بتشرب مياه من الحنفيه ؟؟!!

[ramy_gamal]

لا
هيشتغل
بس هيبقي ضعيف



بالنسبة لمشكلة ضعف المياة حاول تحلها سواء بتركيب موتور للشقة او باي حل اخر يراه السباك مناسب
بالنسبة لطريقة التركيب
صح
يجب ربط الصواميل للأخر بس مش اوي عشان ماتكسرش الشمعة او جسم الفلتر
المهم مايجيبش مياة او ماينقطش
وعلي فكرة لو ربطت جامد هتلاقي ضغط المياة افضل
ولما تقفل المحبس هيمنع التنقيط اسرع
لأن من عيوبه انك بعد ماتقفل المحبس بيفضل ينقط شوية مياة
ودة لأنه بيمتص المياة وبعدين ينقيها فحتي لما بتقفل مصدر المياة هو بيفضل محوش جواه شوية مياة وبيفضل ينزلها

تحياتي

والله المستعان
،
،

شكرا ل اهتمامك
انا عندى موتور بس مبحبش اشغله مع الفلتر انت عارف الموتور بيجيب كل الرواسب اللى فى المواسير وضغط الميه بيكون جامد اوى
بالنسبه ل ربط الصاموله انا بحس لما اربطها اوى الميه بيتقل اكتر ... هجرب تانى واشوف

[No Comment]

موجود عندنا فى اسكندريه فى المنشيه

أنا لسه جايب شمعة من يومين
جابها لى السباك اللى باتعامل معاه لغاية البيت لأن عنده محل قطع غيار
وفيه نوعين صينى وانجليزى
أنا جبت الانجليزى بـ 75 جنيه ، وماعرفش الصينى بكام.
بس الكلام ده فى المنوفية
بس أكيد طالما موجودة فى المنوفية تبقى موجودة فى القاهرة

موجود عندنا في فيصل
مؤسسة الأسراء
وشركة السماح
واعتقد هتلاقيها لو نزلت الجمهورية والسبتية
وسعرها 80 جنيه
والله المستعان
،
،

شكراً ليكم جميعاً ... هأبقى اسأل لما انزل شارع الجمهورية إن شاء الله .

[faragebraheem]

ياجماعه انا سألت انهاردة على فلتر باناسونيك الكربونى فى التوحيد والنورالبائع قالى ان فيه 3مراحل و6مراحل ال3بمبلغ 415جنيه وال6مراحل ب454جنيه وقالى ان الشمعات بتتغير بعد 6شهور ياترى الكلام ده مظبوط ولا لا قالى ان الشمعات بتاعته ب124جنيه وكمان قالى فيه نوع تانى اسمه تانك مرحلة واحدة ب72جنيه ومرحلتين بحوالى 180جنيه ياترى هو ده الفلتر الكربونى بتاع باناسونيك ولا مش هو لانكم فى كلامكم كله لم تذكرو مساله كام مرحلة

[samirsaid1]

يا جماعة بالنسبة للاخوة اللي بيسألوا عن امكانية عمل طلمبات زي بتاعة زمان باستخدام مواسير ارتوازية "جوفية" علي اعماق في الأرض فدا بيعتمد علي المكان نفسه
للأسف المياه الجوفيه معدتش زي زمان نقية و صحية بسبب ان التسريب اللي بيحصل من مواسير المجاري و الصرف الصحي اللي اغلبها مكسر و مشرخ بيختلط بالمياة بتاعة الحنفية و كمان الجوفية و بتلوثها
المشكلة الاكبر طبعا انتوا عاررفين ان اغلب المدن و القري في مصر حاليا مفيهاش صرف صحي "مجاري" زي الصعيد و الدلتا طيب الناس دي بتعمل ايه اقولكم انا
بيبقا فيه عنده بير او بيسموه "بياره او طرنش" في بعض الاماكن دي عباره عن حفره بعمق 4-5 متر و ابعاد 4*4 متر ( طول * عرض) بيتم حفرها اثناء بناء البيت او العمارة في مرحلة حفر القواعد و الاساسات و بتتبني عادي زيها زي حمام السباحة كدا فيه ناس بتمحرها و فيه ناس بتسيبها طوب بدون محاره عشان يزود مسامية التسريب و بتتسقف بالمسلح عادي و بيكمل مراحل بناء البيت عنده عادي و بيتعمل صرف البيت علي البير دا
لحد هنا مفيش مشكلة طيب المشكلة ظهرت امتا بأه
زمان كان الناس استخدامها للميه اقل من دلوقتي بكتير طبعا مكنش فيه غسالات فول اتوماتيك كتير و لا غسالات اطباق والتواليت كان من النوع البلدي مش افرنجي زي دلوقتي و كم الميه الرهيب اللي بيستخدم فيها و حتي لاستحمام نفسه مكنش كتير زي دلوقتي كان زمان الاستحمام من الجمعة للجمعة :-)) او في المناسبات زي العيد و كدا هههههه و طبعا مننساش البانيوهات الله يرحم الطشت الالومنيوم و الكوز المصدي ههههههههههه غير ان عدد البشرية نفسه زاد فحتي الاكل كتر و التصريف كتر يا عم الحج و ربنا يسترها معانا في الايام اللي زي بعضها دي

