مش عايز تزرع قمح ؟!!! طب اشرب بقى ..و اتفضلو اشربو معانا

[Ahmed Samy]

من المعروف ان مصر من أيام الفراعنة و أيام سيدنا يوسف الصديق عليه السلام و هي بلاد القمح ..بلاد الزراعة و التقدم و التخزين و طول عمرها بلد بفائض قمحي يخزن لسنوات و سنوات كعز استراتيجي -مش عز التاني- و أمان من تقلبات الأيام و نكبات الدول أو غدر الصديق .

لكن الدولة المصرية -ولسبب لا أفهمه- اصرت على قتل التوسع في زراعة القمح عاما بعد عام ...بل وقتل الزراعة نفسها بتخفيض سعر شراء الأردب من المزارع المصري لما يقرب ال60% (سعر الأردب الحكومة عايزاه ب 400 جنيه ثم نزلت الى 280 جنيه) و ده طبعا جعل الفلاح يسيبه و يتجه للبرسيم أو حتى الكيوي لأنه أكسب له و الراجل طبعا معذور لأنه أكل عيشه ...

خدت بالك من أكل عيشه دي؟
احنا متصلين بالخبز لدرجة اننا بنطلق عليه لفظ الحياة نفسها (عيش) فالقمح هو من قرون طويلة "عيش المصري"
طب اشمعنى ؟
لأن المواطن المصري طول عمره مسروق و مستهلك و لم تتوافر لديه كثيرا رفاهية الحصول على جبن أو لحم أو فاكهة أو بروتين يسد جوعه فكان يسد هذا الضيق بكميات أكبر من الخبز (اللي البلد بتزرعه ومرطرط) و من المعلوم أن المواطن المصري هو أعلى شعوب العالم استهلاكا للقمح -و الحكومة بتذلنا على اساس ان ده بطر و هو من غلبنا- اذ يستهلك 148 كجم في السنة .(الناس اللي بعدنا 80 بس)

طيب ....
البهوات اللي مايعرفوش يعني حكم ولا دولة ..اللي بيحسب كل حاجة بتمنها و فاكر نفسه ناصح
قال فكك من زراعة القمح ...ناخده معونة و نشتري الباقي ووصل بينا الحال اننا بقينا بنشتري "عيشنا" من الخارج بنسبة مقاربة لـ100%.

عارف يعني ايه تشتري عيشك ؟ تشتري حياتك يعني

و مع الثقة الغربية في المجتمع الدولي انه عمره ما هيقلب علينا (من باب ايه مش عارف) و ثقة كاملة في أمريكا (اللي بتشتري ارض في استراليا علشان تزرعها قمح و استراليا بتعرقل التوسع بكل طاقتها) و سند ظهر للحليف الروسي القديم .......مع جعل دول كأوروبا و الصين و الهند احتياطي نشتري منه لو روسيا اتوطينت (بقت واطية يعني ماعلش). مانت غني بقى و الناس تتمنى تبيعلك ...يا كبير .

طيب وصلنا اننا بنستورد أكتر من 8 مليوووون طن سنويا

فكر في الرقم تاني أرجوك

الجد بقى

ان روسيا ما توطينتش (انت فاهمني بقى) روسيا اتزنقت ...جفاف و حرائق خلصت على 20 % من انتاجهم من الحبوب.....قاللك بس ..وقف تصدير
هو ماعندهومش ؟؟؟ لأ عندهم اللي يصدروه بس هم مش عبط علشان يقعدوا عريانين من قمح و نرجع ندور على اللي يبيعلنا.

طب و بعدين ...ماتخاااااااافش نشتري من غيره

الو يا فرنسا ...اديني تلاتة اربعة مليون طن و حياة ابوكي
مش ممكن يا خبيبي انت مم تشتـ غي مني ربع طن بس ...ي والله و بالغالي كمان

ألو يا ارجنتين ,,,,,,,عندكو دقيق ؟
مش عارفين ..هانشوف شعبنا و نقوللك

و قبل ما ترفع سماعة التليفون أعلنت الهند و الصين انهم مش بايعين مخزونهم الوفييييييييييير من الحبوب حتى تحت اغراءات ارتفاع السعر (شايف!)

ايه ده ؟!!!!
انت مزنوق ؟؟؟ جعان ؟؟؟!!!

