تخيلوا اتظلم فى تقدير ماده بسبب ماتش مصر و الجزائر اللى فات

[eng/muhamad]

ايام ماتش مصر و الجزائر فى تصفيات كاس العالم بصراحه انا واحد من الناس كنت شايف ان الجزائر احق بالصعود ( وجهه نظر) و كنت بتكلم فى الموضوع بكل صراحه مع اصحابى سواء فيهم حد متعصب او لا
و فى مره الموضوع اتفتح قدام معيد فى الكليه متعصب كوره شويه
و قولتله ان انا شايف ان الجزائر افضل فى النتايج و من حقها الصعود و المهم الموضوع كان بهزار و انا اهزر معاه و اقوله ان انا بشجع الجزائر و اغيظه شويه و هو يدايقنى شويه و يقولى لو الجزائر فازت هعمل فيك كذا كذا
كان الكلام بهزار و معملش معايا حاجه
جه بقى التيرم ده انا عندى تدريب و التدريب عندنا ده اكبر ماده فى الدرجات و التقدير فيها بيفرق و التقدير بيعتمد اعتماد اساسى على مناقشه شفوى مفيش امتحان تحريرى
المهم لحسن الحظ اكتشفت ان المعيد ده هو اللى هيناقشنى انا قولت عادى و مكنش فى دماغى اى حاجه الموضوع كان من فتره و فى فتره الماتش كنت معاه فى ماده و معملش معايا حاجه و كنت نسيت الموضوع اصلا
المهم لما المناقشه بدأت كنا 4 انا و 3 اصحابى بكل ما تحمل الكلمه من معنى مكنش بيسال حد غيرى
و اسئله صعبه جدا و كنت اجاوب صح يحاول يغلطنى و مكنتش بغير اجابتى و فى اسئله برده جاوبتها غلط يعنى مش كله صح
يعنى انا تقريبا اتسالت حوالى 10 اسئله و اصحابى كل واحد سؤال او اتنين
و فى الاخر ادانى تقدير جيد و واحد صاحبى تانى اتسال سؤالين غلط فيهم جاب جيد و واحد تالت اتسال سؤالين جاوب واحد و غلط فى واحد جاب جيد مرتفع
انا اتظلمت و للاسف مفيش التماسات
انا مش عارف هو عمل معايا ليه كده كل ده بسبب ماتش كوره
انا مفيش فى ايدى حاجه اعملها غير حاجه واحده حسبى الله و نعم الوكيل
معلش الكلام كتير و تقلت عليكو بس عاوز افضفض انا مخنوق من الاحساس بالظلم

[nabaster]

كفايه كلمة حسبي الله ونعم الوكيل

علي فكره انا حاسس بيك ودايق طعم الظلم زيك وحاسس بمرارته

اتنا اتظلمت في تقدير

انا بسبب الظلم ضاع سنتين من عمري وكنت هتفصل من الجامعه

الحمد لله

بس مش مسامح في حقي

وحسبي الله ونعم الوكيل

A.Yakout

[Eng_Mostafa_89]

امال احساسك يكون اية لما تشيل مادة لمجرد انك جاوبت بقلم رصاص

او جاوبت الامتحان كلة وهو كان ظالب 3 اسئلة من 4

[nabaster]

امال احساسك يكون اية لما تشيل مادة لمجرد انك جاوبت بقلم رصاص

او جاوبت الامتحان كلة وهو كان ظالب 3 اسئلة من 4

انتا بتهرج صح؟؟؟

موضوع القلم الرصاص ده سبب من اسباب ان الدكتور قعدني سنتين

وموضوع اجابة اربع اسئله والمطلوب تلاته ده نفس الي حصل معايا في سنه اولي

وشيلني الماده

علي كده انا عالمي بقي اتجرب فيا كل حاجه :)

A.Yakout

[Mostafa.Mahran]

يا جماعة الدكاترة فى الكليات بتبقى دماغهم شبه تعبانة و اى حاجة بتضايقهم منك مش هيسمو عليك و المفروض انك فى خلال السنة تكون عرفت دماغهم ماشية ازاى و عاوزين ايه و تكون سالت الناس الاكبر منك عن تجاربهم مع كل دكتور علشات تعرف تكون فكرة عن اسلوبه

معلش حوار زى القلم الرصاص و انك تحل الاسئلة كلها مع انه طالب 3بس دى غلطتك لان الدكتور ممكن يكون تفكيره انك بتتنطط عليه و عارف الاسئلة كلها و فاهم المادة و هو مش عاوز حد يكون كده

[Eng_Mostafa_89]

انتا بتهرج صح؟؟؟

موضوع القلم الرصاص ده سبب من اسباب ان الدكتور قعدني سنتين

وموضوع اجابة اربع اسئله والمطلوب تلاته ده نفس الي حصل معايا في سنه اولي

وشيلني الماده

علي كده انا عالمي بقي اتجرب فيا كل حاجه :)

a.yakout

المشكلة اننا فى الكلية كل كتابتنا بالقلم الرصاص وعمر محد اعترض علية بالعكس كل الدكاترة بتوع هندسة هما اللى بيقولولنا اكتبوا بالرصاص علشان لو غلطوا يبقى سهل انك تصلح غلطتك