البير مكنش بيتملي زمان و كانت الامور ماشية

دلوقتي البير في خلال اسبوع بالكتير يكون اتملي و بيطفح لفوق و تحس ان البيت بيتحرك زي الباخرة في البحر هههههههه

للاسف مع الوقت منسوب المياه الجوفيه ارتفع فالارض اتشبعت ميه و مفيش تسريب زي الاول

الناس فضلت صابره علي هم المجاري و كل شوية البير بيتملي و يطفح و كانت المشكلة الاكبر ان بدأ الكلام دا يأثر في اساسات المبني نفسه الحوائط بتملح و الرطوبة عالية بتوصل لاكتر من متر و نص في الحيط من الارض فالمحارة بتنتر و تقع من علي الحيط و بتملح و السيراميك او البلاط بيقفع من الارض و قصة كبيرة ما يعلم بيها الا ربنا

دا طبعا ناهيك عن قرف عملية كسح البير كل اسبوع و طبعا المحليات او ادراة الحي استغلت الموقف علي طريقتها المعهودة عشان تطلع العربيات بتاعتها للكسح خد عندك محسوبية و وواسطة و قلة ادب و سفالة كلنا عارفينها في المحليات

الناس وصلت معاها للحلقوم فاضطرت تفكر في حل للمشكلة دي لان البيوت بدات تظهر عليها آثار بحيرات المياة الجوفية اللي عايمة عليها تشققات و تصدعات و شورخ في المباني و هيصه

الحل كان انهم بيعملوا ايه ؟؟ الحل في الفنكووووش ههههه قصدي [OVERLINE]الأيسون[/OVERLINE] ما هو الايسون ؟؟ ابحث عن الأيسووووون

الايسون بيتعمل بان الناس بينزلوا مواسير بقطر 12 بوصة و لمسافة 30-40 متر في الارض زيه زيه ابار المياة الجوفية اللي ببتعمل في المزارع في الصحراء وطبعا هناك ناس متخصصة في الموضوع دا يصرف عليها من البير بتاعه و طبعا الميه بيتنزل لمستويات علي اعماق كبيرة في الارض و بتختلط بالمياة الجوفية اللي بيسموها الناس بحور المياه تحت الارض
يعني بدل ما البير دا يطلع ميه حلوة لا بيتصرف علية ميه منيلة بستين نيله

وللأسف اغلب الناس بدات تعمل الحكاية دي عشان مشكلة الصرف الصحي و بتكلف حوالي 8-10 الاف جنيه


خلاصة الكلام
معدش ينفع تعمل طلمبة ميه زي زمان لان الطلمبة معروف انها بتسحب ميه من علي حوالي عمق يبدا من 6 متر تحت الارض فدا معناه انك بتسحب ميه مخلوطة بالمجاري

انا خايف انه كمان مع الزمن المياه المعدنية اللي بنقول انها الحل الاسلم و الملاذ الآمن لتجنب تلوث الميه تكون هي نفسها معرضة للاختلاط بمايه ملوثه

تحياتي

كان نفسى أعمل الموضوع دة

[Inteltech]

