سؤال بخصوص الكهرباء فى البيت الفولت عندنا 170 بس مش 220؟!!!

[merosss]

من كام يوم كدة النور قطع و فضل فترة طويلة وبعدين تانى يوم قطع فى نفس الميعاد فترة اقل شوية جيت بقة بعد الموضوع دة اشغل التكيف يشتغل وبعد 3 دقائق يفصل من غير ميجيب هواء ساقع المهم جبت بتوع التكيف استغربوا جدا و قاسوا الفولت كان 170 بس فى كل فيش الشقة ووقاسوا عند البواب بردة 170 بس وقالوا العيب فى الكهرباء والتكيف سليم بس بيفصل عشان الفولت الى جايلة قليل انا مش عارف الكلام دة صح ولا اية ولو صح يبقة كدة كل حاجة فى البيت ممكن تبوز بقة مع ملحوظة التكيف دة 3 حصان والتكيف الى 1.5 حصان شغال عادى

[M.Elsheikh]

انا مش متأكد
بس كده ممكن يكون الجهد ده بين 2 فازه وليس بين فازه والارضي
وده فعلا بيحرق الاجهزه و اللمبات
لو عندك مفك تست جرب كده على العمومي بتاع الشقه
لو مفك التت بينور على الطرفين يبقى ما فيش ارضي و لازم تتصل بشركة الكهرباء

[SGH]

كلامهم صح و دة تامين للجهاز و لازم تجيب شركة الكهربا يقيصوا الداخل للعمارة علشان ساعات بيبقى فية تفاوت بين الشقق لاختلاف الاحمال فينقلوك على فيوز تانى ماعليهوش حمل او تكون مشكلة عامة للعمارة او المنطقة فبيعملوا تدعيم بعد ما يعاينوا و يكتبوا تقرير

[hani945]

ياباشا المشكلة بسبب الأحمال الزيادة والسبب فى كده هو إستهلاك الكهرباء بكمية كبيرة علشان فيه ناس كتير مركبة أجهزة تكييف ومراوح وكمان علشان كأس العالم هتلاقى الناس كلها مشغلة التلفزيونات والمشكلة دى كمان بيعانى منها أصحاب أجهزة الكمبيوتر والنت ، لإن الكهرباء الضعيفة دى بتخلى أجهزة الكمبيوتر ترستر كل شوية ، والراوترات بترستر كل شوية هى كمان .


الحل إيه :

1- هتركب عندك مثبت كهرباء قدرته كبيرة لا تقل عن 5 كيلو وات للشقة عندك .
2- وبالنسبة لجهاز التكييف شوف القدرة بتاعته كام بالوات وتجيبله مثبت كهرباء مخصوص له ، علشان الحمل كله ميكونش على مثبت الكهرباء الأولانى ده بس .

الفرق بعد تركيب المثبت :

هتلاحظ إن الإضاءة فى الشقة كلها اتحسنت لإن اللمبات كانت شغالة على 170 فولت وبقت بتشتغل على 220 فولت يعنى بقت شغالة بالكفاء بتاعتها .
حتحافظ على الثلاجة والتلفزيون والأجهزة الكهربائية الأخرى زى المراوح والخلاطات والرسيفر والغسالات وهتلاحظ تحسن فى أداء هذه الأجهزة .
أقرب مثال ملحوظ : هتلاقى المراوح بقت تجيب هوا أكتر من الأول على السرعات المختلفة .

المثبتات اللى موجودة فى السوق : أغلبها صينى ، واليابانى غالى ، بس الصينى بيؤدى الغرض المطلوب منه , والمثبات فى منها قدرات مختلفة ، نصف كيلو وات ( 500 وات ) ، وفى منها كيلو وات ( 1000 وات ) ، وفى منها 5 كيلو وات ( 5000 وات ) زى اللى موجودة فى معامل الكمبيوتر ، وفى منها 10 كيلو وات ( 10000 وات ) بس دى غالية .

[pro_samir]

انا عندي نفس المشكلة وبجد مبعرفش انام من الحر خصوصا اني دور أخير كمان ، التكييف يا ميشتغلش خالص يا اما يشتغل والكمبريسور يقعد يرزع ولازم الحق افصلة بسرعة

عملت سيرش علي النت لاقيت التكييف 2 حصان ممكن استبليزر 2 كيلو يقومة لأن كل حصان تقريبا بيحتاج 750 وات يعني لو 2 كيلو المفروض يقومة كويس

بس لما سألت ناس معرفة قالولي مش هيستحمل وهيتحرق لازم 5 كيلو

الأنواع اللي لاقيتها واحد اسمة جيسبك تقريبا علي كلام الراجل انة ياباني تقفيل صيني وال2 كيلو بتاعة ب475 جنية وكمان بدون ضمان ! وكدة الله أعلم هينفع ولا لأ

والناس المعرفة رشحولي نوع اسمة عبد الشافي :)) ال5 كيلو منة بيعمل 650 جنية ومعاة ضمان وبيشكرو فية بس الله أعلم بقي

