رساله الي كل متخصصي الكمبيوتر ومجالاته المختلفه ارجو الرد عليها

[AHMED NEGM]

السلام عليكم ورحمه الله وبركاته ازيكم يا شباب انا احمد نجم

طالب في كليه حاسبات ومعلومات وداخل سنه تالته ان شاء

الله انا كنت عاوز اخد رايكم في قرصات الكمبيوتر اللي ممكن

اخدها بحيث اني اخلص سنه رابعه واسافر ان شاء الله علي

طول انا عارف ان المجالات كتيره شبكات ولغات البرمجه

والجرافيك والفوتوشوب وحاجات كتير انا بصراحه الكليه مش

قادر استفيد منها بحاجه عشان تديني القدره اني اقرر

اتخصص في مجال محدد بس انا اصلا بحب الكمبيوتر

جدا وحاسس اني لو اتحطيت في اي مجال ان شاء الله

هعرف امشي فيه السؤال دلوقتي عشان مش اطول عليكم

ايه التخصص اللي اقدر استفيد منه وايه القرصات اللازمه

عشان ابقي متمكن من التخصص ده ويكون مطلوب في

الخليج ويكون طبعا دخله المادي كويس واي معلومات اضافيه

احب اعرفها يا ريت

وشكرا

[marsguy]

نصيحه حاول تتعلم UNIX أو Linux

هاتبقى متميز لو بقيت جامد فيهم.

[AHMED NEGM]

انا اعرف برده ناس صحابي بياخدو linux بس شغله كويس ولا لا قصدي بره مصر طبعا وسهل ولا صعب وهوا شغل ال linux لازم اربط معاه حاجه تانيه زي الجافا مثلا او #c او اي حاجه ولامش لازم بصراحه انا مسمعتش عن الunix ده

[noctis]

الكمبيوتر يافندم فيه مجالين اتنين فلوسهم كتير (ماشاء الله :D)

الداتا بيز : ودي الي هي الشغل بتاع شركة اوراكل وكورسات اوراكل واليله دي كلها واعتقد انك مش محتاج اشرح لك تمشي في المشوار بتاع الداتا بيز ازاي

الشبكات: ودي بقا شغلها كتير بإذن الله لانك قدامك تشتغل مع شركات الاتصالات الي بدأت كلها تتجه للانترنت وتوصيل الانترنت زي فودافون واتصالات وموبينيل وطبعا الشركات الي زيها برا في الخليج بتطلب مهندسين بس لازم تشد حيلك وتكون شاطر وانت تلاقي الفلوس كتير ان شاء الله وكمان بتاع الشبكات قدامه يشتغل مع شركات توزيع انترنت زي تي اي داتا ومش محتاج اقول على الشغل هناك بقا لان الشركات دي دخلها بالملايين شهريا
وعندك خيار اخير وهو ان في شركات بتعمل network soultions يعني بتيجي لهم جامعة مثلا يقولوا احنا عايزين نصمم شبكة لكلية كذا وهاتوا لنا مهندسين واشتغلوا يلا فانت ممكن تكون موظف في احدى الشركات دي


الخلاصه هو الداتا بيز والشبكات اي مجال منهم ان شاء الله يديك فرصه كويسه للسفر لانه مجال مطلوب بشكل عالمي مش في مصر بس




بالنسبة للكورسات الي تاخدها فحضرتك لو عايز تشتغل في الداتا بيز اسأل عن
كورسات اوراكل وشوف الناس الي شغاله فيها معاك في الكليه وبيئه الي حواليك وهما يوجهوك ياباشا
ولو عايز تشتغل في الشبكات في ناس بتاخد شهادات في نظم التشغيل زي MCSE وده بتاع ميكروسوفت و RHCE وده بتاع اللينكس وناس تانيه بقا بتمشي في اتجاه سيسكو
وانا افضل لك اتجاه سيسكو لو كنت بتدور على مستقبل كويس
طبعا اسأل الناس الي شغالين في مجال الشبكات وقولهم عايز ادخل في سيسكو اعمل ايه
ومبدأيا لو عايز تمشي في الشبكات ابدأ بكورس N+