انما المادة اللى الدكاترة اعترضوا على الكتابة بالقلم الرصاص واجابة ورقة الاسئلة كلها هما الدكاترة بتوع حقوق اللى بيدرسولنا مادة حروق الانسان

المشكلة انهم متكليموش معانا فى حتة الكتابة بالقلم الرصاص ولا اجابة المطلوب فقط

لا احلى حاجة ان الدرجات عندهم اسطمة للى كاتب برصاص او حالل الامتحان كلة
طلبة قسم عمارة 13 من 50
طلبة عمارة اشتكوا وكان الرد من عميد الكلية ان الطلبة عى اللى استهترت بالمدة ولما قالوا اشمعنى كلنا جيبين 13 سكت
لما بتوع عمارة اشتكوا رفعوا درجات قسم مجنى

انما احنا بقى طلبة قسم سيارات درجات اللى شيلين 18 او 20 من 50

يلا حسبنا الله ونعمة الوكيل

[kamalsalem]

انا شلت مادة في الكلية عشان الدكتورة بتصحح عالإجابات النهائية فقط، وزملائي من ضحايا الهندسة يقدروا يقولولكوا ده معناه ايه، احنا بنبفى بنكتب اي حاجة واحنا ف عرض نمرة

[Eng_Mostafa_89]

يا جماعة الدكاترة فى الكليات بتبقى دماغهم شبه تعبانة و اى حاجة بتضايقهم منك مش هيسمو عليك و المفروض انك فى خلال السنة تكون عرفت دماغهم ماشية ازاى و عاوزين ايه و تكون سالت الناس الاكبر منك عن تجاربهم مع كل دكتور علشات تعرف تكون فكرة عن اسلوبه

معلش حوار زى القلم الرصاص و انك تحل الاسئلة كلها مع انه طالب 3بس دى غلطتك لان الدكتور ممكن يكون تفكيره انك بتتنطط عليه و عارف الاسئلة كلها و فاهم المادة و هو مش عاوز حد يكون كده

اعتقد مكنتش هتفرق معاه لو كان نبهة على النقطة دى
الدكتور اللى بيدرسلنا لغة فنية من اول السنة وهو قالنا لو سمحت مبحبش حد يكتبلى برصاص دة احترمتة انما التانى دة ربنا يهدية
المشكلة دى موجودة كل سنة مع طلبة سنة اولى وبرضة الدكتور مبينبهش كانة مستمتع بكدة

[Eng_Mostafa_89]

انا شلت مادة في الكلية عشان الدكتورة بتصحح عالإجابات النهائية فقط، وزملائي من ضحايا الهندسة يقدروا يقولولكوا ده معناه ايه، احنا بنبفى بنكتب اي حاجة واحنا ف عرض نمرة

عادى عندنا دكاترة كتير بالطريقة دى

اصلا قمة التخلف الدكاترة اللى بتعمل كدة تخيل فى مسائل بتتحل فى 6 او 7 ورقات فلوسكاب وفى الاخر ممكن تغلط وانت بتنققل رقم من صفحة لصفحة طبعا الرقم دة بوظلك الناتج النهائى يبقى كل اللى انت عملتة دة ولا لية اى لزمة

كنت بحترم الدكتور بتاع الرياضة راجل محترم جدا
كان بيعلم فكرة مش ارقام

[Abdo_Eldesokey]

بص زي ما ياقوت قالك .. كفاية كلمة حسبنا الله ونعم الوكيل

الكلمة دي بجد بتعمل عمايل .. هتلاقي ربنا بلاه في رزقه أو في صحته أو في أهله

لأن الي ربنا يأمنه أمانة ، ويضيعها عشان هوى في نفسه ، يبقى بني آدم ميستاهلش يعيش

[medociv]

استاذ الجامعة ليس له رقيب الا ضميره
فلو استاذ الجامعة او اي حد في اي مركز من الوزير للغفير كان معتبر ان الله عز وجل هو الرقيب عليه واتقى ربنا في شغله كنا والله بقينا وضع تاني خالص.
واحد زميلي قعد يسقط 3 سنين ورا بعض وبال 8 مواد وفي مواد حالين قريب من بعض وفي الاخر اكتشف ان ادكتور كان زعلان معاه وفي صاحبه شغال في الكونترول كان مظبط صاحبي ده نفخه
حسبنا الله ونعم الوكيل

[Eng.Geo]

عين شمس ؟

[maka]

ياباشا قول حسبى الله

ومتقلقش خالص ربنا مش هيضيع تعبك و هيعوضها لك فى حاجة تانية

[kh_talaat]

للأسف نسبة كبير من دكاترة الجامعه بيبقوا معقدين نفسيا وشبع من بعد جوع ... لكن دة طبعا لا يمنع انه منهم ناس محترمة

توجه لله تعالى ... وقل حسبي الله ونعم الوكيل وثق ان الله لن يضيع حقك

[eng/muhamad]

حسبى الله نعم الوكيل
انا عندى احساس بشع بالظلم