بتشرب مياه من الحنفيه ؟؟!!

[زينة الله]

يا سلام على الوطنيه , طيب بس خدي بالك ان نهر النيل دلوقتي مش زي نهر النيل من 7000 سنه دلوقتي فيه بقايا مخلفات المصانع والقوارب + الناس الي بترمي قمامة في الصعيد يعني اصبح نهر كوكتيل ده غير الطحالب والبكتريا فعلا على راي " شيرين " ما شربتش من نيلها ولا هشرب


هو ايه الفرق بين جهاز التقطير والفلتر ؟ ومعقوله المياة المعدنيه كان فيه طحالب واملاح زي الحنفيه

طيب خلاص ما تزعلش
ممكن ندور على الفلتر الكاربونى
بس ميه معدنية لاااااااااااااااااا لانها ممكن تكون اسوء من مياة الحنفية

[Eng.Geo]

هو ايه الفرق بين جهاز التقطير والفلتر ؟ ومعقوله المياة المعدنيه كان فيه طحالب واملاح زي الحنفيه

جهاز التقطير بيغلي الميه ولما تتكثف بيجمع المية المتكثقة في خزان ... وهي ده المية اللي بنشربها .... بتبقبقي خالية تماما من الأملاح وأي حاجة .... ميه بس
انما الفلتر فيه مراحل بيحاول يجمع الاملاح علي الشمع .... الحقيقة مش عارف بيشتغل أزاي بس اللي أعرفه أن جهاز التقطير أفضل بكتييييير
عيب جهاز التقطير :
عايز يبقي في مكان جيد التهوية عشان بيسخن جامد
صيانه كل 3 : 6 شهور حسب تلوث الميه بتبقي حوال نص ساعة
حجمه كبير0.75x0.5 متر
بيتسهلك كهرباء .... يعتبر عيب بالنسبة للفلتر لأن الفلتر مش بيحتاج كهربا

[Ralliart]

خدها مني نصيحه وانا قاعد اذاكر تلوث المياه
المياه الطبيعيه (اللي بيقولول عليها معدنيه) للاسف دي كارثه كبيره جداً جداً
لاسباب كتير ممكن اكتب عليها مواضيع
باختصار مواسير الصرف الصحي بتاعتنا مصنوعه من الفخار والفخار زي ما كلنا عارفين (زي القله) بيسرب المياه للخارج وبيكون آبار جوفيه زي الفل بتقوم شركات المياه المعدنيه تشفط الميه وتعملها شويه معالجه وتعبي في قزايز وتبيع ولو حللتلها تحليل البكتيريا (bod) او (cod) هتلاقي النسبه عاليه جداً واعلى من المسموح
انما الحنفيه بيتحط فيها كلور والكلور دا ميزته انه بيقتل الميكروبات وبيستمر مع المياه في المواسير لان زي ما احنا قلنا الصرف بيسرب ومواسير المياه بيبقى فيها وصلات ممكن تسرب وتختلط فالكلور وظيفته انه يوصلك المياه لحد بيتك خاليه من الميكروبات بس مشكلة الكلور انه لو اتشرب على طول بيعمل فشل كلوي وسرطان (اعلى نسبه سرطان في العالم) وطبعاً الكلور ماده طياره فلازم تسيب المياه شويه لحد ما الكلور يطير وكده هتشرب safe water وانت متطمن
وعامةً الرقابه دايماً على محطات المياه مش على شركات المياه المعدنيه اللي دايماً بيتقفشو ومحدش بيعملهم حاجه (ليا قرايب مفتشين في التموين بيحكولي بلاوي)
بلاد برره بتنقي المياه بالاوزون والاشعاع بس دا مشكلته انه بيقتل البكتيريا وبعد كده بيختفي دوره في المواسير فلو حصل تلوث بعد محطة المياه زي تسريب المواسير بتشرب مياه فيها مصايب وطبعاً هما بيعملو كده علشان شبكات المياه عندهم متطوره ونضيفه ومبيحصلهاش تسريب

