الجري (كل) الجدعنة

[A7MED_PHARMA]

من نص ساعة بالظبط

قاعد بقلب صفحات المنتدى...
دخل عليا الصيدلية راجل كبير فوق الــ40 سنة
قالي:"يادكتور الحاجة تعبانة..ولها حقن..ومش لاقيين حد يديهالها دلوقتي"
الساعة كانت 1:15 صباحا
....عادي جدا.......
قفلت الصيدلية وقولتله فين بيتكم
قالي مش بعيد..بس ممكن نروح بالعربية بتاعت حضرتك
قولت:"مش مشكلة العربية ..طالما البيت مش بعيد"
قال:"أصلها تعبانة أوي يادكتور..وأسرع لو روحنا بالعربية"
قولتله:"مش مشكلة ياسيدي..هنمشي بسرعة:
-ماإستريحتش لطريقته.. بس ماجاش في بالي حاجة وحشة-
سيبت العربية..وأخدت معايا المفاتيح والموبايل
ومشيت معاه
شارع جوه شارع..والشوراع كلها من غير أعمدة إضاءة
بصراحة ..قلبي بدأ مايستريحش
قالي:"خلاص يادكتور ..البيت أخر الشارع ده"
الشارع ضلمة كحل
و
أنا مش مطمن وقلقان(مع اني مش أول مرة أقفل الصيدلية بالليل وأروح أعلق محاليل أو أدي حقن لحد)..ووالله لوجه الله مش بفلوس كمان
...
لقيت 4 أو 5 أشخاص في أخر الشارع...مشوفتهومش
لكن عرفتهم من نور السجاير إلي كان واضح جدا في الضلمة
وقفت الراجل وقولتله:"معلش ...هرجع الصيدلية أجيب حاجة"
لقيته مسكني من دراعي.......قال بصوت عالي:"إلحقوا ..هيمشي"
بس على كده
لقيت كوعي في وشه
ولقيتني بجري من غير ماأبص ورايا
وسمعت صوتهم بيجروا ورايا لحد أول الشوارع المنورة ...

وفجأة لقيتني في الصيدلية.
وأديني بحكيلكم إلي حصل

[HeMa_LanCeR]

لاحول ولا قوه إلا بالله
الحمد لله انك خرجت منها علي خير
وربنا يسترها معاك
بس ياريت تاخد بالك وتتعلم من الموضوع ده

وربنا يجزيك كل خير علي تعبك لوجه الله

[yoko]

الحمد لله إنك خلعت

[Ahmed Samy]

100 100

هو ده الحل طبعا

انت تدخل الصيدلية تبوس رجليك و ش و بطن

[mahmoudysf]

الحمد لله انك بخير
وفعلا فى الحالات دى الجري كل الجدعنة

[ahmedbasto]

الحمد لله أنك سليم بلاش حقن بالليل يا دكتور أحمد

[A7MED_PHARMA]

أه والله يارجالة
أنا مش أول مرة أروح مع حد..وبالذات وقت الليل ده..علشان مفيش صيدليات فاتحة بالليل في المنطقة هنا
وأنا مش بعرف أقول لحد لأ..وبالذات في المرض

...الحمد لله جت سليمة..

[aif]

لا حول ولا قوة الا بالله
الحمد لله انها جت لحد كدة
......
انا رأيي تبلغ عن الموضوع ده خصوصا انك عارف المكان وهما اكيد من المنطقة دي
...
المهم الحمد لله على سلامتك

[Mostafa.Mahran]

انت لازم يكون معاك اى سلاح فى الصيدلية علشان انت بتسهر

وبعد كده تسيب الدنيا تولع ملكش دعوة يعنى لو حد عاوز دوا ويقولك معييش فلوس او زى الحيوان ده يقولك حد تعبان و عاوز حقنة و معرفش مين هيموت لو مخدش الدوا

محدش هيموت ناقص عمر وكل واحد له ساعة هيموت فيها

بس الظاهر ان الناس عينها عليك و طمعانة فيك فخلى بالك

[ahmed-moga]

دكتور أحمد قدامك حل من الأتنين حاول تقفل وتمشي بسرعه او تجهز بخاخ بنج قوي

جدا معاك ديما تحسبا لأي هجوم مفاجئ وربنا يحميك

[O.M.S]

الحمد لله ان انتا خلعت و عرفت تجري
بس روح اعمل محضر في القسم
الناس دي ممكن تكون مسجله
والمنطقه اللي هما كانو عايزين يقلبوك فيها اكيد قلبو حد تاني فيها
فروح بلغ احسن

[dode2002]

ياليل اسود كحل هي وصلت لحد كده
حمدا لله علي سلامتك
لا تخرج من صيدليتك لاي سبب لاي سبب لاي سبب
الي عاوز حقنه يروح المستشفي
تعرف انا مانع الزيارات المنزليه نهائيا ولو هيبوس رجلي ممنوع

[O.M.S]

و انا رايي تقفل الصيديله احسن دلوقتي
عشان انتا مش عارف ممكن يجي تاني هوا والناس اللي معاه

[heshamzaky]

لازم تبلغ يا باشا الخوف ليجو عند الصيدلية و يكسرو الزجاج مثلا بطوبة علشان تخرج انا مش عاوز اقلقك بس خلى بالك

[shouk_1987]

الحمد لله يا دكتور أحمد إنك خلعت بالسلامة
وأّمن تعيش مطّمن