سؤال بخصوص الميكرو ويف

[Pharaoh]

اعزاء المنتدى
كنت بسال عن احسن انواع الميكرو ويف لانى معرفش عنه اى شىء
هل منه موديلات؟ او اية الشىء اللى بيتوصف بيه؟

اكون شاكر جدا

[Casio2000]

عندنا شارب العربي و هو مستورد مش متجمع هنا و شغال ممتتاز - بيتوصف ب السعه و هل هو تسخين بس ولا فيه جريل كمان أظن - هما قالولنا كدا اما جينا نشتري

[HAMZAWY]

معلش يا جماعة هو سؤال ساذج شوية بس والله محيرنى وكويس ان الموضوع اتفتح بس محدش يتريق

هو الميكرويف ده بيعمل ايه بالظبط
المشكلة ان المدام بتزن عليا عشان اجيبو بحجة ان مصر كلها دلوقتى جابتو ولما سالتها هو لازمتو ايه بالظبط قالتلى بيسخن الاكل فطبعا صعقت اشترى جهاز عشان بيسخن الاكل بينى وبينكم حسيت انها بتفتى
حد يدلنى يا جماعا ارجوكم

[QaTaR]

معلش يا جماعة هو سؤال ساذج شوية بس والله محيرنى وكويس ان الموضوع اتفتح بس محدش يتريق

هو الميكرويف ده بيعمل ايه بالظبط
المشكلة ان المدام بتزن عليا عشان اجيبو بحجة ان مصر كلها دلوقتى جابتو ولما سالتها هو لازمتو ايه بالظبط قالتلى بيسخن الاكل فطبعا صعقت اشترى جهاز عشان بيسخن الاكل بينى وبينكم حسيت انها بتفتى
حد يدلنى يا جماعا ارجوكم

لا ساذج ولا حاجه الميكرويف ده جهاز بيقى فيه خامس بوتات البوتاسيوم ونيكيولر ويبن اول ما بتحط الاكل بيقوم خامس بوتات البوتاسيوم ويحك نفسه في النيكيولر ويبن فا بينتج حراره رهيبه جدا وهوب الاكل بيسخن

هههههههههه بهزر معاك

اصل بجد مفيش حد في مصر معندوش ميكرويف تقريبا

عموما الميكرويف مش بيسخن الاكل وبس لا ممكن تطبخ بيه وتعمل بيه الي انت عايزه

وفعلا مهم جدا يعني مثلا لو عايز تسخن عيش فينو او كرواسون تسخينه في الميكروويف بيبقى رائع

وكانه فعلا فرش وطالع من الفرن جربه واشتري واحد وحتستغرب ازاي الفتره ديه كلها مجبتش

ميكروووويف وممكن تطبخ فيه لحمه بجميع انواعها بس حتبقى كانها مسلوقه ممكن تعمل بوب كورن

واي شيء يخطر في بالك وفي اطباق بتتباع مخصوص للميكرويف عشان تحبس الحراره

والاكل يستوي بسرعه وكمان الميه متتبخرش فا تضيع فوائد الخضروات مثلا

وانا عندي اتنين بانوسينك وسامسونج تقريبا البانسونيك ميزته انه فيه تسخين اوتو

يعني تظبطه وهو يسخن لوحده بدون ما تظبط الوقت وفعلا عمره ما حرق حاجه بيسخنها بالظبط

[HAMZAWY]

ده الموضوع طلع كبير
شكرا ياباشا على التوضيح

[Pharaoh]

لا و اية
لما تحط فيه كباية شاى عشان تسخنها
الشاى بيسخن و الكباية بتفضل زى ما هى

[MRBEBO]

لا و اية
لما تحط فيه كباية شاى عشان تسخنها
الشاى بيسخن و الكباية بتفضل زى ما هى

ازاي ده يعني المج مش بيسخن السائل بس ؟!

