الحكومه الذكيه ولعت البلد

[zkralla]

من ا ول ما جت حكومه دكتور نظيف الى الذكيه خالص والاسعار فى ارتفاع مستمر
كل حاجه
الى فاكر اسعار حاجه عند تولى الحكومه والان يا ريت يفكرنى بيها
انا فاكر مثلا الجوافه كانت ب 75 قرش دلوقتى بخمسه جنيه
طبعا السكر والرز بقوا الضعف ( والضعف ده نسبه كويسه بالمقارنه بالحاجات الى اتضاعفت )
طبعا العيش الفينو
والبنزين
واللبن كان لما الحكومه مسكت ب 190 قرش دلوقتى بخمسه
كيلو الكحك اقل حاجه ساده ب 35 جنيه
مش عارف مين كان حاطط فى توقيعه ان ازاى بلد كليوا اللحمه فيها ب 50 جنيه ( ده الحد الادنى ) وفيه ناس فيها عايشين بمرتب 200 جنيه
مش فاكر كان بكام اول ما الحكومه مسكت
اى صانيعى دلوقتى يخش البيت يربط مسمار عاوز 50 جنيه
لو كهربائى او ميكانيكى بص فى حاجه على العربيه لو اديتو 10 جنيه فى البصه هيرمييهم فى وشك
والله باتكلم على بصه بجد
يا ريت الى فاكر اسعار يفكرنى بيها عشان اعرف ادعى من قلبى على الحكومه ديه خاصتا فى العشر الاو اخر من رمضان

[أبو إياد]

انتوا مش اغراب عنى ةباعتبركوا اهلى علشان كده ممكن اتكلم معاكوا بالارقام
من سته سنوات بالظبط دخلى كان 450 ج وكنت باقدر ادخر كمان منهم وادخل جمعيه

دلوقتى دخلى بيعدى 4000ج والتزاماتى بتعدى الرقم ده بكتيررر وكل ما ربنا يكرمنى بمبلغ مش بادخره انما بسد بيه مديونااااااااااااات واقسم بالله مش بوفر منهم 100ج حتى


انا نفسى دخلى بيقا 200ج والتزماتى تبقا 200ج
او دخلى يبقا 10000ج والتزماتى 10000ج

ومش عاوز ادخر اى حاجه نهائى انما طالب الستر وبيتهايالى ده اقل حق لاى مواطن عايش فى بلد الخيراااااااااااااااااااااااااااات للغير مش لاهلها

النهارد واحد صاحبى بيدينى كشكول فاضى باقوله ايه ده ؟ لقيته بيقولى حاول تكتب دخلك ومصاريفك
ردى كان بالرفض قولتله لو حسبتلها مش هالتزم باى حاجه غير انى هاتعب نفسيا

ربنا يرحمنا ,,,,,,,,,,,,,,, اللهم امين

[hh]

أنا متجوزة من خمس سنين بالظبط, كيلو الفراخ الفيليه كان ما بين 12 ل 15 جنيه. دلوقتي بشتريه ما بين 40 و 45 جنيه!!!!!!!!! يعني اتضاعف أكتر من تلات مرات في خمس سنين.

أنا للأسف مش من النوع اللي بركز في الأسعار قوي بس برضه أول ما أتجوزت كنت بانزل أنا و جوزي مترو مثلا نجيب بقالة نشتري كل حاجة محتاجينها و نجيب عصاير و بسكوتات و كل اللي نفسنا فيه ندفع 170- 180 جنيه. دلوقتي نفس المشوار بتاع السوبر ماركت مع محاولة الترشيد و اننا نشتري اللي محتاجينه بس بدفع فوق ال 500 جنيه.

حسبي الله و نعم الوكيل!!!!!!!!!!!!!!!!!!!!!

[gebreel]

انا فاكر العيش الفينو زمان ايام المدرسة كنت بجيب ال10 بجنيه
علبة العصير كانت بجنيه
تقريبا اللحمة كانت بحوالي 35 جنيه مش عارف بالظبط
ده اللي انا فاكرو بصراحة لأني معايشتش الاسعار دي كثير =)

[grumby78]

اتحدى ان تحدث هذه الزيادات في السلع الضروريه بهذه النسب في اي دوله في العالم ولا يتحرك الشعب رافضا . ده لاوجود ولا تاثير لمنظمات المجتمع المدني او النقابات.

[zakiali]

الله يرحمك يا جدي مره رجع من بره مضايق وبنسأله مالك .. قال استغفر الله .. البلد مبقاش فيها خير .. كيلو اللحمه وصل 6 جنيه !!

[hazoom2006]

اتحدى ان تحدث هذه الزيادات في السلع الضروريه بهذه النسب في اي دوله في العالم ولا يتحرك الشعب رافضا . ده لاوجود ولا تاثير لمنظمات المجتمع المدني او النقابات.