وعلى فكره اللي حصل في القليوبيه قريب ده كان بسبب ان وزاره الصحه طلبت انهم يقللو نسبة الكلور علشان نسبة السرطان فلما قللوها المياه اتلوثت بعد المحطه وعملت العمايل دي كلها وخصوصاً ان القليوبيه كلها عائمه على الصرف الصحي

ان كان شر لا بد منه انك تشرب معدنيه يبقى اوعى تجيب حاجه ممليه من بير في القليوبيه (زي داساني) لانها 100% صرف صحي خام وتم تنقيته
حاول تجيب حاجه ممليه من حته غير مأهوله بالسكان (على الاقل تبقى مجاري قليله )

وحسبي الله ونعم الوكيل في اللي مخلينا شغالين بشبكات تعبانه وصرف ضايع ورقابه مختفيه والله انا مش عارف بشرب المياه ازاي بعد اللي شفته عنها (بقت حاجه مقززه )

[ZALABANY]

حضرتك لو عايز خلاصة الكلام ويكون كلام دكاتره

وتاخدها من واحد في دبلومة مكافحة العدوى ومسئول عن تأمين المنشآت الصحية وما بها من مرضى مناعتهم في الارض

تعالى نحط كذا قاعدة عشان نتكلم عليها
1. لا يوجد شيء اسمه تعقيم للمياه : كلمة تعقيم معناها القضاء على كافة اشكال الحياة الميكروبية بما فيها حويصلات البكتيريا وهذا مستحيل

2. ابنك الصغير لو شرب ميا معقمة (جدلا) في بقه الميا باظت تعقيمها (يعني فم ابنك هو اللي بوظ تعقيم الميا لان بق اي بني ادم فيه ملايين البكتيريات)

3. المياه المعدنية كارثة من كوارث الزمن
- مياه راكدة غير جارية : ومن ايام المقريزي عارفين ان الماء الجاري اذا وقف اصبح ماء آسن (معفن يعني)

- مياه تحتوي على املاح اعلى من المسموح (الحد الآمن)

لسه النهارده في معهد التدريب التابع لوزارة الصحة كنا بنجري تجربة على ملوحة الميا , وجبنا ميا معدنية بيعبيها الجيش (اللي بيتقال عليها انضف ميا) وعملنا لها اختبار ملوحة عن طريق وضع كام نقطة من محلول معين ونشوف لون الميا حيتغير بعد اد ايه

الدكتور ادامنا قعد يحط نقطة نقطة لحاد ما حاط الازازة كلها وقال لنا معلش يا دكاتره واضح ان الميا دي مفيش حاجه تغلبها

حضرتك متخيل يعني ايه
كمية من الاملاح المعدنة تعمل حمل على اي كلية بني آدم

4. في فرق بين كلمتين Potable & Palatable
الاولى معناها ان الميا طعمها حلو يعني طعم الميا اللي احنا متعودين عليه (اللي هو المفروض تكون بلا طعم)

الثانية معناها مياه صالحة للشرب بغض النظر عن طعمها

العلاقة اللي بينهم : لا توجد علاقة
يعني ممكن ميا تكون طعمها مقبول وحلو عشان نسبة الحمضيات مثلا تساوي نسبة القلويات انما هما الاثنين نسبتهم عاليا والميا دي كده تبقى مضرة وغير صالحة للشرب


5. الطرق التي تستخدم (لمعالجة المياه) مش تعقيمها
* الكلور : افضل طريقة للقضاء على الميكروبات في المياه يعني من الآخر الميا جايه اصلا من المواسير بالكلور بتاعها ......

* الفلتره : ودي طريقة جيدة مع مراعاة الفلاتر الجيدة
من احسن الفلاتر اللي في مصر الفلتر الكربوني باناسونيك سيبك من الفلاتر بتاعة الخيط والشمعة البيضا

* استخدام التأين والاوزون (الموضة اللي طالعين لنا فيها) العيب الكبير لها لا توجد مفعول ممتد بمعنى لو مليت ازازة ميا من الفلتر وحطيتها في التلاجة بعد نص ساعة الميا بقت ملوثة ثاني

