احنا بلد ....................

[mahfouz1983]

السلام عليكم

وكل سنه وانتو طيبين

دلوقتي يا جماعه البلد داخلة علي ازمة قمح حلو الكلام عشان المشاكل الي في روسيا المهم امريكا عرضت علينا انها تصدرلنا اقمح بتاعها وكلنا طبعآ عارفين جوده القمح الامريكي ونظافته واحنا بقي ردينا قولنا ايه رد حكومتنا الحلوة الطعمه ردينا قولنا لا يا امريكا متشكرين احنا عندنا نظام ولازم تدخلي المناقصة عشان تبقي الدنيا مظبوطه وتعرضي اسعار توريدك وناخد في المناقصه اقل سعر توريد بالزمه دا اسمه كلام ولا لازم ناكل الشعب قمح مسوس ومدود ومسرطن احنا خلاص مفيش امل في مصر البلد انتهت وخلاص والي يقولك اصلاح انسي ان يكون في مصر اصلاح

[Abdo_Eldesokey]

يا باشا هيا جت على دي .. البلد خلاص بتشطب وهتقفل قريب

[M.Osman]

يا باشا احنا عندنا مخزووووون استراتيجي

يكفي 4 شهور

فل اوي

[mahfouz1983]

المخزون الاستراتيجي لا يكفي الا لشهرين اتنين بس اي كلام تاني غير حقيقي

[mrwho1982]

بص انا هاقول كلمتين

البلد من سيء الي اسوأ

الكهرباء بتقطع والشوارع نيلة مافيش نظام والظلم والفساد ظهرو قوي

والماء بتقطع ومش نظيفة

ادوني سبب يخليني عايز اقعد في البلد دي

[zaza_lanos]

يا باشا هيا جت على دي .. البلد خلاص بتشطب وهتقفل قريب

رد تحفة وُمعبر

[تامر.محمد]

بالنسبة لأمريكا , فكله بتمنه
مافيش حدادي بتحدف كتاكيت

بالنسبة لهنا
فكله بتمنه برده , لازم يبقى فيه تأبيج كويس عشان تبقى فيه صفقات

[mahfouz1983]

علي فكرة احنا السنه الي فاتت اشترينا اغلي طن قمح علي مستوي العالم ومقدرش اقول ا الغالي للغالي

[HAMZAWY]

يعنى لما الحكومة يبقى عندها نظام وماشية عليه تطلع وحشة برضو
المشكلة لو كانت خدت من امريكا على طول كنا برضو قولنا اكيد اخدو رشوة من الامريكان عشان ماعملوش مناقصة

[Abo_Lina]

طب و هم يجيبوا قمح غالي و حلو ليه مادام الشعب قابل و مبسوط و راضي بالقمح التعبان ..
خلاص البني آدم المصري خد ع المسرطن و المدود ..
يأس
خوف
رضا
إيمان بالقدر
الله أعلم

[Abo_Lina]

يعنى لما الحكومة يبقى عندها نظام وماشية عليه تطلع وحشة برضو

فيه فرق بين النظام
و الغباء و تنشيف الدماغ خصوصا في أزمة زي دي
لازم يكون هناك مرونة في التفكير و التصرف للخروج من الأزمة

[AmAhmed]

و مين بس قلك يا فندم ان امريكا حتدينا انضف قمح عندها
هي الحداية بتحدف كتاكيت
اعتقادي الشخصي ان سبب الرفض ان القمح حيخش عن طريق اخر غير طريق عصابة القمح اللي بتستورد من روسيا لذا وجب اعادة التظبيط و التجهيز للوضع الجديد

علي صعيد اخر المصري هو اعلي مستهلك للقمح علي مستوي العالم بمتوسط سنوي 148 كيلو
يعني تقريبا نص كيلو في اليوم
يعني 8 رغفة للفرد في اليوم
كتير قوي
طبعا الحل مش امتناع الناس عن العيش و المخبوزات الحل عند الحكومة
الغلبان الغدا بتاعه 10 ارغفة و قطعة جبن و شوية طماطم
لما تتوافر باقي الاغذية بسعر معقول و جودة كويسة ساعتها ممكن نبدأ حملة للتخفيف من استهلاك القمح
حاجة تفقع المرارة .... منك لله يا حكومة

[hesham_tawfiq]

المخزون الاستراتيجي لا يكفي الا لشهرين اتنين بس اي كلام تاني غير حقيقي

ايه مصدرك ؟

[mahfouz1983]

المصر كان الخبر في جريدة المصري اليوم من حوالي يومن

[mahmoudysf]

والله يا جماعة احنا عندنا اراضي لو زرعناها قمح
هناكل امريكا وروسيا واللي يتشددلهم
بس دايما قدر مصر ان فيها اللي بيهد فيها عشان يبنى نفسه
الخلاصة اننا ضحية الفساد والجهل وسؤ التخطيط