هل سمعت عن منحة الإنتخابات؟

[Dr.lancer]

يوم الخميس اللى فات لقيت المدام بتكلمنى فى الشغل وبتضحك و لما سألتها عن السبب قالت لى الشغالة الجديدة اللى جابتها من واحدة معرفة (كانت أول مرة تجيلنا بالمناسبة) جاءت على الساعة 2 الظهر و جات لها مكالمة على الموبايل من جوزها و طلب منها تنزل بسرعة تروحله و لما سألتها المدام عن السبب قالت لها النهاردة ربنا وفقنا وكملنا خمسين نفر من بولاق الدكرور و حنروح نسجل أسمنا فى منحة جمال طبعا الفضول خلاها تسأل يعنى ايه منحة جمال؟ قالت لها دى منحة قدرها 3 ألاف جنية للست و ستة الأف جنية للراجل انه يروح يسجل أسمه علشان يطلع بطاقة إنتخابية ولما يجيى معاد الإنتخابات نروح ننتخبه و ناخد الفلوس. و على فكرة دى مش منحة لأنهم بيقسطوها عليهم بواقع خمسين جنية شهريا. بس بيشترطوا أن الواحد يجيب معاه خمسين فرد علشان ياخد المنحة. طبعا حاولت المدام تكلمها بالمنطق وازاى تبيع صوتها ولما أتنرفزت عليها قالت لها تفتكرى مين المسؤول اللى خالاكى فقيرة كدة و بتشتغلى فى البيوت علشان تجيبى قوت يومك؟ وطبعا ردت عليها ببساطة أنها كده حتكفر لأن ربنا اللى كاتب لها كده و بيرزقها. و كمان ما كده كده الراجل حيكسب و يفوز. اهه نستفيد إحنا كمان.
بصراحة أنا كنت مستغرب من الكلام ده و إحتمال كبير أنه يكون تأليفة من الشغالة علشان تمشى بدرى و خصوصا انى لم أسمع عن موضوع منحة جمال دى قبل كده. ياترى حد سمع عنها؟؟ و طبعا من السذاجة أنى اسأل منين الفلوس دى كلها....

[Ahmed Nouh]

ومن هنا نشهد للغتنا العربيه الفصحى بتعدد كلماتها ومعانيها و كيف انها يمكن ان تحول بقدره قادر الرشوه الى منحه

اسمها جميل والله , من كام يوم انا كمان اديت منحه لأمين شرطه فى الشارع ( مش علشان مسكنى مخالف , بس ظروفه كانت صعبه قوى الحقيقه )

[M.Osman]

ههههههههههههههههههههههههههههههههههه

[MohaMed_Refaat]

و على فكرة دى مش منحة لأنهم بيقسطوها عليهم بواقع خمسين جنية شهريا. بس بيشترطوا أن الواحد يجيب معاه خمسين فرد علشان ياخد المنحة.

انا اول مرة اسمع عنها الصراحة
بس هو اللى حيجيب خمسين واحد هو اللى حياخد ال 6 بواكى طيب والباقى دول يقسموا معاة ولا اية تسلسل قيادى يعنى المعلم وتابعيةيعنى زى محمود عبد العزيز فى الكيف لما البييصى كان مش عاجبة اجرتة ..... جرى اية يا بيصى دة انا مديك فوق نفحتك نفحة يا جدع .
فعلا مصر بقت فرجة وسيرك وكرنفال وفيستفال كمان والجمهور 80 مليون مشاهد مجبرين على الفرجة الصامتة من دون اعتراض .

[بحري]

ومن هنا نشهد للغتنا العربيه الفصحى بتعدد كلماتها ومعانيها و كيف انها يمكن ان تحول بقدره قادر الرشوه الى منحه

اسمها جميل والله , من كام يوم انا كمان اديت منحه لأمين شرطه فى الشارع ( مش علشان مسكنى مخالف , بس ظروفه كانت صعبه قوى الحقيقه )

ممكن خروجا من شبهة التلاعب باللغة نسميها نفحة.......
إيه ده إحنا كده مش حنكون عملنا حاجة..خلاص خلاص مشيها منحة

معلش يا دكتور شريف الله يكرمك ياريت لو تقدر تتأكد من صحة الخبر ده للأهمية

[نور القمر]

وليه التفرقة العنصرية دي بقه
الرجل 6 الاف والست 3 بس
عموما ما يخسرش
نشترك فيها ازاي المنحة دي
وهل ينفع العيال يشتركوا فيها ولو ب 100 جنيه
وعجبي عليك يا زمن !!!

