نظريه الحديده والبلطجه الجديده

[zkralla]

فى الكام سنه الى فاتو انتشرت ظاهره دق حديد فى الارض
كل واحد يروح واخد مكان قدام بيته ويروح داقق حديده ومركبلها قفل عشان محدش مكانه وده التطور الطبيعى لوضع كاوتش وطوب لحجز مكان
كأن كل واحد اشترى شقه اشترى معاها حته فى الشارع
الجديد بقى حصل عندى فى جراج العماره الى مش بيستوعب الا 15 عربيه والعماره عدد الى معاهم عربيات فيها اكتر من كده بكتير المهم راح بعض الاخوه فى العماره بدق حديد عشان كل واحد يحجز مكان فى عربيته
طيب الجراج ده ملك لكل السكان على اى اساس تستولى على مكان فيه بالعافيه
طبعا عملنا اجتماع اتحاد ملاك وتم ازاله كل انواع الحديد الموجوده
أنا مقتنع تماما ان ده نوع من انواع البطلجه
المهم أن فيه ناس بكلمها وهى مقتنعه تماما أن موضوع الحديد ده حق مشروع فقلت اخاد رأيكم وارجوا الاجابه بأمانه كل واحد حسب قناعته الشخصيه دون تجمل
هل من حق أى شخص أنه يدق حديده فى الشارع او جراج خاص ؟

[محمد محمد]

هو طبعا مش من حقه الا اذا كان دافع حق الركنة دي.

[أحمد كمال]

بص يا باشا

انا ضد الموضوع بالذات لو جراج على المشاع او شارع

يعني ايه حق و بتاع

بصراحة انا اما اشتريت البايك اضطريت اسفا اني اكل حتة من الرصيف (الرصيف مش جنب الرصيف)

ليه؟

لاني لو ما عملتش كده هتتسرق وش

كان لازم ادق خطاف في الارض عالرصيف و اربطها فيه بجنزير و اغطيها

و لو اتركنت بعيد انا متأكد انها هتتاخد على عربية نص نقل

فللاسف انا مضطر اعمل كده

بس عمري ما عملت و لا هاعمل كده في عربية ...... لانه مش شارع ابويا

[shankosi]

بصراحة ظاهرة الاستيلاء على الشوارع اصبحت غير طبيعية بالمرة

كل اللي له واللي مالهوش في الطور ولا في الطحين يجي يقفل قدام دكانه بطوبع او حديدة ولما تكلهم يعمل أبو علي ويقولك "ده مكان أكل عيش" وكأن الناس دي لم تسمع قول الله تعالى "في السماء رزقكم وما توعدون" صدق الله العظيم.

بصراحة تقريباً كل يوم بشوف خناقه على الركنه وعلى احتلال الشوارع

وأنا طبعاً مع حضرتك دي إسمها بلطجة وتعدي على حقوق الغير

أنا واحد من الناس براعي مني لنفسي ولما بيكون فيه مكان لميكانيكي مثلاً لكن مش كل واحد يعمل احتلال ويقول ده حقي

الشارع ملكيه عامة.

هو طبعا مش من حقه الا اذا كان دافع حق الركنة دي.

الركنة المدفوعه داخل الجراج فقط وليس الشارع