* استخدام الاشعة فوق البنفسجية (ثاني موضة) نفس العيب الكبير
+ عيب ثاني ان الاشعة دي كتر استخدامها مسرطن
+ عيب ثالث البكتيريا ممكن يتعمل لها reactivation

6. خلاصة الكلام

اشتري فلتر باناسونيك كربوني ب 300 جنيه
تغيره كل 3 شهور
انا بغير فلاتر الميا كل اول 3 شهور : اول يناير, ابريل, يوليو, أكتوبر
ازارة الميا تبقى قاعدة في التلاجة مش اكتر من 24 ساعة بلاش حكاية المصريين ان الازازة اللي عليها الدور او الاسقع هي التي تشتغل النبطشية دي والثانية تستنى
ازازة الميا متقعدش برا التلاجة اكتر من ساعتين تلاتة وبعد كده تترمي

وعيش حياتك

سلام

أنا أتفق معك يادكتور 100% انا مركب عندي الفلتر السيراميك اسمه British filter هل الفلتر ده كويس ولا ايه

[Ralliart]

يا جماعه انا بعمل حاجة ومش عارف صح ولا لا ؟ هو اني كنت بستخدم
عبوات شركة نسله دي الي كانت بتتحطط على الكولدير وبطلت اطلبهم تاني وبقيت احط في مياة عن طريق الفلتر الي عندي (6 مراحل) وكل لما تخلص املاها , فهل ده غلط ؟ حيث ان العبوة البلاستيك ده ما اتغيرت من سنه مثلا ولا عادي طالما المياة الي بتتملي فيها بنشربها فبتستبدل على طول ويبقى كده مفش منها ضرر

انا بعمل زيك بالظبط بقالي سنتين بنفس الازازه ومش عارف غلط ولا لأ

[أحمد علاء]

جهاز التقطير بيغلي الميه ولما تتكثف بيجمع المية المتكثقة في خزان ... وهي ده المية اللي بنشربها .... بتبقبقي خالية تماما من الأملاح وأي حاجة ....

طيب عندي سؤال : مش الجسم في حاجة للأملاح بنسبة معينة؟
وهل المياه الخالية تماما من الأملاح غير ضارة بصحة الإنسان؟انا كنت سمعت حاجة زي كده مع بداية موضوع الفلاتر متعددة المراحل خاصة ان في شركات لغت بعض المراحل علشان القصة ديه..
يا ريت الأطباء يفيدونا في الموضوع ده..
جزاكم الله خيرا

[Eng.Geo]

طيب عندي سؤال : مش الجسم في حاجة للأملاح بنسبة معينة؟
وهل المياه الخالية تماما من الأملاح غير ضارة بصحة الإنسان؟انا كنت سمعت حاجة زي كده مع بداية موضوع الفلاتر متعددة المراحل خاصة ان في شركات لغت بعض المراحل علشان القصة ديه..
يا ريت الأطباء يفيدونا في الموضوع ده..
جزاكم الله خيرا

اللي أعرفه ان الجسم بيحتاج نسبة أملاح معينة
مفيش خطورة من الميه النقية وممكن تاخد الأملاح ده من الفواكه والخضراوات والجبن
وبرده يا ريت الدكاترة تقول رأيها

[n_i_t_e]

ميه الحنفية بطلت أشربها من 15 سنة....
المفروض يكون فى صيانة دورية ((((((تنظيف))))) لمواسير ميه الشرب و للأسف فى الغالب مبتتعملش و بلاش أتكلم على البلاوي اللى بتكون فى المواسير دي و اللى بتلوث الميه.
المية المعدنية رأيى أنها أفضل و ترتيبها التانى فى نظري بي برضه أهو الواحد بيشتري حاجة مقفولة مش عارف أتعملت أزاي و مدي جودة اسلوب المعالجة.
حاليا بشرب ميه من الفلترو دي ترتيبه الأول عندي و الأفضل وسط الحلول..الفلتر ببساطة بيحجز الشوائب اللى جاية من ميه الحنفية.
محطات ميه الشرب بتنقى الميه و بيتم التأكد انها وصلت للمستوي الأمن لصحة الانسان. المشكلة مش فى جودة الميه اللى طالعة من المحطات دي... المشكلة أن المية مع بال ما توصل من المحطات للحنفيات بتكون أتلوثت بسبب المواسير. الحل أن الواحد يعمل تنقية للميه فى بيته بحيث الميه تطلع متنقية تتشرب فى ساعتها و ده اللى الفلتر بيعمله.
شمعة الفلتر بتتغير كل 3 شهور و الشمعة دى هى السكرين أو المصفاة اللى بتحجز الشوائب...بتبقى لونها أبيض أول ما بتييجى...بعد 3 شهور لما ييجى ميعاد التغيير بتلاقى لونها بنى من البلاوي اللى حجزتها. و أثناء ميعاد التغيير الواحد بيجيله ارتياح نفسى أن اللى حجزته الشمعة دى كان زمانها جواه.

