فى حد راح مزارع دينا قبل كدة ؟

[moudy2002]

اخوانى الكرام
ممكن الى راح مزارع دينا قبل كدة يكلمنا عنها شوية انا لاقيت انكم عملتم مقابلة هناك قبل كدة وناس كتير راحت ؟

اصلى عايز اخد المدام والاولاد واقضى هناك يوم بس كنت عايز اعرف اية الى موجود هناك
يعنى نظام الاكل هناك .. ولا اخد اكل معايا ؟
فى اماكن العاب لاطفال ؟
فى اماكن مفتوحة وخضرة الواحد ريلكس هناك شوية
فى اماكن لو الواحد عايز يبات
يعنى من الاخر ممكن الواحد ممكن يقضى يوم كامل هناك ولا اكبر دماغى وطلع العين السخنة احسن
وشكرا مقدما

[sab3aawy]

لو انت ساكن فى مدينة نصر زى ما هو مكتوب فى البروفايل بتاعك اشترى راحتك وكرامتك وعليك وعلى العين السخنة بدل بهدلة المحور

[moudy2002]

سبعاوى باشا بنفسة !!!
شكرا ياباشا على الرد
فعلا انا ساكن فى مدينة نصر .. واللهى انا رأيى برضة العين السخنة بس الواحد بيقول يقعد فى الخضرا شوية .. يلاا مش مهم .
طب ممكن حد يوضحلى موضوع العين السخنة دة يعنى ممكن الواحد يقضى اليوم هناك ويرجع فى نفس اليوم ولا هتبقى متعبة والواحد يبات احسن ..
واية القرى الكويسة وسعرها يكون حنين ؟؟

[Karim_Monir]

حبيب قلبي انا اقوللك فكرة احسن
انت تاخد بعضك وتطلع على الاسماعيلية
الطريق حوالي ساعة ونص بالظبط
تدخل الاسماعيلية نفسها وتوصل لحد معدية 6 هناك فيشاطيء قناة السويس
الدخول ب 10 جنيه للفرد قاعد وقدامك الضفة التانية والسفن رايحة جاية
مليان مراجيح للاطفال ومسطحات خضراء
نضيف جدا لانه تابع لهيئة قناة السويس
تقدر تطلب غداء سمك او اي غداء تاني
ولو مش عايز تتغدي عندهم اي مطعم سمك الاسماعيلية مليانة
وانت راجع ما تنسانيش في سبتبن فراولة اسماعلاوي طعمها تحفة
ولو ماجبتليش فراولة ما تنسانيش في دعوة

[محمد ابراهيم 1]

يا كريم باشا الساعه ونص بتوعك دول يتفكوا بكام ساعه عادى
اصل انت عارف بتمشى انت 180 ومحدش بيبقى محصلك

[ecybrarian]

لو هاتروح الاسماعيلية يبقى لازم تعدي على ابو رشا بتاع السمك وهاتدعيلي..وممكن بدل قناة السويس تخش دخلة ابو سلطان وتشوف حد من السماسرة هناك يجيلك فيلا (جنينة وركنة للعربية) مش هاتطلع غالية وتخليها عائلي بس علشان الأولاد يخدوا راحتهم...اعتقد إن الفلل دي على البحيرات المره مش على القناة! (انا للاسف ماليش في الجغرافيا قوي)

[Karim_Monir]

ابو سطان حلوة بس كدة اليوم هايعدي منه يعني الموضوع حلو لو فيها بياتة
لكن يوم صد رد بفضل الشواطئ خاصة الخضرا وكدة وهناك حمامات نضيفة واماكن تغغير ملابس نضيفة جدا
وقاعات تدريب ضرب نار وحاجات كدة
-----
محمد باشا اصلي طريق اسماعيلية ماعلهوش رادر غير في الكيلو 42 بعد الشروق وقبل المركز الطبي العالمي وواحد تاني في الاخر بعد البوابة بس قليل لما بيقف
لان المسافة كلها 130كم وانا قلت ساعة ونص للناس اللي بتمشي 100 مش ليا

بس لما بيكون معايا العيال مش بزود عن 130 ما تقلقش

[hamedo0]

نضيفة جدا
وقاعات تدريب ضرب نار وحاجات كدة
-----

انا اسف يا اساتذه سوال خارج عن الموضوع ياتري في قاعات تدريب ضرب النار جوه القاهرة ولو فيه
ايه شروط الالتحاق بيها شكرا"

[emam]

يا جماعة لو سمحتو - عوزين نعرف اخبار مزارع دينا ايه - وبالذات ان احنا فى فصل الشتاء والجو برد مش هيبقا ظريف موضوع البحر اليومين دول .

[اسلام المصرى]

اخوانى الكرام
ممكن الى راح مزارع دينا قبل كدة يكلمنا عنها شوية انا لاقيت انكم عملتم مقابلة هناك قبل كدة وناس كتير راحت ؟

اصلى عايز اخد المدام والاولاد واقضى هناك يوم بس كنت عايز اعرف اية الى موجود هناك
فكرة جميلة جدا , أنا روحت فسحت "الفريق" هناك قبل كده :D أهم حاجة الجة يكون حلو شمس يعنى , المكان نظيف جدا حوالى 60 كم من بوابات مصر الأسكندرية الصحراوى , فى شادر فاكهة هو غالى شوية بس عندهم كل حاجة و طازه , فى سوبرماركت , فى جنينه و بعض لعب للأطفال مش قد كده بس القاعدة هناك فى الشمس و الخضره جميله جدا.
يعنى نظام الاكل هناك .. ولا اخد اكل معايا ؟
فى كل حاجة هناك , فطير لحوم فراخ مشويات , و عيش بلدى حلو جدا.
فى اماكن العاب لاطفال ؟
فى بس تعبانة شوية , مراجيح و زوحليقة , ممكن تاخد كورة معاك مثلا.
فى اماكن مفتوحة وخضرة الواحد ريلكس هناك شوية
نعم يوجد , بس أهم حاجة الجو يكون حلو!
فى اماكن لو الواحد عايز يبات
الله أعلم , بس لا أعتقد.
يعنى من الاخر ممكن الواحد ممكن يقضى يوم كامل هناك ولا اكبر دماغى وطلع العين السخنة احسن
وشكرا مقدما

روح حضرتك و مش هتندم ان شاء الله , ماتنساش تاكل فطيره بالعسل و الجبنة و تشرب واحد نسكافيه أو كابوتشينو :) و أدعيلى.

[tmz9111]

روح حضرتك و مش هتندم ان شاء الله , ماتنساش تاكل فطيره بالعسل و الجبنة و تشرب واحد نسكافيه أو كابوتشينو :) و أدعيلى.

شكرا على المعلومات و لكن هل توجد لديك فكره عن الاسعار

[Karim_Monir]

انا اسف يا اساتذه سوال خارج عن الموضوع ياتري في قاعات تدريب ضرب النار جوه القاهرة ولو فيه
ايه شروط الالتحاق بيها شكرا"

مممم
لا والله مش هاقدر افيدك:(