السرقة مش زادت شوية فى مصر اليومين دول ولا ايه

[Ah.Farid]

واضح ان ارتفاع الاسعار وانخفاض الاجور لة تأثير كبير على الناس فى بلدنا لان معدلات السرقة فى البلد بيزيد
كل يوم اسمع من واحد صاحبى ان موبايلة اتسرق وكل شوية الاقى مصيبة سواء نصب او سرقة
ياترى اية الحكاية ؟
هل احنا مقدمين على ايام سوداء ؟ لان احساس الامان بيقل كل شوية
كمان معدلات التثبيت بالاسلحة البيضاء مابقيتش فى المناطق المترفة فقط دة بقت فى الشوارع المزدحمة كمان
وكمان الخناقات فى الشوارع فى ازدياد
هل الحالة الاقتصادية وسياسة الزحام بتتفاعل مع الناس لهذة الدرجة ,,,,,مش عارف
احساسى ان احنا قربنا اننا نعيش فى غابة فعلية
يمكن اكون متشائم شوية بس حوادث السرقة شغالة بزيادة
يجوز القاهرة والجيزة عاوزين اعادة تأسيس وتعليم من اول السطر

..........................
تم النقل إلى القسم المختص
الإدارة -3

[sherif_84]

أنا معاك يا أستاذ أحمد فى الكلام اللى قلته فعلا ربنا يستر علينا من الأيام الجاية وفعلا فى عربية لانسر جديدة 2007 اتسرقت من قدام بيتنا كانت بتاعت واحد جارنا وطبعا هو بلغ لكن تلاقيها دلوقتى اتفككت واتباعت فى غمضة عين كمان فى عربية اسبكترا و مازدا قديمة فتحوا الشنطة وسرقوا منها شوية حاجات ربنا يسترها على عربياتنا
اللهم احفظ أموالنا وأموال المسلمين
يارب خلصنا من الحرامية اللى زادوا فى البلد

[analyzer]

ارتفاع الاسعار + قلة الاجور + البطالة + البعد عن الدين = فشل تام وانهيار للمجتمع
مما ينتج عنه كل الافعال الا اخلاقيه التى نراها فى حياتنا اليومية .

حسبى الله ونعم الوكيل

يمهل ولا يهمل

جى رايح منه له

[Ah.Farid]

على فكرة انا كل يوم اسمع عن طريقة جديدة فى السرقة او النصب
يعنى تسمع اللى يقولك حرص على ان سنتر وزجاج العربية يكون مغلق وانت ماشى لانك ممكن تقف فى اشارة فجاة تلاقى واحد حاطط مطوة فى رقبتك وياخ منك المحفظة والموبيل
ومرة تانية يقولك ما تمشيش فى الشارع وانت معاك شنطة حتى لو مفيهاش حاجة ممكن تتشرط الشنطة ويتاخد اللى فيها بدون ما تحس (سواء فيها حاجة غالية او رخيصة )
المهم هاتتقلب يعنى هاتتقلب
اثنين من اصحابى اتسرق منهم موبايلات فى اسبوع واحد واحد N95 والتانى 6600
وبنفس الطريقة بيتسحب من جيب الجاكت واحد فى وسط البلد والتانى فى مدينة نصر

المهم لما بيجى يعمل بلاغ (محضر )فى القسم تلاقى عدم المبالاة وان شىء طبيعى ومحدش عاوز يعمل حاجة الا لما يعرف ان ليك معرفة فى حتة عشان الناس تتحرك

حتى وكيل النيابة مش فاضى يقابل حد بس اول ما يجيلوا تليفون صغير من المعرفة يبقى كلة تمام يا فندم
وتلاقى الموضوع بدأ يتحرك ,,,,ويعنى اية يتحرك يا دوب يطلعلك جواب لشركات المحمول لتتبع التليفون
وانت وحظك ممكن بعد اسبوع او شهر يعرفوا التليفون فين دة لو ربنا بيحبك وماشى على الصراط المستقيم وكمان معاك وسايط ومعارف ممكن حد يسمعلك

يعنى لازم من الواسطة فى كل حاجة بالذمة دة كلام
معلش انا كنت بتكلم عن السرقة وحولت على موضوع الوسايط بس انا شايف انك فى البلد دة لازم علشان تاخد ابسط حق من حقوقك ان يكون ليك معارف وعلاقات علشان الدنيا تتحرك

[Xpert]