بالتوفيق يافندم

[noctis]

على فكرة لو عايز تدور على شغل ومتتبهدلش سيبك من التفكير في اللينكس والبرمجه على انهم مستقبل ليك لان الي بيتميز فيهم قليل وهما الناس العباقره اوي وكمان لان رواتبهم بشكل عام مش كبيره زي المجالين الي قلتلك عليهم

[أحمد كمال]

نصيحة عابرة

سيبك من حوار الخليج أول ما تتخرج

هترمي نفسك بملاليم و هتفضل طول عمرك بتاخد ملاليم لأنك دخلت الخليج بملاليم

استنى في مصر و استحمل و اقعد سنتين تلاتة حتى لو مرتبك ملاليم في مصر انت بتتعلم

و بعد 3 و لا 4 سنين لو رحت هتلاقي مرتبك اضعاف زميلك في دفعتك اللي راح اول ما اتخرج .....

[AHMED NEGM]

على فكرة لو عايز تدور على شغل ومتتبهدلش سيبك من التفكير في اللينكس والبرمجه على انهم مستقبل ليك لان الي بيتميز فيهم قليل وهما الناس العباقره اوي وكمان لان رواتبهم بشكل عام مش كبيره زي المجالين الي قلتلك عليهم

انا فعلا انا شايف ان البرمجه دلوقتي مفيش اكتر منها وعلي رايك عشان يبقي ليا مركز فيها لازم ابهدل نفسي جامد عشان اكون احسن من غيري وغيري في مجال البرمجه كتير جدا انا كنت روحت وسالت علي كورس الاوراكل وليا صحاب قالولي انك ممكن تربط الاوراكل باي حاجه تانيه زي الجافا وديه مطلوبه عشان اوراكل اشترت شركه sun وشغلهم هيبقي مطلوب جامد في المستقبل اما في حوار الشبكات انا في الكليه هاخد الشبكات ديه لسه في سنه 3 يعني مش عندي فكره عنها خالص او ايه فروعها انا كنت ناوي بعد العيد ابدا في الاوراكل بس قولت بلاش اتسرع واشوف ايه نظام الشبكات ديه بس من كلام حضرتك انا شايف مجال الشبكات جامد جدا وعندي احساس انه هيكون اسهل من الاوراكل عموما انا كده عرفت ايه الخيارات قدامي وان شاء الله علي بدايه الدراسه هكون قررت انا عاوز اتخصص في ايه

احب اشكرك جامد جدا جدا يا باشا علي الافاده الجامده ديه

[AHMED NEGM]

نصيحة عابرة

سيبك من حوار الخليج أول ما تتخرج

هترمي نفسك بملاليم و هتفضل طول عمرك بتاخد ملاليم لأنك دخلت الخليج بملاليم

استنى في مصر و استحمل و اقعد سنتين تلاتة حتى لو مرتبك ملاليم في مصر انت بتتعلم

و بعد 3 و لا 4 سنين لو رحت هتلاقي مرتبك اضعاف زميلك في دفعتك اللي راح اول ما اتخرج .....

بص يا باشا انا ليا قرايبي بره و هما شغالين في شركات ومعاهد تدريس كمبيوتر طبعا مش معاهد زي اللي في مصر وبيقولولي اني لو خلصت وخدت قرصاتك وتدرب في اي شركه تاخدexperience في المجال اللي انا قررت امشي فيه وده مش 3 او 4 سنين ولا حاجه وبعدين الي انا هتخصص فيه مش فوتوشوب او حاجه بسيطه يعني لا الشركات بتاع المجالات ديه بتكون شركات كبيره عشان معظمها عالمي ده لو مكنش كلها وماظنش انها بتتعامل بملاليم وقبل ما اروح انا اكيد هسال قرايبي دول علي تفاصيل الشغل هناك وربنا يوفق ان شاء الله

وتسلم يا ياشا علي النصيحه

[hamdy]

متهيالي انت تدخل في المجال اللي بتحبه مش المجال اللي مطلوب فيه شغل
لان من وجهة نظري ان لو حبيت مجال معين هتبدع فيه و هتكمل باحترافبة

