حدث عام 1979 ..أمن دولة

[A7MED_PHARMA]

خلفية الأحداث
أخويا محمود نجح في ثانوية عامة ..وعلى عادة المصريين ..جالنا هدايا صناديق حاجة ساقعة من كل الأنواع
لقينا وسطهم ...زجاجة حاجة ساقعة فيها حاجة سودا غريبة ..

الأحداث
قاعد النهاردة أنا ووالدي بعد صلاة الجمعة ..فتحنا موضوع الحاجة الساقعة دي
قولتله:"تعرف ياحج ..لو كنا في أوروبا ..قزازة الحاجة الساقعة دي ..ممكن نرفع بيها قضية ونطلب تعويض مادي"
قال الوالد:" أنا سيبت شغلي في مصنع الغزل في الزقازيق سنة 79 ..بسبب حاجة زي كده"
قولتله:"إزاي ياحج "
قال الوالد:" جالنا عيش في وجبة الغدا..بسم الله ولسه بشق الرغيف وهاكل ..لقيت فيه فار صغير..روحت عملت محضر بالواقعة..أخدوني على مباحث التموين وفضلت قاعد هناك في مكتب الظابط(ماهر الدغيدي) رئيس مباحث التموين أيامها في الزقازيق ..فضلت قاعد 5 ساعات ياأحمد لحد لما جه تقرير الهيئة المختصة بيقول:" جسم غير واضح المعالم"
أنا قولت لااا..ده كان فاار...مش حاجة تانية
الموضوع إتطور مابين مباحث التموين ...وأمن الدولة
أخدوني أمن الدولة يومين كاملين...وظابط أمن الدولة يقولي ""يعني أمك عمرها مامدت إيدها في بلاص المش ..طلعت فار أو عرسة"""
فضلت أكتر من شهر ياأحمد ...معينين واحد بموتوسيكل ماشي ورايا في كل حتة ..أروح بيتنا ..يفضل واقف بالموتوسيكل قدام البيت..وضايقوني في الشغل..وفي الأخر
صدر ضدي مذكر ..كان أول سطر فيها بيقول
أن الصادر بحقه المذكرة (.........) ..قام بالتحدث على رؤس العمال مما أدى إلي:
زعزعة ثقة عمال الهيئة في الإدارة

وشوية كلام مش فاكره ياأحمد..
أيامها كنا شباب في بداية التلاتينات من عمرنا ...أعضاء في حزب التجمع
وكانت واخدانا الحماسة ...
قبل الموضوع ده بشوية ..كانت حصلت ثورة الحرامية ..وعلشان كده
أمن الدولة مكنش عاوز أي خروج عن النص ..خصوصا بين العمال
يعني العامل يروح مصنعه الصبح ..يخلص شغله يروح
ملوش دعوة بحاجة ..ولا يتدخل في أي حاجة تحصل حواليه..الرغيف طلع فيه فار
يقول فضل ونعمة ...ويغمس الفار بالعيش ..وهوا ساكت
عهد السادات ياأحمد شوفنا فيه حاجات ...ماتقدرش تتخيل البلد كانت عاملة إزاي"
........................



.....


..
وهنا يخلص كلام الوالد
والدي كان مهندس توليد قوى(كهربا) ..بمصنع الغزل بالزقازيق ....وتركه وإشتغل بشركة الدلتا للسكر ..كفر الشيخ

[Abdo_Eldesokey]

تحية إلى جهاز أمن الدول عشان شايف شغله من زمان

إيه يعني فار في رغيف عيش ؟؟!!

متزعلش يا دكتور أحمد .. بس والد حضرتك كان عايز "يزعزع" الأمن

[ahmed4000]

عهد السادات ياأحمد شوفنا فيه حاجات ...ماتقدرش تتخيل البلد كانت عاملة إزاي"
........................