بالنسبة لموضوع المياه ده بالذات اساسا مفيش حد قال ان مصر فيها مياه معدنية كل الحكاية مياه معالجة متشال منها املاح ومتضاف لها بشكل صناعي املاح ومعادن بنسب اللي بقصده انها مش من مصدر طبيعي كده بمعادنها يعني وللعلم غالبا بتكون عالية في الاملاح بشكل غبي زي مياه بركة وغيرها ومش قصدي افضل نوع عن نوع اما بالنسبة للفلاتر فحدث ولا حرج يعني بامانة كله تقليد في تقليد الواحد معدش عارف الصيني ولا الامريكي ولا مين اللي مقلد مين بس على كل انا عندي الفلتر اللي اسمه ووتر وولرد ده وبيقولوا تايواني وعلشان قصة التعقيم دي اتصلت بالشركة اللي مركبة لي الفلتر من كم شهر وطلبت اللمبة اللي هي بتعقم بالاشعة اللي فوق البنفسجية دي ولما تيجي وتركب هقولكم النتيجة ان شاء الله لاني هاخد عينة من المية المختبر بالشركة عندنا واشوف الفرق قبل وبعد . دمتم بود

[ابراهيم الحاج]

انا فعلا جربت الفلتر السبع مراحل وطعم الميه اتغير تماما ده غير انى بقيت منظر الشمعه وهى بتتغير كل البلاوى ده كنت بشربها ازاى وده من شركه موقعها ده
Aqua-PureSolutions - Home

[memofree]

ربنا يرحمنا

[masafi5]

فلتر باناسونيك كربوني 350 جنية كويس جدا ومبيغريش طعم المية

[ايمن محمود محمد ابراهيم]

مياه معدنية لأن مياه الحنفية ملوثة للأسف، واتجهنا للمياه المعدنية بعد إصابة أحد أفراد العائلة بالفشل الكلوي اللهم اشفه وعافينا ..

حاول تجيب ثلاجة المياة واشتري القرب الكبيرة الـ 19 لتر بيوصلوها للبيت وهتلاقيها أوفر من القزايز (مياه صافي أفضلهم)

لو شربت مياه معدنية أسبوعين مش هتعرف تشرب ميه حنفية تاني وهتحس بطعم بشع لو شربتها

انا نسيت الموضوع الأصلى كله وقعدت ابص على البقة العجيبة دى وسبت الكمبيوتر وجريت علشان اجيب الشبشب واضربها ولكن اكتشفت انها جوة الشاشة ولما ركزت فى النهاية عرفت انها جزء من الصورة
!!!!!!

[faragebraheem]

ياترى الفلترالكربونى ده مرحلة واحدة لانى لما رحت اسأل فى التوحيد والنور قالى فيه 3مراحل ب315 جنيه و5مراحل ب354 جنيه الكلام ده مظبوط انا سألت على فلتر باناسونيك الكربونى انا شفته فى شارع شريف ب345جنيه اللى هو علبتة بيضاء فى لبنى بس مش عارف هو الفلترالعلبة دى بس ولا ليه غيارات

[hamedstar]

السلام عليكم موضوع اكثر من رائع يا جماعه
انا محتاج حد يصور ليا شكل فلتر بانسونيك السيراميك
علشان عاوز اشترى واحد
وياريت لو حد اشتراه فى مكان فى القاهره يقولى اشتراه منين وبكام

وجزاكم الله خيرا على الموضوع الرائع

[Car's Sniper]

مية حنفية وللاسف الفلاتر مالهاش لازمة مع مية بلدنا لانها هى اللى بتلم البكتيريا
ومعلومة هامة للناس اللى بتشرب مية معدنبة : المية المعدنية المفروض اول ما الازازة تتفتح تتشرب لكن ماينفعش نستعمل ازازة على مدار اليوم وكل شوية فبح وقفل لان مية الحنفية فيها كلور لكن المعدنية مافيهاش اى حاجة تقتل البكتيريا وعشات كدة كل ماكانت الازازة تخلص بسرعة كل ما كان افضل

[Egyzizo]

جميع فلاتر المياه المتداولة فى مصر غير صحية وغير مصرح بتداولها

[hamedstar]

جميع فلاتر المياه المتداولة فى مصر غير صحية وغير مصرح بتداولها

حضرتك هتخونا ليه الواحد مصدق اقتنع انه يجيب فلتر
نعمل ايه بقى

[Egyzizo]

طب انت مشكلتك بسيطة علشان لسه هتجيب
لكن اللى كع أد كده وجاب بالفعل ، يروح يسقى بيه الجونينة واللا ايه؟