[تامر.محمد]

انا مع كلام noctis و أحمد كمال

[أحمد كمال]

بص يا باشا انا ليا قرايبي بره و هما شغالين في شركات ومعاهد تدريس كمبيوتر طبعا مش معاهد زي اللي في مصر وبيقولولي اني لو خلصت وخدت قرصاتك وتدرب في اي شركه تاخدexperience في المجال اللي انا قررت امشي فيه وده مش 3 او 4 سنين ولا حاجه وبعدين الي انا هتخصص فيه مش فوتوشوب او حاجه بسيطه يعني لا الشركات بتاع المجالات ديه بتكون شركات كبيره عشان معظمها عالمي ده لو مكنش كلها وماظنش انها بتتعامل بملاليم وقبل ما اروح انا اكيد هسال قرايبي دول علي تفاصيل الشغل هناك وربنا يوفق ان شاء الله

وتسلم يا ياشا علي النصيحه

سيدي الفاضل

انا ما قلتش فوتوشوب و لا حاجة بسيطة انا اكيد عارف انها حاجة كبيرة

و على فكرة انا خريج 2003 و اكبر منك بيوم يعرف عنك بسنة .... شوف بقى اللي اكبر منك بتسع سنين :)

انا شغال حاليا في تخصص نادر و معقد جدا و بقالي اكتر من 5 سنين شغال في شركات كبيرة و عالمية و قبلهم سنتين شغال في شركات محلية و زي ما حضرتك بتقول و عارف اللي باقولهولك

انا مش قصدي ملاليم يعني المرتب هيبقى ملاليم بالمعنى الحرفي .... إطلاقاً

انا اللي عايز اقولهولك ان لو انت اول ما هتتخرج هتشتغل في الخليج ب 5 الاف ريال او درهم مثلا (و دي بمقاييس الخليج ملاليم فعلا ..... اوعى تفتكر ان 5000 ريال = 7500 جنيه هناك !! .... لو بتاخد هنا 2000 جنيه اكرم لك و احسن لك)

كمان 4 سنين في الخليج مش هتكون اتجاوزت ضعفهم

في حين اللي اشتغل في مصر 3 أو 4 سنين و حصلك هيحصلك على 20 عالاقل

مع انه دفعتك و نفس سنين خبرتك

ما تحرقش كارت الخليج بدري ...... اتقل و خد خبرة تستاهل عشان و انت رايح الخليج يبقوا هما اللي عايزينك مش انت اللي عايزهم و تحط رجل على رجل و تطلب اللي انت عايزه و تتشرط..... الكورسات على كام شهر تدريب ما اسمهمش خبرة في سوق العمل ....


حاجة اخيرة ..... شغلانة ال instructor فلوسها حلوة جدا في الأول بس مالهاش مستقبل .... و بعد 5 و لا 10 سنين هتلاقي انك حرقت نفسك و مش عارف تشتغل عملي بايدك ......

[AHMED NEGM]

سيدي الفاضل

انا ما قلتش فوتوشوب و لا حاجة بسيطة انا اكيد عارف انها حاجة كبيرة

و على فكرة انا خريج 2003 و اكبر منك بيوم يعرف عنك بسنة .... شوف بقى اللي اكبر منك بتسع سنين :)

انا شغال حاليا في تخصص نادر و معقد جدا و بقالي اكتر من 5 سنين شغال في شركات كبيرة و عالمية و قبلهم سنتين شغال في شركات محلية و زي ما حضرتك بتقول و عارف اللي باقولهولك

انا مش قصدي ملاليم يعني المرتب هيبقى ملاليم بالمعنى الحرفي .... إطلاقاً

انا اللي عايز اقولهولك ان لو انت اول ما هتتخرج هتشتغل في الخليج ب 5 الاف ريال او درهم مثلا (و دي بمقاييس الخليج ملاليم فعلا ..... اوعى تفتكر ان 5000 ريال = 7500 جنيه هناك !! .... لو بتاخد هنا 2000 جنيه اكرم لك و احسن لك)

