موضوع شاغلني ومحتاج رايكم

[nabaster]

مبدايا احنا لينا 8 شهور ساكنين في منطقه جديده في اسيوط وتعتبر من ارقي المناطق هنا حاليا

مجمع الابراج الي انا فيها الابراج مش كلها بتبص علي الشارع

فبلتالي في شوارع داخيله خاصه بالابراج

البرج الي انا ساكن فيه ليه خصوصيه شويه وليه باب بممر خاص بيه علي الشارع (للمشاه فقط مش للعربيات)

ومنه بتدخل علي الهول الخاص بالبرج

المدخل ده مش كتير بيستخدموه الا الي خارج علي رجليه بس لانه قريب

لاكن الي معاه عربيه بيركنها في الجراش او الهول وبالتالي مش بيستخدم المدخل ده

المدخل ده مغري جدا جدا جدا لاي حد

(محششين تلاقي - حبيبه تلاقي - عيال بيلعبوا كوره ويصدعوا اهلك تلاقي)

لغاية بقي لما اجتمعنا اتحاد الملاك وقررنا تنضيف المدخل ونورناه وبقي زي الفل

طولت عليكم معلش نرجع بقي للمهم و لموضوعنا الاساسي

من كام يوم كنت خارج اجيب شوية طلبات للبيت كان الوقت بعد الضهر تقريبا

وعديت من المدخل ده ولاقيت واحد وواحده واقفين مع بعض بس وقفه مش مظبوطه خالص

انا الاول كملت مشي لان دول مش شباب خالص

الست حوالي 30 سنه

والراجل يعدي الـ 40 مرتاح

مشيت شويه كده لقدام وبعدين دورتها في دماغي وفي ثانيه للخلف در ورجعت تاني

ده الحوار الي دار بيني وبين الراجل

انا: سلام عليكم

هو: عليكم السلام

انا:حضرتك يا رايس ساكن هنا (بطريقه بستهبل فيها)

هو: ايوه (وعايز يدخل فيا شمال وبرقلك في عنيه ونصب وقفته)

انا: برج كام (بصوت عالي)

هو: البرج الي علي اول الشارع

انا:بقولك برج كااااام (بعصبيه)

هو:طيب في حاجه مضايقاك (ابتدا يجر ناعم)

انا: سؤالي محدد حضرتك ساكن هنا؟؟؟؟

هو: لا

انا: طيب اتفضل بره

هو: يعني ايه؟؟

انا: ملهاش معني بقولك اتفضل بره ده مش مكان وقفه زي دي

هو:طيب انا ....... (بدا يتهته في الكلام)

انا: اتفضل بره دي ملكيه خاصه (بزعيق وصوتي ابتدا يعلي)

لاقيته مسك الست الي كانت معاه (من وسطها) وبيتمشي لحد بره

فضلت وقف مكاني لغاية اما خرج

وقف بره علي الرصيف وقالي يعني هنا ملكيه عامه

اتمشيت لحد عنده ووطيت عليه وقربت من وشه قلتله كلمه كمان وهفرج عليك انتا وهيا الشارع وسبته ومشيت

رجعت من مشاوري قابلت عضو اللجنه المسئوله عن البرج وواحد من السكان

بحكيله الي حصل ولاقيت الي واقف معانا بيوصفلي الراجل والست بالتفصيل

قلتله ايوه هما فعلا

ظلعوا دول زمايله في الشغل ومتجوزه وعندها عياااااال ومعروفين في المكتب هناك وشافهم هنا في المكان ده كذا مره بس مقدرش يتكلم بحكم انهم في شغل واحد وكده وهوا مش بيحب المشاكل ومرضيش يحكي باكتر من كده

وقالي قصة احد الصحابه لما جاله واحد بنته ارتكبت الفاحشه وكان عايز يقول للراجل الي متقدملها

راح الصحابي ضربه علي راسه بعصايه كانت معاه وقاله ربنا سترها ليه عايز تفضحها

بعدها بكام يوم شوفتهم قريب من الابراج تاني برضه بس وقتها كنت مستعجل جدا مش فاضي

الصدفه الكبيره بقي كانت امبارح

كنت ماشي بالعربيه ورايح بيتنا القديم ولاقيت تاكسي قدامي واقف بينزل واحده

ولاقيتها هيا الست دي

وقفت لما طلعت عمارتها (عمارتها فاصل بين بيتي القديم وبينها شارعيين)