والغريبة كل حاجة الناس تقولك فين ايام السادات؟

مش عارف بصراحة ازاى مش ملاحظين ان البلد بدأ خرابها على ايده بالانفتاح الاستهبال والطبقة المتوسطة انهارت وظهرت بدايات كل الفساد من فراخ فاسدة وتجارة عملة و"قطط سمان" ولا الشلة اللى كانت حواليه ..انيس منصور المستشار السياسى (ومتسالش ايه علاقة انيس منصور بالسياسة) التهامى (الراجل العجيب ده اللى كان مدروش) اما الناس المحترمة فكانت بتستقيل لما تلاقى العته اللى كان بيعمله -تقريبا مفيش وزراء استقالوا فى عهد اى رئيس الا فى عهده

وحتى لما مبارك جه -اختلفنا او اتفقنا معاه- كانت مصر متخانقة مع طوب الارض وكان البلد عايمة فى المجارى وكانوا بيتريقوا ان الاسهل على الواحد يسافر قبرص يوصل الرسال بنفسه على انه ينتظر الحرارة تيجى فى التليفون

[د.أبونضال]

فعلا ... إزاي يكتب شكوى إنه لقى فار في العيش... ده كان مفروض يبعت جواب شكر للحكومة على إنها بتدعم رغيف العيش بالبروتين والذي منه...

[A7MED_PHARMA]

تحية إلى جهاز أمن الدول عشان شايف شغله من زمان

إيه يعني فار في رغيف عيش ؟؟!!

متزعلش يا دكتور أحمد .. بس والد حضرتك كان عايز "يزعزع" الأمن

ماهو والدي ماخدش باله ...إن الفار ده كان مصروف مع وجية الغدا
ههههههههههه

والغريبة كل حاجة الناس تقولك فين ايام السادات؟

مش عارف بصراحة ازاى مش ملاحظين ان البلد بدأ خرابها على ايده بالانفتاح الاستهبال والطبقة المتوسطة انهارت وظهرت بدايات كل الفساد من فراخ فاسدة وتجارة عملة و"قطط سمان" ولا الشلة اللى كانت حواليه ..انيس منصور المستشار السياسى (ومتسالش ايه علاقة انيس منصور بالسياسة) التهامى (الراجل العجيب ده اللى كان مدروش) اما الناس المحترمة فكانت بتستقيل لما تلاقى العته اللى كان بيعمله -تقريبا مفيش وزراء استقالوا فى عهد اى رئيس الا فى عهده

وحتى لما مبارك جه -اختلفنا او اتفقنا معاه- كانت مصر متخانقة مع طوب الارض وكان البلد عايمة فى المجارى وكانوا بيتريقوا ان الاسهل على الواحد يسافر قبرص يوصل الرسال بنفسه على انه ينتظر الحرارة تيجى فى التليفون

عهد السادات فعلا
فعلا
كان بداية عهد السقوط المستمر لحد دلوقتي.....مسمعناش في التاريخ عن قضية لحوم فاسدة أو ماشابه أيام ناصـــر
كل ده بدء في عهد السادات

فعلا ... إزاي يكتب شكوى إنه لقى فار في العيش... ده كان مفروض يبعت جواب شكر للحكومة على إنها بتدعم رغيف العيش بالبروتين والذي منه...

شوفت ازاي!!!!!
بيصرفوا لكل مواطن فار بحاله ..مع كل رغيف عيش

[TAMERHASSAN]

مش لاقي كلام اقوله

[Mzeid]

اولا الف مبروك لمحمود يا دكتور

و حتة زعزعة الامن دي بتفكرني بفيلم عادل امام بتاع الواد محروس بتاع الوزير

و بعدين ليه يلفقوا لوالدك تهم كدة ليه على ايه يعني ؟!