[windofchange]

الفلتر البريطاني اللي عندي اسمه دولتون Doulton كان ب250 جنيه بالشمعة وده من 3سنين الشمعة بتاعته فخار لونها ابيض كل شهرين ثلاثة اطلعها ادعكها بفرشة مواعين صحون يعني ترجع بيضاء تاني واحطها المهم الشمعة دي درجت تنقيتها ستيراسيل وده مكتوب عليها بمعني اللي قريته انها ممكن تتنظف لغاية 100 مرة ووتغلي في المياه لو عايز وبعدين بعد تنظيفها 100 مرة والمرة كل 3شهور تغيرها يعني ده اوفر حل للي عايز يجرب الفلتر باقل التكاليف ومقلكوش كانت بتتطلع لونها بني غامققق جداااااااااا ودي اقل درجة في التنقية

[mazagngi2010]

الله ينور يا دكتور.
بالمناسبة كان بتاع صيانة الفلتر جه في مرة عندنا الشغل علشان يغير الفلتر ، المهم كان بيعمل دعايا للموظفين وبيقوللهم على قذارة مياه الحنفية وجاب كباية مياه من الحنفية وحط فيها جهاز كده (قضيبين معدنيين علشان يحلل المياه) وراح موصله بالكهرباء ، فجأة لقينا المياه اتحولت لطبقة بني طافية من فوق وفي النص مياه صفرا وتحت بلاوي زرقا.

ياجدعان ده اسلوب نصب ودعايا رخيصه بتستخدمه شركات الفلاتر للضحك على الناس واتفضل الاقتباس ده وعلى لسان اكتر من واحد


وعن حاجة المواطن في دمشق لاستخدام أجهزة لتنقية المياه يقول السيد خلوف ليس هناك حاجة ضرورية لذلك وعلى المواطن أن يكون واعياً ولا يقع ضحية لشركات هدفها بيع ما أمكن من أجهزتها عبر استخدام أساليب غير أخلاقية لتوهم عبر خدع بصرية أن المياه ملوثة حيث يدعي مندوبو هذه الشركات أن هذا الجهاز يكشف عن نقاء المياه وهو في الحقيقة جهاز يعمل على مبدأ التشريد الكهربائي فتظهر المياه مصفره هذا الأمر يسبب رعبا لدى المواطن الذي يمكن أن يقطع لقمة العيش عن أولاده ليشتري هذا الجهاز.

خدع بصرية

وللاستفسار أكثر عن حقيقة التجربة التي يجريها هؤلاء المندوبون أمام المواطنين التقينا الدكتور ياسين معلا دكتوراه في الكيمياء مدير المخابر في الهيئة العامة لشؤون البيئة حيث قال: يتكون الماء من جزئيات متناهية الصغر وقطرة الماء الواحدة تحتوي على الملايين من هذه الجزئيات وكل جزيء من هذه الجزئيات يتكون من أجسام أصغر, تسمى ذرات ويحتوي جزيء الماء الواحد على ثلاث ذرات مرتبطة ببعضها ذرتا هيدروجين وذرة أكسجين والماء النقي يحتوي على العديد من العناصر الذائبة كذلك ولكن بنسب صغيرة جداً مثل شوارد الكالسيوم والمغنيزيوم والصوديوم والبوتاسيوم ذات الشحنات الموجبة وشوارد الكلور وكبريتات الكالسيوم والمغنيزيوم والصوديوم والبوتاسيوم ذات الشحنات الموجبة وشوارد الكلور والكبريتات والحموض ذات الشحنات السالبة إضافة إلى آثار من النترات والنتريت ... إلخ

