التاكسى الأبيض و مغامراتك ... ساعدونى محتاج المعلومات دى إنهاردة

[icehearted girl]

طالما السواقين هما هما مش هتلاقي تغيير فلسلوك

تاكسي اسود ابيض اصفر كاروهات

نفس المشاكل

اخر تاكس اول مركبته طلبت منه يشغل التكييف والا انزل

ونا نازلة كان عامل 7 جنيه ادتله عشرة وبقوله الباقي 3 جنيه؟؟؟

لقيته بيقوللي سبعه ازاي يعني هو التكييف دا ببلاش؟؟؟؟

قلتله مهو لو ببلاش كان زماني دفعتلك جوز جنيهات بس فلشارع العبيط دا

ضحي توفيق 94 سنة رائدة فضاء

[icehearted girl]

اوعي تكون بتستدرجنا وبتكتب موضوع صحفي

[SeiffoZ]

شكرا يا جماعة على كل الردود دى و الإهتمام و المهمة تمت الحمد لله

[SeiffoZ]

اوعي تكون بتستدرجنا وبتكتب موضوع صحفي

انضميت للمهنه

ههههههههههه , مرحب يا زمل

بدأنا نتفشى فى المنتدى اهه

ههههههه ...

أنا أختى حاليا بتدرب فى وكالة أنباء يابانية ... و طلبوا منها بحث عن شامل عن التاكسى الأبيض ..

فواخدانى السيكرتير بتاعها ... أساعد ... و كله بحسابه طبعا ...

يعنى تقدروا تقولوا بقيت زميل ليك يا نوح

[midosalah]

هو بيقلب ربع ولا نص لأني كنت ركبت قبل كدة واحد من المعادي كان بيقلب نص

هو بيقلب ربع على طول بس مع دقايق الانتظار ممكن يقلب نص عادى لان كل دقيقة بربع جنية

[gebreel]

يبقى انا اضحك عليا يا ردالة =)

ده كان بيقلب نص و هو ماشي عادي جدا بس بردو في الاخر اديتلو نفس اللي على العداد اللي الابيض و اسود كان بياخدو من المعادي لمدينة نصر و بالتكييف كمان

[icehearted girl]

اي دا يعني انا مشاركتي دي هتتنقل بالياباني؟؟

طب قلل بقي ملسن 70 سنة

واسحب عنيها لفوق

[emicko88]

لما يشغل التكييف زى مايشغلوش
لأن المفروض ان ده تاكس مكيف

انا باطلب منه انه يشغله لما باركب و طريقة الحساب زى ما ذكر
2.5 اول كيلو و الباقى 1.25

[ahmed4000]

وفي سواقين اغبياء زي مرره واحد عايز نص جنيه زياده بحجة ان العداد فاضله شويه ويقلب مع اني اديته الفلوس ونزلت من العربيه ومشيت شويه ودا عمال ينادي عليا ويقولي استنى العداد هيقلب اهو !!!

يخبر ابيض على الطمع

طبعا اشهر حاجة انه ميشغلش التكييف حتى لو الجو ناااار (تفكيرهم زى مهو قال يعنى حيفرق معاه فى البنزين 5 جنيه فى اليوم)

الحاجة التانية انه ابتدى ينقى ...يعنى زمان كنت تركبه وتقوله عايز اروح كذا دلوقتى يقولك اه او لا (سواقين اغبيا لان الاسود يقول كده لو عارف الدنيا زحمة لكن الابيض مش فارقة معاه زحمة ولا لا بس برده عادة مستاصلة فيهم)

الحاجة الثالثة الاستهبال فى اللف والدوران للى مش واخدين بالهم من السكة

الحاجة الرابعة: اللعب فى العدادا بموضوع التعريفة السياحية (جهل من الحكومة متحاسبهم زى العاديين وخلاص هو لازم استغلال) وطمع من السواق


بالتراخى اللى حصل اعتقد بعد سنة بالكتير اوى مش حيشغل العداد وحنبقى زى التاكسى الاسود

اخر حاجة حصلت فيا كنت رايح مشوار فى شارع الجمهورية قبل رمضان بيوم والدنيا رهيبة ركبت معاه ومشينا من قصر النيل وجه عند دخلة الشارع بتاع الجمهورية بص عليه لقاه زحمة راح كمل على طول فى اتجاه النفق ولقيته بيقول "هو احنا المفروض ندخل منين" وطبعا اضطريت انزل لان مفيش لفة يرجع منها تانى ومش حضيع وقت وهو كده كسب 4 جنيه بتوع فتح العداد وحتة من المشوار بدون داع