السلبية وقانون الطوارئ بيخلى اى حد خايف يطالب بحقة واللى يطالب بحقة يبقى بيتكلم فى السياسة

ذود كمان الخوف من الشرطة والحكومة

[م.محمد مختار]

ماهو هو ده الذكاااء...
أمــــال انم فاكرين اسمها ذكية ليه ؟؟؟

[omar-saad]

الله يرحمك يا جدي مره رجع من بره مضايق وبنسأله مالك .. قال استغفر الله .. البلد مبقاش فيها خير .. كيلو اللحمه وصل 6 جنيه !!

هههههههههههههههههههههههههه
ياريتوا كان عايش وشاف المهازل دى
انا فاكر وانا صغير كنت بروح مع والدى عند الجزار وكان وقتها كيلو اللحمة ب17 ج
وكان كيلو اللبن ب140 قرش
وكان الدقيق والرز بجنيه
دا اللى انا فاكرو دلوقتى

[Soma_Sooma]

حسبى الله و نعم الوكيل فيهم بجد

نفسى الاقى حاجة سايبنهالنا نتمتع بيها غير الكورة كل حاجةفى البلد بقت تقرف بجد مفيهاش حاجة عدلة

[Dr Ahmed]

أنا جايب الشبكة سنة 2001 الدهب الجرام ب 36 جنيه

[omaroof]

انا ابويا اول ماتجوز كان راتبه 6 جنيه وكان اقساط الشقه ب3 جنيه فى الشهر وال3 جنيه اللى فاضله كنو بيكلو ويشربو ويدخلو جمعيات وقبل مايتوفى الله يرحمه ويرحم اموتنا جميعا كان معشه 600 جنيه وموش مقضيين ( هى الدنيا حصل فيها ايه)

[Lion_Heart]

بتقلبوا علينا المواجع ليه بس .....................حسبنا الله و نعم الوكيل

[mobitic]

طيب شوفوا آخر الأخبار

ارتفعت أسعار السلع الغذائية اليوم، السبت، مع بداية الأسبوع الثالث
من شهر رمضان بشكل كبير، بعد أيام قليلة من الاستقرار على أسعارها، وأهمها الدقيق والمكرونة والسكر والسمن والزيوت والبيض والأرز والألبان، وذلك طبقا للأسعار المعلنة بموقع وزارة المالية ومركز معلومات مجلس الوزراء.

وسجل سعر الدقيق ارتفاعا من 2.5 جنيه للكيلو بنهاية الأسبوع الماضى إلى 4 جنيهات مطلع الأسبوع الحالى، فى الوقت الذى ارتفعت فيه المكرونة أيضا من 4 جنيهات للكيلو إلى 5.5 جنيه.

وزاد السكر أيضا مسجلا 4.5 جنيه مقابل 3.5 جنيه نهاية الأسبوع الماضى، فى حين ثبتت أسعار السكر المعبأ على 3.75 جنيه حد أدنى لسعر الكيلو و5 جنيهات الحد الأقصى للسعر، كما ارتفع سعر الشاى للمرة الأولى منذ بداية الشهر مسجلا 28 جنيها للكيلو، مقابل 19.25 جنيه حد أدنى لسعر الكيلو منذ بداية الشهر.

كما ارتفع سعر البيض بدوره مسجلا 20 جنيها للكرتونة مقابل 15 جنيها بنهاية الأسبوع الماضى، وارتفع سعر المسلى الصناعى (السمن) من 9 إلى 10 جنيهات للكيلو.

وسجلت أسعار الزيوت زيادة مماثلة حيث بلغ سعر زيت الذرة 12.75 جنيه للتر بزيادة 25 قرشا عن سعره بنهاية الأسبوع، كما ارتفع أيضا زيت عباد الشمس من 6.5 إلى 9.75 جنيه للتر.

أما البقوليات فلم تختلف كثيرا، حيث ارتفع سعر الأرز السائب من 2.25 جنيه للكيلو إلى 3.25 جنيه، كما ارتفع الأرز المعبأ من 2.5 حد أدنى لسعر الكيلو إلى 4 جنيهات، هذا فى الوقت الذى استقر فيه سعر العدس عند 7 جنيهات للكيلو.

وارتفع أيضا سعر اللبن السائب من 3.5 جنيه الحد الأدنى لسعر الكيلو بنهاية الأسبوع إلى 4 جنيهات، كما ارتفع اللبن المعبأ من 5.5 إلى 6.5 جنيه للكيلو، وارتفع الحد الأدنى لسعر الجبن الأبيض من 8 جنيهات للكيلو إلى 17 جنيها.

وبعكس الارتفاعات السابقة، واصل اللبن البودرة انخفاضه مسجلا 12.5 جنيه مقارنة بـ 15 جنيها بنهاية الأسبوع الماضي.

المصدر


حسبى الله ونعم الوكيل

[Eng_Mostafa_89]

حسبنا الله ونعم الوكيل