محدش اتكلم

[mahfouz1983]

سعنس محدش اتكلم علي هوجة الغلاء الي حاصلت في البلد لحد دلوقتي ليه ساكتين ليه يا رداله ولسا هما زودو السجاير وزودو البنزين والحديد والاسمنت وهيزودو الكهربا وهيزودو العيش وهيزودو ال..................................... طيب انا من رائي ان احنا نديلهم المراتبات والاجور بتاعنا من اشغالنا انا مستعد اوصل كل شهر 1000 جنيه لمجلس الوزراء وياخدو منهم الي هما عاوزينو ويدوني الباقي اعيش بيه بس يا تري هيكون الباقي دا كام بس العيب مش عليهم العيب علي الشعب الصبور الجميل المهاود
نزلتو مصاريف جباية قصدى زبالة على الفواتير وقولنا ماشى والزبالة ماتشالتش وسكتنا
غليتو السولار وعملتو ازمة ورضينا بالامر الواقع وركبنا مواصلات وسكتنا
رفعتو سعر الاتوبيسات من نص جنيه لجنيه علشان اتوبيسات مميزة اللى هى الحمرا وخليتو الخضرا المميزة عادية علشان ترفعو سعر التذكرة من نص جنيه لجنيه ماقولناش حاجه وبندفع وساكتين
ضرايب عقارية وقولنا ماشى وعملنا الاقرار وسكتنا
دمغة ملهاش اى لزمة مع ان الشغل كله بالكمبيوتر وبندفع وساكتين
غليتو السلع التموينية وبيقولك دعم و راضيين وساكتين
اسعار فواتير الكهربا رفعت مرتين وبندفع وكمان عايز ترفعها تانى
العيب مش عليك العيب علينا احنا علشان ساكتين علشان لو قولنا لأ مرة واحدة كنت فكرت الف مرة قبل ما تقول كلمة واحدة من اللى بتقوله ده
زى ما انت عايز ترفع عليا سعر الكهربا ادينى حقى واديك حقك ولا ايه شكرا

[A7MED_PHARMA]

ماهو الكلام مش هيجيب فايدة
لازم فعل
وأي فعل هيعتبروه خروج على النظام
وهنموت مخنوقين بلفافة بانجو

تعرف يا محفوظ ياأخويا

لو ألاقي كام ألف يسمعوا كلامي...أروح أقعدلهم قدام مقر الحكومة معتصما
لحد مايلاقولنا حل للعيشة القرف الي احنا فيها دي
وحسبي الله ونعم الوكيل


بس تعرف....ميزة جديدة للي حصل اليومين دول
أنا كنت بشرب روثمان(ربنا يعافينا)...ولما بقت بــ7.5 جنيه
يعني 7.5 ×30=225 جنيه
وكنت بحط 90

دلوقتي

هبطل السجاير ..وأضطر إني أحط 80(ولو كان فيه بنزين 30 كنت حطيت)

[د/أحمد ابراهيم]

هبطل السجاير ..وأضطر إني أحط 80(ولو كان فيه بنزين 30 كنت حطيت)

الحمد لله

في وسط كل الاخبار المحبطة

نسمع خبر جميل حتى لو كان ناتج عن سبب محبط اخر

المهم الخبر في حد ذاته جميل ويستحق التهنئه

الــــــــــــــــــــــــــــــــــــــــــــــــ ــــــــــــــــــــف مبروك

اخي احمد على قرارك اللي ناس كتير بتكون اضعف من انها تتخذه

موفق دائما ان شاء الله

[mahfouz1983]

لالالالا بنزين 80 باااااااااااااااطل فتوي لا يجوز وضع بنزين 80 في العربيات بتاعنا لانه مدمر للصحه ويسبب الوفاة السريعه للموتور

[A7MED_PHARMA]

لالالالا بنزين 80 باااااااااااااااطل فتوي لا يجوز وضع بنزين 80 في العربيات بتاعنا لانه مدمر للصحه ويسبب الوفاة السريعه للموتور

ماهو لما الــ90 يغلى 50 % (حسب أخر كلام سمعته)...الميزانية هتبوظ
أنا بستهلك صفيحة كل 48 ساعة..بمعدل 10 لتر يوميا