[Ahmed Samy]

المايكرويف هو جهاز بيولد موجات شديدة القصر
اللي بتحرك التركيب الجزيئي في الأكل و تهز الجزيئات بسرعة تنتج حرارة داخلية

مزاياه انه فعلا عنده قدرة تسخين عالية و سريعة

تقدر تستعمله في سلق الخضار و البطاطس و اللحوم و السمك

و تسخين كل حاجة و دي ميزته الكبيرة

ان أي حاجة تدخل الفريزر و لما تعوزها تلاقيها سخنة و طازة في دقيقة و العيش مثلا في 20 ثانية بس .


في ماركات بتوفر عليك الحساب

يعني تحط طاجن طورلي مثلا متجمد

و تختار نظام الديفروست الأوتوماتيك للحوم و تدخل الوزن تقريبي

وهو يعيش حياته



في نقط مهمة تاخد بالك منها :

بلاش تعتمد عليه في غلى المياه لأنه بيسخنها فوق درجة الغليان و ما بتغليش ...وممكن تضرب في وش أي حد لو هزها عند الخروج من المايكرو ويف

ما بيسلقش بيض برضه ...بيفرقع البيض بس بيعمل اوليت في 40 ثانية بدون زيت بجد جامد جدا


الأواني الزجاجية و السيراميك المخصصة للمايكرويف ما بتسخنش منه فعلا بس الأكل اللي فيها ممكن يسخنها خلي بالك

ممنوع تحط اواني خشب أو معدن أو ورق او أي حاجة قابلة للاشتعال

في مايكرو ويف بشواية و ده أفضل لو ناوي على طبخ و تحمير و كده



عزيزي QaTaR

في ناس في مصر لسه ما عندهاش بوتاجاز

الحمد لله

[نور القمر]

انا كنت بسخن فيه العيش البلدي
بيطلع مجلد زي الكاوتش الظبط
في ناس عقدوني منه وانه مضر دلوقت مبقتش واثقة هل الكلام ده كان صح ولا غلط ؟؟؟

[Ahmed Samy]

انا كنت بسخن فيه العيش البلدي
بيطلع مجلد زي الكاوتش الظبط
في ناس عقدوني منه وانه مضر دلوقت مبقتش واثقة هل الكلام ده كان صح ولا غلط ؟؟؟

مجلد ولا ناشف ؟؟؟

و بتسخنيه من التجميد ولا من التلاجة

لو من التلاجة المفروض تمسحيه بمية بايدك قبل التسخين

على فكرة كل الفلاحين بيشيلو العيش البلدي ناشف و لما ييجوا ياكلوه يبلوه و يحطوه على الفرن شوية

يرجع زي زي يوم ماتعمل

[نور القمر]

حتة جلدة طرية مش ناشف لما يكون بايت بس لسه طري عادي
انا سيبته في الشقة وانا بعزل والله بعد ما الناس خوفوني منه بس ناسية ماركته

[Ahmed Samy]

يعني بايت طري مش ناشف

بيجلد فعلا

اسمعي كلامي

العيش الفلاحي يتشال ناشف او متجمد

و اشتري ميكرو ويف بدال اللي سيبتيه

و سيبك من الناس اللي مش فاهمة أي حاجة غير كلمة "بيشوه الجنين و بيجيب سرطان"

وهو امن جدا ولا الهوا لأن الجهاز معزول تماما

[نور القمر]

تعاطفك وحده مش كفاية
تبرع ولو ب 100 جنيه

[Ahmed Samy]

تعاطفك وحده مش كفاية
تبرع ولو ب 100 جنيه

طب كان لازمتها ايه بقى الفنجرة و تسيبيه في الشقة

يعني كنتي خديه معاكي احتياطي ..يمكن تعمليه حوض سمك

كان زمانه جابلك ال100 جنيه دلوقتي بدل اعلانات جمعية رسالة دي

هههههههههههه

[نور القمر]

ههههههههههههه يعني مفيش فايدة
والله عندك حق