*** الحرامية-أو-حينما يكون الربا أخف الضررين

[ecybrarian]

يا سبحان الله كمية نصابين خدوا من الناس فلوس بالمليارات تحت غطاء توظيف الأموال وبعديت خلعوا ومحدش هارف يحاسبهم. كلنا فاكرين صاحب معرض سيارات الفرسان، ذلك الرجل المتدين الذي استولى على (مش عارف) كام 100 مليون من الناس لتوظيفها ثم خدع ناس تانية ببيع سيارات بدون أوراق. ثم تلاه النصاب الصغير كريم ربيع صاحب معرض الربيع تريد للسيارات بعميلة نصب لم تتجاوز العشرين مليون جنيه (حاجة كده بيبي نصاب)
ثم كانت الطامة الكبرى لنصاب العمرانية الذي ضحك على الغلابة وخد منهم ما يقرب من 98 مليون جنيه فقط لاغير..تخيلوا الغلابة دول سكان العشوائيات اتلم منهم قد ايه فلوس!!! ده في واحدة جات في برنامج العاشرة مساء (بهدوم مزيته لو شوفتها في الشارع هاتطلع من جيبك 5 جنيه ليها) وقعدت تعيط وتقول انه واخد منها 300 ألف حنيه!!!!!!!!! من اين لكي هذا يا حاجة؟؟؟؟؟ وبعدين حكاية ارنوب...مشروع ارنوب بتاع الأرانب..الراجل صاحب المشروع لم فلوس من طوب الأرض على حس الأرنوب..شوف ساذجة البشر أو فلنقل طمعهم..المهم واجد من البهوات دافع 250 الف جنيه استثمارات في الأرنب كان في برنامج الحقيقه امبارح وكان مغطي وجهه وذكر انه موظف في احدى السفارات الاجنبيه المهمة ..يا نهار ابيض ده انا موظف في احدى السفارات الاجنبيه المهمة برضه وعلى منصب ودرجة محترمة وماحتكمش على5000 جنيه!!!!!

وأخيرا يأتي معلم الكل سيد المُعَلِمين إسلام باشا نصاب مدينة نصر الذي استولى على 2 مليار جنيه وشوية فكه (يعملوا حوالي 180 مليون) ضحك على مشاهير مثل بشير التابعي ووليد صلاح عبد اللطيف. وخد 5 مليون من بهاء ابن وزير التنمية الاقتصادية (من اين له هذا) وخد 4.5 مليون من اتنين اخوات وحماة احدهم...الظريف إن واحد من الإخوات دول قال إن فلوسه دي شقى 9 سنين (بس)

الناس دي بتجيب الفلوس دي منين؟؟؟ بصوا بقى، ان لا اسمح لأي حد أن يشكوا من ارتفاع الاسعار أو اي حد يقول لي إن زجاجة الزيت وصلت 10 جنيه...البلد مليانه فلوس

المهم تخليوا كل الناس إللي إضحك عليهم أكدوا انهم كانوا عايزين يتحروا الحلال في استثمار اموالهم ويبعدوا عن البنوك علشان فلوس البنوك رباويه...لا حول ولا قوة إلا بالله..اصبح الربا اخف الضررين...لا اريد ان اناقش فتاوى ارباح البنوك ولكن الناس يبررون الطمع بأنهم كانوا يتحرون الحلال
========
كالعاده...تم وضع الثلاث نجوم في عنوان الموضوع من طرفي ولكل قارئ الحرية في إضافة ما يشاء من كلمات في حدود الثلاث حروف مثل كلمة "بلد" مثلا

[memo_hefnawy]

لالالالالالالالالالالالالالالالالالالالا إنت فاتك الكبيره :)

فيه واحده من المنصورة إداتله 99 مليون جنيه و جت فى العاشرة مساء !!!!!

