المستقبل في الكمبيوتر

[FunnyMickey]

سلام عليكم علي اجدع اعضاء واحلي اخوات

بعد التحيه والسلام

دلوقتي ياشباب
انا مش مبسوط في مجال شغلي

بمعني اصح العائد المادي مش اد كده

المهم انا كان حلم حياتي ابقي حاجه كده في الكمبيوتر

وكنت مبسوط اوي في الكليه بتاعتي

تربيه كمبيوتر
وخدنا حاجات كتير اوي
جرافيك وبرمجه وشبكات
يعني الحمد لله اشتغلنا في كل حاجه
بس طبعا مش بتوسع
مقتطفات كده

لان مش شغلتنا يعني

المهم اننا مأخدناش البرامج الاحترافيه اللي فعلا تشغل الواحد

يعني
visual basic
photoshop
تصميم مواقع بال frontpage

يعني حاجات مبدئيه خالص

فانا نفسي اخد حاجه شغل بجد

اخد كورس محترم
اعرف اشتغل بيه في اي حته

اسمع دلوقتي ان الاوريكال اكتر حاجه مطلوبه دلوقتي ومجال شغلها في مصر مطلوب
هل الكلام ده صحيح ولا لا

وايه هيا فكره برنامج الاوراكل اصلا

وايه حاجات تانيه ممكن افكر فيها في المجالات دي

مستني اقتراحاتكم

وللعلم انا باخد في شغلي 1500 جنيه
تزيد ان شاء الله ل2000 بعد الجواز

هل الموضوع مستاهل فعلا اني افكر فيه
ولا كده العائد المادي اساسا كويس وانا بفكر غلط

[mohamed_mohsen]

متابع معاك

[AHMEDCAR]

العائد المادى مش وحش فى ناس كتيره عايشه باقل منه و متجوزين كمان

بس المشكله فى قدام العائد ده مش هايغطى البامبرز حتى فلازم يكون فى حاجه تانيه حنب شغلك

[wesam_salom]

حتى لو العائد كويس

مينفعش انك تقف مكانك

لازم تطور نفسك لان الدنيا عامله زى الطابور

كل يوم واحد يرقى نفسه ويطلع قدامك

وفى يوم هتلاقى نفسك فى اخر الصف

بس دور على مجال شغلك وشوف ايه القريب منه وايه اللى ينفعك علشان تتقدم فيه

علشان مترميش اللى فات وتبداء فى شغل تانى من اول السطر

[FunnyMickey]

مانا مجال شغلي المشكله ان التطور فيه
يبدأ باني افتح لوحدي

وبكده العائد حيكون اكتر
لاني بشتغل في الاجهزه الرياضيه

ملهاش تطور
الفكره اني دلوقتي بمرتب
ثابت

وكنت حابب اني اخد حاجه تغير المجال اصلا

لاني مش حقدر صراحه في الوقت الحالي افتح لوحدي
ممعايش امكانيات ماديه تساعدني

ولا حتي مكان افتح فيه
ومبحبش الاماكن الايجار
لان اللي بتكسبه حتدفعه في الايجار

يعني الموضوع مش حيجيب همه
بس ده اللي في دماغي

[Eng_AmrAllam]

ياباشا بالنسبة لمجال الكمبيوتر فانت اختار المجال اللي بتحبه
ومتسمعش اللي يقولك ان المجال دة مطلوب اكتر من المجال التاني
ببساطة عشان كل المجالات في الكمبيوتر مرتبطة ببعضها يعني في شبكات
وبرمجة وجرافيك مفيش مجال اعلي من التاني عشان كلهم مكملين
فانت اختار اللي بتحبة واللي انت ميال لية
وخد فيه كورسات او الاحسن طبعا تعمل فيه سيلف استدي
وهتلاقي فيه شغل ان شاء الله

[eng_ahmedryad]

اسمع دلوقتي ان الاوريكال اكتر حاجه مطلوبه دلوقتي ومجال شغلها في مصر مطلوب
هل الكلام ده صحيح ولا لا

وايه هيا فكره برنامج الاوراكل اصلا



وايه حاجات تانيه ممكن افكر فيها في المجالات دي

مستني اقتراحاتكم

ربنا يعينك ويوفقكك للصح إن شاء الله

بالنسبة للأوريكال فد برمجة قواعد بيانات ، لو شايف أن قواعد البيانات دخلة دماغك توكل على الله

وعلى فكرة بتحتاج معاها لغة برمجة زي الفيجوال بيسك كمان

لكن أنا نصحتي ليك خليك في البرمجة لأن الطلب عليها كتير وبقت سهله عن الأول بعد نزول .Net

وممكن كمان تذاكرها مع نفسك بدون كورسات ولاحاجة ، وموجود شرح فيديو كتير على النت ممتاز