ركنت العربيه ونزلت وروحت للبقال الي قصاد العماره وكان معرفه

كلمتين كده مني عرفت انها ساكنه هنا وفعلا شغاله في الحته الفلانيه وجوزها راجل غلبان جدااااااا وبيعاملها معاملة مفيش بعد كده وبيتمنالها الرضا ترضي لدرجة انها اما بتنزل بيفتحلها باب العربيه بنفسه وحاجات شبه كده كتير

من ساعتها وانا محتار اعمل ايه

مش عارف اتصرف

اقول لجوزها طيب؟؟؟

ولو قلتله هقوله ازاي وهقوله ايه اساسا

اقوله مراتك ............*

انا فعلا دماغي واقفه ومش عارف افكر

وايه الي يخلي واحده تعمل كده مع ان الناس الي حواليها شاهدين علي معاملة جوزها ليها

طولت عليكم معلش بس انا فعلا عايز اعرف رايكم

ولو حد مكاني هيعمل ايه

A.Yakout

[MomoMedo]

اتحطيت في موقف زي دة مع مراة واحد صحبي
مبقتش عارف اقول لصحبي و اهد البيت ولا اعمل ايه
لحد دلوقتي صحبي ميعرفش حاجة وانا سكت على الموضوع والكلام دة من اربع سنين تقريبا :s حاجة تلخبط

[w-m-a]

للاسف الشديد ان الموضوع شائك جدا جدا
وانا شخصيا اتحطيت فيه بس كان كبير بس الحمد لله تعالى ربنا اكرمنا ونهيناه على خير واتصلح حالها
اولا ماينفعش نهد بيت ونشرد اولاد
ثانيا ماينفعش نفضح حد ربنا ستره
ثالثا انت لم تشاهدهم فى وضع يستوجب اقامه الحد او الادانه
رابعا انت شاهد واحد
ماشى
بس المشكله ان الواحد برضه ماينفعش يسكت
بس نرجع ونقول يمكن ربنا يهديها وتتوب
وبرضه المشكله ان حق الاستتابه من حق الزوج او ولى الامر
افضل حل انك تحاول تشوف حد يعرفها ( بس يكون تقى يتقى الله ولا يستغل الموقف لصالحه ) يحاول يكلمها وينصحها او يتصل بها ويهددها يمكن تتلم
وربنا يستر علينا جميعاً

[M!SHO]

متهيألى انت دورك انتهى وعملت اللى عليك خلاص ولو فكرت تعمل اكتر من كده يبقى بدخل نفسك فى حوارات كبيره وهتعود عليك بالضرر وهتجيبلك مشاكل ...
لو عايز تعمل حاجه يبقى جرب تكلم الست لكن جوزها صعبه بصراحه ...

[bmya]

مش عارف ارود اقول ايه غير حسبي والله ونعم الوكيل في الاشكال دي

[nabaster]

ثالثا انت لم تشاهدهم فى وضع يستوجب اقامه الحد او الادانه

اول وضع لما كانوا واقفين الاول

وبلبدي جسمه لامس جسمها بطريقه صريحه جدا ومستفزه جداااا وده الي لفت نظري اساسا

تاني وضع لما كلمته وهوا خدها ومشي وكان ماسك وسطها (بالبلدي برضه حاضنها من وسطها)

رابعا انت شاهد واحد

في الشغل عارفين بس مش متاكدين بس باين من بعض الايحائات الي بينهم في الشغل

والمهندس الي ساكن معايا الي معاهم في الشغل شاهد علي الواقعه

بس مش بيتكلم علشان حساسية الموقف ده غير ان الراجل يعتبر مديره في الشغل

فبالنسباله الموضوع حساس جدا جدا جدا

A.Yakout

[أحمد كمال]

لا حول و لا قوة الا بالله :(

[nabaster]

يبقى بدخل نفسك فى حوارات كبيره وهتعود عليك بالضرر وهتجيبلك مشاكل ...

