من شر حاسد إذا حسد، ولا أنا الغبي!!!

[M.Alshafie]

الحمد لله انك رجعت لبيتك سالما بس هو ساعات فعلا بتبقى فى ايام غريبه كده الواحد بيحس انه مش عارف يسوق
بس بجد انا حاسس ان البنت دى فى علاقه بينها و بين اللى حصلك لان هى كانت واقفه فى الجنب اليمين و ماسكه مرايه الجنب اليمين و خبطاطك كلها كانت فى الجنب اليمين حتى المرايا اللى هى مسكتها اتخبطت
و بعدين سمرا و عنيها خضرا دى غريبه شويه و ما اعتقدش مركبه عدسات يبقى دى اكيد فيها لعنه و حطتها على عربيتك
نصيحه ما تخليش اى حد من الشحاتين يلمس العربيه و لو لمسها اديله لان فعلا لما بيلمسها ما اعرفش ليه اليوم بيتعفرت و العربيه بتبقى بتتلكك و تتخبط
يارب يسلم طريقنا كلنا و حاول تهدى نفسك و خصوصا و انت معاك الاولاد عشان ما يشوفوش باباهم كده و ما يتعلموش كده

[lonedoctor]

موضوعك غريب وبيفكرنى بالافلام الوثائقية اللى بتيجى فى الجزيرة وناشيونال جيوجرافى ابوظبى ويبدو انه فيه علاقة بين البنت وبين اللى حصلك وساعات الانسان بيوضع فى اختبارات ايمانية عشان ربنا سبحانه وتعالى يعرف الانسان بعض الحقائق عن نفسه والتى قد يكون هو نفسه شخصيا جاهل بيها فمثلا من واقع روايتك قد تكون ابتليت ببعض البخل وشح النفس والله عز وجل يريد ان يلفت انتباهك لهذا الموضوع فيكون سيناريو الامور بهذا الشكل ولكن المهم هنا هو العبرة والعظة
فهل وعيت الدرس فعلا ام لا
هذه البنت لو كنت رضيتها ب شئ بسيط كان ممكن تتلاشى كثير من المشاكل حتى فى حياتك وقد صح عن النبى صلى الله عليه وسلم انه قال "أن الصدقة لتطفئ غضب الرب”
كما أنها تمحو الخطيئة، وتذهب نارها كما في قوله صلى الله عليه وسلم: “والصدقة تطفئ الخطيئة كما يطفئ الماء النار” صحيح الترغيب وهي وقاية من النار كما في قوله صلى الله عليه وسلم: (فاتقوا النار، ولو بشق تمرة).
المهم انا اشعر ان هذه البنت لربما ليست من عالم الانس اصلا وانا اعلم ان الكثير سيعترضون على كلامى
ولكن انظروا هذا الحديث الذى اورده البخارى ومسلم فى صحيحيهما عن أبي هريرة رضي الله عنه أنه سمع النبي صلى الله عليه وسلم يقول إن ثلاثة من بني إسرائيل أبرص وأقرع وأعمى أراد الله أن يبتليهم فبعث إليهم ملكا فأتى الأبرص فقال أي شيء أحب إليك ؟ قال لون حسن وجلد حسن ويذهب عني الذي قد قذرني الناس فمسحه فذهب عنه قذره وأعطي لونا حسنا قال فأي المال أحب إليك ؟ قال الإبل أو قال البقر شك الراوي فأعطي ناقة عشراء فقال بارك الله لك فيها فأتى الأقرع فقال : أي شيء أحب إليك ؟ قال شعر حسن ويذهب عني هذا الذي قذرني الناس فمسحه عنه وأعطي شعرا حسنا قال فأي المال أحب إليك ؟ قال البقر فأعطي بقرة حاملا وقال بارك الله لك فيها فأتى الأعمى فقال أي شيء أحب إليك قال أن يرد الله إلي بصري فأبصر الناس فمسحه فرد الله إليه بصره قال فأي المال أحب إليك ؟ قال الغنم فأعطي شاة والدا فأنتج هذان وولد هذا فكان لهذا واد من الإبل ولهذا واد من البقر ولهذا واد من الغنم ثم إنه أتى الأبرص في صورته وهيئته فقال رجل مسكين قد انقطعت بي الحبال في سفري فلا بلاغ لي اليوم إلا بالله ثم بك أسألك بالذي أعطاك اللون الحسن والجلد الحسن والمال بعيرا أتبلغ به في سفري فقال الحقوق كثيرة فقال كأني أعرفك ألم تكن أبرص يقذرك الناس فقيرا فأعطاك الله فقال إنما ورثت هذا المال كابرا عن كابر فقال إن كنت كاذبا فصيرك الله إلى ما كنت وأتى الأقرع في صورته وهيئته فقال له مثل ما قال لهذا ورد عليه مثل ما رد هذا فقال إن كنت كاذبا فصيرك الله إلى ما كنت وأتى الأعمى في صورته وهيئته فقال رجل مسكين وابن سبيل انقطعت بي الحبال في سفري فلا بلاغ لي اليوم إلا بالله ثم بك أسألك بالذي رد عليك بصرك شاة أتبلغ بها في سفري ؟ فقال قد كنت أعمى فرد الله إلي بصري فخذ ما شئت ودع ما شئت فوالله ما أجهدك اليوم بشيء أخذته لله عز وجل فقال أمسك مالك فإنما ابتليتم فقد رضي الله عنك وسخط على صاحبيك .
فلربما كانت من الجن او الملائكة او غير ذلك
والمحصلة ان الله عز وجل يريد ان يلفت نظرك انه كما وهبك نعمة المال والغنى لا تنسى عباد الله الفقراء واكثر من الصدقة فى السر والعلن فلربما حادث بسيط لسيارتك ال bmw قد يكلفك الاف(بارك الله لك فيها) وهذه البنت لن تعطيها الا اليسير بضع قروش او جنيها مثلا
اسال الله لك الخير كله عاجله واجله
وتقبل تحياتى