كمان 4 سنين في الخليج مش هتكون اتجاوزت ضعفهم

في حين اللي اشتغل في مصر 3 أو 4 سنين و حصلك هيحصلك على 20 عالاقل

مع انه دفعتك و نفس سنين خبرتك

ما تحرقش كارت الخليج بدري ...... اتقل و خد خبرة تستاهل عشان و انت رايح الخليج يبقوا هما اللي عايزينك مش انت اللي عايزهم و تحط رجل على رجل و تطلب اللي انت عايزه و تتشرط..... الكورسات على كام شهر تدريب ما اسمهمش خبرة في سوق العمل ....


حاجة اخيرة ..... شغلانة ال instructor فلوسها حلوة جدا في الأول بس مالهاش مستقبل .... و بعد 5 و لا 10 سنين هتلاقي انك حرقت نفسك و مش عارف تشتغل عملي بايدك ......

الكلام ده بصراحه انا اول مره اعرفه وبيني وبينك انا كنت متوقع 5000 ريال دووول حاجه كبيره اوي بس من كلامك ده هبل ومتزعلش انا مكنتش بشكك في كلامك في الاول والله بس كل اللي حصل اني فهمت قصدك غلط
( على فكرة انا خريج 2003 و اكبر منك بيوم يعرف عنك بسنة .... شوف بقى اللي اكبر منك بتسع سنين) :d

طيب انا كواحد عاوز ابني مستقبلي بسرعه هعد 3 او 4 سنين هنا ومعلش مرتبات هنا برده عمرها ما هتكون زي بره وبعد ال 3 او 4 سنين دول ابقي اسافر قعد 5 او 6 سنين هناك عشان ابقي عملت اللي انا عاوزه بعدين اجي هنا افتح بيت واجيب عربيه واعيش مرتاح هيكون عندي 26 او 28 سنه انا عاوز رايك بصراحه ولو في حاجه غلط في كلامي ارجو النصيحه

[noctis]

انا متفق مع كلام اليشمهندس احمد كمال تماما ودي مباديء عندي من زمان بس ربنا يدينا البركه في العمر ونحقق الي نتمناه

انا شغال حاليا في تخصص نادر و معقد جدا و بقالي اكتر من 5 سنين شغال في شركات كبيرة و عالمية و قبلهم سنتين شغال في شركات محلية و زي ما حضرتك بتقول و عارف اللي باقولهولك

ممكن اعرف التخصص ده ولا ده فضول زايد؟

[أحمد كمال]

الكلام ده بصراحه انا اول مره اعرفه وبيني وبينك انا كنت متوقع 5000 ريال دووول حاجه كبيره اوي بس من كلامك ده هبل ومتزعلش انا مكنتش بشكك في كلامك في الاول والله بس كل اللي حصل اني فهمت قصدك غلط
( على فكرة انا خريج 2003 و اكبر منك بيوم يعرف عنك بسنة .... شوف بقى اللي اكبر منك بتسع سنين) :d

طيب انا كواحد عاوز ابني مستقبلي بسرعه هعد 3 او 4 سنين هنا ومعلش مرتبات هنا برده عمرها ما هتكون زي بره وبعد ال 3 او 4 سنين دول ابقي اسافر قعد 5 او 6 سنين هناك عشان ابقي عملت اللي انا عاوزه بعدين اجي هنا افتح بيت واجيب عربيه واعيش مرتاح هيكون عندي 26 او 28 سنه انا عاوز رايك بصراحه ولو في حاجه غلط في كلامي ارجو النصيحه

للأسف دي غلطة شائعة جدا بين شباب خريجي مصر بجميع التخصصات

انه بيحسبها ازاي

5000 ريال سعودي = 7500 جنيه مصري ...... يريل و بقه يدلدل و يحلم بقى بالقصور و العربيات

400 دينار كويتي = 8000 جنيه مصري ..... أوه لالالا (على رأي المذيع الجزائري بتاع الكورة)

لأ طبعا

عشان تحسبها يا باشا لازم تعرف مصاريف المعيشة في البلد اللي انت رايحها ايه

يعني هتسكن بكام

هتاكل بكام

هتركب مواصلات او عربية بكام (بكامل مصروفها من بنزين و تأمين و ترخيص و صيانة دورية)

هتصرف نثريات بكام (كروت الموبايل .... خروجة كل اسبوع و لا اسبوعين ..... فاتورة الدي إس إل عشان تخش النت و تكلم أهلك ..... إلخ)

هتنزل اجازة كل سنة مصر بكام (حتى لو التذاكر عليهم)

هتشتري هدوم اما تحتاج بكام ....