ياكبدي

ماما امريكا ممكن تخلصلك الليلة و تملالك التلاجه زي زمان
بس..........

انحني يا حمار
اخضع يا جعان

قمنا بكل صياعة و شرف رفضنا العرض (رجالة يابني ...بس ما بنبانش الا وقت الجوعة)

__________________________________________________ _____________________________

الوزير بيقول ان المخزون يكفي 4 شهور ......يافرحة أمـــــــ......ـي بيا أنا يا سيدي
جرايد بكرة بتقول ان المخزون لا يكفي للمدة في فعلا و بالأرقام ده غير استهلاكنا الجنوني في رمضان اللي ينسف 6 شهور كمان ...و الباشا بيطمنك و انت في السوبر ماركت .....في قمح ماتخااافش عييييييش اشتري و بعزق .

سعر الدقيق ارتفع
مترو فعلا غلى العيش من فترة
التوقعات بتقول ان رفغيف العيش هايكسر ال50 قرش للتجاري و الحكومة بتدرس رفع الرغيف التعبان لـ20 قرش

منيييييييييين يا ناس في ناس مش قادرة تجيب ابو 5 قروش و بتموت فداه .

_________________

قريت ؟
شربت معايا اللي أنا شاربه ؟
فكر كده هايحصل ايه ؟؟؟

أفضل الفروض علشان ما كونش سوداوي قوي

اننا نقدر نوفي احتياجاتنا من اي داهية زرقا بالسعر الجديد

انت عارف احنا عجز الموازنة وصل 100 مليار طبعا (99 بالضبط) تفتكر هايبقى كام بعد سنة القحط دي بقى ؟؟

طب دعم البنزين و مشريع الكهربا و المية .......هانجيبلها فلوس منين ؟


مش عارف

انا عارف حاجة واحدة

ان اللي عايز يقعد في البلد دي يستحق مني 21 طلقه على روحه

الشهيد مالوش غير كده

بس شهيد ايه ؟؟ وشهيد مين ؟؟

أنا ان شاء الله ماشي

مش قادر اشرب كمان

[pro_samir]

البقاء لله

[hazoom2006]

احنا شربنا كتير مش كفاية بقا ولا اية

واحنا لسة داخلين على العيد وكحك وبسكويت والحجات دى كلها

هنعمل اية يا حكومة ؟؟؟ وهتعملى اية يا غاليه ؟؟

ازمة النيل و ازمة القمح وازمة الكهرباء وازمة عجز فى الميزانية و......و.....و..ووو

اية بلد الازمات دى

منهم لله اللى خربوها ولسة بينهبو فى خيرها

[bmya]

كفايه يا دكتور :((
بس مسيرها تتددبر ما تخافش احنا عندنا الحكوومه الذكيه اكيد هيتصرفوا اااااااا

[M.Osman]

انا شربت من نيلها لحد ما اتكرعت

[Kareem_A]

عارفين القاعد يولع في نار عشان يدفى لغاية ما ولع في نفسه !!

ادينا مستنين الثورة

[Terrible_DaRsH]

يا جماعة اذكروا محاسن موتاكم .

أنا ان شاء الله ماشي

يا بختك .

[kono]

فى موضوع سابق كنت قولتلك برة احسن من هنا فى ايه
والبلد دى احسن من غيرها
وكلام حمصى اوى
بس الوقت انا بقولك
لما تلاقى اى حته بيحترموا فيها الانسان قولى عشان اجى معاك

[mrwho1982]

مطلوب :

مطلوب حكومة محترمة تعمل بجد تخاف علي الشعب وتقوم بانتخابات حرة ونزيهة

ملحوظة ( الاغبياء يمتنعون والمتخلفين برضو نفس الكلام وممنوع منعا باتا اي فرد من الحكومة الحالية لاننا بنبني مش بنهد )

هشام الجخ قالها ( مش ايد بتبني و600 تيت تيت بيهدو )

حسبي الله ونعم الوكيل فيك ياصفوت الشريف وفتحي سرور ونظيف وكل الحكزومة من اول واحد لاخر تيت

واخد باللك انت من الحكزومة دي

[medo_2060]

