مطلوب مساعده من كل مهندسين مدنى و ياريت الاعضاء يشاركو

[eng/muhamad]

انا فى سنه 3 مدنى و ان شاء الله السنه الجايه اخر سنه
انا فى هندسه العاشر قسم مدنى عندنا مدنى عام يعنى مفيش تخصصات بتدرس كل حاجه فى مدنى
لكن مشروع التخرج هو اللى ممكن يحدد تخصصك بنسبه كبيره و انا محتار جدا فى مشروع التخرج
1- مشروع خرسانه
و ده معظم الطلبه بيختاروه عشان زى ما بيقولو السوق عاوز كده
2- مشروع مياه و صرف صحى
و ده بيكون عباره عن تصميم كل حاجه فى شبكات مياه الشرب و شبكات مياه الصرف لمدينه معينه
من اول ما تاخد المياه من المصدر و تدخلها محطه المياه للمعالجه و تصميم المواسير لحد المياه ما تخرج من البيت و الصرف و كده و المشروع ده مش اى حد بياخده عدد قليل اوى عشان شغله مش سهل
3- مشروع اداره مشروعات هندسيه ده بيكون عباره عن عمل الاداره الهندسيه الكامله لمشروع معين يعنى تحديد التكاليف و المده الزمنيه للمشرع و العواقب اللى ممكن تحصل و كل حاجه تخصص اداره المشروعات الهندسيه
4- مشروع مساحه و ده بيكون عباره عن رفع مساحى للجامعه و الشوارع المحيطه و رسم خريطه مساحيه
و انا محتار بين الاربعه دول ياريت تساعدونى

[city_ct]

أختر ما تعتقد أنه سيعود عايك بتقدير أعلى، و الذى تميل له أكثر. الشىء الوحيد الذى قد تحتاجه بعد التخرج من نوع المشروع هو أذا كنت ترغب فى العمل فى مجال التصميم و بالطبع ينطبق ذلك على مشروع الخرسانة و مشروع المساه و الصرف الصحى، أما إدارة المشاريع فسوف تحس بها أكثر بعد سنتين من الخبرة العملية فى مجال سواء كان تصميم أو تنفيذ أو حتى مكتب فنى و فى أى نوعية من المشاريع سواء كانت طرق، شبكات و محطات مياه و صرف صحى أو مبانى.

فى حياتى العملية قابلت مهندسن عمارة يعملون فى الموقع فى مشاريع شبكات مياه و صرف صحى و كذلك فى تامكتب الفنى لهذه المشاريع.

ما تتعلمه فى الكلية هى الأسس العلمية للهندسة المدنية و الخبرة تتأتى تماما بعد العمل، و لكن يفيد التخصص فى مجال العمل و لكن ليس بالشكل الشديد الذى تتخيله.

هناك مجالات بتعرض لها حميع المهندسين المدنيين،و لكن سوق العمل و ظروفه تصقل المهندس. فعلى سبيل المثال معظم المهندسين المدنييين يمكنهم العمل قى مشاريع مبانى سكنية و عمارات و لكن القليل لديه الخبرة لللعمل فى مشاريع الأساسات و التربة و محظات المياه و الصرف الصحى و الطرق، بالرغم من تعاملهم جميعا مع الخرسانة و حديد التسليح.

الكليات لا تقدم لك خبرات الحياه العملية،و لكن هذا يتوفر لك من خلال العمل لدى الشركات المتخصصة و أيضا الشركات الكبيرة.

[SS]

و أنت بقى مين فى دول؟؟؟

يعنى بأختصار انت عاوز إيه و حابب أيه اكتر و شايف نفسك ممكن تمشى فيه أحسن

أنا فى رأيى ان الشغل ده رزق و نصيب قبل أى شىء.... و عموماً المشروع مش عامل مؤثر اوى زى ما انت

متخيل خاصة و أنت خريج جديد....طالما انت عندك خلفية كويسة و أستعداد للعمل بتخصص معين

بس ده ما يمنعش انه بيضيف لك معلومات مش بطالة عن الفرع اللى انت هاتعمل المشروع فيه