بس ياسلام لو عندك دماغك شغالة بالمنطقية يبقى هتلاقي أي لغة برمجة لعبة في أيدك

ولو عاوز فيديوهات الشرح موجود عندي وأنا تحت أمرك

[pro_samir]

مبدأيا متسيبش الشغل الا لما تكون حددت انت ناوي تعمل اية وهو مش وحش يعني معقول

بالنسبة للبرمجة فا دي عايزة دماغ و وقت وانك تكون حاببها

وعلشان تلاقي فرصة شغل كويسة لازم توصل لمستوي معقول

مع العلم ان الشغل فيها متعب واصحاب الشركات بيستنزفو الناس ومتفتكرش انك لو فتحت شركة خاصة بيك ان الدنيا هتبقي بمبي بالعكس

علشان كدة دة وأكتر بقولك تغيير المجال مش حاجة سهلة خصوصا انك داخل علي حاجة جديدة عليك خالص وهتتفاجئ بحاجات كتير ، يعني لو تقدر تظبط نفسك في المجال اللي عندك فية خبرة يبقي أفضل ولو عاايز تدخل في البرمجة يبقي خليها بجانب شغلك دلوقتي واضغط علي نفسك في المذاكرة والتطبيق علشان تشوف الدنيا هتمشي معاك فيها ولا لأ

ولو تحب تجرب في البرمجة قولي وانا اظبطك في كورس اونلاين

بالمناسبة انت عندك كام سنة ؟

[FunnyMickey]

طيب معلش لو حد يعرف
ايه مجالات الفيجوال بيسك دوت نت في الشغل

يعني بيفيد في ايه
الاوريكال اعرف انه بيستخدموه في فودافون وموبينيل والكلام ده
فيجوال بيسك دوت نت بقي
بيستخدم في ايه

[smsmxxxxxx]

اوراكل دى قاعدة بيانات بس الشركة عاملة ديفلوبر للتطوير بالجافا
يعنى لازم تتعلم جافا لو ناوى على اوراكل

لو في دماغك الوظيفة فى بنك او الشركات الكبرى فركز على اوراكل
عن طريق كورس في مكان كويس جدا وطبعا هيكون غالي وبيقدم شهادات معتمدة من شركة اوراكل
وبعد كدة تشتغل في شركة تخصصها برمجة اوراكل بأى مرتب حتي لو هتديهم انتا فلوس علشان الخبرة العملية

وبعد على الاقل سنة هيكون معاك شهادة بكورس محترم من مكان معروف زائد خبرة عملية من الشركة اللى اشتغلت فيها
ساعتها هيبقي فاضلك الواسطة اللى تشغلك في الشركات الكبيرة
وطبعا في البداية هيبقي المرتب صغير لكن هيزيد بسرعة لو فايدتك زادت في الشركة



اما فيجوال بيسك دى لغة برمجة بتعمل بيها اللى انتا عايزه مثلا برنامج قواعد بيانات متصل باوراكل او اى قاعدة بيانات اخري

هو تعليمه سهل اوى ممكن تبتدى بنفسك من خلال الكتب اللي على النت
وبعد كدة الكورسات والشهادات المعتمدة من مايكروسوفت
وهكذا باقي المراحل اللى فاتت



نصيحتي ليك
غير مجال شغلك لو مش عاجبك مجالك بس بحرص وبخطوات مدروسة
ولازم تجرب نفسك لان كل شخص ليه قدرات غير التانى
ومش عيب انك تشتغل في مجالين مختلفين في نفس الوقت
خصوصا ان البرمجة ممكن تشتغل فيها من خلال النت

صاحب شركة بينت شوب كان طيار مدنى بس غاوى برمجة وتصوير
عمل برنامج شبيه بفوتو شوب بس ابسط وارخص وسوقه عن طريق البريد لان الانترنت مكنتش انتشرت

ودلوقتى شركته بتكسب ملايين



--------------------------
محمد سالم

[FunnyMickey]

والله انا مبسوط في مجال شغلي كمجال
بس مش طموحي ولا نهايتي اني اكون sales خالص

حفضل كده لحد امتي
وعشان كده فكرت اني افتح لوحدي ويبقي العائد ليا لوحدي
بس انا داخل علي جواز واعتقد ان الخطوه دي مش في محلها دلوقتي
فقلت استغل فتره السنه اللي فاضلالي قبل الجواز
واخد كورس اي حاجه

بحيث لو مقدرتش اني اخد مكان بقي واشتري البضاعه وابتدي لسه
وطبعا ساعتها حكون متجوز ولازم دخل شهري وثابت

اشتغل بالكورس ده
بس بردو موضوع ان المرتب حيكون صغير والواسطه دول قلقوني
لاني صراحه معنديش حد واسطه اساسا في المجال ده
وزي ما قلنا انا باخد 1500 حاليا
و2000 اما اتجوز
يعني المفترض اني حضحي بكل ده عشان عائد اكبر

