اشيك تي شيرتات المونديال واسؤها

[ecybrarian]

انا بصراحة با شوف الوان وتصميمات مختلفة لكل دول العالم من تيشرتات اللاعيبة..وكنت محتار مابين ايهم الأشيك على الاطلاق من حيث اللون والتصميم..انا عموما عاجبني جدا اللون بتاع تيشيرت الاروجواي..لون خرافة الحقيقة




لكن الشكل العام مش تمام..يعني الياقة (الكولة) إللي كل الاعيبة مخبينة وكمان رسمة الشمس الخفيفة عاملة زي العلامة المائية

اما التيشيرت الاجمل في المركز الثاني فهي بكل جدارة فهو التيشيرت الغامق بتاعة اسبانيا..ايه اللون دا بالظبط!!! بس تحفة مع تصميم النص ياقة دي مع شرائط الألوان على الكتاف..إللي يعرف بيتباع فين في مصر يقولي


اما في المركز الأول وبلا منازع من وجهة نظري هو التيشرت الاسود بتاع ألمانيا..في درجة لمعان غربية بصراحة والتتشات الذهبية بتقول إن دا فريق مصروف عليه كويس


Getty Images - Unsupported browser detected
=====

اما اوحش التيشرتات على الإطلاق فهي تيشرتات الفرق الافريقية كلها..يعني التي شرت الغبي بتاع ماتش غانا وأمريكا دا!!! مين إللي عمل فيهم مقلب وباعهلهم... لكن الاسوأ على الإطلاق كان تيشرت الانتاج الحربي إللي لبسه فريق كوت دي فوار في آخر مباراة له...دا انا حتى مالقتش له صور على النت من كتر ماهو مقرف

========

انت رايك ايه؟؟؟

[Terrible_DaRsH]

انت عايز بلد اديداس تبقي تى شيرتاتها وحشة ؟

[M.Osman]

تي شيرت المانيا فعلاً تري شيك

بالمناسبة ... هي الكورة الجديدة فعلاً اشتكوا منها ؟

[Nader]

الاوحش كان زي الجزائر الأخضر
تحس انه من 20 سنة فاتت

[m7nsh]

أحييك على فكره الموضوع .. و متفق معاك تماما فى التشرتات اللى اخترتها
و احب اضيف تشرت اليابان .. حقيقى تشرت محترم جدا

بالمناسبة ... هي الكورة الجديدة فعلاً اشتكوا منها ؟

بالنسبه لحوار ( الجابولانى ) فانت قصدك يا M.Osman على الألمان ولا عموما ؟؟؟
هو الكل بيشتكى منها فعلا بالذات حراس المرمى بس المهندسين بتوع اديداس اللى عملوها قالو انها زى القديمه بالظبط بس عملو فيها حوار كده بيخليها تخترق الهواء بسلاسه اكتر و بمقاومه اقل و ده بيخلى حركتها غير متوقعه الى حد ما

[احمد عبدالله]

انت عايز بلد اديداس تبقي تى شيرتاتها وحشة ؟

+99999999999

[ecybrarian]

فعلا تيشرت اليابان جامد برضة..بس تيشرت ألمانيا في لمعة البدل التاكسيدو وتحس إنك ممكن تروح سهرة او فرح او الأوبرا بالتيشرت دا

[mohamedmostafa]

ولا الجزائر .. متعاقدين مع التوحيد والنور بس الصراحة كانت لون التى شيرت لايق على شعر اللعيبة .

[AhMeD EzZ]

التي شيرت الي عجبني جدا تي شيرت المكسيك الغامق كان جامد جدااا و برضة تي شيرت المانيا جامد

[M.Osman]

أحييك على فكره الموضوع .. و متفق معاك تماما فى التشرتات اللى اخترتها
و احب اضيف تشرت اليابان .. حقيقى تشرت محترم جدا

بالنسبه لحوار ( الجابولانى ) فانت قصدك يا m.osman على الألمان ولا عموما ؟؟؟
هو الكل بيشتكى منها فعلا بالذات حراس المرمى بس المهندسين بتوع اديداس اللى عملوها قالو انها زى القديمه بالظبط بس عملو فيها حوار كده بيخليها تخترق الهواء بسلاسه اكتر و بمقاومه اقل و ده بيخلى حركتها غير متوقعه الى حد ما

..اقصد جميع الفرق... و بصراحة انا بيجيلي احساس ان الكور ساعات بتطول من اللعيبة بغباء

شكراً عالمعلومة يا زعيم

[n8os]

تشيرت المانيا واسبانيا جامدين

[ecybrarian]

ولا الجزائر .. متعاقدين مع التوحيد والنور بس الصراحة كانت لون التى شيرت لايق على شعر اللعيبة .

:-))))))
جامد جدا التعليق دا.."التوحيد والنور" يصلح ما افسدته الكرة