أصغر عسكرى فى الجيش أفضل من أكبر لواء فى الشرطه

[NoRmAl]

السلام عليكم

النهارده كنت بطلع الاعفاء والحمد لله
رحت الهايكستب الساعه 8 وخارج من هناك 1.30
بس بجد كلى رضى عن أداء المنظومه لأنها منضبطه جدا جدا
وبجد خرجت بأستنتاج أن أقل عسكرى أمي فى المنظومه دى أفضل 100 مره من لواءات فى الشرطه شغلتهم النصب والسبوبه والمصالح والكوسه والمحسوبيه...... وأكمل على مزاجك
المهم
أنك أول لما دخلت دايما فى واحد يقلك تعمل أيه وبكل ود على فكره
وممكن تسأله 100 مره هيرد عليك بنفس التون ومش هيتنرفز من كثره سؤالك ولا يقلك أمشى كدا تقله فين يعملك فيها مشير
دايما فى واحد فى خدمتك ويراجع ورقك
المهم وأنا قاعد مستنى دورى لقيت هرج كدا وهوب لواء داخل ومعاه بتاع 4 عومداء كدا ومعاهم راجل كبير لابس مدنى و شاب "أب وأبنه"
دخل الواء على الشباك الموظف أتنطر من على الكرسى
شويه والواء شاط فى الموظف وقاله ليك خصم 3 أيام راح الموظف قاله دا ورقه مش كامل
أتضح أن الراجل بقاله بيجى 3 تيام متواصله وكل مره الموظف دا يقله ناقصك كذا يروح يجيبه ويرجع تانى يوم يقله ناقصك كذا وهكذ كدا 3 مرات
والراجل حتى مشتكاش دا سمع الواء دا بيمر بيقول حد عنده مشكله فقاله
"تصوروا أنتوا لواء نازل يمر بنفسه إنما فى الشرطه المخبر بيتعفف أنه يأدى شغله"
المهم قاله تكتلبه ناقصه كذا وكذا فى ورقه مش تقله شفوى "كل دا بزعيق جامد جدا"
وبعدين خبط بأيده على الرخام "الراجل دا يخلصله شغله دلوقتى وتيجينى بعد متخلص شغل"
طبعا أنا تخيلت الكلام دا فى اى جهه خاصه بالشرطه
حتى القيد العائلى الى طلعته كنت لازم أنت الى تتزل للموظف وإلا مفيش شغل طالع
كان ممكن تتهزأ من الموظف وتحط....... فى بوئك علشان إن كان ليك عند الكلب حاجه
لكن الجيش بجد دا مش مصرى
بعد ما الواء مشى جيه عميد فضل قاعد يشوف مشاكل الناس
منهم مشكله فى شباك معين المهم العميد وهو بيكلم الموظف الموظف غلط فى الراجل الى جي يقضى مصلحه
عينك متشوف إلا النور
الموظف أتبعترت كرمته فى الارض لأنه غلط فى الراجل الغلبان والعميد هدده لو كرر أسلوبه دا فى الكلام مع المواطنين هيتحول للتحقيق
فى الشرطه أشتم وهزق أتنين جاين يقضوا مصلحه تاخد نشان ويتعملك ألف حساب
شويه كمان وواحد من الى قاعدين قام يقل العميد دا أنه ظابط جيش متقاعد ويظهر كان عايز معامله خاصه
العميد قاله أهلا بيك لكن للأسف هنا الناس كلها سواسيه ومقدرش أعملك حاجه
وكله لازم يمشى بالترتيب ومحدش فوق حد
وقله لفظا "هنا بالتعليمات أبن الغفير زى أبن المشير"
فى الشرطه طبعا حدث ولا حرج
لو تعرف السايس الى بيركن لوكيل النيابه عربيته تطلع شهاده المخلفات وأنت واقف
لو متعرفش فضى نفسك أسبوع
الى يشوف العميد دا بيكلم الشباب الى سنه أصغر من 20 سنه أزاى عليه النعمه يقول أحنا فى أوروبا أو يمكن أفضل من أوروبا
لما شاب 19 سنه يقله بعد أذنك ممكن كذا
العميد يقله أؤمرنى!!
مش هيستفيد حاجه أى من الواءات دى والظباط الكبار دول يعملوا برم زى الشرطه
لكن دول ناس بجد بيعرفوا ربنا وبيراعوه
كمان نسيت أقول أن الواء والعميد دا كانوا بيمروا لما يشوفوا راجل كبير أو ست عجوزه بيسألوها على مصلحتها ويقضوها بسرعه فائقه وكانت بتدخل قدامى مع أنها جايه بعدى لكن كنت ببقى فى قمه السعاده أقسم بالله
ومفيش واحد بس قال أزاى
لأن دا الى أتربينا عليه
إنما فى الشرطه يبقى راجل 70 سنه واقف يقضى مصلحه وشاب بشورت يخش قبله علشان بابى حرامى مسؤل
هو دا الفارق بين الجيش والشرطه
ناس تعرف ربنا وناس متعرفش أن فى خالق فوق الجميع بيراقب ويسجل كل حركه
بجد تحيه مطلقه للجيش المصرى الى مش مصرى
وتحيه لكل من ينتمى أليه
ولو الشرطه قعدت ليوم القيامه تحسن من نفسها عمرها مهتوصل لكدا
لأن خلاص الزمام فلت والفساد للركب إلا من رحم ربى
فخور بأن فى بلدى جيش زى الجيش المصرى زى مكلى خجل من شرطتها
شكراً

