اية رايكم فى مدينة الشروق

[alaasaid]

طيب استفسار تاني...ه الشروق باكملها تابعة لجهاز مدينة الشروق؟؟بما فيها اراضي طريق مصر الاسماعيليلة؟ وافي جزؤ تابع لجهاز العبور؟

الشروق بأكملها تبع جهاز المدينة , انما اراضى طريق الاسماعيلية مش كلها تبع الجهاز فى اراضى تبع الجيش و اراضى تبع الاسكان و أخر لخبطة

[alaasaid]

بالنسبه لاراضي الشروق الي منزلها بنك الاسكان و التعمير فيه فئتين
ارض 210 متر و ارض 267 متر
الارض ال 210 متر سعر المتر تقريبا 550 جنيه
و ال 267 متر سعر المتر 675 جنيه

الدفع علي 4 سنين
اول سنه الي هي السنه الي هايتم فيها القرعه بيتدفع 10000 جنيه مع تقديم الاستماره
و لو رسيت عليك بتدفع 25% من قيمه الارض من ضمنهم ال 10000 الي اتدفعو في الاول
و بعد كدا كل سنه 25%

البناء خلال 5 سنين من تاريخ التملك

و لو مارسيتش عليك القرعه فلوسك بترجعلك و عليها الفايده الي حققتها


السنادي نازل مدينه الشروق و بدر و 15 مايو
بس احسنهم الشروق في الموقع

هحاول ارفع كراسه الشروط بكرا لان النت بطيء حاليا

السلام عليكم ,

أنا مش خبير الصراحة فى اسعار الاراضى بس حاسس ان السعر كويس و طريقة الدفع كويسة و أهم حاجة ان مهلة البناء 5 سنوات و كدة أكيد المكان هيكون اتغير و اتعمر أكتر

[saadelden]

السلام عليكم ,

أنا مش خبير الصراحة فى اسعار الاراضى بس حاسس ان السعر كويس و طريقة الدفع كويسة و أهم حاجة ان مهلة البناء 5 سنوات و كدة أكيد المكان هيكون اتغير و اتعمر أكتر

يا فندم طالما شرط البناء خلال 5 سنين هتلاقي البلوك الي حواليك كله بنى و ناس ابتدت تسكن
و 5 سنين كمان و هتلاقي العمارات كلها ساكنه و المنطقه شغاله الله ينور

زي اكتوبر و اسكان مبارك اول ما اتعمل قليل الي راح سكن هناك
دلوقتي شوف الوضع بقى عامل ازاي ؟!

[alaasaid]

يا فندم طالما شرط البناء خلال 5 سنين هتلاقي البلوك الي حواليك كله بنى و ناس ابتدت تسكن
و 5 سنين كمان و هتلاقي العمارات كلها ساكنه و المنطقه شغاله الله ينور

زي اكتوبر و اسكان مبارك اول ما اتعمل قليل الي راح سكن هناك
دلوقتي شوف الوضع بقى عامل ازاي ؟!

أنا متفق مع حضرتك تماما , الفترة المتاحة للبناء كويسة و المكان هيكون اتغير ان شاء الله للاحسن

[mosad2]

السلام عليكم

انا انشاء الله ناوي اتري في الشروق شقه بالتقسيط
ايه افضل منطقه و احسن شركه ممكن اشتري منها.؟

[Hebaghareeb]

كل الشكر والاحترام

جزاكم الله خيرا . ربنا يكرمك في الدنيا والاخرة . انا استفدت كتير وانت لخصت كل حاجه. الموضوع رد علي كل التساؤلات عندي . ربنا يكتب لك الخير كله

[Hebaghareeb]

كل الشككر والاحترام

الاحياء في مدينة الشروق

قبل ما اتكلم عنها في معلومتين مهمين

الاولى ان الاحياء عمرانها اقل من المناطق يعني لسه بتتعمر رغم انها فيلات طبعا السبب الاول ان الجهاز مكنش حاطط مهله للبناء دلوقتي جهاز المدينه وضع شروط ومهل للبناء في الاحياء فتلاقيها البناء قام فيها وابتدى العمران يزيد وطبعا زي ما قلت من قبل ان المنطقه اللي فوق في الخريطه اللي هي من طريق مصر اسماعيليه سواء احياء كانت او مناطق فهي متعمره عن المنطقه اللي ناحية مدينتي الاعمار فيها أقل بس بيقوم برضو

والثانيه ان الشركات مش بتقسط في الاحياء اكتر من 5 سنوات يعني في المناطق بيكون في تهاود شويه اما في الاحياء ماسكين في ال5 سنين بالعافيه وفي كتير مش بيقبل اكتر من 4 سنوات او 3 كمان ومساحات الشقق في الاحياء كبيره نوعا ما فده بيعطي عدم راحه سواء في القسط لانه مضغوط بعدد سنين اقل او في الاجمالي للمبلغ لان المساحه كبيره شويه وكمان سعر المتر عالي وحتى ان مش عالي اوي يعني في احياء سعر المتر 1900 او 2000 لكن تقع المشكله في الوقت اللي سيدفع فيه القسط بيكون صغير فبيكون كبير الا اذا امكانيات الشخص تسمح بكده وربنا يرزقنا يارب والجميع ان شاء الله

