مغامراتى فى التراويح

[azmeralda]

الحقيقة مرحتش غير مرات قليلة بس لقيت حاجات عجيبة وبوجه رسالة للرجال لأن كلكم راع وكلكم مسئول عن رعيته لو زوجتك واقفة فى المطبخ طول النهار وحرارة الفرن يا حرام سحبت كل الرطوبة من جسمها وحطت الأكل و يمكن كانت بتشتغل نفس شغلانتك ويمكن حضرتك رجعت نمت وارتحت بعدين هى لبست 3 اطفال ما شاء الله وجاهدت ونزلت بيهم عشان تصلى وتاخد ثواب وفى غيرها قاعد قدام المسلسلات او فى الخيمة بيشرب شيشة
مش خسارة الثواب يضيع او يقلب سيئات
لو اختك او بنتك برضه انت مسئول
الأول محدش يقولى صلاتها فى بيتها احسن ده رمضان شهر فى السنة والحسنات بتتضاعف وروحانيات عالية
ولا تمنعوا اماء الله مساجد الله
................................................*
اتحملت المجهود ده كله ونزلت نحسبها على خير ان شاء الله واتفقنا ان قوتها الجسمانية اقل من الرجل مش تستاهل شوية حسنات


احكى لكو اللى بيحصل الأول ومحدش يتريق وكله فى ميزان سيئات رجالة تانيين مالآخر

1-اول حاجة ريحة البرفان المفحفحة سايبها نازلة من البيت كده ليه؟ طبعا هى بتنزل كده فى العادى <اذا استعطرت المرأة فخرجت على القوم ليجدوا ريحها فهى كذا وكذا > وبعد التراويح راحة النادى

فين بقى لا تمنعوا اماء الله مساجد الله وبيوتهن خير لهن وليخرجن تفلات تفلات يعنى غير متعطرات او متزينات مش مستعملة الطيب وفى الحديث ايما امرأة اصابت بخورا فلا تشهد معنا العشاء الآخرة

2-انا شبه اتضربت يا جماعة واحدة جت تقف جنبى فى الصف وواقفة معووجة خالص وسايبة مسافة انا لسة بلمسها وكنا فى قلب الصلاة زقت ايدى حسيت ان الرسغ اتفك من مكانه(اوعى حد يعلق تعليق يديها ثواب انا بقولكو اهو) بعد الصلاة مسكت اعصابى وقلت اكلمها بالحسنى واقولها ان فى حديث لتسون صفوفكم او ليخالفن الله بين وجوهكم و ان تسوية الصف من تمام الصلاة ولينوا فى ايدى اخوانكم

والفراغ بقى اللى سايباه هاحكى لكو حكمه فى موقف تانى المهم لسه بادية اقولها ليه زقيتى ايدى بصت لى شذرا وسابتنى ومشيت

3- الفراغ بقى يا جماعة دى واحدة تانية سايبة شارع بيننا جيت اكلمها عشان الشيطان ميدخلش قالت لى الدنيا حر وشيطان ايه فى الجامع وفى رمضان !!!!!!!!!!!!! ودخلت فى الصلاة شكلها اتكسفت تكمل وتقول ياعبيطة انتى
بعد الصلاة قلت لها الحديث رصوا صفوفكم وقاربوا بينها وحاذوا بالأعناق فوالذى نفسى بيده انى لأرى الشيطان يدخل من خلل الصف كأنها الحذف طبعا مفتكرتش الحديث بالنص هى مصدقتنيش كد ه ببساطة وقالت لى هاسأل
الحذف اولاد الضأن الصغار


4-الصف مش كامل من النص هاه من النص ننده الناس اللى ورا حد يسد الخلل ياجماعة طب اتحركوا انتوا وكملوا الصف لا حياة لمن تنادى لا اللى ورا بيجوا ولا اللى واقفين فى الصف بيقربوا على بعض
مش هتصدقوا ان 5 عاليمين مصرين يفضلوا زى ما هم وفراغ مهول و7 مثلا وفراغ شوية و15 حاجة كده مثلا!!!

فى معلومة ان الصف بيبدأ من اليمين
المفاجأة لا بقى الصف يبدأ من الوسط (مما يلى الأمام) ثم اليمين افضل من اليسار ولا يصف فى الثانى حتى يكمل الأول

5-حكاية شر صفوف النساء اولها دى كانت زماااااااااااااااان عشان مكانش فيه حائل بين الرجال والنساء الوضع اختلف تماما دلوقتى


6-اثناء الدرس اللى فى النص لوك لوك لوك محدش بيسمع حاجة مع ان المساجد لم تبنى لأمور الدنيا
وفى ناس بتقوم تصلى مش عرفة ده حكمه ايه ؟