[dode2002]

اضحك كركر اوعي تفكر ----- اوعي

[ams]

انا احترم اللى بيبيع صوته عن اللى معندوش صوت اصلا و كل اللى بيعمله يسب و يلعن و يكرهنا فى عيشتنا

[mrwho1982]

ياجماعة انا عايز اهاجر ماليزيا بجد انا كل يوم بقرف من الحكومة دي

[بحري]

انا احترم اللى بيبيع صوته عن اللى معندوش صوت اصلا و كل اللى بيعمله يسب و يلعن و يكرهنا فى عيشتنا

أنا فاهم قصدك إيه وإنك بتدعو للإيجابية
لكن المقارنة غلط..اللي ملوش صوت تقدر تعتبره مش موجود..سلبي..قول زي ما إنت عاوز...لكن اللي بيبيع صوته بالشكل ده بيبقى ضال مضل وبيضفي على هذه الأنظمة مشروعية زائفة..بيع الأصوات عبارة عن تزوير قبل الصندوق

[asbeats]

بما اني موظف حكومي..انا فعلا سمعت عن المنحة دي من الموظفين اللي معايا.....رحت جايب آلة حاسبة من الحسابات وقلتلهم لو اتقدم للمنحة دي 20 مليون واحد ...وكل واحد أخد 6000 جنيه.... 120,000,000,000 يعملوا كام دول.!!!!!!!!.... يعني مبلغ وهمي ومش موجود اساسا .... وابقى سلملي على العتبة الخضرا بعد ما البيه ينجح.......

[kimo-nubira]

دول يا باشا يعملو 120 مليار جنيه شوف بقي يفتحو كام مصنع دول ويشغلو كام فرد .. وبدام الفلوس ديه موجوده في

مصر مابنشوفهاش ليه في حاجه مفيده .. حسبي الله ونعم الوكيل في كل اللي خالا احوال البلد توصل لكده

بجد حزين جدا من اللي بشوفه وبيحصل كل يوم في مصر وللاسف مقدرش اسيبها لاني بحبها بكل قرفها ده

[crazylambada]

انا احترم اللى بيبيع صوته عن اللى معندوش صوت اصلا و كل اللى بيعمله يسب و يلعن و يكرهنا فى عيشتنا

[osoliman88]

لا اله الا الله
قلت قبل كده في مشاركة سابقة أن البلد ليست حاليا مؤهلة لممارسة الديمقراطية بمفهومها الواسع أو الحقيقي، كان الهجوم عليا فظيع ، واتهمني البعض بأنني عميل للحزب الوطني، وأديت مثل لذلك مصطفى السلاب واللى بيعمله في دائرة مدينة نصر (الصوت بالف جنية ووجبة غذاء، وبالطبع ليس هو العضو الوحيد الذي يفعل هذا الكلام ، لأنه طبعا كل واحد وإمكانياته وكل دائرة وثمنها .... من ليس في مكان هؤلاء الغلابة الفقراء المعدمين لا أعتقد أنه يستطيع أن يحكم على ما يقومون به بشكل صحيح، كفانا الله وأياكم شر الفقر والمرض والحاجة للناس. هذا الكلام ليس مبررا لشئ أو تلميحا لأمر معين.

على العموم لا يمكن أن تكون هناك ديمقراطية وتسير في الإتجاه الصحيح طالما ان هناك جهل وامية وفقر، كما أنه لابد أن يكون هناك قانون ومفعل لتجريم شراء الأصوات الإنتخابية. وأقولها مرة عاشرة في ظل مثلث الفقر والمرض والجهل كل الأعمال ستكون هباء منثورا، ربما يسأل البعض ما هو الحل الإجرائي حاليا لإختراق هذا المثلث، أنا لا أدعى أنني أعرف الحل ......... هذا رأى شخصى والله أعلم

[بحري]

الديموقراطية حينما تعني المساواة بين جميع أبناء المجتمع في حق الانتخاب بغض النظر عن التكوين الثقافي والعلمي والمهاري هي نظام فاشل ومهما حاول المرقعون معه لن يفلح...في كل دول العالم هناك توجيه للناخبين من خلال القوى السياسية ومراكز الثقل المالي والآلات الإعلامية..وهذا التوجيه دائما ما يصب في صالح جماعات الضغط السياسي التي لا يمكن بحال اعتبارها خالصة النوايا والأهداف
وهذا النظام الانتخابي إن صلح في مكان فلن يصلح في آخر...المشكلة في عدم قدرة البعض على إدراك أن العالم متسع..والنظم السياسية حتى تكون ناجحة وحتمية مثل الديموقراطية لا بد أن تنجح في التطبيق في كافة الدول على اختلاف أوضاعها الاقتصادية والاجتماعية والسياسية والديموجرافية....هل نجحت الديموقراطية في ذلك أم أنها تبقى فكرة بشرية قاصرة وفي حاجة دائمة لـ (تقييف الترزجية)