مجبر أخاك لا بطل

[hazoom2006]

قالو لفرعون اية فرعنك قال مالقتش حد يلمنى

وزير الكهربا بيقول ان الكهرباء بقالها فتره اسعارها مش بتزيد وباين عليه زعلان علشن الكهربا مزادتش

شوية والميه هتغلى ومش هنلاقيها

[SkyBird]

امال ليه الناس عملت ثورة ايام السادات لما غلى السكر على ما اعتقد 3 قروش او ما شابه
وفضلوا في ثورة لحد ما تراجع السادات عن قراراته
الظاهر ان حومتنا دي ذكيه جدا ..... تغلي اي سلعة وقت ما تحب وزي ما تحب وماحدش يجرؤ يفتح بوقو بكلمه
الف تحية لهذه الحكومة

[magyver]

والله النااس هااتشحت دة الا اذا ..........
دة السجااير البوكس بقت ب5 جنية اللي كانت ب 165 قرش
والمارلبورو ب13 جنية
دة غير البنزين اللي هايزيد وطبعا لو زااد والله البلد هاتولع

[ahmad--ezzat]

مفيش غلا ولا حاجه
والرغييييف كبيرررررررر والمواصلات فاضياااااااااااااااااااااااااااااااااا

ومحدش يقدر يتكلم...

[أبو إياد]

هو سعر المارلبورو الرسمى 10ج والغير رسمى ممكن 11 و 12 و 13 وبصراحه ماينفعش حد يتكلم فى زياده على حاجه زى السجاير ماتغلى ان شالله تبقى ب 100ج حتى دى مش هاتحييك دى بتاذى رغم انى بشرب سجاير رغم انها من الحاجات السلبيه اللى فيا وربنا يعافينى عنها
انما لازم طبعا نتكلم على غلو الاساسيات وانا شايف اهمها انبوبه الغاز فى ناس كتير جداا معندهاش غاز فى البيت ولسه بتستخدم الانابيب ليه يغلى الانبوبه ويخليها على البطاقه والاسره المكونه من 4 افراد ليها واحده فى الشهر والاسره اللى عددها اكبر ليها 2 فى 3 شهور ودى بسعرها الرسمى 4ج ولو اتنزقت اشتريها ب 48 ج من غير بطاقه تموينيه واغلبنا مش شغال فى قطاع عام علشان يستفيد من الدعم ويتعمله بطاقه تموينيه
دى مصيبه سوده

طبعا غير اسعار الجبن والالبان والخضار والعيش واظن دى الحاجات الاساسيه

وزود على كده المياه والكهرباء

ويسلام بقا لو واحد بيدفعله من 300 الى 800ج ايجار شقه فى الشهر لان اغلب الشباب دلوقتى بيتجوزوا فى شقق ايجار

وياريت بقا محدش يمرض لان الدواء والكشف غاليين

انا شايف ان الحل تموتوا وهناك فى الجنه ما لم عين رأت

[SkyBird]

وياريت بقا محدش يمرض لان الدواء والكشف غاليين

انا هغلي الكشف واجر العمليات
محدش يزعل ويتكلم عن المدينه الفاضلة

[amrc5]

اللى بيحصل ان الحكومة اتعودت منا على السلبية احنا لو فعلا جمعنا كام الف مننا و عملنا اعتصام و كبرنا الموضوع قدام الحكومة و مسكتناش على اللى بيحصل ده لازم هانعمل تاثير و حنشيل جزء حتى لو صغير من سرقة عصابة ال مبارك و احمد نظيف لينا انا باتكلم بجد و مستعد ابتدى بنفسى - يا ريت كنت اقدر اعمل حاجة فعالة لوحدى لكن للاسف مش كفاية ابدا

هل من مجيب

[أبو إياد]

المشكله ان كل واحد شايف نفسه انه واقف لوحده
مافيش وحده شعبيه وطنيه

[ahmedfouad]

انا مش هشارك معاكو
عاوز اربى العيال ده لو مطلقتش الولية

[mahgary]

واليغيظ ان الشرطه جايبه x3 علاشان شويت مجندين يلعبوه بيه هو ده مش من اوت الشعب ده