تعمل ايه لو لقيت منتدى نايل موتورز اتقفل ؟؟؟

[ابو ليلى]

السلام عليكم ورحمة الله وبركاته

زى العادة ركنت عربيتك وطلعت على شغلك وصباح الخير يا محمد وازيك يا مدام هند وبتجرى على مكتبك وكلك نشاط وحيوية فتحت الكمبيوتر وانت بتقول لنفسك اما اشوف اخبار المنتدى ايه... كده على السريع وانت بتنادى على عم على بتاع البوفيه وحياتك اعملى النسكافيه بتاعى ...بيجى فى دماغك الموضوع اللى كنت كتبته امبارح ومستعجل تشوف الناس ردت بأيه ...تيجى تدوس على الموقع مش راضى يفتح ..تجرب تانى مش راضى يفتح تقول لنفسك هو النت قطع عندى ولا ايه...؟
تجرى بسرعه تفتح صفحة تانية تلاقى النت شغال ...ترجع تجرب تانى برضه مش شغال تقول لنفسك اكيد فى صيانة ولا حاجه وهجرب كمان شويه .

تبتدى بقى تشوف شغلك وتكلم فلان او علان وتطلع ورقك وتشتغل بس وانت مش مرتاح حاسس ان فى حاجه غلط وكل 5 دقائق تحاول تفتح المنتدى تلاقيه مش راضى يفتح... يجى فى دماغك فكرة غريبة مش يمكن جهازى انا اللى بايظ تروح رايح على المكتب بتاع احمد اللى جنبك وتحاول تفتح الموقع من عنده تلاقى برضه نفس الشى
تقول لنفسك طيب اصبر ياعم شويه واكيد شويه وهيفتح ...

ترجع تانى لشغلك تعدى ساعه وانت برضه بتفكر ليه الموقع مفتحش تعدى الساعه التانية وانت حاسس ان فى حاجه غلط فى اليوم ويبتدى مزاجك يتغير ..
تحس انك ابتديت تتوتر شويه تجرى تانى تحاول تفتح الموقع برضه النتيجه هى هى......؟!!

بعصبية تروح جايب تليفونك وتتصل بصحبك اللى تعرفه من 3 سنين من المنتدى يرن التليفون ويرن ويرن ويرن وانت بعصبية بتقول ياعم رد بقى... واخير يرد عليك اول حاجه تقوله ومن غير حتى ما تسلم هو الموقع فيه حاجه؟؟؟ يقولك وهو صوته كله نوم فى ايه يبنى طب قول حتى صباح الخير.... وانت بعصبية بتكلمه ياعم اخلص الموقع فيه حاجه.....؟
يقولك انت معرفتش ؟؟؟ تستغرب !! وتقوله اعرف ايه !!؟ المنتدى قفل خلاص ...............

تسمع الرد ويجى فى دماغك الف سؤال ......تقوله انت بتهرج يعنى ايه قفل ؟؟؟ يرد عليك يقولك ايوة ياعم خلاص مبقاش موجود !!! تقوله طب ليه ؟؟ يقول انا معرفش امبارح حولت ادخل ومرديش يدخل معايا واتصلت بواحد معانا وهو اللى قلى .
تقوله طب سلام سلام .
تقفل وتروح رامى تليفونك على المكتب بعصبية وترجع تحاول تفتح تانى تلاقى نفس النتيجة ......تروح بصوت عالى منادى وانت فى قمة العصبية ياعم على فين النسكافيه يجى الراجل وهو مذهول يا استاذ ما المج قدامك اهو من بدرى .......!!!

ترد تقوله معلش انا اسف وتلاقى تنهيده بتطلع منك بحرقه .وانت بتقول بصوت عالى ......طب ليه ؟؟؟؟؟
يبصلك عم على وهو ماشى ويقول بصوت واطى هو ايه اللى جراله النهارده .

تقعد تفكر وتفكر وتفكر ونفس السؤال طب ليه قفل ........؟؟؟


سؤال طرحته على نفسى : هو ده فعلا ممكن يحصل ؟؟

فكرت وقلت اكيد ليه لا بس سالت نفسى سؤال تانى هو انا عملت ايه للمنتدى علشان يفضل قائم ؟؟من ساعة ما اشتركت هنا وانا على طول اللى باخد ومش بدى

طب لحد امتى هفضل كده هو مش كده انا انانى..... ؟؟
طب هو مش انا بحب المكان ده ؟
طب عملت ايه يثبت انى بحبه ؟
طب مش ممكن يكون عندى افكار تفيد المنتدى ؟
طب انا اصلا حولت افكر من الاساس ؟

اسئلة كتيرة بدور جوايا وبحاول الاقى ليها اجابة ياترى الاسئلة دى برده برضه فى دماغك ؟؟؟؟

دعوة للناقش الجاد الهادف عن كل شى ممكن يفيد المنتدى للارتقاء للافضل محتاج ايجابية وليس كلام من القلب .