طب صغير دي اد ايه

تاني حاجه ودي بكرهها في شغلي
انه من 10 صباحا ل10 مساءا تقريبا
واما نقفل بدري بيكون 8

يعني اليوم مفيش يوم اصلا
ولا فيه حياه اسريه
ولا وقت تقعده مع ولادك
ولا تراعيهم ولا تاخد بالك منهم

دي نقطه كمان مخلياني بلف حوالين نفسي
يعني انا مش متجوز عشان ابقي مقطف فلوس يغرفوا منه وخلاص
عاوز يبقالي بيت واسره واشوفهم واخرج معاهم

فمش عارف والله
اعمل ايه

[eng_ahmedryad]

على فكرة المرحلة دي هي اللي هاتحدد الشكل اللي هايستمر عليه شغلك بعد كده

أنا كان ليا صديق ذاكر ال C# .NET في شهر واحد - بس هو كان عنده المؤهلات - وبعده اشتغل في أكتر من مكان

لحد ماسافر السعودية بعقد ومرتب محترم

شوف أنت حابب أصلا تدخل في مجال البرمجة ولا لأ

كمان أوعى تسيب الشغل اللي أنت فيه نهائي إلا لما تلاق شغل في المجال اللي أنت عاوزه

وعلى فكرة مجال الـ Sales منتشر ومطلوب جدا اليومين دول

يعني ممكن تتنقل ومعاك خبرة جاهزة لمكان تاني أحسن ويكون العائد فيه أفضل

وربنا يوفقك للي في الخير والصلاح

[FunnyMickey]

الله يكرمك يااحمد باشا
والله انا لا خبرات ولا بتاع
انا بشتغل في المبيعات عادي
مع قرايبي
يعني ولا شهاده خبره ولا دراسه ولا يحزنون

خلصت كليه لقيتهم بيقولولي تعالي
وانا كنت بنزل معاهم في الصيف كده

بس فنزلت
طبعا كتر خيرهم وبحمد ربنا عاللي انا فيه غيري بياخد 500 و600

بس كحياه فعلا مش لاقي نفسي كده وحاسس اني شويه شويه حقرع واروح بالبطيخه والجرنان

الحياه روتينيه بشكل غبي

ده غير حكايه المرواح متأخر دي
الحياه الاسريه منعدمه تماما وانا مش عاوز اعيش كده
يعن عارف لو حتي نفس المبلغ بس اروح الساعه 5 6
زي الفل
اهو الواحد يعرف يخرج يروح ييجي
ياراجل ده انا مش عارف اروح للميكانيكي ولا عارف العب كوره مع اصحابي ولا عارف اعمل اي حاجه

فما بالك بعد الجواز بقي والمسئوليات تكتر
بس يعني

بس اتعرفت علي واحد صاحبي معاه اوريكال وبيشتغل it
في شركه

عاوز اقولك انه فعلا عبد
بيروح الساعه 11
ويروح الساعه 8

وانا متعقد يعني لو مدير الشركه بعد ما سبت شغلي وخدت كورس واشتغلت وييجي يقولي اقعد مش عارف ايه

ممكن اعمل فيه حاجه
وبدل ما اكون عضو برونزي
حبقي عضو مسجل خطر

يعني مش عارف الصراحه اعمل ايه محتار جدا بجد

[نور القمر]

ممكن تاخد كورس في الشبكات
اختي اخدته تبع راية كمنحة بمرتب وشرط جزائي
وبعده اخدت كورس في الجافا والجافا سكريبت
كل واحد لمدة 3 شهور
هي خريجة هندسة كهرباء اساسا وكانت تقدريها جيد جدا وبالرغم من كدة معرفتش تشتغل الا مؤخرا بكورس الجافا والجافا سكريبت
اما الشباب فسهل يشتغل بكورس الشبكات اكتر من البنات وفرص العمل بالخارج بكورس الشبكات كير

[eng_ahmedryad]

ممكن اعمل فيه حاجه
وبدل ما اكون عضو برونزي
حبقي عضو مسجل خطر

هههههههههههههههه

بص ياسيدي

أنت بالفعل عندك خبرات بس أنت اللي مش حاسس بيها

وجرب كده أدخل على مواقع التوظيف وأعمل لنفسك cv وشوف العروض اللي هاتجيلك

وعلى فكرة مجال المبيعات مطلوب جدا والعائد بتاعه كويس جدا

والميزة أن الشغل هايبقاله تدرج وظيفي ، يعني ممكن توصل لحد مدير مبيعات وده بياخد مرتبات خيالية

والميزة التانية أن هايكون فيه مواعيد للعمل

والله المستعان