فى اختراع عجبنى عندنا فى المنصورة واحدة فتحت حضانة للأطفال تستقبلهم قبل العشا بنص ساعة لغاية بعد التراويح طول رمضان ب45 ج فى الشهر الفكرة كانت فى دماغى كل مسجد يبقى فى حضانة من دى وياريت باركينج كمان لو تحت الأرض ماشى نحل مشكلة الخناق على صريخ الأطفال

والمنع مش لكل الاطفال بس فعلا طفل رضيع نازل وأواة مينفعش يجى لكن مثلا الحسن والحسين كانوا بيدخلوا المسجد النبوى ولازم تعود الأطفال على المسجد

7-فى حاجة بقى انا مش عرفة دى ايه ياريت حد يقوللى ناس عايزة تجيب 20 ركعة فى خلال ال90 دقيقة اللى الأمام بيصلى فيهم 11 ركعة
هل ده اختراع ولا ده ينفع جو الصف نفسه اول ميقرا الفاتحة تسيبه يقرا مع نفسه لا تسمعه ولا تركز معاه تجيب هى ركعتين او 4 على قد متلحق وتخش معاه قبل الركوع ؟ !

انا شايفة ان الأمام شايف الرجالة فشايف اخطائهم ومعندوش فكرة عن اللى بيحصل فوق ممكن مثلا يطلب من النساء يبعتو له ورق كل الللى شايفة حاجة غلط تكتبها له ويدرسها فى البيت براحته ويعمل درس وياريت يكون امام واعى مش بطريقة تخلى الرجالة هاتك يا ضحك ايه رأيكو تقترحوا الفكرة دى على الأئمة ولا عندكو اقتراحات تانية

[ahmed4000]

للاسف المشاكل دى موجود غالبيتها عند الرجال

- تسوية الصف ده موضوع بيقلل من كرامته والصف الاعوج ده حاجة جميلة

- اكمال الصف ده مزاج لو الحتة مش عاجباه ميقدمش يملاها

- سد الفروج ده حاجة غلط لانها بتوجع الرجالين وليه تحبوا الزنقة

- اشهر حاجة فى صلاة الجمعة ان الناس ولا بتسمع حاجة من اللى الشيخ بيقولها..اول حاجة تدخل تلاقى كل واحد سايب قدامه نص متر ومش راضى يقدم فالشيخ يبدأ يقول تفسحوا يفسح الله لكم (ولا كانه بيقول حاجة) يقول الأية الخاصة بالتفسح فى المجالس (اخر طناش) او بالكتير يتحرك سم لقدام...... كل جمعة يقول سنة عن الرسول ان الناس متقومش للصلاة الا لما يتقال فى الاقامة "قد قامت الصلاة"...اول ميخلص الخطبة يقوموا جرى يستعدوا للصلاة (مع انها اخر كلمة بيقولها فى الخطبة)

الحمد لله ان معندناش رغى

[م. عصام مهنى]

فى اختراع عجبنى عندنا فى المنصورة واحدة فتحت حضانة للأطفال تستقبلهم قبل العشا بنص ساعة لغاية بعد التراويح طول رمضان ب45 ج فى الشهر الفكرة كانت فى دماغى كل مسجد يبقى فى حضانة من دى وياريت باركينج كمان لو تحت الأرض ماشى نحل مشكلة الخناق على صريخ الأطفال

من اسبوع كدة اتفرجت على برنامج اسمة خواطر على mbc1 وكان جايب مسجد فى سنغافورة فى ماليزيا
فى كل حاجة ملاهى للاطفال اللى مامتهم عايزة تصلى وحاجات كتير وفى سوق بعد صلاة الجمعة وكان جايب الفرق بين مساجدنا ومساجد سنغافورة .
الحلقة كانت جامدة قوى وفين فى سنغافورة - ماليزيا
ودى اللينك بتاع الحلقة

http://hespress.com/?browser=view&EgyxpID=22967

[Abo_Lina]

أحييك على الموضوع
للأسف العبادات أصبحت طقوس روحانية لدى الكثيرين ..يؤدونها دون أن تتغلغل معانيها في قلوبهم و عقولهم ..

[n_i_t_e]

2-انا شبه اتضربت يا جماعة واحدة جت تقف جنبى فى الصف وواقفة معووجة خالص وسايبة مسافة انا لسة بلمسها وكنا فى قلب الصلاة زقت ايدى حسيت ان الرسغ اتفك من مكانه(اوعى حد يعلق تعليق يديها ثواب انا بقولكو اهو) بعد الصلاة مسكت اعصابى وقلت اكلمها بالحسنى واقولها ان فى حديث لتسون صفوفكم او ليخالفن الله بين وجوهكم و ان تسوية الصف من تمام الصلاة ولينوا فى ايدى اخوانكم

والفراغ بقى اللى سايباه هاحكى لكو حكمه فى موقف تانى المهم لسه بادية اقولها ليه زقيتى ايدى بصت لى شذرا وسابتنى ومشيت

:)) انا مقدرتش امسك نفسي من الضحك رغم انك قلتى مفيناش من ضحك ... العدوانية و الشراسة دي بقت منتشرة مش عارف ليه




4-الصف مش كامل من النص هاه من النص ننده الناس اللى ورا حد يسد الخلل ياجماعة طب اتحركوا انتوا وكملوا الصف لا حياة لمن تنادى لا اللى ورا بيجوا ولا اللى واقفين فى الصف بيقربوا على بعض
مش هتصدقوا ان 5 عاليمين مصرين يفضلوا زى ما هم وفراغ مهول و7 مثلا وفراغ شوية و15 حاجة كده مثلا!!!