انا بصراحه والله معدتش شاغل دماغى باى حاجه تخص البلد ولا بحب اعرف تفاصيل اى موضوع .. كانى للاسف ضيف وماشى بعد يومين مثلا

[hazoom2006]

انا بصراحه والله معدتش شاغل دماغى باى حاجه تخص البلد ولا بحب اعرف تفاصيل اى موضوع .. كانى للاسف ضيف وماشى بعد يومين مثلا

والله انا بقيت مكتئب من الاخبار دى كل يوم خبر عن ازمة او مصيبة

كنت بقول امشى بس مش عايز اسيبهالهم

انا حاسس ان احنا بنطلب منهم وعد بلفور للمصريين علشان يعيشو فى ارضهم

بقول يارب يمكن يكون فى امل فى التغيير طبعا التغيير الكلى يعنى كله كله

ربنا يقدم اللى فيه الخير

[SHNORY]

طول عمر مصر بتجيلها ازمات ومجاعات انيل من اللي احنا فيها دي
لو حد قري كتب التاريخ اللي اتكلمت عن الشعب مش عن الحكومات حيعرف
مصر جه عليها وقت لما كان حد بيعدي من شارع
كان الناس بيرموا عليه خطاطيف ويصطادوه وياكلوه
والكلب يدخل ياخد الرضيع من قدام امه وهي مش قادره تتحرك من الجوع
والبيت بيتباع بطبق قمح
وبعد كده بتيجي عصور ازدهار
الي يقري التاريخ ويفهمه حيعرف ان ده العادي
بس التواريخ بعيده عن بعضها
ومش حقول غير
حسبي الله ونعم الوكيل في الي كان السبب

[Medo.Malek]

انا بصراحه والله معدتش شاغل دماغى باى حاجه تخص البلد ولا بحب اعرف تفاصيل اى موضوع .. كانى للاسف ضيف وماشى بعد يومين مثلا

كنت فاكر انى لوحدى اللى بعمل كده !

[blazer]

طول عمر مصر بتجيلها ازمات ومجاعات انيل من اللي احنا فيها دي
لو حد قري كتب التاريخ اللي اتكلمت عن الشعب مش عن الحكومات حيعرف
مصر جه عليها وقت لما كان حد بيعدي من شارع
كان الناس بيرموا عليه خطاطيف ويصطادوه وياكلوه
والكلب يدخل ياخد الرضيع من قدام امه وهي مش قادره تتحرك من الجوع
والبيت بيتباع بطبق قمح
وبعد كده بتيجي عصور ازدهار
الي يقري التاريخ ويفهمه حيعرف ان ده العادي
بس التواريخ بعيده عن بعضها
ومش حقول غير
حسبي الله ونعم الوكيل في الي كان السبب

ماهو نفس الكلب دا هو اللى بيمد ايده فى جيبى وجيك مش عشان يسد جوعه لا
عشان يغير الجاجوار بفرارى و يشترى بدل القصر 100
حسبى الله ونعم الوكيل

[Ahmed Samy]

كفايه يا دكتور :((
بس مسيرها تتددبر ما تخافش احنا عندنا الحكوومه الذكيه اكيد هيتصرفوا اااااااا

ياريت يتصرفوا

أما عن كفاية ....هو أنا يعني اللي باعمل كده

ربنا يلطف

يا بختك .

هههههههههه
محسسني اني لميت عزالي و ماشي الصبح
أنا لسه باحاول و الطريق بيضيق يوم عن يوم

قول يارب

فى موضوع سابق كنت قولتلك برة احسن من هنا فى ايه
والبلد دى احسن من غيرها
وكلام حمصى اوى
بس الوقت انا بقولك
لما تلاقى اى حته بيحترموا فيها الانسان قولى عشان اجى معاك

و انا يومها ضحكت و قلتلك ماتزعلش منى

أكيد دلوقتي فهمتني

و عندي من الصنف ده كتير

انا بصراحه والله معدتش شاغل دماغى باى حاجه تخص البلد ولا بحب اعرف تفاصيل اى موضوع .. كانى للاسف ضيف وماشى بعد يومين مثلا

يعني انت ماشي فعلا و لا ناوي تفتح على المصيبة مرة واحدة

والبيت بيتباع بطبق قمح

يا خوفي يا شنوري من اليوم ده

يا خوفي