99 مليون

تخيل فيه ناس عرفت تجمع 99 مليون جنيه و مش عارفه تستثمرهم و تشغلهم إذاى فتديهم لعيل أهبل يضرب عليهم و يكت ؟ههههههههههه بجد أنا من ساعة الست دى و أنا بضحك من الجنان إللى الناس دى فيه يبقى كان عنده حق يسرقها لأنها هبله مش فاهم أنا الناس دى بتفكر إذاى وصل أمانه إيه و هباب إيه ؟

بس إللى إنت ماوضحتوش فى موضوعك إن إبن وزير التخطيط المبجل (تخطـــــــــيط) مش مديله 5 مليون بس لأ :D

البيه إشتغله سمسار و بقى يلم من الناس الفلوس بحكم إنه إبن وزير يبقى فوق الشبهات و يمضى للناس على وصولات الأمانه و الوصولات برده جت فى العاشرة مساء !!!!!!!!!!!!

محدش عنده حمار أبيض نفسه يخططة و يبقى حمار مخطط :)

[أبومعاذ]

(يأيها الذين أمنوا اتقوا الله و ذروا ما بقي من الربا إن كنتم مؤمنين (278) فإن لم تفعلوا فأذنوا بحرب من الله و رسوله وإن تبتم فلكم رؤوس أموالكم لا تظلمون ولا تظلمون)

مين يقدر على حرب ربنا؟؟؟؟
أعتقد إن لو الواحد سمع كلامك هيبقى المستجير من الرمضاء بالنار
طب و ليه كل واحد ميعملش لنفسه مشروع حتى لو صغير و يبقى المشروع دا كمان سبب في رزق ناس تانيين و بكدا ممكن البطالة تقل لكن البنوك معروف إن أغلبها إن لم يكن كلها بتشتغل في غسيل الأموال و بتضارب في البورصة و بلاوي تانية كتير غير السبب الرئيسي اللي هو إنها ربا بحت

[memo_hefnawy]

أنا نسيت أعلق على نقطة البنوك تبقى أحسن أو لأ

ياريت مانقلبش الموضوع لجدل فقهى و خصوصا إن الحلال بين و الحرام بين و فيه فتاوى كثير أوى فى الموضوع ده تحلل و تحرم

إحنا مش أهل إن نحكم فيها و كل واحد يعمل إللى هو شايفه و إللى بيشيل إربة مخرومة هو لوحده إللى هايتبل محدش غيره

يبقى نخلينا فى أصل الموضوع النصب و الضحك على الدقوون

و نقطة أخيرة إن كل الناس إللى إتنصب عليها بيتمحكوا دلوقت فى إنهم كانوا عايزين يتجنبوا الربا و ربنا بس إللى يعلم بالنيات .........

[وائل عطية]

أنا متفق معاك في كلامك
ولسه كنت في نقاش مع بعض الأصدقاء بمناسبة غلاء الأسعار، وحكاية زجاجة الزيت اللي بقت بـ 10 جنيه دي..
فعلاً كلامك مظبوط ..الكل عمال يشتكي من غلاء المعيشة، وارتفاع السعار ..طيب تعالى بص على كمية الطوابير المهولة اللي كانت قدام أفرع بنك التعمير والأسكان في موضوع قرعة الأراضي الأخيرة اللي كان عاملها ..فعلاً الناس معاها فلوس ..طيب خللي البنك ينزل شقق في حلايب وشلاتين هاتلاقي أمم بتقدم عليها والفلوس بتطلع بعد ماكانت متكرتن عليها..فعلاً حاجة مش طبيعية

[وائل عطية]

و بتضارب في البورصة و بلاوي تانية كتير

طيب وهى المضاربة في البورصة مالها ؟؟!!

معلش أنا نسيت أوجه الشكر للأخ ecybrarian صاحب الموضوع، فكرة حلوة وعنوان مميز، وبالمناسبة أنا مابادخلش واشارك في أي موضوع إلا إذا كان العنوان بتاعه عميق ومتوافق مع موضوعه ..ودا اللي اتحقق في الموضوع دا..شكراً

[أبومعاذ]

طيب وهى المضاربة في البورصة مالها ؟؟!!