ولاحظوا انه على الخريطه الشروق مقسمه شرق وغرب

والغرب طبعا اللي تقع في المنطقه الغربيه على الخريطه بس مش مكتوب عليها غرب

والشرق مكتوب عليهم شرق يبقى المقابل له الغرب
وبرضو لاحظوا ان غالبية الغرب في الاحياء متعمر عن الشرق واكتره خدماته مكتمله ومستقبله افضل وسعره اعلى

ونيجي بأه لافضل الاحياء في الشروق

1-الحي الخامس والسادس ودوول كلهم كمبوندات يعني غالبا مفيهمش فلل مستقله للبيع ولا عن طريق شركات وطبعا سعر المتر عااالي اوي يعني 2800 او 3000 للمتروممكن اكتر

2-الحي الرابع فيلات وده عالي برضو وبيقولوا كمستقبل ممتاز والله اعلم وسعر المتر من 2000 الى 2500 او اكترقليلا بس حي رااااقي ما شاء الله وبرضو فيه كمبوندات وسعرها عالي تمنها غير الفلل المستقله

3- الحي السابع والحي الثامن فيلات وسعر المتر اغلى شويه من الرابع والسبب في غلوه انه طالع ويعتبر مكتمل وده اللي مزود سعره وكمان قريب جدا من مركز المدينة الرئيسي ومن الجامعه الفرنسيه وهي اغلى الاماكن حولها يعني حيين راقيين جدا

4- الحي التاسع فيلات وهو اللي بعد الحي الثامن على الخريطه ومشابه في الاسعار يعني 2200 الى 2400 للمتر تقريبا ومتعمر برضو بس اقل شويه في العمار من السابع والتامن

5- الحي الاول غرب متعمر وبرضو فوق ال 2200 للمتر

6-الحي التاني شرق فيلات شيك اوي برضو وهادئ بس يعتبر مهجور لسه العمران قليل وسعر المتر من 1850 الى 2200


7- الحي الثالث شرق راقي و موقعه مميز بس لسه مهجوور مفيش خدمات بس مستقبله كويس لان موقعه كويس جدا هو في وسط الشروق ومقابل له الحي الرابع وكمان قريب من مدينتي هو بعد التامنه والسابعه عمارات وسعر المتر من 2000 وانت طالع

7- الحي الثالث غرب متعمر وبرضو به اماكن مهجوره بس خدماته موجوده لكن هو له جانب قريب اوي من اسكان الشبااب ويطل عليه فورا بينهم شارع اما اذا دخلت فيه شويه بيكون كويس جدا وسعر المتر من 1850 وطالع

9- اقلهم الحي الاول شرق وغرب والحي التاني غرب دوول اقل شئ بالنسبه للاحياء الفلل بس مش وحشين لكن احنا بنقارن الاحياء ببعض فده ترتيبهم

بس عموما السكن في الاحياء حتى اذا شقق اكيد ارقى من السكن في المناطق بس لا يمنع ان كثيير من المناطق العمارات مميزه وجميله وراقيه مثل ما قولت لكم ترتيبهم


وطبعا كل مدينه ولها مميزات وعيوب وبالنسبه للي عرفته عيوبها عدم النمو السريع للخدمات واكتمالها او هحتى بطء العمران ولكن ذلك بدأ يتغير بسبب انهم اعطوا مهله للبناء لاصحاب الاراضي سواء الشركات او الناس والا فغرامات وسحب الارض ولما العمران يزيد مشاكل المدينه سيستجيب لها الجهاز اللي غالبا هيتغير كتيير بعد الثوره لكن اراها ان شاء الله افضل بعد كام سنه كمان ليس سريعا وليس متأخر يعني ممكن 5 سنين والله اعلم

اللي يقرأ كلامي يحسبني بشتغل في العقارات بس اقسم بالله اني لم اكن اعرف شئ عن العقارات قبل ما ادرس الشروق كويس لاني من النوع اللي مبدخلش في شئ قبل ما ألم به علشان النصب وصوره المتعدده وعلشان الندم فيما بعد فبجب اعرف كل شئ قبل ما اقرر وده اللي عملته وسألت من هنا وهنا ودرست المكان كويس على الخريطه اولا وحفظت الاسعار بعد سؤال الكثيييير من اماكن وشركات مختلفه ورحت بعدها عاينت وتفرجت بعيني ثم توكلت على الله

والله أنا تعبت في الكلام وترتيبه بس علشان خاطركم وعلشان انفع بعلمي أي محتاج او محتار وعاوز يفهم
فأرجو اكون وفقت ان شاء الله في الشرح وتقريب الصوره للي عاوز يسأل عن الشروق

والله يوفق الكل يارب

جزاكم الله خيرا . ربنا يكرمك في الدنيا والاخرة . انا استفدت كتير وانت لخصت كل حاجه. الموضوع رد علي كل التساؤلات عندي . ربنا يكتب لك الخير كله