ويرتبط الهيدروجين بالأكسجين داخل جزيء

الماء بروابط مشتركة تجعل الماء في الشروط العادية من الحرارة والضغط في حالة توازن كيميائي وكهربائي وعندما يتم تطبيق تيار كهربائي يحوي قطبين ( كما في حالة المروجين لهذه الأجهزة) يحدث فرق في الكمون يؤدي إلى تكسير هذه الروابط وتتشرد جزيئات الماء إلى شوارد أكسجين وهيدروجين وتحدث تفاعلات أكسدة وإرجاع في هذا الوسط وتتغير الخواص الفيزيائية للماء وينتج عنها تفاعلات جديدة بين ذرات الهيدروجين من جهة مع شوارد العناصر الذائبة من جهة أخرى وبين ذرات الاكسجين مع هذه العناصر الذائبة من جهة اخرى حيث ينتج سلسلة كبيرة من التفاعلات مما يعطي ألواناً جديدة للماء نتيجة التفاعلات الجديدة الحاصلة ليس لها علاقة بالماء حيث أنه من المعروف أن هناك اختبارات منهجية تستخدم فيها محددة وكواشف محددة يمكن اجراؤها على الماء لتحديد كل عنصر من العناصر الملوثة للماء ومن أهم التحاليل الأساسية التي تجري على الماء الحموضة أو القلوية (ah) - الحرارة - الناقلية الكهربائية - العكارة - المواد المنحلة الكلية (tds) - العوالق الصلبة (ss) - حاجة الأكسجين الكيميائي (cod) - حاجة الأكسجين البيولوجي (bod)- النترات والنتريت - الفوسفات - الأمونيا - ويكون الماء نقياً وصالحاً للشرب في حالة كانت نتائج الاختبارات مطابقة للمواصفة القياسية, ولو كانت الألوان الناتجة تعبر فعلاً عن تلوث لكان قد مات كل من يتناولها خلال زمن ليس بطويل ويمكن القول إن هذه العملية هي خدعة تعتمد على تغيير الخواص الفيزيائية للماء وبالتالي الكيميائية لتسويق أجهزة معينة.

[هيثم]

6. خلاصة الكلام

اشتري فلتر باناسونيك كربوني ب 300 جنيه
تغيره كل 3 شهور
انا بغير فلاتر الميا كل اول 3 شهور : اول يناير, ابريل, يوليو, أكتوبر
ازارة الميا تبقى قاعدة في التلاجة مش اكتر من 24 ساعة بلاش حكاية المصريين ان الازازة اللي عليها الدور او الاسقع هي التي تشتغل النبطشية دي والثانية تستنى
ازازة الميا متقعدش برا التلاجة اكتر من ساعتين تلاتة وبعد كده تترمي

وعيش حياتك

سلام

نشتريه منين يا دكتور احمد
و لو حضرتك تعرف الفرق بينه و بين الانواع
الاغلى يا ريت توضح الفرق من فضلك
و فى جزئيه انا ما فهمتهاش
حضرتك بتقول بتغير فلاتر المياه كل 3 شهور
المقصود الشمعه و لا الفلتر كله على بعضها
وشكرا لحضرتك

[Ahmed A Rahman]

أنا أتفق معك يادكتور 100% انا مركب عندي الفلتر السيراميك اسمه British filter هل الفلتر ده كويس ولا ايه

فيه نوعين من الفلاتر في العالم كله (بتكلم على اي فلتر ان شاء الله يكون فلتر بنزين وزيت)

1. Membranous filter
وده بيكون زي فلتر التكييف كده عبارة عن شبكة والشبكة دي اللي بيتحكم في قوتها هو قطر الاخرام الموجودة فيها من اخرام مرئية لاخرام اقل من حجم البكتيريا

