خلااااااص...جبت اخري عايز اهاجر

[ahmed4000]

يا دكتور احمد , انا برده طالب و داخل على مرحلة الجامعة , و الواحد نفسه فعلا يدرس في جامعة بره

و لكن المصاريف مكلفة جدا جدا , الموضوع فعلا صعب

انتوا زمانكم احسن بكتير
المنح الدراسية اللى بقت كتيرة جدا دلوقتى:

شيفنج
فورد
فولبرايت
القلعة
انسي ساويرس
حاجات تبع الجامعة الامريكية
....الخ

[medo_2060]

السلام عليكم و رحمة الله و بركاته

أنا ماقلتش شغل , انا قلت هجرة أو دراسة , الموضوع ببساطة أن حضرتك يا اما جاى كندا دراسة , يعنى راسلت جامعات هنا و لقيت موافقة و بالتالى هتيجى تكمل دراستك و كده و السكة اياها , أو انك مهاجر الى كندا بصرف النظر ادا كنت جاى على شغل عالطول أو لسه هتدور على شغل بعد ماتيجى كأغلب المهاجرين.

عشان مشروع الهجرة يكون ناجح ان شاء الله , لازم ربنا يوفقك أنك تلاقى شغل فى كندا بعد ماتيجى , و ده هيكون اسهل بكتير لو أنك معاك شهادات معترف بيها هنا , معلش انا مش عارف التفاصيل بتاع تخصص الهندسة لأنى مش مهندس , بس ده الكلام المنطقى .

بالنسة للأربع سنين الخبرة , أنا قصدى أنك لما تيجى تقدم على الهجرة لكندا و هى بنظام النقط زى ما سيادتك عارف , الخبرة عليها حد أقصى 21 نقطة , أنت محتاجهم عشان تكمل ال 67 نقطة بتوع الهجرة و ال 21 نقطة دول مش هتقدر تاخدهم كلهم الا لو كان عندك 4 سنيين فمافوق كخبرة فى التخصص اللى أنت هتقدم تبعه لما تيجى تقدم عالهجرة .

على فكرة , التوقيع بتاعى فيه اللينك بتاع موقع الهجرة الرسمى الحكومى بتاع كندا .

و ربنا ييسر الأمور ليك و لكل المسلمين و لا تنسى الدعاء فى شهر رمضان الكريم .

مازيراتى كواتروبورتيه

شكرا يا ستاذ maserati على التوضيح

[medociv]

السلام عليكم ورحمة الله وبركاته

قال رسول الله صلى الله عليه وسلم
"إذا قال الرجل : هلك الناس ، فهو أهلكهم"
الراوي: أبو هريرة المحدث: مسلم - المصدر: صحيح مسلم - الصفحة أو الرقم: 2623
خلاصة حكم المحدث: صحيح