يا ريت لو حد يأكدلنا موضوع الأحمال دة وهل 2 كيلو يستحمل تكييف 2 حصان مثلا ولا فعلا بيبوظ

الواحد كرة البيت بجد بسبب الموضوع دة ومش عايز اروح من الشغل

[theking2690]

نفس الموضوع برضه حاصل عندى و شركة التكييف قالتلى عيب كهرباء رغم ان التكييفات التانيه شغاله سليمه

[powersha]

يباشا انت المفروض اولا تبلغ شركه الكهرباء لان الفرق كبير جداااااااااااا 50 فولت فرق دروب احمال
وده خطر على الاجهزه

[أحمد كمال]

2 حصان يعني قدرة التبريد 2 حصان

و الحصان 745 واط يعني قول 750

يبقى 2 حصان يعني 1500 واط أو 1.5 كيلو واط

بس انت نسيت حاجة مهمة جدا

ان ده خرج التبريد

مش الكهرباء المسحوبة

لان اكيد فيه فقد في الطاقة سواء سخونة في الاسلاك او حركة المراوح و الكباس و غيرها

و أكيد هتبقى اكتر من 500 واط

عشان كده الناس بتقول لك ماتجيبش 2 و هات 3 او 5 كيلو واط

[motoxp]

زيادة الفولت او قلته خطر على الالات الكهربية ويسمى over and under voltage faults و بيخلى الاجهزة تشتغل مش بكل قوتها ده لو فولت قليل اما لو فولت زيادة حيحرق العزل للكابلات و يتم تدمير المعدة بالكامل

نصيحة منى اما voltage stablizer او تشتكى لشركة الكهرباء و هى المسئولة



بالنسبة لجهد الفاز للفاز 380 فولت

اما الفاز مع الارضى 220 فولت وهو ده اللى بيدخل البيوت وممكن يزيد او يقل بنسبة 5 % كما تقول المواصفات العالمية يعنى ممكن 230 فولت او 210 فولت ده المسموح ليه

واى استفسار انا فى الخدمة اخوكم مهندس كهرباء قوى و الالات كهربية احنا هنا اخوات

[n_i_t_e]

طبيعى تكييف ال3 حصان ميشتغلش لأنه مش هيعرف يقوم أصلا مع الجهد ده. أجهزة التكييف بتحتاج تيار عالى شوية عند بدء التشغيل بيسموه Starting current بعد كده التيار بيرجع يقل لحد ما ياخد القيمة العادية بتاعته اللى بتلاقيها فى الكتالوج. الجهد الضعيف ده مش بيوفر له أصلا Starting current فمبيعرفش يقوم.
الموضوع ده شغال اليومين دول بسبب الحر كله مشغل التكييف و الحمل على الشبكة عالى جدا

[mazagngi2010]

بسبب ان الناس كلها بتشغل التكييف وشركه الكهربا عندنا ماشاء الله تعبانه فالكهربا بتقطع كل يوم دلوقتى فى كل حته ميقلش عن ساعه علشان الشبكه ترتاح شويه من الاحمال

[زهير فكري]

نفس المشكله والله ياجماعه , بس الفولت انا قيسته عندي 180 فولت , وطبعا جميع الأجهزه لا تعمل بكفاءه عدا , التليفزيونات , و اجهزه الكومبيوتر , و الحل زي ما الاخوه قالوا هو المثبت , و انا جربت الجسبك ياباني تقفيل صيني بقاله سنتين و كنت شاريه 160 جنيه , و ما فيش منه مشاكل .

[yasseropel]

استبليزر 5 كيلو بسعر مغرى

يا جماعة للى عايز استبليزر 5 كيلو انا عندى استبليزر تحفة اصلى 5000 كيلو وات كنت جايبو علشان البيت عندى الكهرباء ضعيفة ومكنتش بتشغل التكييف وبعدين انا نقلت فى مكان تانى ودلوقتى مش محتاج اللاستبليزر اللى عايز يشترية فرصة بسعر مغرى يكلمنى على الرقم دة 01152331210
او يراسلنى على الايميل دة yasseropel@hotmail.com

[sas5]

يا جماعة للى عايز استبليزر 5 كيلو انا عندى استبليزر تحفة اصلى 5000 كيلو وات كنت جايبو علشان البيت عندى الكهرباء ضعيفة ومكنتش بتشغل التكييف وبعدين انا نقلت فى مكان تانى ودلوقتى مش محتاج اللاستبليزر اللى عايز يشترية فرصة بسعر مغرى يكلمنى على الرقم دة 01152331210
او يراسلنى على الايميل دة yasseropel@hotmail.com

انا مهتم - ممكن اعرف كيف حالته ؟
ونوعه ايه
وكم السعر المطلوب

ممكن ترد على الخاص بعد اذنك

[tota_ys]

عندى التكيف يونيون اير واحد ونص حصان مش عايز يشتغل والفولت اللى داخل الشقه 160 ومش عارف اعمل ايه الجو حر نار وانا مش فاهم اى حاجة ابلغ يعنى فى شركه الكهرباء هو مافيش حاجة وحده ماشيه صح لا اله الا الله