[mada121977]

غريبه جداا.. انا برضه امبارح كان يوم غريب جدا وبرضه كنت ماشى فى امان الله وقافل الزجاج ومشغل التكييف وكافى خيرى شرى وماشى فى هدوء وفجاءه الاقى واحد شمام سواق ميكروباص قبل منزل الزمالك على كوبرى 15 مايو كسر عليا خبط الاكصطدام الامامى وجرى والبيه ماهنش عليه حتى يعتذر او يشوف هوعمل ايه .. برضه عرق الصعايده عندى نقح جامد وروحت جايبه ووقفت العربيه بالعرض وكنت هاكله بس الجبان جاب مارشدير وجرى برضه .

تعليقا على كلام الاخ الفاضل lonedoctor مع احترامى وتقديرى لحضرتك فى دعوتك للصدقه وفعل الخير بس ماينفعش نطبق ده على المتسولين اللى مليين الشوارع !
على كده الواحد طول ماهو ماشى يدى المتسولين فلوس وهما اساسا بيتخذوها مهنه على اساس انهم مش بشر !!ده عن رأيى منطق غريب وعلى مااذكر ان الرسول عليه افضل الصلاه والسلام كان له حديث شريف عن المتسولين وقد توعد الرسول من يتسول دون حاجة بنزع لحم وجهه يوم القيامة"

[lonedoctor]

غريبه جداا.. انا برضه امبارح كان يوم غريب جدا وبرضه كنت ماشى فى امان الله وقافل الزجاج ومشغل التكييف وكافى خيرى شرى وماشى فى هدوء وفجاءه الاقى واحد شمام سواق ميكروباص قبل منزل الزمالك على كوبرى 15 مايو كسر عليا خبط الاكصطدام الامامى وجرى والبيه ماهنش عليه حتى يعتذر او يشوف هوعمل ايه .. برضه عرق الصعايده عندى نقح جامد وروحت جايبه ووقفت العربيه بالعرض وكنت هاكله بس الجبان جاب مارشدير وجرى برضه .