ربنا على الظالم و المفتري

[Moe86]

المهم هاتعمل اية فى ازازة الحاجة الساقعة؟ (طبعا الموضوع دة حصل 5000 مرة قبل كدة)

أعتقد ان "جهاز حماية المستهلك" عمال شغل مش بطال الأيام دى
يعنى ممكن يحكموا ليك بتعويض 10,000 مثلا و يخادوا ليهم غرامة 100,000
مش مشكلة بس تبقى خدت جزء من حقك

[M.almaghraby]

اكتر كلمة يتضايقني من الشعب المصري

لما اسمع واحد يقولك فين ايام السادات و الانفتاح و السلام و الكلام دا و يمجد فيه كانه زعيم بجد


ياااه بضايق اوييييييييييي

[بحري]

خلفية الأحداث
أ
قبل الموضوع ده بشوية ..كانت حصلت ثورة الحرامية ..وعلشان كده
أمن الدولة مكنش عاوز أي خروج عن النص ..خصوصا بين العمال
ي

أولا ألف مبروك لأخوك

ثانيا السادات هو من سماها ثورة حرامية كعادة أهل الحكم في التلاعب بعقول الجماهير التي ضاقت بها السبل ورأت مستقبلا مظلما أمامها فثارت مطالبة بما يسد جوعها بسبب ارتفاع الأسعار...كانت في الحقيقة ثورة جياع وليست ثورة حرامية...فالحرامية هم من سرقوا الجياع وتلاعبوا بأقواتهم

لكن من جاءوا بعد ذلك استوعبوا الدرس جيدا وعرفوا أساليب أكثر تأثيرا وقدرة على تمرير ارتفاع الأسعار..
إشاعة كبالونة اختبار
ثم عدم تنفيذ الإشاعة
ثم بالونة مرة أخرى بارتفاع أشد
ثم عدم تنفيذ الإشاعة
ثم علاوة اجتماعية 10٪
ثم رفع الأسعار بدرجة أقل من الإشاعات
فالناس يحصل لها ارتياح وتحمد ربنا أن الأمور لم تكن أسوأ مما توقعوا..ودورة كرة قدم وفيلم وأغنية ورقصة وسي دي فضيحة وخبر ملتهب ينسوا الناس اسمها أصلا

على فكرة يا دكتور ملاحظة دكتور محمد كايرو في محلها...مواضيعك إما إنت بتتوقف فيها أو حد تاني لازم يتوقف...ربنا يستر

[A7MED_PHARMA]

على فكرة يادكتور بحري

الثورة دي كانت مشهورة بإسمين
ثورة الجيااااع
أو
ثورة الحرامية
...................
وبالنسبة للوقف

ربنا يستر...عندي كام مشاركة أهه في الموضوع
والحمد لله ...لسه ماحدش إتوقف

[powerofhelll]

ايه يعني فار ده بروتين

[magyver]

فعلا والله مافيش كلام بتقاال
والف مبروك لمحمود

[dr-mohamed]

أيامها كنا شباب في بداية التلاتينات من عمرنا ...أعضاء في حزب التجمع
وكانت واخدانا الحماسة ...
قبل الموضوع ده بشوية ..كانت حصلت ثورة الحرامية ..وعلشان كده
أمن الدولة مكنش عاوز أي خروج عن النص ..خصوصا بين العمال

عهد السادات ياأحمد شوفنا فيه حاجات ...ماتقدرش تتخيل البلد كانت عاملة إزاي"

بص يا عم احمد زي ما قال اخونا بحاري لازم يا انت تتوقف يا اما حد يتوقف بسببك والمرة دي هيحصل الاتنين انا وانت هنمسك في رقبة بعض لغاية ما نتوقف احنا الاتنين ومش بعيد ناخد في رجلينا اخوك بحاري اهو بالمرة يجرب حياة السجن والوقف لانى من يوم ما عرفته مفتكرش انه اتوقف ولا مرة

اولا والدك بيقول انه كان شاب واخداه الحماسة وعضو في حزب التجمع وبعد كدة انت اللى بتوصف احداث 18 - 19 يناير 1979 بانها ثورة الحرامية لان لو والدك الله يديه الصحة كان عضو في التجمع في الوقت ده لا يمكن يوصف الاحداث دي بانها ثورة حرامية لانها بالفعل كانت ثورة جياع