الطمع واكل قلوب الناس ومبيخلهومش يفرقوا بين حلال وحرام

كان الحرام حينفع

[ahmed4000]

لا لاااااااا مدام وكالة انباء يابانية يعنى سياحة يبقى انا عايز اغير اقوالى

التاكسى الابيض من اجمل التاكسيات التى تركبها فى اى مكان فى العالم حيث يتفوق على تاكسى لندن فى عراقاته حيث ستجد بعض من ماركة لادا نفس انتاج السبعينات بدون اى اختلاف، ويتمتع التاكسى الابيض برائحة جميلة لم تشمها من قبل (نتيجة ان السواق خايف يستخدم التكييف) ويحرص السواق بشدة على صحتك واعطائك بعض النصائح الطبية (الركوب من سخن لبارد يعمل برد) ويعتبر ركوب التاكسى الابيض نزهة جميلة حيث يحرص السائف على ان يريك اكبر قدر ممكن من معالم القاهرة (والاسكنرية لو يقدر مدام انت سائح)


كله علشان مصر ياولاد

[A.Gameil]

على حسب السواق في سواقين بيراعوا ربنا وعاوزين يكلو عيش و في ناس تانية مستغله

[osoliman88]

اوعي تكون بتستدرجنا وبتكتب موضوع صحفي

والله فعلا فكرة خطيرة ، ومش بعيدة تكون اتعملت فينا قبل كده

[osoliman88]

بخلاف مشكلة التكييف واصرار السواق على أنه يمشي في الطريق اللى هو عاوزه علشان يطول في المسافة وطبعا فلوس أكتر
في مشكلة تاني بتحصلي كتير وهي إن السواق طول ما هو ماشي يحكي في قصص الزباين المحترمة النضيفة اللى بتقدر الزحمة وممكن تسيب 5 و10 جنية زيادة على العداد ، مش الزباين (المعفنة ) اللى لو باقي جنية لازم تاخده .... بصراحة أنا ببقى مش عارف أقول أيه

[sara2001]

ويتمتع التاكسى الابيض برائحة جميلة لم تشمها من قبل (نتيجة ان السواق خايف يستخدم التكييف)

لسه حاصلي الموقف الجميل بتاع الرائحه ده النهارده
شىء حضاااااري وسياااااحي جدا (تاكسي اسبيرانزا ابيض)

لو بدأت اكتب خبرتي العظيمه مع سواقين التاكسيات
الموضوع مش هيخلص

[Donzi]

بقالي 4 شهور بركب التاكسيات دي و فعلا فيها لعب في العداد لان انا في مشوار محدد بروحو 3 مرات في الاسبوع من نفس المكان لنفس المكان و دايما العداد مش بيعدي ال 10 جنيه يعني و الدنيا زحمة و واقفة يعمل 9.5 و لو ماشية يعمل 8.5 و عمروووووو ما عدا ال 10 جنيه و في مرة واحد عمل 14 جنيه قلتلو انت عدادك مش مظبوط و ملعوب فيه قالي ازاااااااي دا نازل من الشركة و مينفعش يتلعب فيه و عملي فيها البرىء و انا نازلة اديتلو زي العداد ما عمل و قلتلو انت و ضميرك و انا مش مسمحاك

و من كام يوم ركبت واحد و اعقدت ادور على العداد مفيش قلتلو هو فين العداد قالي اصلو باظ قلتلو امال هانتحاسب ازاي قالي مش هانختلف و انا طبعا عارفة المشوار بيعمل كام بالظبط و لما وصلت اديتلو ال 10 جنيه قالي مفيش حاجة كمان دي الدنيا زحمة قلتلو المشوار دة في الزحمة مبيعديش ال 10 جنيه و انا بروح كل يوم و عارفة سكت مشي

و موضوع الباقي دة بقى مبيحصلش ابدااااااااااااا يعني لو العداد عامل 8.5 و اديتلو 10 عمرهم ما بيدوني باقي و انا بتكسف اني اقلو هات الجنيه او الجنيه و نص و بطنش

الظاهر ان الافضل الواحد يركب التاكسي الاسود بس يتفق معاه من الاول هايخد كام و خلاص


.