تعليقا على كلام الاخ الفاضل lonedoctor مع احترامى وتقديرى لحضرتك فى دعوتك للصدقه وفعل الخير بس ماينفعش نطبق ده على المتسولين اللى مليين الشوارع !
على كده الواحد طول ماهو ماشى يدى المتسولين فلوس وهما اساسا بيتخذوها مهنه على اساس انهم مش بشر !!ده عن رأيى منطق غريب وعلى مااذكر ان الرسول عليه افضل الصلاه والسلام كان له حديث شريف عن المتسولين وقد توعد الرسول من يتسول دون حاجة بنزع لحم وجهه يوم القيامة"

لالا انت فهمتنى غلط طبعا موش معقول الواحد هيمشى يفرق فلوسه على الشحاتين فى الشارع وخاصة انها صارت منظومة عصابات الان بيتخذوها وسيلة للنصب والاحتيال وليسوا فقراء بالمعنى الشرعى المفهوم انا اتحدث عن حادثة بعينها وهى التى ذكرها الاخ الفاضل صاحب المشاركة وما ترتب عليها من احداث غير طبيعية لانه برضه موش معقول انه كل واحد يرفض يعطى صدقة لواحد مسكين فى الشارع هتحصله سلسلة من الكوارث بهذا الشكل وان كانت القضية قضية حسد فليست سيارة الاخ الفاضل هى اغلى وارقى سيارة فى الشارع مثلا
وعموما هذا كان اجتهاد منى ونصيحة لوجه الله فان اصبت فمن الله وان اخطات فمنى ومن الشيطان
وتقبل تحياتى

[M.Alshafie]

طب انا هحكيلكوا على موقف من سنه تقريبا كنت خارج من مرور بين السيارت بخلص ورق عربيتى القديمه عشان كنت ببيعها و كنت رايح بعربيه والدى عشان ما استخدمش عربيتى عشان اللى هيشتريها
المهم بعد ما خلصت و كانت الساعه 10 صباحا طالع بركب العربيه لقيت السايس طلعلى من تحت الارض و انا بصراحه كنت بتكلم فى التليفون فقعدت فتره قبل ما اطلع و هو واقف جنبب العربيه و اما خلصت عمال يقوللى يمين و شمال و هو اصلا الشارع فاضى و بيقولى على انه عاوز حاجه قولتله هو انت اللى ركنتنى و لا جبتلى المكان و سيبته و مشيت سمعته طبعا بيبرطم و الله بعدها بكيلو تقريبا فى ملف رخم كده و انا اتهورت فيه بصراحه النتيجه العربيه عومت بيا و فضلت تلف فى صلاح سالم و لحد ما بقيت برجع بضهرى و العربيات فى وشى و طلعت فوق الرصيف و الله لولا ستر ربنا و ان الطريق كان فاضى ساعتها كان لازم عربيه هتاخدنى بالحضن
طبعا انا مش بقول ان لازم الراجل اللى انا ما ادتهوش يكون سبب الحادثه بس ممكن يكون هو مفكر ان ده حقه و انا ظلمته فيه بس انا شايف انه مالوش حق ياخد حاجه غصب عنى و خاصه انه و لا ركنى و لا شفته و انا بركن
و بالنسبه لموضوع الصدقه انا لسه قارى فتوه يوم الجمعه اللى فاتت فى الاهرام ان المفروض ما نديش المتسولين اللى فى الشارع لان اغلبهم مش محتاجين بجد و انما ندى للى فعلا حاسين انه محتاج او المتعفف اللى هو مش بيسال الناس او جمعيات خيريه

[mostafabakry]

لا حول و لا قوة إلا بالله

كل دا في مشواار واحد

يا ساتر يا رب ، كان الله في عونكم يا اهل القاهرة

حصل خير بس يا ريت تمسك اعصابك اكتر من كدا و بلاش العرق الصعيدي دا اللي هيودينا في داهية و خصوصا في القاهرة ما ينفعش تبقي صعيدي ابدا لنك ببساطة يا هتتجنن يا هترتكب جريمة و تضيع روحك