[Dojuar]

قعدت مستني لاخر المشاركة عشان اتفاجئ ان كلامك كان تهكم او هزار

بس الحمد لله ان الجيش (حسب وصفك) مطالوش اللي طال غيره

بس يا ترى ايه السر؟؟؟؟؟؟

[mxz911]

وانا برضه متسغرب والله .. يعنى انا عارف اه ان الجيش احسن من الشرطه دايما بس اى حد راح الهايكستب بيشتم ف المشوار ده وواحد صحبى بيقولى العساكر هناك كانت بتشتم ف الناس وتقولهم مثلا نظام يا ولاد ال........* يا ........* ده اللى سمعته

المهم قولى حضرتك هو انت طلعت اعفاء على اساس ايه .. يعنى انت مواليد ايه وكده لانى برضه وحيد ومتخرج السنه الى فاتت ومعملتش الورق غايت دلوقتى ( كسل )

[Abdo_Eldesokey]

قال رسول الله -صلي الله عليه وسلم- :
"إذا فتح الله عليكم مصر ، فاتخذوا منها جنداً كثيفاً ، فذلك الجند هم خير أجناد الأرض ، وهم في رباط إلى يوم القيامة"
صدق رسول الله صلي الله عليه وسلم

[som3a2]

فعلا كلامك صحيح ...انا كنت فاكر العكس من كلام الناس ...بس لقيت ان المعامله محترمه جدا بالذات من الرتب الكبيره ..
-----------------------------------------------------------
بس في ناس قالتلي ده عشان انت كنت بتطلع المعافاه (عشان انا وحيد يعني )
لكن اللي بيلبس بيشوف غير كده ...
والله اعلم ...
انا من وجهة نظري ...ان لو انت محترم هتجبر اللي قدامك انه يحترمك ... حتي لو كان لوا ...
-----------------------------------------------------------

[m7nsh]

والله يا نورمال انت متعرفش انا اتبسطت اد ايه لما قريت الموضوع بتاعك ده
الحمد لله والله ان لسه فى ناس كتير كده .. والله حاجه تفرح

[yoko]

معاك 100% يا علي بس هما إمبارح طلعوا عيني وهرجع تاني ليهم بكرة بعد ما أجيب الورقة الي طلبوها من الكليه
وبتاع الإستعلامات الي في الأول ده كلمني بطريقة سخيفة جدا رحت داخل فيه شمال لإني كنت عيان وبقالي 4 ساعات في الشارع قام لامم نفسة لكن هما كمنظومة بجد 100% وطبعا بيبقى فيه شويه حاجات فرديه كدا لكن بجد الجيش محترمين جدا

[SkyBird]

الجيش فعلا حاجة تانية
مرة وانا في الكليه قريب ليا تغيب عن الجيش فاخذته من ايده علشان اوديه الوحده بتاعته في قطاع عسكري كبير على الحدود الصحراوية للقاهرة (بدون ذكر المكان)
تخيلو من على البوابة قلت للعسكرى عايز اقابل العميد علشان احكي له ظروف قريبي والله في دقايق كنت في مكتبه وتخيل راجل عميد يكلم طالب في الكلية بكل احترام وذوق .... بصراحة حسيت انه بطل بجد