و احياناً بعض الأماكن بطلب انك تكون عامل المشروع فى تخصص معين كنوع من الضمان انك عندك فكرة كويسة عن التخصصص

و عموماً بعد ما تشتغل فترة ...هيبقى الفيصل فى الموضوع خبرتك مش المشروع

رأيى أدخل المشروع اللى انت حابه و ميال ليه أكتر

ربنا يوفقك للخير

[eng/muhamad]

المشكله ان انا مش ميال لمشروع معين و كل مشروع من الاربعه دول فكرت فيه لاسباب مختلفه
1- الخرسانه اصحابى كلهم هيختاروه و هنساعد بعض و زى ما بيقولو السوق عاوز كده
2- مياه و صرف شغله عجبنى لما درست المواد بتاعته و كنت معجب بفكره المشروع
3- اداره مشروعات من افضل التخصصات فى الهندسه المدنيه و شغلها حلو بس لازم يكون فى خبره 3 او 4 سنين على الاقل
4- المساحه انا متفوق جدا فيها فى الكليه و لكن اللى مخلينى متررد فيها ان طبيعه شغلها صعبه جدا و عاوزه واقفه طول النهار فى الشمس و كده و فى نفس الوقت شغلها قليل

[eng/muhamad]

فعلى سبيل المثال معظم المهندسين المدنييين يمكنهم العمل قى مشاريع مبانى سكنية و عمارات و لكن القليل لديه الخبرة لللعمل فى مشاريع الأساسات و التربة و محظات المياه و الصرف الصحى و الطرق، بالرغم من تعاملهم جميعا مع الخرسانة و حديد التسليح.

النقطه دى برده حاجه من الحاجات اللى بتخلينى ابعد عن خرسانه
يعنى زى ما حضرتك بتقول اى مهندس مدنى ممكن يشتغل انشاءات عشان كده لو عملت مشروع خرسانه هحس ان مفيش جديد
لكن لو عملت مشروع مياه و صرف مثلا هيبقى عندى خبره فى شغال محطات المياه و الصرف غير ان طبيعى كلنا بنفهم فى الانشاءات

[م.محمد علاء]

إختاااار الأسهل فيهم...
و خليك عارف....
محدش بيسألك على المشروع قوي....
و مقوله بيفرق فى الشغل مقوله خادعه

[eng/muhamad]

إختاااار الأسهل فيهم...
و خليك عارف....
محدش بيسألك على المشروع قوي....
و مقوله بيفرق فى الشغل مقوله خادعه

امال ايه الواقع ياريت حضرتك تقول تخصصك ايه و ايه اللى حصل معاك فى الشغل و نستفيد من حضرتك

[korkor]

بص ياهندسه مشروع التخرج ده مايفرقش معاك فى اى حاجه انا كنت مشروع هندسه صحيه وشغال دلوقتى Planner زمايلى اللى كانوا مشروع مساحه شغالين فى الطرق المشروع مش هيفرق فى حاجه فاختار المشروع الاسهل بالنسبه ليك وان كنت اعتقد ان مشروع الاداره مشروع ممتاز ومناسب لاحتياجات السوق حاليا ممكن يكون نواة لمساعدتك فى عالم الواقع بعد كده بس مش ضرورى الشغل ده نصيب وتقريبا 85 % من اللى بندرسه فى الكليه مش بنستخدمه , مشروع الخرسانه طوب الارض بيعملوا , المساحه متعب ومقرف وشمس و اجهزه وترافرس و كلام فاضى من ده , مشروع الصحيه هيديلك خبره نسبيه زياده عن زمايلك فى المجال ده , مشروع الاداره بقى هتتعلم حاجات كتيره من اللى واحد مش بيدرسها فى الكليه زى البرامج والتسعير ومعدلات التنفيذ ,العقود والكلام ده فعلا خبره ممتازه وممكن تنفعك ونسبيا هو اقل مشروع فى المجهود البدنى بس هيكون اصعب مشروع علشان توصل للمعلومات لان الكلام اللى فى مش كلام نظرى بتاع كتب ونظريات وكده ده عاوز مساعده حقيقيه من ناس فعلا اشتغلت فى الموضوع ده علشان يطلع المشروع كويس كمان اداره المشروعات ماشيه موضه اليومين دول فى البلد (امريكانى بقى ) يعنى ممكن بعد التخرج ان شاء الله تضربلك كام كورس management على عقود على كام شهاده من الجامعه الامريكيه والعمليه تلعب معاك وتلاقى نفسك شغال فى شركه Multinational وكله فى الاخر نصيب .

