مصر والكاميرون .... رأيكوا هانعمل ايه؟؟

[emadkamel]

انا شايف اننا مزودين شويه الفرحة بعد كوتديفوار ...هو طبعا احنا نستاهل نفرح انما لسه الكاميرون علشان الفرحة تكمل

تفتكروا هانعمل ايه؟ هانغلب الكاميرون زى العادة ولا هانشوف فصل بارد من بتاع الكوره المصرية

[fahd_628]

ان شاء الله انا متوقع ان مصر تفوز

[إسلام شاهين]

مع إن العروض اللي قدمناها حلوه وقوية لكن أنا مش متفائل خااااااااااااااااااااالص الكامرون عايزه تاخد بطارها والماتش الأولاني مش مقياس خالص ربنا يستر

[emadkamel]

ياريت يا جماعة اللى يشارك يقول رأيه مش بس يكتفى بالتصويت .. ممكن كمان يقول التشكيل الأمثل وتوقعه لسير المباراة وايه اللى لازم نخلى بالنا منه وايه اللى نلعب عليه من خلال متابعاتكم للفريق الكاميرونى

[emadkamel]

مع إن العروض اللي قدمناها حلوه وقوية لكن أنا مش متفائل خااااااااااااااااااااالص الكامرون عايزه تاخد بطارها والماتش الأولاني مش مقياس خالص ربنا يستر

بس رغم كده ماهنش عليك تدى صوتك للكاميرون :) :) ... هو ده المصرى الأصيل ... إن شاء الله ربنا معانا ونكسب

[Ahmed Anwer]

هأقولكم بصراحة ،،

أنا مش متفائل ،،

مش عدم ثقة و لا خوف من أتو و رفاقه ،،

و لكن حاسس إن الأفارقة مش هيسمحولنا ناخد الكأس مرتين ورا بعض ،،

و نكمل السادسية ،،

و الإتحاد الإفريقي خرابة ،،،

و عيسي حياتو ،، أنا قلقان من التحكيم ،، قوي ،،،

و أديكم شوفت متش كوت دي فوار ،، و الحكم ،،

عشان نفوز لازم نبقي متفوقين جدا زي متش كوت دي فوار

معلهش هيا نظرية المؤامرة اللي أنا بحاربها ،،

[د.أحمد سمير]

والله أنا متفائل .. بس قلقان لعدة اسباب :
أولاً : تفاؤلي مرجعه إننا أحسن فريق في البطولة يلعب كرة جماعية بانضباط تكتيكي عال للغاية ، وهو فريق لم يتأثر بغياب أي عنصر حتى الآن ، ولدينا القدرة على فرض إيقاعنا في الملعب وعلى المنافس ، ولدينا طموح الفوز الكاسح حتى آخر ثانية ، والأهم الروح القتالية العالية ، والرؤية الفنية العالية للجهاز الفني .

ثانياً : قلقي مرجعه إننا حتى الآن لم نلعب تحت وطأة التأخر بهدف على الإطلاق ، ودي وإن كانت ميزة رائعة إلا إن المنتخب لم يجرب حتى الآن التخلف بهدف ، ولم نختبر نحن كذلك قدرة المنتخب في التعويض ، وده يعني إن المنتخب لازم يهدف الأول تحت أي ظرف لكن لو اتخطفنا بهدف الله أعلم حالنا هيبقى إزاي .
تاني حاجة إننا تحت ضغط رهيب ، فالكاميرون ليس لديها ما تخسره ، حيث يرى العالم الآن أحقيتها في الخسارة أمام فريقنا المرعب ، أما نحن فنلعب تحت ضغط نتيجة المباراة الأولى ، وتحت ضغط التاريخ الذي يلزمنا ألا نسمح لفريق إفريقي آخر بمعادلة رقمنا في البطولة لخمس بطولات على الإطلاق حتى نغرد منفردين على قمة إفريقيا بستة بطولات كاملة .
أنا توقعي إن الماتش هيكون شبيه جداً بماتش أنجولا .. حذر وهجوم مضاد خاطف .. وتهدئة للملعب .. وتقفيل مساحات .. ولكن هل نفعت توقعات أي شخص حتى الآن ؟؟؟؟

[meza]

أنا واثق إن الجهاز الفنى مفوتش جزئية مهمة زى دى .... إن الفريق الآخر يتقدم علينا بهدف الأول .... أهم حاجة تهيئة اللعيبة نفسياً لظرف زى ده .... خصوصاً إن ماتشات المتتخب زمااااان ...... كان بعد أول هدف فينا نلاقى الحماس قل و الحذر زاد و ضاع الماتش يا ولدى ..... بس الجهاز الفنى أكيد عامل حسابه ...... و إن كانت العبرة بالإختبار الحقيقى فى الملعب.

[MoToRiZeR]

قلقااااان جدا و حاسس انه هيبقي ماتش مقفول .. و لكن الكاميرون مستواها كان اي كلام قدام غانا .. بس برده لسة قلقان .. مش هتطمن غير و انا شايف احمد حسن شايل الكاس .. إن شاء الله اتوقع نكسب بس بنتيجة قليلة لأن اتوقع الماتش هيبقي مغلق جدااااا خاصة من جانب الكاميرون

التشكيل اللي اتمناه

الحضري طبعا .. ادامه وائل جمعة و هاني سعيد و احمد فتحي و سيد معوض
و ادامهم في نص الملعب حسني عبد ربه و محمد شوقي و احمد حسن ارتكاز

ادامهم ابو تريكة و زيدان في مثلث مع عمرو زكي

و بلاش متعب خالص

[Chicco]

أنا قلقان ..... بس متفائل :d
و بصراحة كون إن احنا نوصل للنهائي إنجاز كبير ... ما أظنش حد كان متوقعه قبل البطولة ... الحمد لله
تصوري إن الماتش حيخلص بضربات الجزاء .....ربنا يبارك في الحضري يا رب و يكمل تألقه و ناخد الكاس إن شاء الله
و حاسس إن متعب ممكن يعمل حاجة يصالح بيها الجمهور

[PRO-DRIVE]

ياخوفي يحصل زي خليجي 18 ههههههههههههه

[Karim_Monir]

برضه مش متفائل
خاصة لو جبنا جول في الاول

[sa3dawy]

rabna ysahell

[bishoo33]

باذن الله حنرجع بالكاس
احنا أقوى فريق بالبطوله
وعلى فكرة الجيل الحالى يتمتع بميزه رهيبه جدا وهى التقرب لله
ومن توكل على الله فالله حسبه
ربنا معاك يا شحاته انت وفريقك
التشكيل يجب ان يحتوى على ابوتريكه وأحمد حسن لأن الخبره وضبط ايقاع خط النصف أهم أحد مفاتيح الفوز فى هذه المباراه

[HNaga]

إن شاء الله ربنا هيكرمنا وزى ماكنا قلقانين قبل ماتش كوت ديفوار وبنا كرمنا بزيادة
ربنا إن شاء الله يكرمنا برضه