اسمحولي اعرضلكم وجهة نظري وانا بس ليا بعض التعليقات على مداخلات الاخوة الافاضل:
1-مينفعش حد يقول خلاص مفيش فايدة انه الوضع ينصلح- كما قال رسول الله صلى الله عليه وسلم
2-الدنيا دار ابتلاء فانت متفتكرش انك حتعيش في اي مكان في الدنيا منعم وفي رغد العيش والرفاهية "لقد خلقنا الانسان في كبد"..سورة البلد
3-انا متفق معاكو قلبا وقالبا انها بقت خرابة بس باذن الله هتتصلح ... عارفين امتى يمكن بقلم على وشنا يخلي الناس تفوق فعلا من الغيبوبة اللي هي فيها
4-العلماء حرمو السفر لبلاد الغرب الا لحالات خاصة : (علاج-علم معين)
5-السفر في حد ذاته مش حرام "الم تكن ارض الله واسعة فتهاجروا فيها"
6-بلاد الغرب واوربا وامريكا بلاد لا تامن على دينك ونفسك فيها
7-المسلم فيها بيعامل معاملة سيئة من اضطهاد لبهدلة وشكوك في المطارات والشرطة ومضيقات من الناس هناك لانك مسلم يعني ارهابي !! وبص بعنيكو على الحملات اللي على الاسلام في كل مكان باختصار مش هتامن على دينك.
8-بلاد فيها انحلال خلقي وتفكك اخلاقي وعائلي لاقصى درجة وانتو اكيد عارفين يعني ايه لما بنتي تدخل عليا بصاحبها وانا مقدرش افتح بقى والا الشرطة تسجني ولا اعرف اربي ابني ولا ان ابني ييبقى عايش في الزنا ليل نهار (جيرل فرند) ولا دين ولا صلاة غير اسمه بس والواد او البنت تسيب اهلها وتروح تستقل بحياتها وتشتغل وتعيش حياتها بره (دكتور زميل خد الدكتوراة من المانيا وبعد مخلص وراجع حب يكمل استاذه مصري قاله ارجع انا مش عارف احكم بنتي ضاعت مني !! تسوى ايه ده ؟؟؟!!
9-هتشتغل ايه هناك ؟؟ هتغسل صحون؟ ولا تبيع جرايد ولا تبقى نموذج مشرف على راي سمير صبري لما جاب واحد فاتح عربية سجق في امريكا.
10-واحدة قريبتنا امريكية اصلي (ابوها مصريب قريبنا) لما جت مصر قالت انا مشفتش دفا زي اللي شفته في مصر دفئ العائلة الاسرة الناس الجيران الاهل..
11-مش هيكون ليك علاقة بمصر الا لو رجعت في تابوت
12-امريكا كمثال فيها عنف شديد جدا وجرائم بشعة
13-اللي عايز يعيش حياة كريمة ممكن يروح بلد من بلاد الخليج مثلا يعمل فلوس ويعيش حياة كريمة ويامن على دينه وعياله (ده احسن من اي حاجة في الدنيا)
14-مين قالك انك مش هتتبهدل برضه في الغرب وتلاقي حركات وسخة (انا معاكو ان الحياة هناك بتكون انظف-عيشة وعلاج وتعليم وكله) بس انت بكل سهولة ممكن تلاقي بهدلة وخصوصا انك مسلم (واحد في كندا قعد حوالي سنة من لاقي شغل لان اسمه اسلام)
-اخيرا نصيحة الي يسافر الخليج مثلا ميطولش والغربة تاخده لحسن مش هيعرف يرجع مصر تاني اللي هي بلدنا شئنا ام ابينا.

[MASERATI]

السلام عليكم ورحمة الله وبركاته

قال رسول الله صلى الله عليه وسلم
"إذا قال الرجل : هلك الناس ، فهو أهلكهم"
الراوي: أبو هريرة المحدث: مسلم - المصدر: صحيح مسلم - الصفحة أو الرقم: 2623
خلاصة حكم المحدث: صحيح


7-المسلم فيها بيعامل معاملة سيئة من اضطهاد لبهدلة وشكوك في المطارات والشرطة ومضيقات من الناس هناك لانك مسلم يعني ارهابي !! وبص بعنيكو على الحملات اللي على الاسلام في كل مكان باختصار مش هتامن على دينك.

13-اللي عايز يعيش حياة كريمة ممكن يروح بلد من بلاد الخليج مثلا يعمل فلوس ويعيش حياة كريمة ويامن على دينه وعياله (ده احسن من اي حاجة في الدنيا)

السلام عليكم و رحمة الله و بركاته

و كل عام و أنتم بخير بمناسبة شهر رمضان الكريم , أعاده الله عليكم بالخير و اليمن و البركات

أنا لحد دلوقتى قاعد فى كندا بقالى تقريبا شهر و خلال الشهر ده , لفيت على مصالح حكومية كتير عشان أخلص شوية الأوراق اللى أى مهاجر جديد بيخلصها و بصراحة ماشوفتش منهم الا كل احترام و زوق بدرجة أصابتنى بالخجل و الاحراج و الله و مش دول بس , ده من أى حد بتعامل معاه فى اى مكان , ده أقربها النهاردة , واحد لا أعرفه و لا يعرفنى و قابلته فى الشارع , لقيته بيبصلى و يبتسم و يقوللى Hi و دى مش أول مرة يحصل الموضوع ده , ده حصلى كتييييييير و أنا ماشى فى أى متنزهات عامة .

يمكن لما أطول هنا شوية , أكتشف حاجات , أنا لسه ماكتشفتهاش , الله أعلم .

و أنا جاى كندا , ركبت من القاهرة الى فرانكفورت الى تورنتو و بصراحة و الله العظيم مالقيتش أى تمييز فى المعاملة ضدى كعربى مسلم أو حتى ضد أى حد تانى من العرب المسلمين اللى كانوا جايين معايا على نفس الطيارة من القاهرة الى فرانكفورت, ده بالعكس , و احنا بنستعد عشان نركب من فرانكفورت , لقيت - يا عينى - راكب أجنبى , لاهو مسلم ولا عربى, و كل ما يعدى على الجهاز , يزمر , ده اللى فتشوه تفتيش دقيق و فتحوا شنطه , غير كده , مفيش , احنا كعرب و كمسلمين , بنحب دايما نظرية المؤامرة و ان العالم كله بيتآمر علينا و دى احنا بنستخدمها عشان نبرر أى حاجة , احنا مش عايزين نعملها أو مش قادرين نعملها و نبرر بيها الفشل و الفساد اللى بقى مالى المجتمعات العربية بشكل مزرى و مثير للقئ .

