مصروف البيت

[mrwho1982]

السلام عليكم اولا

انا كنت عايز اعرف كل واحد هنا بيصرف مصروف البت ازاي

يعني بتصرف امورك من اول الشهر لحد اخره واحسن طريقة لتوفير المرتب

الموضوع مفتوح للمناقشة والحلول المقترحة

بافتراض ان المرتب من 1000 : 2000 جنية مع ذكر المرتب وطريقة الصرف

[M.Zaher]

بص انت تريح دماغك ادي الفلوس للمدام و خد انت اللى يقضيك و خلاص و هيا هاتتصرف
وكن على ثفه هاتوفر اكتر منك
بس اعمل حسابك في بنزين العربيه و لو فيه مصاريف تانيه للعربيه عشان مابيحبوش يصرفوا قرش واحد على العربيه

[mrwho1982]

مابيحبوش يصرفوا قرش واحد على العربيه

اؤيدك 100 % في النقطة دي

[Islam_galal]

تقدر تعمل ملف علي الاكسل بالمصاريف
مثلا : الأطعمة و تحتها الخضروات و الفاكهه و المطاعم و المخبوزات و اللكماليات و الاساسيات
و بعدين مصروف العربية و مصروف الشغل و الفسح في حدود يوم و الفسح أكثر من يوم و العلاج و الثوابت الدورية كإيجار البيت و الماء و النور و التليفون و المحمول و و و

و كل شوية حتغير فيه علي طريقة حياتك
و بكده كل شهر تقدر تعرف فين الفلوس بتروح و بأي نسبة و بالتالي إيه البند اللي محتاج تنظيم

الموضوع مش حياخد منك وقت كتير و ممكن تكتب مصاريفك علي sms و اخر اليوم تنزل البيانات علي الاكسل

الطريقة دي أنا مجربها و بصراحة مفيدة

[ابو فرح]

سيبها على الله

[ابوهاشم]

حاسس انى لو حسبتها هطلع مديون
علشان كده مش بحسبها

[FunnyMickey]

هههههههههههههههه
انا حتجوز قريب ومرتبي 2000 جنيه
ومش عارف لحد دلوقتي حيكفوا ازاي

بس انا حعمل بالرأي اللي فوق
حدي الفلوس للمدام
واسيبها علي الله

تعيش هيا بقي
ههههههههههههه

[SeiffoZ]

إشترى الضرورى إللى فعلا هتستخدمه ...

سيبك من الأكل إللى برا البيت طالما إن راجع البيت و البيت فيه أكل .. يعنى مش تروح محل أكل تاكل و تروح ..

فكك من الشيبسى و البيبسى و الهجس ده ... حفاظا على فلوسك و حفاظا على حجم كرشك (خليه صغير أحسن) ..

لو بتتسوق و بتشترى بنفسك شوف العروض إللى موجودة ...

فكك من السجاير ....

بيع عربيتك و إشترى واحدة 1100 سى سى هتوفر فى البنزين ... بلاش ثقافة ال1600 إللى مسيطرة على الشعب ..

لو مش متجوز ... قسم مرتبك لتلات أقسام ... قسم تحوشه للمستقبل ... قسم تحوشة لسفريات و فسح ... و قسم تحوشة لإحتياجاتك اليومية و إحتياجاتك بشكل عام ...

فبكده تقدر تحوش ... و تشترى إللى نفسك فيه ... و كمان تسافر أوروبا تتفسح كل سنتين ثلاثة ...

لو مثلا عندك موبيل شغال كويس ... متسيبوش إللى لما الجهاز يقولك ( أبوس إيدك إرحمنى!! ) ..

مش عاشن نزل جهاز جديد خلاص أبيع القديم و أزود عليه ... لأ ....

متسبش حاجة إللى لما تكون مش بتأدى وظيفتها .....

مش فاكر إيه دلوقتى كمان!

[hossam_elwani]

بقلك ايه سيبها على الله ياما حسبنا والنتيجه واحده امشى على قاعدة (لا افراط ولا تفريط) يعنى خير الامور الوسط فى كل شىء

وبعدين مين الى قال ان الستات بيدبرو انا اعرف حريم بيفرتكو الفلوس فرتكه ومتعرفش تحاسبهم

[mrwho1982]

إشترى الضرورى إللى فعلا هتستخدمه ...

سيبك من الأكل إللى برا البيت طالما إن راجع البيت و البيت فيه أكل .. يعنى مش تروح محل أكل تاكل و تروح ..

فكك من الشيبسى و البيبسى و الهجس ده ... حفاظا على فلوسك و حفاظا على حجم كرشك (خليه صغير أحسن) ..

لو بتتسوق و بتشترى بنفسك شوف العروض إللى موجودة ...

فكك من السجاير ....

بيع عربيتك و إشترى واحدة 1100 سى سى هتوفر فى البنزين ... بلاش ثقافة ال1600 إللى مسيطرة على الشعب ..

لو مش متجوز ... قسم مرتبك لتلات أقسام ... قسم تحوشه للمستقبل ... قسم تحوشة لسفريات و فسح ... و قسم تحوشة لإحتياجاتك اليومية و إحتياجاتك بشكل عام ...

