الدنيا ربيع و الجو بديع، ليه؟ علشان عادل دخل الماتريكس تانى!!!!!

[Hossam_Hassan]

عادل ده صديقى بس بقالى كتير ما قابلتهوش، المهم قابلته صدفة من يومين لقيته متغير، لقيته مبسوط، متستغربوش، أصل عادل كان دايما مهموم بحال البلد و الناس و القضية الفلسطينية و حقوق الأنسان و التوريث و التعزيب و ارتفاع الأسعار و و و و ، المرة دى لقيته ريلاكس و متكلمش فى أى موضوع من دول، فسئلته، قالى: لقيت نفسى مش قادر يا حسام رحت دخلت الماتريكس و ريحت دماغى، استغربت و سألته : ماتريكس ايه، قالى: فاكر فيلم ماتريكس، قلتله: أكيد، قالى، أحنا كمان لينا ماتريكس تريحنا من التفكير فى المشاكل، عارف عملت ايه؟ لغيت كل محطات الأخبار من الدش ماعدا النيل للأخبار، مبقتش أقراء جرايد غير الأخبار و الأهرام و روزاليوسف و بابعد عن صفحات الحوادث، بتفرج على القناة الأولى و التانية كتير، مابتكلمش مع حد فى أى موضوع سياسى.

قلتله و انت يعنى هتضحك على نفسك، يعنى لما الأسعار تلسعك، مش هتفكر فى السياسة؟ قالى: صدقى لما تسيب نفسك للماتريكس تغسل دماغك كل حاجة هتعدى و مش هتحس بالدبابيس، صحيح دمك بيتصفى نقطة نقطة، بس ما بتحسش و أهى عيشة و خلاص و زى ما أغلب الناس عايشين طول عمرهم فى الماتريكس و ساكتين و مبسوطين، أيه المشكلة لما ارجعلها و افضل فيها.

على فكرة الكلام اللى فوق كله حقيقى، بس مش ده المهم، المهم بقى مين فينا فاكر انه بره الماتريكس و هو فى الحقيقة قاعد و مأنتخ و مبسوط جواه؟

[sab3aawy]

على فكرة ، الحالة دى معروفة نفسيا من قبل فيلم الماتريكس وبيسموها فى الإنجليزية بالمصطلح الدارجbrain in a vat او ما معناه"المخ فى برطمان"،وده اجراء دفاعى بيتخذه الكثيرين ممن لا يستطيعون تبديل الأحوال السيئة من حولهم الى احوال اخرى ترضيهم، بوضع نفسهم فى حالة انعزال عن كل مجريات واقعهم والإكتفاء بما يحبون ان يسمعوا من اشياء ترضيهم وينجحون فى اقناع نفسهم بإن "كله تمام" ، او بالمختصر يضعون امخاخهم فى برطمان

[Karim_Monir]

على فكرة ، الحالة دى معروفة نفسيا من قبل فيلم الماتريكس وبيسموها فى الإنجليزية بالمصطلح الدارجbrain in a vat او ما معناه"المخ فى برطمان"،وده اجراء دفاعى بيتخذه الكثيرين ممن لا يستطيعون تبديل الأحوال السيئة من حولهم الى احوال اخرى ترضيهم، بوضع نفسهم فى حالة انعزال عن كل مجريات واقعهم والإكتفاء بما يحبون ان يسمعوا من اشياء ترضيهم وينجحون فى اقناع نفسهم بإن "كله تمام" ، او بالمختصر يضعون امخاخهم فى برطمان

انا عرفت ليه مصر ما زالت الدولة الوحيدة في العالم اللي لسه بتنتج الزير والبلاص
وكل لبيب بالاشارة يفهم

[goodwave]

وأنا قررت أرشح نفسي نايم في البرطمان (على وزن نائب في البرلمان)!!!!