خليك كووووووووووووووووول

[abogogo]

(اعطي السائل ولو كان على ظهر فرس)
فعلا نصف جنيه مش هيفرق معاك في حاجه ممكن البنت دي او اكيد من الغجر محترفي السرقة والتسول واهلها مجبرينها على التسول فبصت عليك واتمنت انك تكون مثلا ابوها وسرحنها في عربيتك وفيك دليل على كده شكلك بالبنسبه ليها مبسوط والناس الطيبين زمان قالوا (اطعم الفم تستحي العين ) حقيقه مؤكده والعين تدخل البني آدم القبر اعاذناواعاذكم الله منها :b4_444:

[ahmedbasto]

لا تعليق ...
بس حاسس بيك ...
الاكصدام الامامى عندى عامل زى جنب عربيتك اليمين كده ...

عارفه اكصدامك دة ياخالد انت لسه مصلحتوش والصراحة يعنى باشا اية التجارب الصعبة دى لو مكانك اركن العربية وانزل امشى على رجلى

[M.Mostafa80]

هو عايز اقولك ان موضوع ان الناس تعدى من اليمين وظاهره هو عشان راكب عربيه واللى يخبطك من ورى ويقولك بسيطه كل دا بقى عادى فى زمن العجيب اللى احنا فيه ولونى كدا ظلمت الزمن لأن العيب فى الناس
لو كل واحد حاسب نفسه هنلاقى مبررات كتير للى بيحصل وأولكم انا وهنلاقى الحال بقى افضل واهم من دا ودا نرجع لربنا

[SHNORY]

واضح ان الغباء في السواقه بقي ظاهره او فيرس بيطلع مع الحر
امبارح برضه كنت حعمل 3 حوادث منهم 2 انا صاحب اقل ضرر فيهم
اول واحد
زفه من 3 عربيات
والطريق ضيق ناحيه المنشيه علي البحر
واول واحد بلانسر عمال يرقص بالعربيه شمال ويمين ومش عاوز يعديني
عمال ارعشله بالنور ومفيش عنده دم
روحت حارق بنزين وراشق جنبه وقولتله ما تغور بزفتك بعيد وتعديني
وسيبته ومشيت
بس واضح انها كانت ايجار علشان كده منطقش ومشي مؤدب
-------------------------------
تاني حادثه
برضه مكان علي البحر والطريق مش واسع اوي
وعربيتين جنب بعض وانا تالتهم
وكنت علي الشمال
وواحد جاي من شمالي بجين 2 وحارق برضه وعاوز يعدي من جنبي
وكان حيلبس في الجزيره
بس ربنا سترها معاه ولولا اني جيت ربع متر يمين كان زمانه علي ضهره
اللي حرق دمي بقي ان مراته وبنته جنبه
يعني بيجري بالغباوه دي ومعاه ارواح ملهاش زنب
====================
تالت واحد
ناحيه المكتبه وعربيه هيونداي من بتوع السياحه عمال يرمي عليا
وانا معلقله الكلاكس لحد ما فاق ورجع لطريقه الطبيعي قبل ما يزنقني في
الحديد الفاصل بين الاتجاهين
===================
فالظاهر انها بقت ظاهره سواء قله الادب او الناس الغشم في السواقه علي راي واحد صاحبنا
هههههههههههههههههههههه
والحمد لله علي الستر من عند ربنا

[M.Mostafa80]

الناس الغشم في السواقه علي راي واحد صاحبنا
هههههههههههههههههههههه
والحمد لله علي الستر من عند ربنا

هههههههههههههههههههههه
انت لسه فاكر يأخى
طب تعرف لسه واحد قاطع عليا ش التحرير بالعرض وبعد ما أديتو اللى فى النصيب ببص على النمر لقيتو ملاكى أسكندريه هههههههههههههه