فبكده تقدر تحوش ... و تشترى إللى نفسك فيه ... و كمان تسافر أوروبا تتفسح كل سنتين ثلاثة ...

لو مثلا عندك موبيل شغال كويس ... متسيبوش إللى لما الجهاز يقولك ( أبوس إيدك إرحمنى!! ) ..

مش عاشن نزل جهاز جديد خلاص أبيع القديم و أزود عليه ... لأ ....

متسبش حاجة إللى لما تكون مش بتأدى وظيفتها .....

مش فاكر إيه دلوقتى كمان!

انت كده عايز واحد بيقبض 10000 جنية

[esam_comm]

بقلك ايه سيبها على الله ياما حسبنا والنتيجه واحده امشى على قاعدة (لا افراط ولا تفريط) يعنى خير الامور الوسط فى كل شىء

وبعدين مين الى قال ان الستات بيدبرو انا اعرف حريم بيفرتكو الفلوس فرتكه ومتعرفش تحاسبهم

+1111111111111111

[icehearted girl]

مفيش بيت زي التاني

ومفيش بيت بيصرف زي التاني

في بيت نص دخله بيروح ع الايجار وبيت تاني قاعد تمليك ببلاش

فيه بيت فيه عربية بتصرف بكذا وبيت تاني موفر المصاريف دي

في بيت فيه مصاريف نثرية كتير..فسح وكروت شحن ودي اس ال وغيره وغيره

وبيت تاني مضيع كل فلوسه ع الاكل والشرب وبس

في بيت بيضيع نص فلوسه علي مصاريف الاولاد والمدارس وبيت تاني مفيهوش مدارس

مينفعش تقارن نفسك بغيرك

اعمل احصائياتك بنفسك وظبطها علي احوالك الخاصة وان شاء الله هيكفوا ويفيضوا كمان

بس نصيحة 3 حاجات تثبتهم شهريا مهما كان دخلك قليل

1_ زكاة عن مرتبك ثبتها انك تدفعها شهريا مهما كانت بسيطة

2_مبلغ تتدخره حتي ولو 20 جنيه شهريا بس مجرد انك تعود نفسك ع الادخار

3_خروجة مع اسرتك بامكانياتك لو تقدر في جراند حياة ولو متقدرش يبقي ترمس علي كوبري عباس يعني متكلفش

نفسك فوق طاقتك

حاول تثبت ال 3 حاجحات دول

[hesham_tawfiq]

جنب مصروفاتك الثابته اللى لازم تتدفع كل شهر على جنب زى الايجار والكهربا والميه والغازوالتليفون وبنزين العربيه فى ظرف لوحده ومحدش يمد ايده عليه مهما كانت الاسباب والباقى قسمه اربع تربع بعدد ايام الاسبوع واشترى حاجة البيت وطلباته اسبوعى بدل ماتشترى يومى اوتشترى شهرى لان فالحالتين يا اما بتجيب اقل من اللى محتاجه او اكتر من الىل محتاجه
وربنا يعينك ويعيننا على الغلاء اللى احنا فيه دا

[mahmoudysf]

مفيش بيت زي التاني

ومفيش بيت بيصرف زي التاني

في بيت نص دخله بيروح ع الايجار وبيت تاني قاعد تمليك ببلاش

فيه بيت فيه عربية بتصرف بكذا وبيت تاني موفر المصاريف دي

في بيت فيه مصاريف نثرية كتير..فسح وكروت شحن ودي اس ال وغيره وغيره

وبيت تاني مضيع كل فلوسه ع الاكل والشرب وبس

في بيت بيضيع نص فلوسه علي مصاريف الاولاد والمدارس وبيت تاني مفيهوش مدارس

مينفعش تقارن نفسك بغيرك

اعمل احصائياتك بنفسك وظبطها علي احوالك الخاصة وان شاء الله هيكفوا ويفيضوا كمان

بس نصيحة 3 حاجات تثبتهم شهريا مهما كان دخلك قليل

1_ زكاة عن مرتبك ثبتها انك تدفعها شهريا مهما كانت بسيطة
تصحيح صغير هي هتبقى صدقة لان الزكاة احكامها معروفة
2_مبلغ تتدخره حتي ولو 20 جنيه شهريا بس مجرد انك تعود نفسك ع الادخار

3_خروجة مع اسرتك بامكانياتك لو تقدر في جراند حياة ولو متقدرش يبقي ترمس علي كوبري عباس يعني متكلفش

نفسك فوق طاقتك

حاول تثبت ال 3 حاجحات دول

[shooter123]

اديه كله للمدام وهي بتتعامل وبتعرف تفاصل بس سيب معاك جزء لمصروف العربية ومصروف جيبك لان المدام موتها وسمها انك تاخد فلوس للعربية مع ان العربية دي هي اللي بتوديها لزيارة والدتها واخواتها وبتتفسح بيها وتروح تصييف بها برده بس كله ده ومينفعش تدفعلها فلوس فخلي بالك من النقطة دي