ويا سيدي والله اللى عاش في العهد اللى بعد كدة بيترحم على عهد السادات على الاقل مكانتش الفروق الطبقية رهيبة كدة كنا كلنا بنلبس مريلة تيل نادية ونروح المدرسة مشي ونجيب اللحمة البلدي بجنيه والصومالي ب68 قرش مش دلوقت فيه ناس بتشتري اكل للكلاب والقطط مستورد وناس مش لاقية العيش الحاق

والغريبة كل حاجة الناس تقولك فين ايام السادات؟
مش عارف بصراحة ازاى مش ملاحظين ان البلد بدأ خرابها على ايده بالانفتاح الاستهبال والطبقة المتوسطة انهارت وظهرت بدايات كل الفساد من فراخ فاسدة وتجارة عملة و"قطط سمان" ولا الشلة اللى كانت حواليه ..انيس منصور المستشار السياسى (ومتسالش ايه علاقة انيس منصور بالسياسة) التهامى (الراجل العجيب ده اللى كان مدروش) اما الناس المحترمة فكانت بتستقيل لما تلاقى العته اللى كان بيعمله -تقريبا مفيش وزراء استقالوا فى عهد اى رئيس الا فى عهده

وحتى لما مبارك جه -اختلفنا او اتفقنا معاه- كانت مصر متخانقة مع طوب الارض وكان البلد عايمة فى المجارى وكانوا بيتريقوا ان الاسهل على الواحد يسافر قبرص يوصل الرسال بنفسه على انه ينتظر الحرارة تيجى فى التليفون

قطط سمان مين بس يا باشا اكبر واحد فيكي يا بلد وقتها كان رشاد عثمان بالمقولة الشهيرة خد بالك من اسكندرية يا رشاد وكانت ثروته تقدر بالملايين وكان عثمان احمد عثمان وكان راجل عصامي مش زي دلوقت 30 ولا 40 واحد وثروتهم بالمليارات دول المعروفين غير اللى منعرفهمش ومش بيظهروا في الاعلام وبردو ثروتهم بالمليارات ومعظمهم بطريق غير مشروعة
وبعدين يا سيدي لما يبقي انيس منصور مستشار احسن ما يبقي الشاذلي ثم احمد عز هم رجال النظام والمعبرين عنه
اما الاستقالات اللى حصلت في ايام السادات فكانت دليل حقيقي على ان الراجل بيختار ناس عندها راي وفكر بدليل انهم ممكن يعارضوه لدرجة الاستقالة زي وزيري الخارجية اللى استقالوا اثناء مفاوضات كامب ديفيد وحتي استقالتهم قدر يحولها لورقة ضغط يحصل بها على مكاسب اكتر
هات لي بقة وزير واحد استقال في عهد ناصر او العهد الحالي وخلينا في لاعهد الحالي لا يمكن واحد يستقيل لان الكل منتفعين مجرد رجال اعمال همهم يبيعوا البلد لنفسهم

ومصر ماتخانقتش مع طوب الارض ايام السادات هي الدول العربية بس ما عدا الامارات خوفا من صدام وبسبب معاهدة السلام لان العرب كانوا رافعين شعار تحرير فلسطين لاخر قطرة دم في اخر جندي مصري
يعني عايزين مصر اللي تحارب بالنيابة وتستمر في لاحروب للابد والسادات رفض الاستمرار في الحروب
وظاهرة الجعجعة الصوتية العربية معروفة وجربناها كتير يا اما نحارب ونخسر من جميع النواحي وفي الحالة دي لو كسبنا الحرب يبقي العرب كسبوا وكل دول تقولك شاركت في الحرب ولولا قواتنا ما كانت مصر كسبت وتلاقي قواتهم دي كلها 200 ولا 300 عسكري وكانوا في القاهرة يا اما نخسر ووقتها تشتغل التريقة على المصريين
السادات لانه عسكري قرر عدم الاستمرار في الحرب واعاد سيناء كاملة هتقولي غير مسلحة هقولك احسن من الجولان والضفة الغربية
تخيل لو كنا استمرينا في حالة الحرب كان زمان حصل كام حرب وكان زمان حالة البلد عاملة ازاي والعرب طبعا كانوا هيتفرجوا علينا لا يا سيدي مش عايزين نحارب

