طفل فى الخامسة والعشرين

[Dr Ahmed]

الطفولة فى مصر تصل للخامسة والعشرين وأحيانا بعدها !!!
وإلا كيف تفسر انعدام رغبة الأبناء فى العمل حتى إتمام المراحل التعليمية كلها والاعتماد التام والمخجل على (المصروف) !!!
وياليتها تنتهى .. بل تستمر الحاجة للآباء حتى يتم الزواج ، وأحيانا يستمر تلقى المساعدات حتى أثناء الزواج...
ليس رغبة الأبناء فحسب بل رفض الآباء لهذه الفكرة كأنها صورة من صور الفقر أو الذل والهوان !!!

هل فكرت أن تكسب مالا وأنت طالب؟
أنا أسألك...
وهل تمانع أن يعمل أبناءك حتى ولو فى الأجازة الصيفية؟
وما رأيك فى ذلك؟؟

[abdelaziz-waleed]

انا رأي ان دي بتعتمد على التربية بمعني لو عودت ابنك انه يعتمد على نفسه اكيد اول مايكبر بس شويه من نفسه هايتكسف يقولك على المصروف لأنه هايحس ان ده هايقلل من قيمته امام نفسه وبالتالي هتلاقيه يقولك انه عاوز يشتغل في الأجازات. ولكن انا افضل انه يكون في اجازات الجامعة مش في ايام المدرسة.
برده لازم يحس ان المصروف مش هايحققله كل اللي هو عاوزه علشان يكون حافز ليه انه يفكر يكون ليه مصدر دخل خاص بيه. والله اعلم

[TaoTao]

أنا تناقشت مع زوجتي على ضرورة تعليم ابننا الاعتماد على النفس وعلى قيمة العمل وكسب الرزق، وبعد مناقشات استقررنا على خطة بسيطة:
- ابننا هايشتغل في أوقات فراغه بس لحسابنا :) يعني لما يتعلم كي الملابس مافيش مانع يقوم بكي الملابس في أوقات فراغه بمقابل مادي.
- لو ربنا أكرمنا بمنزل ذو حديقة، ممكن يقوم بالعناية بها بمقابل.
- لو عنده هواية فنية ممكن ينميها ويستغلها تجارياً (الشيخ صالح كامل بدأ حياته العملية منذ طفولته عن طريق تصنيع لعبة كانت شهيرة اسمها تريك تراك وبيعها لزملائه الأطفال!!)
- بعد كدة ممكن ينعامل مع ناس خارجيين بس بعد مايكون عرف مبادئ العمل والادخار والاستثمار والتنظيم، بس أكيد لازم يكون عمل مناسب
أعتقد إن الحل ده كويس من ناحيتين، الأولى إنه هايكون في الأول تحت عينينا
الثانية إنه لن يختلط بأوساط غير مأمونة في سنين عمره الأولى
بالمناسبة ابني عمره 8 شهور :)

[hazem_khidr]

كان خالي بيتكلم معايا من فتره و بيقولي زمان كان الواحد يتخرج و يشتغل علشان يساعد اهله و يشيل الحمل عنهم .
انما دلوقتي الواحد يتخرج و يشتغل و اهله كمان يفضلو شايلين همه و يجوزوه ويصرفوا عليه و هو متجوز.
كلامك يا دكتو احمد فكرني بالكلام دا رغم انه فات بقاله اكتر من 4 سنين.
بس بيني و بينك يا ريت الواحد اشتغل و هو طلب كان زمانه كسب خبرات كتير اوي

[Ahmed Samy]

انا كان والدي الله يرحمه بيشجعني على الحكاية دي بس من تحت لتحت (معنى عدم رفضه هو الموافقة)
انا و انا في اعدادي كنت برسم لأخوات اصحابى الكبار اساميهم على عربياتهم بالستيكر و كنت باخد في الرسمه 10 جنيه و كان فرخ الاستيكر ب 5 جنيه :)

و بعدين عملت استيكر لنفسي alien و طبعته silk screen بنفسي و بعته لبتاع كماليات ب 3 جنيه للاستيكر (و اداني نص الفلوس و دحك عليا في النص التاني):D بس كانت فرحتي كبيييرة لما أشوف الاستيكر على أي عربية
و دلوقتي عملت لنفسي واحد شكله اجمد بس exclusive ....ليا أنا بس

و انا في الكلية كنت غاوي شغل المعامل و بابا جابلى معمل صغير على قدي و كنت عاوز أجيب موتور الماني بدل التركي فبابا الله يرحمه قاللي : ( عندك معمل ..و بتعرف تشتغل..و عندك زباين اللي هما شللتك...و بتطلب فلوس !!!!! مش عيب يا دوك !!؟؟)
و قلت للعيال اني هاعمل حاجاتي عندي و لما شافوا شغلي و درجاتي عليه بدأوا يدوني حاجاتهم و كنت بقعد اسهر في المعمل و أشغل راديو سوا طوووول الليل و جبت الموتور و الحكاية لعبت بس لما جت ايام الامتحانات بابا قفش عليا و خاللاني ابطل
على فكرة انا دلوقتي شريك في معمل أسنان بالــtech-support بس بنسبة 30%:)