محتاج فعل وليس قول واتمنى انى محدش يقول ان المنتدى مش محتاجنا فى شى لالالا المنتدى محتاج لكل واحد فينا ..... محتاج شى ملموس وليس معنوى .

منتظر اقترحاتكم وافكراكم وكل شخص عنده فكرة تفيد المنتدى لا يبخل بالله عليكم .

اتمنى من الاشراف ان يكون الموضوع مفتوح لجميع الاقسام حتى يقراه جميع من فى المنتدى اذا كان من وجه نظركم مفيد للمنتدى .

والسلام عليكم ورحمة الله وبركاته .

[Nistelrooy]

الناس لازم تتجمع ويفتحوا منتدي جديد ..
بس اكيد مش هيبق زي نايل موتورز الي ع الاقل ممكن يفقد نص الي فية ..
أو هيروحوا للبديل ..

بس ان شاء الله مايحصلش كدا :)

[kemoelord]

موضوع جميل جدااااا يا ابو ليلة والله وفعلا عندك حق في كل كلمة وزي ما المنتدى له فضل علينا كلنا من ساعه لما اشتركنا فيه وحتى هذه اللحظة زي ما المفروض علينا واجبات وفروض والتزامات اتجاه المنتدى واتجاه اعضاؤه الكرام وربنا يقدرنا كلنا ويقدرني انا شخصيا في ان اخدم المنتدى حتى لو كانت بسيطة

[kemoelord]

بعد ما كتبت المشاركه فكرت ولاقيت اننا داخلين على شهر رمضان العظيم شهر العباده والصيام شهر الذكر والقران ,,, ففكرت اننا نعمل حاجة زي جمعيات الخير او بنك الطعام كده وتقوم الفكره عن بناء مجموعه من الاعضاء بالاتفاق مع بعض انهم يجمعوا شنط رمضان او حتى ملابس وكل ما نستطيع ان تبرع به لصالح الفقراء او الجمعيات الخيريه نفسها ,, ان شاء الله حتى ننفذ الفكره دي زي فكرة توزيع استكر المنتدى كده وربنا يقدم الي فيه الخير

[kar!m]

أنا أحب أقول ان الشركات اللى بتشغلنا بتدفع لنا فلوس عشان نشتغل وده احنا ماضيين عليه فى عقود العمل .. بتاخد س من الفلوس عشان تشتغل ص من الساعات .. و فى ساعه مثلا للأكل و الصلاة و الراحه و الترفيه.

يا ريت كلنا نحاول وقت الترفية ميزدش عن الوقت المسموح بيه .. عشان ربنا يبارك لنا فى فلوسنا.

[M7amD_7amDy]

يتقفل؟!!!!!!!!

يا أبو ليلى تف من بوقك

المشكلة ان الواحد ممكن يفكر نفسه انانى بس لو جت فرصة أو دعوة لعمل خير مش بيتردد

يبقى النتيجة:

مش كل الناس بتعرف تفكر صح

مش كل الناس بتعرف تستخدم قدراتها صح

مش كل الناس أنانية

الأهم هو التوجيه أو قائد ( وده مش عند كل الناس )

يعنى مثلا ممكن واحد يفتح موضوع عن شيىء معين ويبرز نفسه فيه

وواحد تاااااااانى خالص ولا كان بيفكر فى الموضوع أصلا بس لما يجى يفكر يرد أو يوضح إمكانياته هتلاقيه مالوش حل وفعلا متميز عن صاحب الفكرة الأساسى

حد فاهم حاجة؟

[ابو ليلى]

أنا أحب أقول ان الشركات اللى بتشغلنا بتدفع لنا فلوس عشان نشتغل وده احنا ماضيين عليه فى عقود العمل .. بتاخد س من الفلوس عشان تشتغل ص من الساعات .. و فى ساعه مثلا للأكل و الصلاة و الراحه و الترفيه.

يا ريت كلنا نحاول وقت الترفية ميزدش عن الوقت المسموح بيه .. عشان ربنا يبارك لنا فى فلوسنا.

طبعا كلامك صح طيب بدل الموضوع واعتبره انك فى البيت بدل الشغل ...
ها ...فكرت فى حاجه تفيد المنتدى ؟

[Mustafa_Farouk]

ان شاء الله مايحصلش كدا

[hamedo0]

يا باشا ان شاء الله المنتدى قائم برجالته والمشرفين بتعو واصحابو ده هو المكان الوحيد الواحد بينفس فيه عن الجواه
شوف كام واحد كل يوم يجي مخنوق وزهقان وتو ما اعقد وفتح المنتدى ترجع الحياه بيس زاى الاول
ربنا مايفرقنا ابدا يارب

[M.Mostafa80]

عن نفسى الحاجه الوحيده اللى أقدر اعملها وعملتها فعلا تشجيعا لأستمرار المنتدى هى انى اشترييت الأستيكر وشماسه وكاب وتيشيرت المنتدى

لأنى فكرت قبل كدا فى أننا نعمل حاجه تجيب عائد للمنتدى كريم رد وقال
ماينفعش نجمع فلوس والا هندخل فى مشاكل

[ابو ليلى]

عن نفسى الحاجه الوحيده اللى أقدر اعملها وعملتها فعلا تشجيعا لأستمرار المنتدى هى انى اشترييت الأستيكر وشماسه وكاب وتيشيرت المنتدى

لأنى فكرت قبل كدا فى أننا نعمل حاجه تجيب عائد للمنتدى كريم رد وقال
ماينفعش نجمع فلوس والا هندخل فى مشاكل

تمام هى دى الايجابية اللى بتكلم عليها لو كل واحد عمل زى حضرتك كده ده شى ايجابى وخطوة

بنقدر نساعد بيها المنتدى .