اما المشاكل بتاعة البنية الاساسية كنت منتظر ايه يا باشا من بلد بتخرج من حرب تدخل التانية ودخلت حربين كبار جدا في 6 سنوات وبينهم حرب استنزاف يا دوب البلد كانت لسة هتفوق السادات اتقتل

اكتر كلمة يتضايقني من الشعب المصري
لما اسمع واحد يقولك فين ايام السادات و الانفتاح و السلام و الكلام دا و يمجد فيه كانه زعيم بجد

ياااه بضايق اوييييييييييي

راجع كلامي اللى فوق يا دكتور مغربي وقولي اي عهد الافضل ناصر ام السادات ام مبارك ؟
ثورة الجياع كانت علشان رفع رغيف العيش من 5 مليم لقرش وكيلو اللحمة من 68 قرش لجنيه والسكر ولا مش فاكر الارز من 4 قروش ل 5 قروش
شوف انت لااسعار ارتفعت كام مرة وكام ضعف من يوم علاوة ال30 % الملعونة
وشوف بردو تعقيب اخونا بحاري

أولا ألف مبروك لأخوك


ثانيا السادات هو من سماها ثورة حرامية كعادة أهل الحكم في التلاعب بعقول الجماهير التي ضاقت بها السبل ورأت مستقبلا مظلما أمامها فثارت مطالبة بما يسد جوعها بسبب ارتفاع الأسعار...كانت في الحقيقة ثورة جياع وليست ثورة حرامية...فالحرامية هم من سرقوا الجياع وتلاعبوا بأقواتهم

لكن من جاءوا بعد ذلك استوعبوا الدرس جيدا وعرفوا أساليب أكثر تأثيرا وقدرة على تمرير ارتفاع الأسعار..
إشاعة كبالونة اختبار
ثم عدم تنفيذ الإشاعة
ثم بالونة مرة أخرى بارتفاع أشد
ثم عدم تنفيذ الإشاعة
ثم علاوة اجتماعية 10٪
ثم رفع الأسعار بدرجة أقل من الإشاعات
فالناس يحصل لها ارتياح وتحمد ربنا أن الأمور لم تكن أسوأ مما توقعوا..ودورة كرة قدم وفيلم وأغنية ورقصة وسي دي فضيحة وخبر ملتهب ينسوا الناس اسمها أصلا


على فكرة يا دكتور ملاحظة دكتور محمد كايرو في محلها...مواضيعك إما إنت بتتوقف فيها أو حد تاني لازم يتوقف...ربنا يستر

تحليل قمة في الاحترافية يا بحاري باشا
النظام اتعلم من اللى حصل في ثورة الجياع وعلشان كدة نزع كل العوامل اللى ممكن تخلي الناسش تثور او تفكر
خللى الناس تجري ورا لقمة العيش من الفجر لمنتصف الليل وكلنا عارفين كويس ان محدش فينا بيشتغل اقل من 10 ساعات يوميا وفي الاخر مفيش
وزاد الجهل الحقيقي بينما ايام السادات كانت ما زالت هناك حركة فكرية والدليل ان العمال اللى مع والد فارما كانوا اعضاء في التجمع وكان الفكر اليساري منتشر جدا في اوساط الشباب والعمال ومعه الفكر الاسلامي
قولي الفكر المنتشر دلوقتي ايه
فكر انت تمراوي ولا عمراوي زي الموضوع اللى كان معمول هنا من كام يوم

[ahmedbeirut123]

هو الفار يعرف يزعزع الامن

طيب لو قال الرغيف فيه نووى

يبقى بيزعزع المنطقة

ههههههه