نظراً للغلاء السائد بالبلد ... كان من الضروري علي الشعب المصري ابتكار طرق جديده للحصول علي الكاش ماني باسهل الطرق الممكنه .. لمواجهه الغلاء المعيشي و المستوي الاقتصادي السائد ..
و الجدير بالذكر ان السرقه احد هذه الطرق .. و يفضل ان يطلق عليها مبداء : اللي مامعوش ياخد من اللي معاه ...الغني يدي الفقير يعني هههه

[sherif Anton]

انا فعلا 2 من اصدقائي اتسرق الموبايلات بتاعتهم الاسبوع ده ... الوضع فعلا مايطمنش

[mfa2009]

احنا برده مسكوا حرامي بيلم -لا مؤاخذة- الجذم من علي ابواب الشقق وتاني يوم مسكوا حرامي بيفك الباب الالوميتال بتاع العمارة ايوه والله بتاع العمارة وفين قرب مدرية الامن
بس لازم نعرف اللي بيسرق مابيسرقش علشان يوكل عياله اللي بيسرق بيسرق علشان يعمر دماغه هدفه سامي برضه

[wawoo]

اعرف شركة كبيرة , حرامى دخل الشركة لم كل موبيلات الناس و هى بتصلى , و لما الناس فى الدور اللى تحت عرفو طلعو عشان يشوفو حصل اية , نزل لم موبيلات الدور اللى تحت كمان , و هرب.

[ahmedsrs]

احنا عندنا سرقو اغطية البلاعات الحديد وبعدها بشهر سرقو كابلات التليفونات

[OsKaR]

غريبه كأنكم اول مرة تاخدوا باالكم من الموضوع ده

[Xpert]

احنا عندنا سرقوا خط كهرباء موصل 25 عمود نور مع بعض ... حلوهم و خدوهم .. عادي يا مان ..ده اللي انا اسميه فري ماني .. free money ...

[MoToRiZeR]

كاسيت عربية واحد صاحبي اتسرق امبارح برده ..

بس عادي هي السرقة شغالة من زمان لأن الوضع متدهور من زمان
بس هي الفكرة ان النسبة هتزيد لأن مع الوقت الوضع مش بيتحسن بل بيزداد تدهورا

[Ah.Farid]

ودة طريقة جديدة لسة جايلى النهاردة على الايميل


جامدة جداً



( إنت جاى تهرج ولا جاى تعزي :)



تعرض عدد كبير من المواطنين لعملية نصب أمس الأول بينما كانوا يؤدون


واجب العزاء في سرادق بمدينة نصر، وذلك على يد أربعة أشخاص تظاهروا


بأنهم من حرس جمال مبارك نجل رئيس الجمهورية، وطالبوا المعزين بتسليم


هواتفهم المحمولة لهم في إطار إجراءات أمنية قبل وصوله لتقديم واجب


العزاء .


فقد فوجئ المعزون بأربعة أشخاص مفتولي العضلات يرتدون بزات سوداء


ويضعون سماعات في آذانهم يهبطون من سيارة جيب 'شيروكي ' سوداء اللون


ويسألون عن أبناء المتوفى، وذهب أكبرهم ليستعلم عن شخصيتهم، ليخبروه


أنهم ضمن الحرس الشخصي لجمال مبارك، وأنه سيحضر خلال نصف الساعة



ليقوم بنفسه بأداء واجب العزاء ..


لكنهم طلبوا إخلاء السرادق من أي تليفون محمول؛ وذلك كإجراء أمني متبع


عند حضور جمال مبارك أي مؤتمر أو حفل أو مناسبة رسمية، وأعطوه دفترًا


يحتوي أرقامًا ليتم لصقها على كل تليفون يسحب حتى إذا انتهى نجل


الرئيس من العزاء مبارك يحصل كل شخص على تليفونه .


وطاف أحدهم على المعزين حاملاً في يديه حقيبة ' هاندباج ' لجمع


التليفونات منهم،


وما أن جمعوها من جميع المتواجدين، حتى وضعوها داخل سيارتهم الشيروكي


قبل أن ينطلقوا بها بأقصى سرعة، ليتبين بعد لحظات بأن هؤلاء مجرد


محتالين استخدموا اسم جمال مبارك في النصب على العشرات من المعزين ..


انطلقت أكثر من سيارة خلف النصابين وذلك في محاولة للحاق بهم واستعادة


التليفونات، إلى أن قاموا بإلقاء الحقيبة التي تحتوي على التليفونات


فارغة وفروا هاربين، ، وقد انتاب المتواجدين نوبة ضحك من الأساليب


الجديدة للمحتالين ...

[ahmedezzat78]

يههههههههههههههههههه

حلوه حلوه

[GoldenManEye]

با ولاد الجنيه!!!!