طيب حد فكر يجيب اعلانات للمنتدى كل واحد فينا شغال فى مكان ما اى كان نشاط المكان ده

مش ممكن نعمل اعلانات هنا .مش شرط انت ممكن يكون والدك ممكن يكون قريبك ممكن يكون صحبك اى حد منهم مش عندهم شركات او مشاريع خاصه بيهم انتو عارفين الاعلان بكام فى الشهر 250ج للاعلان الصغير لمده شهر تفتكرو مش كده نقدر نفيد المنتدى ونخليه يكبر ويكبر

11000 الف عضو نشط موجودين فى المنتدى كل العدد ده محتاجين بس 100 عضو بيحبو المكا
من قلبهم .
تاكد تماما ان بشرائك منتج من منتجات نايل موتورز انت كده بتقدم مساعدة ايجابية للمنتدى .

[kono]

اولا طريقتك فى عرض الموضوع جامدة جدا اسلوبك بجد حلو اوى
ثانيا مش المفروض ان فيه اعلانات مدفوعة فى المنتدى ودى بتدر عائد
وشراء الاستيكر والشماساة وكل حاجة تانية ممكن يدخل عائد حتى لو كان بسيط
اعتقد فكرة تجميع فلوس عشان منتدى عربيات صعبة اوى
احنا ممكن نجمع فلوس عشان الناس الغلابى اللى مش لاقين ياكلو ونساعدهم باسم المنتدى
انا كنت فكرت اعمل موضع بناسبة رمضان ان كل مجموعة معينة فى مكان قريب من بعض نعمل حاجة للغلابى باسم المنتدى

اما بالنسبة للمنتدى فاحنا ممكن ننشره اكتر بين اصحابنا ومعارفنا واكيد كل ما حد جديد هيدخل ممكن يشترى اى حاجة من منتجات المنتدى او يقدم فكرة جديدة للمساعدة

[ابو ليلى]

اولا طريقتك فى عرض الموضوع جامدة جدا اسلوبك بجد حلو اوى
ثانيا مش المفروض ان فيه اعلانات مدفوعة فى المنتدى ودى بتدر عائد
وشراء الاستيكر والشماساة وكل حاجة تانية ممكن يدخل عائد حتى لو كان بسيط
اعتقد فكرة تجميع فلوس عشان منتدى عربيات صعبة اوى
احنا ممكن نجمع فلوس عشان الناس الغلابى اللى مش لاقين ياكلو ونساعدهم باسم المنتدى
انا كنت فكرت اعمل موضع بناسبة رمضان ان كل مجموعة معينة فى مكان قريب من بعض نعمل حاجة للغلابى باسم المنتدى

اما بالنسبة للمنتدى فاحنا ممكن ننشره اكتر بين اصحابنا ومعارفنا واكيد كل ما حد جديد هيدخل ممكن يشترى اى حاجة من منتجات المنتدى او يقدم فكرة جديدة للمساعدة

استاذى الفاضل للتصحيح انا لم اقول بطريقه مباشرة او غير مباشرة اننا نجمع فلوس .

منتجات نايل موتورز اقدر اقلك بكل ثقه هامش الربح فيها قليل جدا جدا جدا لانى انا شغال فى نفس المجال واعرف التكلفه كويس .

فين الاعلانات المدفوعه اللى حضرتك بتتكلم عليها 10 او 20 اعلان تفتكر دول يقدرو يغطو المصاريف .
الفكرة مش فلوس بقدر ما شى ايجابى مننا نعبر بيه عن حبنا للمكان ده .

[MaZaGAngeE]

هوه المنتدى عنده مشاكل مالية ؟
فيه وكالات اعلانية على النت تتمنى تلاقي مواقع مشهورة و بيشتروا مساحات اعلانية منها و كمان السيرفر اللي عامل استضافة منه سيرفرات بتشتري مساحات اعلانية
و كل ما كان عدد الزوار المتكررين و الجداد كبير كل ما كانت القيمة المالية للاعلان كبيره
كمان عندك وكلاء السيارات و قطع الغيار و المعدات ممكن ادارة الاعلانات أو التسويق في المنتدى تعملهم عروض و ده هيكون مصدر دخل مناسب و معقول للمنتدى و مالكيه

بس عموما مش ممكن يتقفل

[ahmad5997]

بعد الشر
وأروح فين انا والغلابة دول
ربنا يخليك لينا يا نايل موتورز