[memo_hefnawy]

خلينا ساكتين يا حسام و خلى صاحبك يدخل الماتريكس فى إطمئنان و سكينه و إنت ممكن تدخل اللانوس بتاعتك بس لوحدك :) عشان لو حاولت تاخد حد معاك إنت و اللانوس و الحد هاتدخلوا المتاتريكس بالإكراه :)

خلينا مستنيين نيو لحد ما يجى :)

[وائل عطية]

على فكرة ياحسام مش صديقك بس اللي بيعمل كده..دا في ناس كتير كده وأنا منهم !!
أنا باستمرار مهموم بالمواضيع والقضايا اللي ذكرتها دي ودايماً باتنقل بين المواقع والمحطات الإخبارية والجرايد الأجنبية ..ودايماً باحس إن الدنيا مكركبة وهاتقع فوق دماغنا ..ولما أحب أخلع من المود دا ..بانعزل تماماً عن المواقع والمحطات والنقاشات دي ..
الغريبة إنك تحس فعلاً إن الدنيا " بمبي " والأحوال زي الفل ..وتشعر إن في حالة من الهدوء والسلام سيطرت على المناطق الملتهبة في العالم وإن مراكز الشرطة والأقسام المصرية أصبحت فنادق خمس نجوم !!!!

[Dr Ahmed]

رسالة من السيد مورفيوس:
السيد محمود حفناوى: هل تأخذ الكبسولة الحمراء أم الخضراء؟

حسام حسن:
وصف رائع للواقع رغم اننا لا يمكن نقدر نطلع بره الماتريكس ولا نفضل فيها طول الوقت...

[tutankhamoun]

أحلى حاجة إن أنا أفضل داخل الماتريكس
لأني لو خرجت خراجها هاترشق من الغيظ و خصوصا السواقة و اللي بيسوقوا
و ربنا يخليني كدا جوه الماتريكس لغاية ما أهج من البلد دي و ارجع مكان ما كنت عايش و مبسوط

[memo_hefnawy]

:) إنت تعتقد آخد الحمرا و لا الزرقا و ماتقوليش ده قدرك و إختيارك يا مورفيس :) أحسن لو قولت كده هاضرب الإتنين :)

[memo_hefnawy]

كثير مننا أحيانا بنطلع و أحيانا أخرى بندخل

العيب و الغلط إن ندخل و ننسى نخرج لازم كل فترة تخرج تشوف الدنيا فيها إيه و لما تحس إنك هاتفرقع تدخل تانى بس ماتنمش فى العسل جوه

[محمد عز]

الماتركيس
مش لازم ناخد كل المشاكل على اعصابنا
الدنيا مش سودة اوى كده ، زى ما فيه حاجات وحشه وتخلى الواحد يكره الدنيا باللى فيها
فيه حاجات جميلة بتصبر الواحد
المهم كل واحد عمل ايه وقدم ايه علشان يتصلح حالنا ، مش المجتمع ده برده هوا انا وانت وكل اللى معانا
لكن السؤال المهم اللى جه فى بالى هل ياترى الماتركيس هى حاجة حديثه لمقولة قديمة هى ندفن راسنا زى النعام

[Ahmed Samy]

أنا أسف يا جماعة
أنا لا أستطيع وضع مخى في البرطمان (دا حتى البرطمان مش مقاس مخي)
و أفضل أن أظل صاحيا و اعيا خارجه , لأنى لا أقتنع بفكرة النعامة
و لو وضعنا جميعا أمخاخنا في البرطمان من سيبقى ليعي ما يحدث من سيكوم مهموما لحال هذي البلد ؟؟؟؟

الى السيد عادل : لقد تعبت و خارت قواك النفسية من التفكير فى ما يحدث و رؤيته يوما بعد يوم ... وللعلم هذا هو المطلوب . استجمع قواك و اترك عقلك واعيا -ولو منهكا- لست أدري ما سيحصل و لكنى بالفعل أود أن نكون شهودا على حياتنا نراقبها بكل ما نستطيع -حتى لو لم نستطع اصلاحا- فهم المراقبة هو الأن أضعف الايمان.