أنا قبل ماجى كندا , كنت قضيت 3 سنوات أعمل كطبيب فى السعودية , يمكن السعودية مش زى باقى دول الخليج , بس العنصرية اللى أنا شوفتها من حوالى 25 بالميه من اجمالى السعوديين اللى اتعاملت معاهم , أنا متأكد أنها مش موجودة فى اسرائيل حتى , ده كفاية نظام الكفيل - قصدى الاستعباد - اللى عندهم و عشان أكون منطقى , هنعمل احصاء خلال سنة 2011 اللى لسه هتبدأ كمان 4 شهور , خلال السنة دى , شوف هتسمع كام حالة اهانةو بهدلة و مرمطة للبنى آدم المصرى فى كل من , مصر - الخليج و بالدات السعودية - كندا و أمريكا و بلاد أوروبا الغربية .

أنا هقولك النتيجة مقدما :
رقم 1 = مصر
رقم 2 = الخليج و بالدات السعودية و الكويت
رقم 3 = باقى بلاد العالم .

عمر ما كانت العيشة فى الخليج عيشة كريمة , حتى لو كانت مريحة و شكلها حلو , لكنها تقوم على أساس استعباد الأجانب , حتى لو الأجنبى ده قعد هناك و طول , بيبقى مواطن من الدرجة التانية , زى ماكان السعوديين بيقولوا على الأجانب اللى بيتجنسوا هناك كانوا بيقولوا عليهم , مخلفات حجيج أو طرش بحر , اللى يحس بالحياة الكريمة فى الخليج , الأمريكى أو النجليزى أو الكندى اللى رايح هناك , بيبقى باااااااشا ( وش عمرو أديب فى القاهرة اليوم ) و بيبقى جواز سفره معاه و معاه عليه تأشيرة دخول و خروج متعدد و بيبقى فعلا أعلى من المواطن ابن البلد, مش تقولى المصرى يعيش حياة كريمة فى الخليج !!!!!!, الخليج ده اتعمل عشان حاجة والحدة بس , نروح هناك نستحمل القرف بتاعهم لحد ما نجيب شويه فلوس عشان ننط بعد كده على حاجة أعلى من القاع اللى كنا فيه ( قصدى مصر يعنى ) .


شكرا و آسف للاطالة .

مازيراتى كواتروبورتيه

[AboELsoud]

يااااااااااااااااااااااه يا جماعه الموضوع ده بقالوا 594 يوم قاعد لوحده :)

شفتوا كان حالنا عامل ازاي و كنا مخنوقين ازاي و كنا حاسين انه مفيش امل

هل الواحد فينا كان يتخيل انه ممكن تحصل ثوره و نشوف مبارك في السجن او عياله او اي حد من المسئولين
هل حد فينا كان يتخيل انه ممكن يشوف رئيس تاني غير مبارك او جمال
هل حد فينا كان حاسس انه فيه امل في المظاهرات اللي كنت بتحصل كل شويه
هل حد فيننا كان حاسس انه الشرطه ممكن يتكسر عينيها ( الفاسدين منهم بس طبعا )
هل حد فينا كان ممكن يتخيل احمد عز و زكريا عزمي بالبدله البيضاء و في البوكس

بجد بجد سبحان الله :)


ده احنا بجد لينا الجنه من اللي كان بيحصلنا

انا عارف انه برضه حال البلد دلوقتي لسه مش كويس بس اكيد في امل كبير جدااا اكبر من الي اللي كان موجود ايام مبارك ( ده لو كان فيه حد حاسس بيه اصلا )

على فكره انا كتبت على جوجل ( عايز اهاجر ) لقيت الموضوع ده تاني نتيجه على طول

شكرا خاص جدااااااااا للزميل احمد عز اللي كان فاتح الموضوع و يا ريت تدخل تقولنا اخبارك ايه دلوقتي :)

[sas5]

السلام عليكم ورحمه الله
لاتنسونى معاكم فانا قرفت من كل شى وجالى احباط من الناس
اريد ان اقضى باقى حياتى بسلام

[AboELsoud]