[TAG_Turbo0]

انا مفكرت انى أشتغل وانا بدرس
كنت بس بدرب فى الصيف علشان الخبره مش العائد المادى
وبعد عمر طويل ان شاء الله لما أتجوز وأخلف لو اولادى عايزين يشتغلو فى الصيف معنتديش مانع خالص

[Dr_Mido]

نفس الكلام انا شغلى كان فى الاول اعمل موقع لواحد صاحبى او بتاع وبعد كدة عملت شغل للجامعه عندى بفلوس وبعدها قررت انا وواحد صاحبى نفتح مكتب دعايه واهلان وتصميم مواقع وبرمجه وبتاع وفتحناة فعلا وربنا كرمنا وبعدها بشوزيه دخلنا مجال المستلزمات الطبيه والحمد لله ربنا كرمنا فيه
واحنا لسه طلبه ودى العقبه الوحيدة فى الشغل

[أبو عبدالله]

بصراحه في محافظات مشهوره بالموضوع ده
وفي محافظات الموضوع ده مش عندها خالص وانا بحب اهلها بصراحه علشان الموضوع ده

ومنهم دمياط طبعا مفيش شاب ابن غني او فقير مبيشتغلشي من وهو صغير في الاجازات

وبورسعيد برضه

وعندنا في المنصورة نبروه معروفه الرجاله والستات والأطفال والكل بيتاجر ماشاء الله

[Karim_Monir]

يوووه فكرتوني بالذي مضى
من اعدادي وانا بشتغل واعتمدت على نفسي اعتماد تام وانا في ثانوي
اعدادي كنت بربي عصافير وحمام غية وبنزل ابيعهم وكانو بيكسبوا مكسب جامد قوي
وكنت عايز اعمل مفرخة سمك زينة بس المساحة بتاعتها لانها كانت عايزة تكلفة في الاول وانا من يومي مسرف
في ثانوي نشاطى توسع ليشمل الكلاب بس لما عرفت حرمتها وكدة خلعت منها مع انها بتكسب قوي واشتغلت تقريا في كل حاجة ومع ثانوي ظهر حبي الشديد للكمبيوتر وكنت من اوئل اللي فتحوا نشاط صيانة الكمبيوترات في مصر (طبعا انا بتكلم ايام ويندوز 311 و95 دي ايام الاحتراف لكن من قبل كدة هواية بس
في الجامعة كنت بعمل كل سكاشن العملي اللي بيطلبها المعيدين لزمايلي والدفع مقدم عشان الحمرئه
ها ها ها
حتى كان عندنا دكاترة مش بيعملوا كتاب وكانوا بيقولونا ارجعوا لكتاب كذا وكتاب كذا
وبما اني دودة كتب قديم كنت اسقط على مكتبة الجامعة واجيب الكتب اصور الفصول واخدها اصورها وابيعها للزملاء على انها ملازم وتعبت في تصويرها من الكتب الاصلية وكدة
وبما ان كل طلبة الدفعة مش غاويين تعب حطيت مكسب 5 جنية في كل ملزمة(في 500 طالب) وابيعها بعد المحاضرة على طول(ماهم لو تعبوا نفسهم ووصلوا مكتبة الجامعة كانوا قروها بنفسهم )
بس بعد الطلبة لخبثاء كانوا بياخدوها يصورها من بعض
قمت روحت مركز طباعة وطبعتها بخط ملون ما ينفعش يتصور وررق خفيف يشف اللي تحتة(حماية حقوق ملكية بقى)
بقوا يجوا يتحايلوا عليا اديهالهم
ماهو اصعب حاجة في الكلية الدكتور اللي من غير كتاب ده
وغيرة وغيرة يوووة ده انا كنت مصيبة

[Xpert]

ياما اتحايلت علي المعلم يديني كاش عشان اشتغل و اقلب رزقي .. المعلم رفض و يقولي لما تخلص جامعه ... اما نشوف بقي ايه اللي هايحصل بعد الجامعه .. شكلي هاسيبله البلد ههههه

[major_memo]

