محفظتي ضاعت بكل اللي فيها ايه العمل

[Karim_Monir]

السلام عليكم
محفظتي ضاعت من كام ساعة وانا في النخيل في اسكندرية بكل اللي فيها
فلوس مصري ودولارت ويورو والرخص والبطاقة وكارنية النادي والمشكلة الاكبر كروت 6 بنوك والتامين الطبي وكذا كارت تخفيضات
مش مهم كل الفلوس ما عدا الرخص والبنوك
مش عارف اعمل ايه
جايلي حالة شلل ومش عارف افكر حتى في اي حاجة
دلوني ودعواتكم اللي يلاقيها يجيب الرخص حتى عشان اعرف اروح القاهرة

[fady.bekatcho]

فى داهية الفلوس
المهم طبعا تعمل محضر بان الرخص والبطاقة ضاعو علشان ما حدش يعمل بيهم مصيبة وتخلى مسئولية
وطبعا البنوك تروح تلغى كل الفيزا والكروت بتاعتهم

[fady.bekatcho]

وباذن ربنا واحد ابن حلال هيلاقيهم ويرجعولك تانى

[mahmoudselim]

فداك يا كريم .. قدر الله وما شاء فعل
أول حاجة تصلي ركعتين لله وتدعي ان المحفظة ترجعلك وان شاء الله هيحصل كل خير
تروح تعمل محضر في القسم في أسرع وقت ,, وتتصل بالبنوك وتوقف عمل الكروت .
ومتضيقش نفسك زيادة عن الزوم في كل الاحول , لان اهم حاجة ال هي الرخصة وكروت البنوك أمرهم سهل والباقي مقدور علية
أن شاء الله .. متنساش الركعتين مع صلاة الفجر والدعاء والاستجابة علي ربنا ان شاء

[NoRmAl]

الحمد لله وقدر الله وما شاء فعل
فعلا أول حاجه تعمل محضر فورا وتكلم البنوك بسرعه جدا توقف عمل كل الفيز
وإن شاء الله ربنا يعتر فيها واحد أبن حلال يرجعهالك
بس أنت أدعى وقول يا رب

[ahmed ismail]

اجارك الله فى مصيبتك

بالنسبة للفلوس انساها مبدائيا عوضك على الله فيها

ثانيا
اتصل حالا بكل بنك من البنوك ديه و بلغهم يوقفوا كل الكروت عشان اللى خدها ممكن يشترى بيها اى حاجه
ثالثا اعمل محضر فى القسم وخد صورة منه و امشى بيها و حط فى المحضر ده محتويات المحفظة عشان لا قدر الله لو وقفوك فى اى لجنة عقبال ما ترجع مصر تطلعلوهم صورة المحضر ان الرخص ضاعت منك
رابعا اول ما ترجع مصر روح على السجل المدنى طلع بدل فاقد اظن حتاخد اسبوعين و ممكن اقل لو فيه واسطة وطلع بالمرة وانت واقف صورة شهادة ميلاد بيدوهلاك وانت واقف و لو عندك صور البطاقة بتاعتك خدها هى و شهادة الميلاد الاصلية وصورة المحضر و روح على المرور وابدا امشى فى اجرائات بدل الفاقد للرخصة بتاعتك ورخصة العربية

اهم حاجه دلوقتى تبقى مركز وانت فى اسكندرية على حاجتين اول حاجه تتصل حالا او اول ما يفتح مركز الكروت بتاع كل بنك توقف الكروت بتاعتك فورا تانى حاجه تعمل محضر

اهم نقطة دلوقتى خالى بالك من العربية بتاعتك كويس جدا جدا جدا و حاول تأمنها علىقد ما تقدر عشان ممكن يتعمل عليها توكيل رسمى فى الشهر العقارى و تتسرق منك و تبقى بتاعت الحرامى رسميا وقانونيا و بتحصل كتير لو حد ليه معرفة فى اى شهر عقارى بيعمل الموضوع ده بسهولة
و ربنا يعينك و يسترها معانا ومعاك

[ehab_mansour]

لا حول ولا قوة الا بالله
اللهم أجره في مصيبته واخلفه خيرا منها
ربنا يسترها معاك لحد ما تسترد حاجتك يارب

[aliabutaleb]

لا حول ولا قوة إلا بالله
ربنا يأجرك في مصيبتك ويخلف لك خيراً منها يا كريم
أنا موجود من الضهر إن شاء الله في إسكندرية
قوللي لو احتجت أي حاجة أنا موجود لغاية يوم السبت إن شاء الله

[ahmed4000]

البنوك ممكن توقف الكروت بالتليفون لغاية لما تعمل محضر
ربنا معاك

[Pharaoh]

هو اية موضوع المحافظ اليومين دول
ركز و جرب تدور عليها كويس لانك بتقول انها ضاعت مش اتسرقت
ووبص تحت كراسى العربيه
وحاول تركز اكتر و ترجع شريط الذاكرة يمكن تفتكر لقطة كدة تقولك نسيتها فين

ولما تكلم البنوك عشان توقف الكروت اتاكد اذا كانت فى عمليات تمت بيها ولا لا

ربنا يسهل ان شاء الله وترجعلك

[kh_talaat]

حاول تفتكر آخر مره كنت شايفها معاك امتى ودور في كل مكان ذهبت اليه في اليوم دة سواء سوبر ماركت او مطعم ... الخ وأسألهم عليها يمكن يكون واحد ابن حلال محتفظ بيها ومستنيك تيجي تسأل عنها او حتى حرامي خد الفلوس وسابلك البطاقة والرخص ولو ملقتش سيبلهم نمرة موبايلك احتياطي يمكن حد يلاقيها ويجيبها لهم

وبرضة دور كويس في البيت والعربية انا محفظتي ضاعت مني اسبوع كامل وفي الآخر لقيتها في البيت شابكه في شماعة الملابس بعد ما كنت فقدت الأمل عشان كدة بقولك دور كويس في كل مكان في البيت مهما كان

وطبعا قبل كل حاجة اوقف عمل كروت الآئتمان مؤقتا لحد ما تشوف هترسي على اية ، وان شاء الله تلاقيها

[Akram]

زي ما الزملاء قالوا اعمل المحضر دا أول حاجة ,
و لو باسوورد الكروت مش في المحفظة يبقى اللي هيلاقي الكروت مش هيعرف يستخدمها ,
فانت تلف على كل الأمكان اللي كنت فيها و تبلغهم بفقد المحفظة و تديهم رقمك مع الوعد بمكافأة مجذية و التأكيد على عدم اهتمامك بالفلوس اللي كانت فيها ,
و استنى النهاردة ,, لو ظهرت يبقى خير و لو ما ظهرتش يبقى أوقف الكروت احتياطي ,
و هتكمل في الإجراءات الباقية لإستخراج الورق و ربنا يعينك ,

لو عايز حاجة انا في الخدمة ,,, اجيلك مخصوص ,,,,

[kh_talaat]

زي ما الزملاء قالوا اعمل المحضر دا أول حاجة ,
و لو باسوورد الكروت مش في المحفظة يبقى اللي هيلاقي الكروت مش هيعرف يستخدمها

لاء ممكن يستخدمها في الشراء من على الأنترنت

[mido777]

ان شاء الله قبل ما ترجع القاهرة حتلاقيها

ولو عايزنى اجيلك او اخلصلك حاجة فى وسط البلد ياريت تقولى يا كريم

[بحري]

أسأل الله أن يرد عليك ضالتك...ميسورة إن شاء الله يا زعيم...أبشر