ولما خلصت الاعفاء من منطقة الزقازيق كان بالضبط نفس تعامل الناس اللي في الهايكستب كلهم زوق وجدعنه والورق يخلص في مشواره ومفيش تعال بكرة لان كل حاجه مترتبة والمواطن عارف المطلوب منه بالضبط بالورقة والميعاد

تحية للجيش

وبصراحة حتى الشرطة انا عن نفسي خلصت ورق كثير في مراكز الشرطة هنا في سيناء والاقي كلهم ادب واحترام
وبطبيعة عملي كجراح وكل شوية تقارير طبية لاصابات وكده حسيت ان انا والمأمور وامناء الشرطه اصحاب واخر مرة رحت القسم المأمور اصر اني اشرب شاي وكان كريم جدا
مشكلة الشرطة ان تعاملها مع المواطنين دائم وبالذات المجرمين فتلاقي المشاكل كثير والشرطة سلطتها على المدنيين على عكس العسكريين ملهمش سلطة على المدنيين (لكن الجيش محدش له سلطة عليه )
الملخص
ان نفسية الشرطي متوترة علطول بسبب شغله اما العسكري فهو مرتاح وليس عليه ضغوط مدنية

[NoRmAl]

والله أنا يا رجاله قبل مروح أتقالى خلى بالك العساكر بتتنطط عليك ويستفزوك وكنت رايح عامل حسابى على كدا
لكن ملقتش كلمه صح من الى أتقالى وأتعاملت كويس جدا
وحتى لو كان بيحصل مشاكل بين الشباب والعساكر كان من وجهه نظرى الغلط من الشباب ال....* الى لسان حاله أنت عسكرى وأنا مهندس مثلا
أنا مواليد 87 ووحيد "يا ولداه :)" ودا سبب الاعفاء

[amrbakly]

المؤسسة العسكرية لا تزال هي المؤسسة الوحيدة في مصر اللي فيها قدر من الإنضباط و التنظيم

و لكنها ايضا لا تخلي من العيوب و المشكلات و الفساد

ليست بسبب الجيش و لكن لأنها مصرية و مصر إضربت يا رجالة

[shaddadfalcon1]

منكرش ان المعامله في المنطقه العسكريه احسن بكتيير من الشرطه لكن برده انا شفت في منطقة العامريه من اللواءات دوول كل مالذ وطاب
يعني كل مكان فيه الكويس والوحش بس الفكره ان في الجيش الكويس احسن

بماسبة الكوسه - انا كنت ببقي واقف في الطابور وطالع عييني وكان بيبجي مقدم ينادي بالأسم علي فلان وياخده تحت دراعه يخلصله ورقه كله ويوصله لحد بره وسلملي علي عمه ياحماده

[hazoom2006]

مبروووووك على الاعفاء

انا نتيجى ظهرت النهارده ورايح اشوفها بكرة ربنا يستر

ولسة هدخل موضوع الجيش دة وربنا يسهل ونشوف معامله محترمة

[elassar2010]

انا لما خلصت ورق الجيش من العامرية كانت معاملة تمام لانى اعفاء
بس سمعت من صحابى الى دخلة بوابة التسليم الى ليهم جيش انهم اتعاملوا معاملة زى الزفت سب الدين هناك السلام الرسمى

[shaddadfalcon1]

انا لما خلصت ورق الجيش من العامرية كانت معاملة تمام لانى اعفاء
بس سمعت من صحابى الى دخلة بوابة التسليم الى ليهم جيش انهم اتعاملوا معاملة زى الزفت سب الدين هناك السلام الرسمى

انا كنت بعمل كشف عيله بس بعد مااترشحت ظابط واتقبلت
مش عايز اقولك قمة البهدله والذل اللي خلتني اتمني اني كنت ادخل الجيش
9 شهور رايح جاي كل اسبوع وساعات كل يوم علي العامريه وساعات كانو بيجرو ورايا كمان

كل مره والله العظيم من الساعه 7 الصبح ل 3 و4 العصر وفي الاخر ارجع ايد ورا وايد قدام
لردجة اني في اليوم اللي اخدت فيه الشهاده لقيت العسكري محضرلي الشهاده وحاططها علي جنب واول ماشافني من بعيد نده عليا وبيقول للعسكري اللي جنبه الراجل ده مقدم علي الاعفاء من اول مانا مسكت خدمه وانا خلاص هخلص جيش

[A.Saad]

انا رحت الهايكستب قيل كدة
نظام سخيف ومكنش فيه غير ظابط واحد تتكلم معاه