تنظيفها سهل لان البكتيريا بتتحاش على سطح الفلتر

2. Depth filter
وده بيكون فلتر له تخن والبكتيريا تدخل تتحاش جوا المواد المعمول منها الفلتر وبحيث تبقى البكتيريا (محبوسة في مادة الفلتر نفسه) صعب تنظيفه بس بيمنع البكتيريا كويس

انواعه :
- الكربون
- السيراميك
- الرمل
- الزجاج المتكسر
- الزلط

بمعنى اصح فتافيت اي حاجه تلزق عليها البكتيريا

[Ahmed A Rahman]

نشتريه منين يا دكتور احمد
و لو حضرتك تعرف الفرق بينه و بين الانواع
الاغلى يا ريت توضح الفرق من فضلك
و فى جزئيه انا ما فهمتهاش
حضرتك بتقول بتغير فلاتر المياه كل 3 شهور
المقصود الشمعه و لا الفلتر كله على بعضها
وشكرا لحضرتك

موجود في اي محل توحيد والنور
اي محل للعجيل
السعر حوالي 280 جنيه بالفلتر اول مرة
الفلتر مكتوب انه ممكن يقعد 6 شهور لو الميا نظيفة و4 شهور لو الميا مش حلوة (اللي هو نظام لو الميا متنيلة حلوة كنا حطينا فلتر ليه )

فيه نوع ثاني نزل من باناسونيك فيه indicator يبين لك مدى تلوث الفلتر

سعر الخرطوشة اوالفلتر الداخلي 70 جنيه والنوعين بيركب عليهم نفس الفلتر

[pro_samir]

فيه نوعين من الفلاتر في العالم كله (بتكلم على اي فلتر ان شاء الله يكون فلتر بنزين وزيت)

1. Membranous filter
وده بيكون زي فلتر التكييف كده عبارة عن شبكة والشبكة دي اللي بيتحكم في قوتها هو قطر الاخرام الموجودة فيها من اخرام مرئية لاخرام اقل من حجم البكتيريا

تنظيفها سهل لان البكتيريا بتتحاش على سطح الفلتر

2. Depth filter
وده بيكون فلتر له تخن والبكتيريا تدخل تتحاش جوا المواد المعمول منها الفلتر وبحيث تبقى البكتيريا (محبوسة في مادة الفلتر نفسه) صعب تنظيفه بس بيمنع البكتيريا كويس

انواعه :
- الكربون
- السيراميك
- الرمل
- الزجاج المتكسر
- الزلط

بمعنى اصح فتافيت اي حاجه تلزق عليها البكتيريا

يعني هو نفس الفلتر العادي حتي لو مرحلتين بس الفكرة في الشمعة نفسها تكون كربون مثلا

صح كدة ولا انا فهمت غلط ؟

وشكرا للتوضيح

[Ahmed A Rahman]

يعني هو نفس الفلتر العادي حتي لو مرحلتين بس الفكرة في الشمعة نفسها تكون كربون مثلا
صح كدة ولا انا فهمت غلط ؟
وشكرا للتوضيح

لو حضرتك يا استاذ سمير بتقصد الشمعة اللي هي بتكون معمولة من خيوط وملفوفة على بعضها : دي نوع من ال depth filter بس معمولة من خيوط على بعض ونفس الطريقة المفروض ان المصنع وهو بيلفها عارف المسافة بين الخيط والخيط يكون كام ويكون مكتوب على الشمعة بتاعة الفلتر

يعني مثلا لازم نتفق على حاجه

* مفيش حاجه اسمها نحوش فيروس عن طريق الفلتر لان قطر الفيروس 250 nm يعني ربع ميكرو ميتر

* قطر البكتيريا بيكون حوالي 2um ميكرو متر يعني حوالي 10 اضعاف الفيروس


ساعات بيكون فيه فلتر عليه عرض كذا شمعة هدية لقيت الحرامية حطين فلتر قطر الخروم بتاعته 20-50 ميكرون وده في عرف ال microbiology او الميكروبات باب زويلة يعدي قطيع من الفيلة بزلومتهم

يعني معمولين عشان يحوشوا الرمل والزلط بس

انما كل قطر الاخرام ما تضيق كل ما ثمن الفلتر يغلى