انهي افيد للبلد مشاريع صغيرة تشغل ناس و تقلل البطالة الرهيبة و لا المضاربة في البورصة
هي المشكلة إن مفيش حد عايز يخاطر بفلوسه و يعمل مشروع في ظل ظروف البلد الحالية و كل واحد عايز يكسب فلوس ومن غير ما يبذل أي مجهود و أعتقد إن دا تفكير خاطئ و لا يرضي أحد

[osman hisham]

الحقيقه اتا شبه متأكد أن أغلب هذه الأموال هيه أموال حرام فى الأساس و أصحابها مش عايزين يظهروها فى القنوات الشرعيه للدوله يعنى غسيل أموال بالعربى .... الفلوس دى رشاوى و سرقه و أتاوات و غيره فكانت النتيجه ضياعها .......
الناس اللى بتقول أنها حاطه 3 مليون دى ناس طماعه حت فى مطالبتها بفلوسها بعد ضياعها ... أسلام كان بيديهم 8% شهريا يعنى المبلغ بيتضاعف سنويا!!! و هما حطين أموالهم من أكتر من 4 سنين يعن فى الأساس هوه حاطط 300000 و تصل بمضاعفتها الى 3 مليون...
و حسبــــــــــــــــــــــى الله و نعم الكيـــــــــــــــل

[وائل عطية]

انهي افيد للبلد مشاريع صغيرة تشغل ناس و تقلل البطالة الرهيبة و لا المضاربة في البورصة
هي المشكلة إن مفيش حد عايز يخاطر بفلوسه و يعمل مشروع في ظل ظروف البلد الحالية و كل واحد عايز يكسب فلوس ومن غير ما يبذل أي مجهود و أعتقد إن دا تفكير خاطئ و لا يرضي أحد

كده أنا فهمت وجهة نظرك يا استاذ محمد لأنك في المداخلة الأولى جمعت الربا مع المضاربة في البورصة ودا لا يجوز لأن المضاربة ليست حراماً في حين أن الربا حرام
اما مسالة إن محدش عايز يخاطر بفلوسه فدي ثقافة خاصة، وتوجهات شخصية لا نستطيع أن نلوم أحداً عليها في ظل الظروف الحالية والوضع القائم.

[Ayman_Abdullah]

الغلاء سببه ان الناس معاها فلوس
و بالتالى القوة الشرائية بتزيد
و بالتالى الطلب على السلع بيزيد
و بالتالى النصابين بيزيدو
دائرة مغلقة

[cpt_shawky]

فيه واحده من المنصورة إداتله 99 مليون جنيه و جت فى العاشرة مساء !!!!!

99 مليون

تخيل فيه ناس عرفت تجمع 99 مليون جنيه و مش عارفه تستثمرهم و تشغلهم إذاى فتديهم لعيل أهبل يضرب عليهم و يكت ؟

سؤال فالصميم ايه العقلية اللى قدرت تجمع 99 مليون ومش عارفة تستثمرهم

السؤال الأهم رغم أنهم عارفين مدى التعب اللى لموا فيه الملايين دى ازاى تصوروا ان فيه عبقرى اكتر منهم يضاعف الفلوس فسنة مثلاً!!!!!!!!!!!!!!!!!!!!!!!!

[محمد عز]

حال البلد يحير فعلا
لكن خلينا نفكر شويا
فين ناس دخلهم مش بيعدى 300 جنيه
وده قاعده عريضه جدا من الشعب مش واحد ولا اتنين
توزيع الاجور فى مصر مفهوش تناسب
يعنى لو اخدنا مثال واحد معاه دبلوم صنايع (وتقريبا ده نموذج منتشر بشده فى مصر)

اشتغل فى
1- شركة بترول
2- قطاع خاص بس فى شركه برده (مقاولات - ملابس)
3- حكومه
4- معاه مهنه وشغال صنايعى، سواق تاكسي .... الخ
5-مش لاقى شغل
6- او يسافر بره مصر وهوا ورزقه ولكن فى الغالب لن يستطيع بمؤهله البسيط عمل شىء يذكر