[م.محمد علاء]

امال ايه الواقع ياريت حضرتك تقول تخصصك ايه و ايه اللى حصل معاك فى الشغل و نستفيد من حضرتك

الحقيقه أنا بكالريوس لسه...
بس متأخر عن دفعتي سنتين..
فزمايلى كلهم (دفعتين)
لما خلصوا كان المميز إنه لا إتسأل فى تقديره ولا إشتغل تبع مشروعه...لأن مش معقوله انا مثلا(ميكانيكا قوي)مشروعي حاليا تكييف..
لما أطلع مش حعرف أشتغل فى أي حاجه تانيه...؟؟إزاي ماده هي اللي حتحدد تخصصك...؟وبقيت المواد فين..
عشان كده زمايلي اللي إتخرجوا السنه اللي فاتت أختاروا المشاريع الخفيفه السهله...
زي الصرف...
والحاجات دي..
لأنه والله ..مش بيفرق معاك...
دي حاجه ليك إنت...
وكده كده...
إنت الشغل حيعلمك كللللللللللللللللللل حاجه

[eng/muhamad]

بص ياهندسه مشروع التخرج ده مايفرقش معاك فى اى حاجه انا كنت مشروع هندسه صحيه وشغال دلوقتى planner زمايلى اللى كانوا مشروع مساحه شغالين فى الطرق المشروع مش هيفرق فى حاجه فاختار المشروع الاسهل بالنسبه ليك

انا عارف ان المشروع مش بيفرق بنسبه كبيره و لكن بيفرق احيانا
يعنى مثلا لو متقدم لشركه شغلها محطات مياه اكيد لو المشروع مياه هيفرق معاها ده اللى اقصده

ان كنت اعتقد ان مشروع الاداره مشروع ممتاز ومناسب لاحتياجات السوق حاليا ممكن يكون نواة لمساعدتك فى عالم الواقع

مشروع الاداره بقى هتتعلم حاجات كتيره من اللى واحد مش بيدرسها فى الكليه زى البرامج والتسعير ومعدلات التنفيذ ,العقود والكلام ده فعلا خبره ممتازه وممكن تنفعك ونسبيا هو اقل مشروع فى المجهود البدنى بس هيكون اصعب مشروع علشان توصل للمعلومات لان الكلام اللى فى مش كلام نظرى بتاع كتب ونظريات وكده ده عاوز مساعده حقيقيه من ناس فعلا اشتغلت فى الموضوع ده علشان يطلع المشروع كويس كمان اداره المشروعات ماشيه موضه اليومين دول فى البلد (امريكانى بقى ) يعنى ممكن بعد التخرج ان شاء الله تضربلك كام كورس management على عقود على كام شهاده من الجامعه الامريكيه والعمليه تلعب معاك وتلاقى نفسك شغال فى شركه multinational وكله فى الاخر نصيب .

كتيير قالولى الكلام ده و عشان كده فكرت فيه و كتير بيقولو ان مستقبله كويس جدا

مشروع الخرسانه طوب الارض بيعملوا , المساحه متعب ومقرف وشمس و اجهزه وترافرس و كلام فاضى من ده

عشان كده مش عاجبنى مشروع خرسانه و لا مساحه

مشروع الصحيه هيديلك خبره نسبيه زياده عن زمايلك فى المجال ده

اكيد هيكون فى فرق بينه و بين مشروع اى حد بيعمله ( خرسانه )

-----------------
حاليا حضرتك فضلت حاجتين و قولت لا على حاجتين
حضرتك فضلت مشروع اداره مشروعات
و مشروع مياه وصحيه
و ابتعدت عن خرسانه و مساحه فياريت حضرتك تقولى الانسب من وجهه نظرك ايه
اداره و لا صحيه
انا عاوز اعمل مشروع مميز و مختلف مش حاجه عاديه مش حاجه اى حد بيعملها لدرجه ان انا فكرت اعمل مشروعين فى وقت واحد مشروع صحيه و فى نفس الوقت ادخل معاه اداره مشروعات

