ياترى تعرف الشخص ده

[eng:ahmed]

عويجة أفندي

عويجة أفندي راجل دوغري .... يوميا تلاقيه صاحي بدري
وبكل همة على شغله يجري .... وعمره ما راح يوم وخري
عويجه أفندي راجل مستقيم .... على طول ماشي في السليم
في مدح مديره لسانه كريم .... وعامل لأخلاقه نظام وريجيم
شايل رؤسائه فوق راسه .... رمز التفاني في أخلاصه
عشان مصلحته يبيع ناسه .... إن حتى مديره ضربه وداسه
عويجه أفندي راجل مظبوط .... أدام مديره عامل كتكوت
ولو حتى في يوم رزعه شلوت .... يضحك ويغني أنا مبسوط
عويجه أفندي راجل رايق .... بنفاقه وكدبه فخور متعايق
كام مره أشوفه أنا متضايق .... لو غاب عنه مديره دقايق
عويجه أفندي صاحب مبدأ .... لرضا مديره هو الأسبق
تنصح فيه ولا يصدق .... ويا مديري حلمه بيتحقق
عويجه أفندي راجل تمام .... دايما باصص على قدام
لمديره ينفذ حتى الأحلام .... ولو كح مديره يقول يا سلام
عويجه أفندي ده أسطوره .... قفاه لمديره ملعب كوره
ليه ضحكة صفرا و مشهوره .... والكدب في دمه وعالقوره
عويجه أفندي نهايته ايه .... راح يترقى ويصبح بيه
وكام عويجة يعيشوا حواليه .... وكل أصحابه وأحبابه يتفوا عليه

منقول من إيميلي

[حاتم سليم]

يا ترى اونكل عويجه

معدول و لا معوج ؟؟؟

[النوبي]

عويجه افندي راجل حساس ........................عارف مصلحته زي كل الناس
محدد هدفه في الانجاز..................... عارف ان مسيره علي الكرسي الهزاز
يملي جيوبه من عرق الناس..........ويرضي صاحب الكرسي الممتاز

[تامر.محمد]

عويجة افندي هايروح فين ؟ ... جوة حفرة متر في متريـن
قاعد فيها ليـــــوم الديـــــن ... لما نشوف هاينافق مــين

[devilishtigers]

حلو اوي قصة عويجة افندي
وما شاء الله في شعراء هنا جامدين

[ehabbasha30]

عويجة افندى دة راجل سيس ....... دة تلاقية من اولاد ابليس
ممكن تقابلة فى اى حتة ....... جارك, زميلك, او حتى فى الاتوبيس
عويجة افندى مش من دلوقتى ....... دة من ايام فرعون واوزوريس