نجد من الخمس حالات اللى فوق الوحيد القادر على انه يكون معاه فلوس ويشترى او يبيع هو الحالة رقم 1 نظرا لاشتغاله فى شركات البترول ذات المرتبات الجيدة والامتيازات

طيب الناس التانيه جابت فلوس؟؟؟؟؟؟؟

اغلب الناس اللى معاها فلوس اظن لا تزيد عن نسبه 10 % من جموع الشعب المصرى
وبالتالى 90 % بس هوا اللى بيشتكى فعلا من زيادة الاسعار او 80 %

[mohamed_rhem]

(يأيها الذين أمنوا اتقوا الله و ذروا ما بقي من الربا إن كنتم مؤمنين (278) فإن لم تفعلوا فأذنوا بحرب من الله و رسوله وإن تبتم فلكم رؤوس أموالكم لا تظلمون ولا تظلمون)

مين يقدر على حرب ربنا؟؟؟؟
أعتقد إن لو الواحد سمع كلامك هيبقى المستجير من الرمضاء بالنار
طب و ليه كل واحد ميعملش لنفسه مشروع حتى لو صغير و يبقى المشروع دا كمان سبب في رزق ناس تانيين و بكدا ممكن البطالة تقل لكن البنوك معروف إن أغلبها إن لم يكن كلها بتشتغل في غسيل الأموال و بتضارب في البورصة و بلاوي تانية كتير غير السبب الرئيسي اللي هو إنها ربا بحت

معاك مليون في الميه وفي احاديث كثيره نبويه كثيره للاطلااع
اي حد معاه فلوس زياده يشغلها
والمثل بيقول طول ما الطماع موجود النصاب بخير

[Xpert]

انا مش عارف ليه حاسس ان ورا المواضيع دي .. غسيل اموال و نصب و احتيال و اللمه دي فيها اكتر من راس كبيره اصلاً .. و بعد ما الرؤوس دي تلم المبالغ من بعض + شويه فكه من الناس .. واحد فيهم يطلع اكبر نصاب و ياخدهم و يكت بيهم .. اقنعني ان انت تجيب 10 الاف جنيه بالشقاء و الحلال .. و تيجي بكل بساطه تديهم لواحد .. يعني انا لما المعلم الكبير يديني 10 جنيه مثلاً يقولي انزل هات كذا او اعمل كذا و ارجع .. اقعد اعد في ال 10 جنيه دي 30 مره .. و كل ما اصرف حاجه اعدهم تاني و تالت و اجمع و احسب و احطهم في جيبي و انا مقلق !

[ramyfawzy]

يا جماعة الموضوع فعلا مستفز
منين يقدر واحد او حتى واحده يلم مبلغ يعدي الست اصفار وبمنتهى البساطة يديهم لواحد عشان يشغلهم او يستثمرهم
انا مع Xpert في رأيه ان ده غسيل اموال
بس فعلا بقت حاجة تحير ان الواحد لو معاه فلوس ازاي يستثمرها وتجيبله عائد مربح وفي نفس الوقت يكون العائد ده حلال ميه في الميه
تخيلوا ان في واحد عنده معرض ايجار سيارات وكلها ما شاء الله معدية (اقل حاجة عنده الفئة الخامسة مثلا) وكل سنة بيجيب الموديل الاحدث لو حسبنا عدد العربيات اللى عنده وايجارها بكام في اليوم ممكن يقعد 50 سنة يسدد في تمنهم ومش حيسددهم كلهم بس هوا معاه شوية فلوس زيادة وبيستثمرهم (بتاع 50 - 60 مليون جنيه كده)
ده الواحد مش عارف يحوش 300 جنيه على بعضهم في الشهر تقوم تقوللى 99 مليون جنيه
خلوني ساكت بقه احسن

رامي (ابو احمد)