و بعد كل ده هيفضل لي كام احوشه عشان اما ارجع بلدي..... و لو مش هيفضل حاجة بلاها السفر لأن الغربة مش ببلاش ..... و لو ببلاش يبقى مرمطة و لو مرمطة ببلاش يبقى مرمطة مصر أهون (وسط اهلك ..... و خبرة تكنيكال احسن ..... و عايش على حساب الحاج و الحاجة واكل شارب نايم بلوشي :) )

و يا باشا انا عمري ما ازعل من زميل مهنة بالذات الشباب الجديد :)

5000 ريال في السعودية يعيشوك بالعافية ..... يعني شقة معفنة أو حتى لو هتشارك شباب في شقة (و دي مش سهلة لأن الخليجيين بيعتبروا العزاب سواء اهل البلد او اجانب جربة !!! ..... و كمان لو حسبتها كده يبقى مش هينفع تتجوز بالمرتب ده نهائي) ..... شقة مش اقل من 1000 ريال ..... و عربية بمصاريفها (لان المواصلات و التكاسي هناك غالية جدا و قليلة) حوالي 2000 ريال و اكل مش اقل من 50 ريال في اليوم يعني 1500 ريال ...... ادي كده 4500 راحوا مع اللي راح في 67 و انت و لا اتفسحت (ان شالله جتى قعدة قهوة كل اسبوع !) و لا اتكلمت في الموبايل و لا العربية عملت فيك مقلب و محتاجة شوية فلوس للتظبيط ........

ساعتها يبقى 1500 جنيه و لا 2000 في مصر ابرك 100 مرة

و موضوع بناء مستقبلك بسرعة ده محتاج تخطيط سليم

معلش اتمرمط سنتين تلاتة في مصر عشان تكتسب خبرة صح و هتلاقي مرتبك بيزيد شوية بشوية و بيجيلك عروض من شركات اكبر و احسن بفلوس احسن و سعرك بيغلى و مستقبلك بيتبني ...... و ماتنساش ان ربنا ما بيضيعش مجهود حد في شغله بذمة ....... و معلش محدش بيبني مستقبله من الصفر في سنة و لا اتنين ...... لازم تتفحت شوية عشان ترتاح لان اما بتكبر شغلك نوعيته بتتغير و فلوسك بتزيد ......

مرتبات هنا مش زي برة و ده أكيد ...... بس ما تنساش ان القيمة الشرائية هنا برضه أقل من برة ..... يعني بالمثال أعلاه 5000 ريال في السعودية و لا هتعرف تحوش منهم حاجة ....... بس ممكن في مصر تقرص على نفسك و تحوش من 3000 جنيه ......

و انا شايف انك لو على سن 26 او 28 بقى عندك بيت و عربية ده مش سن كبير و ده كويس جدا و مش سن بعيد ........ طبعا مفيش حاجة بعيدة على ربنا و الارزاق كلها بيد الله

انا متفق مع كلام اليشمهندس احمد كمال تماما ودي مباديء عندي من زمان بس ربنا يدينا البركه في العمر ونحقق الي نتمناه


ممكن اعرف التخصص ده ولا ده فضول زايد؟

لا يا باشا عينيا ليك

Telecom Billing

Rating and Roaming

[AHMED NEGM]

كلامك زي الفل وعاجبني بس انا والله مش بريل ولا ادلدل وبحلم وقصور عربيات (انا كبرت علي الكلام ده )
وبرده مش بقول اوه لا لا لا انا مش بحب الكره اصلا

شكرا علي النصايح يا باشا