انا بحب اشتغل من زمان ومش بحب اقول للحاج هات مصروف بحس انها بايخة اوي
وشكلك وحش قدام نفسك اوي انا عملت سيبر نت اينعم كنت واخد الفلوس منوا بس الحمد لله رجعتها وفوقيها بوسة والسيبر بقي بتاعي وبعدين جالي مكسب فية جامد بعتة وفتحت مكتب كمبيوتر وبردوا اول ما المكتب بقي كويس بيعتة وبعدين اتجهت للاهتمام بالسيارات بقيت اظبط عربيات زمايلي وزمايلي يجبولي عربيات زمايلهم وتجارة شوية كدة في العربيات بس علي خفيف وفي الاجازة الي فاتت نزلت الغردقة مع واحد قريبي عندوا مكتب تاجير سيارات هناك اينعم مكنش شغل شغل بس اهو الواحد بيتعلم وكان بيتفسح بردوا ومش لازم علي فكرة الواحد يشتغل بمقابل مادي في ايام الدراسة علي فكرة المكسب الحقيقي هوا انك تتلط بالناس والمجتمع وطرايقة التعامل مع الناس ودخول السوق وتعرف الدنيا ماشية ازاي ومش مهم المقابل المادي علي اد الخبرات التانية الي بتكتسبها والاعتماد علي النفس
والحمد لله اخر سنة ليا في كلية تجارة علشان الواحد يشق طريقة بقي بجد

[Nile_Storm]

طب يادكتور احمد بذمتك و انت استاذنا كلنا
الاقي وقت منين اشتغل فيه في كليتنا ديييييييييييييييييييييييييييييييييييييييي

[Dr Ahmed]

طب يادكتور احمد بذمتك و انت استاذنا كلنا
الاقي وقت منين اشتغل فيه في كليتنا ديييييييييييييييييييييييييييييييييييييييي

والله يا أخى الفاضل إحنا فاهمين كلية الطب غلط شوية..
وكلنا واحنا طلبة كنا عايشين دور المزنوق دايما وكده رغم إن الوقت فيه بركة لكل حاجة: مذاكرة ونشاط طلابى وأسرة ونت وشغل كمان..
ولا أدّعى أن ذلك سهل ، لكن فعلا يحتاج لشخصية منظمة من الطراز الأول لإدارة كل هذه المهام الغير مستحيلة..

لكن الموضوع يبدأ قبل الكلية ، فعلا من الطفولة زى ما بعض الأخوة تفضلوا وقالوا..
مثلا والدى الله يرحمه كان بيشجعنى وأنا لسه فى المرحلة الابتدائية على إنتاج "مجلة"... أيوه مجلة بيتية باجمع فيها إبداعاتى الصغيرة وتجميعاتى من المجلات الأخرى مقابل أن يشتريها هو منى ب "عشرة قروش"
وعندما كنت فى الاعدادية أصدرت مجلة طلابية وأيضا كانت بمبلغ زهيد لكنها لاقت نجاحا محمودا..
وكنت أشترك فى مسابقات مجلة "ماجد" الاماراتية وكنت دااااااااائما أفوز فى مسابقة أكمل الرسم المشهورة ، حتى أنى اشتريت ب "جزء" من هذه الجوائز دراجتى الكحلى التى تشبه سيارتى لانسر الحالية..
وفى الثانوية بدات أتدرب بعض الرياضات العنيفة شجعتنى على العمل فى بعض الأعمال التى تعتمد على القوة فى أحد المصانع لكنى تركتهم بسرعة بسبب سوء المعاملة وعدم إعطاء الحق لأصحابه وحسابى معهم يوم القيامة..
ثم عملت وأنا طالب فى المرحلة الثانوية فى بيع الجرائد والمجلات.. أخرج فجرا وأستلم كل شئ وأرصه فى أماكن عرضه وفى نهاية اليوم أسلم الحصيلة وآخذ نصيبى ، وكنت أحتفظ به وأنظر له كما تنظر للذهب اليوم..
كل هذا وأنا -بفضل الله- دائما الأول على المحافظة فى جميع الشهادات العامة.. كى لا يظن أحد أنى كنت أعانى صعوبات دراسية، والعمل كان فى الأجازة فقط.
ثم دخلت الكلية وقمت لفترة بعمل بعض التحف الفنية وبيعها لمحلات الأنتيكات ، ثم أنعم الله علىّ بالإشراف على مشروع يدر دخلا للأسرة كنت أشرف عليه وأنا طالب ويتكفل بمصاريفى الكثيرة كطالب طب..
ومنذ تخرجت عملت فى العديد من المستشفيات كطبيب مقيم ولم أفتح عيادة إلا بعد أن حصلت على الماجستير حفاظا على حق المريض فى العناية الطبية المتخصصة فعلا لا قولا ، وأنا الآن -بفضل الله- استشارى ومدرس بالجامعة ولدّى أكثر من عيادة وأكثر من مستشفى كبير أعمل بهم وأعد لإصدار بعض المؤلفات فى تخصصى ولدّى أسرة صغيرة جميلة وأبناء لابد أن أعلمهم قيمة العمل والجهد وإثبات الذات بالعرق والكد والتقرب إلى الله قبل كل شئ وليس بأى طريقة أخرى.

[Nile_Storm]

بصراحه تحيه مني لحضرتك
و تقبل فائق احترامي لشخصك
اخجلتني بردك

[hazem_khidr]

تحيه للدكتور احمد و الباشمهندس كريم
بجد شخصيات من دهب :)