاتح بيته و عموما ان كان معك فاتورة شراء فمن حقك ان تقدم شكوي الي جهاز حماية المستهلك و ارقام تليفونتهم موجودة علي النت و سوف يقومون بحل مشكلتك و لا تتهاون في حقك حتي لا تشجع التجار غير الملتزمين بمذيد من الفساد و لعلمك قانون حماية المستهلك العقوبات فيه كبيرة يشرط ان يكون مع سيادتك ما يدل علي الشراء من المكان و هو الفاتورة مع الشكر

[liquidator]

طيب أنا معايا الفاتوره بس للأسف البنطلون أنا رميته في وشهم لما رحتلهم .. يعني جسم الجريمه مش معايا !!!! للأسف

[boty50]

عزيزي

ماهو انت لما رميتة في وشهم وهم بالأخلاق دي
حايبيعوة لواحد تاني غيرك

[ابوحميد]

انا بشجعك تروح تعمل لهم محضر فى القسم بجد مش هزار وانت كدا كدا معاك الفاتورة يعنى معاك ما يثبت انك مش بتتبلى عليهم
انا عارف انه احتمال كبير ميجيبش نتيجة بس اعتقد كفاية اوى انك تعمللهم شوشرة

[tmz9111]

عزيزي

ماهو انت لما رميتة في وشهم وهم بالأخلاق دي
حايبيعوة لواحد تاني غيرك

100+++++++

[ecybrarian]

لا يؤخذ المرء إلا من مأمنه...أو حرص ولا تخون

[segsauer]

انا بشجعك تروح تعمل لهم محضر فى القسم بجد مش هزار وانت كدا كدا معاك الفاتورة يعنى معاك ما يثبت انك مش بتتبلى عليهم
انا عارف انه احتمال كبير ميجيبش نتيجة بس اعتقد كفاية اوى انك تعمللهم شوشرة

+1000000
يا باشا كان المفروض تتطلع من المحل على قسم مدينة نصر على طول و تعملهم محضر والشرطة هتقوم بالواجب
وده حصل معايا فى محل لبس أطفال فى الدقى و جبتلهم البوليس أمام المحل فأتصلوا بصاحب المحل على الموبايل و جه المحل وأعتذر لى عن اللى حصل و رجعلى فلوسى فورا
صحيح الموضوع أخد وقت شويه حوالى ساعة بس أخدت حقى
و هى بصراحة كانت قفلت فى دماغى

[liquidator]

متشكر يا جماعه علي المرور و الاهتمام بس أنا معايا الفاتوره بس و زي ما قلتلكم مش معايا البنطلون لاني رميته في وشهم ... هل اقدر أروح أعمل محضر و الكلام ده ولا أروح لجمعية حماية المستهلك و للا خلاص بقي يعوض عليا ربنا ؟
والله يا جماعه أنا مش عايز الفلوس خالص بس أنا نفسي أديهم درس عشان يبطلوا ينصبوا علي الناس ...

[amr delfe]

لو ليك حد فى الضرائب خلية يروح يخرب بيتهم او جواب صغير لمصلحة الضرائب قسم التهرب الضريبى ولو كانوا بيدفعوا اهو العيار اللى مايصيبش يدوش

[meza]

أولاً متسبش حقك
ده نصب علنى ... عندك جمعية حماية حقوق المستهلك . أو قدم بلاغ فى القسم

ثانياً أنا حصل معايا موقف كده برضوا فى موستاش اللى فى عباس العقاد
دخلت قعدت أتفرج على كام تى شيرت و قميص و عجبونى .. بس أنا مش بشترى على طول ... لازم أشوف كذا محل .... فقلتلهم هبقى أعدى عليكم تانى ... لقيتهم مصممين أقيس التى شيرت قلتلهم مش دلوقتى هبقى جى تانى ...... لأ هما راسهم و ألف سيف لازم أقيسه ... دخلت قيسته و لقيته جابلى تى شيرت تانى و قيسته برضه .... بعديها قلتله حلوين بس بعدين بقى
لقيته بصلى كده بقرف .... كأنى بلقح جتتى عليه .. رحت قلعت التى شيرت و سيبته و مشيت
من ساعتها عرفت طريقة التعامل بتاعتهم و مدخلتوش تانى

بس أنا بجيب بدل من موستاش اللى فى شارع الأهرام . الناس هناك أرحم شوية
بس فى عباس العقاد يا ساتر.
برضه فى guy laroche .... الناس هناك كويسه ...

[liquidator]

يعني أنا مش أول واحد الناس دول يتعاملوا معاه وحش ... ان شاء الله هنحاول نديهم درس كويس ...

[tutankhamoun]

خدمة عملاء في مصر = صفر أو ZERO أو زيرو أو Zero بالفرنسي أو Cero بالأسباني
بمعنى أصح لا يوجد خدمة عملاء لأن خدمة العملاء تتطلب ذوق و الذي هو منعدم عند غالبية شعبنا الجميل
أهم حاجة أزاي يموصوا دمك زي مصاصي الدماء و يأخدوا منك الفلوس اللي في جيبك
و لو ما أشتريت منهم تحس أنك حشرة من نظراتهم
معاملة زبالة
.......... يبقى أنت أكيد في مصر ...........

[liquidator]

والله يا أخي كلامك في شيء من الصح بس أكيد مش كل الناس كده ... بس الناس دول بالتحديد عدوا حدود قلة الأدب بكتير كمان و وصلوا للوقاحه و السفاله و علي أد ما أنا متغاظ علي أد ما أنا مش عارف أعمل ايه و يكون حاجه تبهدلهم بجد بس واضح ان في بلدنا دي ما باليد حيله

[Dr Ahmed]

خدمة عملاء في مصر = صفر أو ZERO أو زيرو أو Zero بالفرنسي أو Cero بالأسباني
بمعنى أصح لا يوجد خدمة عملاء لأن خدمة العملاء تتطلب ذوق و الذي هو منعدم عند غالبية شعبنا الجميل
أهم حاجة أزاي يموصوا دمك زي مصاصي الدماء و يأخدوا منك الفلوس اللي في جيبك
و لو ما أشتريت منهم تحس أنك حشرة من نظراتهم
معاملة زبالة
.......... يبقى أنت أكيد في مصر ...........

كلام صحيح للأسف...
وبعدين؟؟؟
هو احنا فعلا بقينا وحشين قوى كده؟
إزاى وصلنا لكده من غير ما حد ياخد باله ويقف قدام التغيير ده؟
وإزاى مافيش حد بيقعد يدرس سلوك المصرى اليوم كدراسة مستفيضة ويضع الحلول؟؟؟؟
هو فيه إيه يا بلد؟؟؟؟؟؟؟؟