معلش انا نسيت جزء

قبل ما يكتر معايا في الكلام وقبل ما اقوله (هفرج عليك انتا وهيا الشارع)

اخدته من ايده وشاورتله علي البرج بتاعي والشقه والبلكونه بتاعتي (استعباط)

لاني لاقيته بيقولي انا هعرف انتا ساكن فين

A.Yakout

[M!SHO]

معلش انا نسيت جزء

قبل ما يكتر معايا في الكلام وقبل ما اقوله (هفرج عليك انتا وهيا الشارع)

اخدته من ايده وشاورتله علي البرج بتاعي والشقه والبلكونه بتاعتي (استعباط)

لاني لاقيته بيقولي انا هعرف انتا ساكن فين

a.yakout

انا مقصدوش هوه لانى عارف ان اللى بيعمل حاجه غلط بيخاف ومعتقدش انو لما يعرف حضرتك ساكن فين هيعرف يعمل حاجه ...
انا اقصد جوزها لان ببساطه الموضوع ده حساس جدا يعنى ممكن الراجل ميتقبلش الكلام حتى لو مصدقك عشان شكله وشرفه والكلام ده واللى انا خايف منو اكتر ودايما بيحصل هتطلع انت الغلطان وانت اللى بتسوق سمعة الست المحترمه الشريفه ومتقلقش هى هتعرف تتصرف وهطلع نفسها اشرف من الشرف ,, وصلت

[AymanPt]

انا قلبي وجعني من القصة دي
وصلت للست دي البجاحة انها تخون جوزها بالشكل ده و هو بيعاملها أحسن معاملة

انا اللي صعبان عليها زوج الست دي بجد و العيال اللي بينهم
قصّر في ايه عشان تعمل فيه كده طالما معروف انه بيعاملها أحسن معاملة و الراجل كويس جدا

حسبي الله و نعم الوكيل

[أحمد كمال]

انا لو منك المرة الجاية

الراجل اللي يقف معاها وقفة زي دي يترن علقة ما يعلم بيها الا ربنا

و هي هتخاف من الفضيحة و هتتلم

[magyver]

لا اله الا الله
ربنا يبعدنا عن الاشكاال دة
حاول تشوف من المقربين اليها قوي وتقلو يمكن ربنا يهديها

[بحري]

ما يخصك هنا هو عدم وجود المنكر في مكان سكنك، أو شارعك، أو في مكان عام
تأمر بالمعروف وتنهى عن المنكر بقدر ما تستطيع حسب طبيعة المكان ومدى قدرتك على التغيير فيه..وحاول تستعين بأهل العمارة أو الحي
حاول متدخلش نفسك في أكثر مما يخصك من هذه النوعية من المشاكل المقرفة
لأن هذه السيدة لو كانت (مش مظبوطة) فممكن للأسف تعملك مشاكل أكثر طالما ليس عندها حياء...
أما عن علاقتها بزوجها فهذا شئ بينهما لا دخل لأحد به وثق تماما أن الأمور قد تكون أعقد بكثير مما تبدو عليه، أقصد أنك لا تستبعد أن الزوج نفسه عنده معلومات أو على الأقل إحساس شبه يقيني بهذه الأمور، هذه أمور يعلمها وتعلمها الرجال والنساء بسهولة...تقول: وما الذي يجبرهم على الاستمرار..أقول لك متاهات نفسية يا صديقي..عافاك الله منها

[Karim_Mohy]

بصراحة الموضوع سخيييييييف.........وزي ما الناس قالتلك يا ياقوت هاتدخل نفسك في حوارات من غير لازمة وممكن تطلع في الاخر غلطان

انت اللي ليك ان عند بيتك ماتشوفش اللي شوفته قبل كده..........انما انك تعمل اللي انت بتفكر فيه..........اعتقد لازم تفكر كويس اوي .......ولو عايز تعمل حاجة ماتكونش لوحدك.....يكون معاك حد عشان ماتشيلش الليلة ويطلعوك غلطان في الاخر


عارف انك مقدر موقف الراجل واللي عايز تساعده..........بس فكر كويس تاني

[MaZaGAngeE]

مش معقول جوزها مش عارف ................
أو على الأقل حاسس باللي بيحصل من ورا ظهره
عشان تدخل نفسك في الموضوع ده لازم تكون عارف تاريخ البيت ده كويس لأن أكيد فيه حاجة غلط

بس ريح دماغك و ارميهم ورا ظهرك ده أكيد زنب ناس بتخلصه ناس