ههههههههههههههههههههه يافندم ده موضوع معمول من 2010 و صاحبه لسه قاعد معانا :)

و الراجل كان مخنوق ايام ماكان مبارك طابق على نفسنا

انما دلوقتي لسه فيه شويه امل ( شويه كتار مش قليلين )

فان شاء الله يكون غير رأيه :)

[sas5]

يااااااااااااااااااااااه يا جماعه الموضوع ده بقالوا 594 يوم قاعد لوحده :)

شفتوا كان حالنا عامل ازاي و كنا مخنوقين ازاي و كنا حاسين انه مفيش امل

هل الواحد فينا كان يتخيل انه ممكن تحصل ثوره و نشوف مبارك في السجن او عياله او اي حد من المسئولين
هل حد فينا كان يتخيل انه ممكن يشوف رئيس تاني غير مبارك او جمال
هل حد فينا كان حاسس انه فيه امل في المظاهرات اللي كنت بتحصل كل شويه
هل حد فيننا كان حاسس انه الشرطه ممكن يتكسر عينيها ( الفاسدين منهم بس طبعا )
هل حد فينا كان ممكن يتخيل احمد عز و زكريا عزمي بالبدله البيضاء و في البوكس

بجد بجد سبحان الله :)


ده احنا بجد لينا الجنه من اللي كان بيحصلنا

انا عارف انه برضه حال البلد دلوقتي لسه مش كويس بس اكيد في امل كبير جدااا اكبر من الي اللي كان موجود ايام مبارك ( ده لو كان فيه حد حاسس بيه اصلا )

على فكره انا كتبت على جوجل ( عايز اهاجر ) لقيت الموضوع ده تاني نتيجه على طول

شكرا خاص جدااااااااا للزميل احمد عز اللي كان فاتح الموضوع و يا ريت تدخل تقولنا اخبارك ايه دلوقتي :)

انا لم اخذ بالى فى مشاركتى السابقه من التاريخ - ولكن مازلت مصمم انه لايوجد لنا عيش فى هذه البلد حتى بعد الثوره وخصوصا بعقليه جماعه حازمون وامثالهم
والاعتصامات التى تحدث على الفاضيه والمليانه - انظروا تونس وانظروا مصر

[Ghosts]

مفيش بلد فى الدنيا مفيهاش تعب ومشاكل بمعنى أنك لو خلصت من المشاكل الموجودة فى مصر هتلاقى نفسك بتتصدم فى مشاكل من نوع تانى أنت مش عامل حسابها خااااااااااالص .....

[ahmedhawas]

أنا عارف إن الموضوع ده قديم.
بس المشاركة دي (رقم 58) بجد بجد (تحفة) .. الله ينور عليك يابوسامي.
للعلم تاريخها كان 05-08-2010

يا باشمهندس الموضوع مش اختياري بالشكل اللي بتتكلم بيه

انت في بلد بتتباع منها حتت علشان تقدر تدفع مرتبات الموظفين ...

انت في بلد عجز الموازنة فيها وصل رقم قياسي ....99 مليار جنيه و بيزيد

انت في بلد لاتحترم القوانين و لا الدستور و انت شخصيا مهدد في أي وقت بالبهدلة بدون سبب

انت في بلد مقبلة على نقطة صعبة في تاريخها وهي انتقال السلطة من رئيس يحكم باستقرار من 30 سنة ...و يعالم الأيام دي هاتعدي ازاي و لو عدت هايحصل بعدها إيه ..

انت في بلد لا تتمتع بأدنى درجة من الشفافية و ياعالم لو الناس اللي موجودة اتغيرت هانلاقي مفاجاءات إيه في انتظارنا ..

انت في بلد لا تتمتع بأي وزن اقتصادي أو عسكري أو إقليمي ...جواز سفرك مالوش تمن ولا كرامة

قريب مش هاتعرف تعيش لا أنت و لا أهلك حتى لو أغنيا ..ولو سافرت هتبقى انت مركب نجاتهم من البلد الغرقانة دي .

افتكر اني نصحتك والله نصيحة لله

الكلام ده من قبل الثورة ب 5 شهور .. أنا وقتها مكنتش بفكر في الكلام ده نهائي.
أنا بحييك على رؤيتك.

[منتدى الهجرة]

إذا لا تزالون مهتمون بالهجرة يسرنى المساعدة:
https://www.facebook.com/pages/%D9%8...95616070450326

[amdd]

فاتت كام سنة ولسه برضه بنتكلم فى نفس القصة .....مفيش فايده