[م.محمد علاء]

بص ياهندسه مشروع التخرج ده مايفرقش معاك فى اى حاجه انا كنت مشروع هندسه صحيه وشغال دلوقتى Planner

+1

[Ralliart]

حاول تاخد حاجه ليها سعر في السوق
يعني الخرسانه كل الناس بتشتغل فيها وبقى ملهاش لازمه
عندك ادارة المشروعات بقت حلوه جداً ونسبة استفادتك منها عاليه
وكمان المساحه حلوه لو ليك دماغ في تصحيح الاخطاء والحاجات دي ومتشغلش بالك بالحر لان اساساً شغل المساحه الصح مبيتعملش في الحر (يبدأ من العصر) لان الاجهزه بتتأثر جامد بالشمس والـtotal station الجديد بقى ليه سوفت وير خلت العمليه سهله جداً جداً بس عايزه شوية تركيز وانك متغلطش في نقطه ولا حاجه وعايزه تبقى فاهم الجهاز كويس

[eng/muhamad]

ان انا فكرت اعمل مشروعين فى وقت واحد مشروع صحيه و فى نفس الوقت ادخل معاه اداره مشروعات

يعنى عاوز اعمل مشروح صحيه كامل من تصميمات و روسمات و كل حاجه و فى نفس الوقت احسب التكاليف و المده الزمنيه للمشروع و الحاجات الخاصه باداره مشروعات لمشروع هندسه صحيه
مش عارف حضرتك فاهمنى و لا لأ

[eng/muhamad]

وكمان المساحه حلوه لو ليك دماغ في تصحيح الاخطاء والحاجات دي ومتشغلش بالك بالحر لان اساساً شغل المساحه الصح مبيتعملش في الحر (يبدأ من العصر) لان الاجهزه بتتأثر جامد بالشمس والـtotal station الجديد بقى ليه سوفت وير خلت العمليه سهله جداً جداً بس عايزه شوية تركيز وانك متغلطش في نقطه ولا حاجه وعايزه تبقى فاهم الجهاز كويس

متفق مع حضرتك بس بصراحه اللى اعرفه ان مساحه شغلها قليل و انا اتعاملت مع الاجهزه دى فى الكليه و اشتغلنا عليها و بعرف اتعامل معاها دلوقتى الجهاز بقى فيه كل حاجه تقريبا و تاتش و حاجه دلع يعنى غير الاول بس المشروع بتاعها متعب جدا و شغلها برده
و بصراحه انا نفسى اشتغل شغل فى مكتب مش عاوز مواقع
الصحه مش ببلاش شغل المواقع متعب جدا و مقرف لكن شغل المكتب
قاعد فى التكييف جنبك النسكافيه بتاعك و محافظ على صحتك

[NoRmAl]

متفكرش فى الشغل من دلوقتى
والموضوع دا رزق وقليل الى بيشتغل بالى أتعلمه
رأيي تاخد يا خرسانه يا مساحه
فكك من المشروعات بالطبع
حاجه تانيه
مشروع الصحيه قد يكون كويس بردو
بص
أنت دلوقتى 3 مدنى
يعنى خدت التصميم كويس جدا
وتقدر دلوقتى تصمم بلاطات وكمرات وأعمده
ناقصك أساسات هتخدها فى باكلريوس
رأيي أنك تاخد حاجه بعيده عن المجال دا علشان تبقى ملم بكل حاجه
يعنى لو أخدت خرسانه مش هتعرف حاجه عن الصحيه وتصميماتها
فى الاخر كلكم بتتطلعوا "مهندس مدنى"
مبيتكتبش ديزينر ولا تنفيذى ولا أشغال ولا إنشاءات
كلكم مدنى
والمدنى الوحيد الى يعرف يشتغل فى أى تصميم
تعرف تشتغل فى أستيل وخرسانه ورى وكل حاجه
فشوف أنت معلوماتك ناقصه فى أيه وكملها
ومتفكرش فى الشغل مطلقا دا نصيب
ربنا معاك