الشاي الابيض ... white tea ؟؟

[MRBEBO]

مساء الخير عليكم يا جماعة

حد عنده فكرة عن الشاي الابيض

انا سمعت انه ليه فوايد كتير جدا

وانه بيتفوق على الشاي الاخضر والشاي الاسود في فوايده

وسمعت كمان انه عبارة عن براعم الشاي الصغيرة اللي بتتقطف بدون اي عمليات تصنيعيه

وبيقولوا ان سعره اضعاف سعر الشاي الاخضر والاسود

لان الشاي ده بيتقطف يدوي حاجة زي كده

واكيد كمان لان الانتاج بتاعه مش هيكون كبير زي بقيت الانواع

لانهم بيختاروا على حسب ما سمعت اوراق الشاي الصغيرة اللي في بداية النمو بس يعني مش بيختارو الاوراق الكبيرة

فهل فيه حد يعرف اي معلومة عن الشاي ده ؟؟ وهل موجود في مصر ؟ وسعره ؟ وهل طعمه مقبول ولا

منتظر ردودكم

[MRBEBO]

مكرر ..........

[Dodo2009]

الشاى الأبيض موجود فى مترو وهايبر وان العلبة 25 ظرف ب 15 جنيه (ماركة تويننجز ) وهو شبه الشاى الاخضر بس لونه أفتح شويه

[Dodo2009]

معلومات عن الشاى الابيض

مكرر ..........

الشاى الابيض من أرقى الأنواع وانتاجه العالمى قليل جدا لان القطف يكون فى أوقات معينه من السنه ويتم أخد البراعم الصغيره للأوراق فقط ويتم التعامل معها بطريقه سريعه فيتم تعريضها لبخار الماء كى يتعطل مفعول المواد المسئوله عن تغيير لون الشاى وبعد كده يتم تجفيفها لذلك يسمى بالشاى الفضى او اللؤلؤى وطعمه غايه فى الخفه والسلاسه (لمزيد من المعلومات اقرأ كتاب عالج نفسك بالشاى الاخضر تأليف صبحى سليمان)

[devilishtigers]

اول مرة اسمع عنه بس لازم اجربه إن شاء الله

[ainshouka]

المصدر بتاعه من نفس النبات اللى بيتعمل منه الشاى العادى

بيتعالج بطريقة معينة عشان ميبقاش زى الشاى الاخضر

ومبيمرش بعملية اكسدة علشان ميتحولش للشاى الاسود اللى احنا بنشربه

مميزاته
مضاد جامد للالتهابات (زى حالات الروماتيزم) وكمان مضادات الاكسدة (يحمى من بعض السرطانات) وبيوقف عمل الانزيمات اللى بتكسر الكولاجين والإلاستين (لان المواد دى لما بتقل بتسبب التشققات اللى فى الجلد يعنى من الاخر بيقلل اعراض الشيخوخة السطحية

كمية الثيانين اللى موجودة فيه اعلى من الشاى الاخضر (ودى اللى بتظبط المزاج وبتعدلك الطاسة)

من موقع ويكيبديا

[zakiali]

وطعمه عامل ايه ؟؟؟؟؟؟؟؟؟

[ahmedbasto]

فعلا طعمه عامل ايه لن دى اهم حاجة بالنسبة لى

[ainshouka]

شاي بكل الحاجات اللي بيعملها دي ميتهيأليش إن طعمه حيبقي حلو

[omaroof]

الحقيقه اول مرة اسمع عنه بس حاشوف واجرب وابقى اقولكم

[Dodo2009]

وطعمه عامل ايه ؟؟؟؟؟؟؟؟؟

يا جماعه اللى متعود على الشاى الأحمر صعب يتقبل بسهوله الشاى الاخضر او الابيض حياخد وقت شويه بس فيه حاجه مهمه جدا طريقة عمل الشاى الاخضر والابيض مختلفه عن الاحمر وهوه ده اللى بيفرق فى الطعم وكمان النوع
ابتعدوا عن الانواع المصريه (دلما)نوع ممتاز بالنسبه للاخضر و (تويننجز) بالنسبه للابيض
طريقة عمله بنحط عادى الباكيت أو (سايب) فى الكوب بدون سكر ونغلى الميه أهم حاجه مانحطش الميه وهى بتغلى
يعنى بعد ما الميه تغلى اقفل عليها ولازم أستنى لحد ما درجة الحراره تنزل شويه يعنى 5 أو 10 دقايق بالكثير لان كل ما الميه هديت كان طعمه احلى وأفيد.........حتى فى اليابان لما بيعملوه بيحطوا الميه المغليه الاول ويرموها ويرجعوا يملوا الكبايه تانى ..يعنى من الاخر استنوا شويه قبل ما تفرغوا الميه وعلى فكره لو اتعودتوا عليه حتلاقوا طعمه جميل وحيبأه ادمان الشاى الاخضر والابيض زى حالاتى ..ربنا معاكم

[mido777]

انتظر رد خبير الشاى الأول " كريم بك منير "

[MRBEBO]

معلومات مفيدة جدا

انا اول ما هنزل ان شاء الله هحاول اجيبه واجربه

انا شوفت شوية موضوعات عن الشاي ده خطيرة بالاضافة طبعا لمعلوماتكم الرائعة

مضادات اكسدة اضعاف اللي في الشاي الاخضر + تنزيل الدهون الزيادة + محاربة الشيخوخة + مفيد للبشرة + محارب للسرطان ( ربنا يحفظنا ) + يجهز بطريقة طبيعية بدون اي مراحل تصنيعية ( يجفف عن طريق التعريض للشمس ) او اي مواد حافظة او الوان

حاجة خطيرة فعلا وتستحق التجربة .... وفعلا سعره العالي نسبيا مش من فراغ