فى معلومة ان الصف بيبدأ من اليمين
المفاجأة لا بقى الصف يبدأ من الوسط (مما يلى الأمام) ثم اليمين افضل من اليسار ولا يصف فى الثانى حتى يكمل الأول

دي مشكلة بلاقيها كتير...أولا زي ما قلتى الصف بيبدأ من النص. ثانيا خلاص بدأ من نصه..المفروض اللى على يمين الامام يحاذي على شماله و اللى على الشمال يحاذي على اليمين. المشكلة فى ناس بتاخدها عند و كرامة ده غير اللي يفتى و يستغرب على موضوع اليمين بيحاذي على شماله اللى أقرب للأمام و يقولك (تيمنوا) !!






والمنع مش لكل الاطفال بس فعلا طفل رضيع نازل وأواة مينفعش يجى لكن مثلا الحسن والحسين كانوا بيدخلوا المسجد النبوى ولازم تعود الأطفال على المسجد

لأ مش متفق كليا لأن الموضوع ده حسب السن و مش كل الأطفال زي الحسن و الحسين. ممكن تلاقى طفل بس بيعيط أو لو أكبر شويه بيتشاقى و يعد يتمشى بين المصلين و ساعات طبعا بيدوسوا على النظارات و الموبايلات اللى الناس حطينها قدامهم فى الصلاة و يا حبذا لو طفلين أشقيا و تحبك معاهم يلعبوا توم و جيري فى الجامع.
اللى عارف ان طفله مش بيتشاقى و هيصلى من غير شقاوة ده اللى مستحب يجيبه

7-فى حاجة بقى انا مش عرفة دى ايه ياريت حد يقوللى ناس عايزة تجيب 20 ركعة فى خلال ال90 دقيقة اللى الأمام بيصلى فيهم 11 ركعة
هل ده اختراع ولا ده ينفع جو الصف نفسه اول ميقرا الفاتحة تسيبه يقرا مع نفسه لا تسمعه ولا تركز معاه تجيب هى ركعتين او 4 على قد متلحق وتخش معاه قبل الركوع ؟ !

ده فعلا اختراع عمري ما سمعت على كده و الله أعلم...بس جزء القراءة ده جزء من الصلاة و اللى بتتركه دي هل هتؤجر عليه؟ انا أعرف أن اللى يلحق الركوع يلحق الصلاة بس ده للى كان عنده ظروف و لسه جاي...أنا مش بأيدي أقول ده حلال أو حرام بش ذوقيا مش عشان عندنا رخصة اننا نلحق الصلاة من ركوعها اننا نسيب القيام طالما فى ايدينا نلحقه. ده غير ضياع أجر سماع القراءن و الانصات اليه زي ما ورد بالقرأن .. ده غير ان أصلا صلاة الفرد فى جامع الأمام بيقرا فيه مش هيخلى الواحد مركز بسبب تداخل صوت الامام فى عقله مع صلاته...

انا شايفة ان الأمام شايف الرجالة فشايف اخطائهم ومعندوش فكرة عن اللى بيحصل فوق ممكن مثلا يطلب من النساء يبعتو له ورق كل الللى شايفة حاجة غلط تكتبها له ويدرسها فى البيت براحته ويعمل درس وياريت يكون امام واعى مش بطريقة تخلى الرجالة هاتك يا ضحك ايه رأيكو تقترحوا الفكرة دى على الأئمة ولا عندكو اقتراحات تانية



دي فكرة كويسة أوي و هيكون أحسن أن امام هو اللى ينصح الناس بالنسبة لهم عشان كلام من رجل دين و محدش يبقى له حجة

[alaasaid]

السلام عليكم .

كل اللى حضرتك ذكرتية بيحصل فى 99 % من الجوامع فى مصر فى مصلى السيدات لدرجة ان زوجتى مبقتش تحب تروح التراويح فى الجامع لانها تحولت لقعدة نسائية مش صلاة و للاسف الغلطة الشائعة جدا هى الاطفال و الدوشة و الحركة الكتيرة بين المصليين و كل دة للاسف راجع لضعف الفقه الدينى و هتلاقى ناس كتير مثلا واقفة على جنب عشان تحت المروحة ملهمش دعوة بقى الصف ناقص ولا معوج المهم يقف تحت المروحة و حاجات من دى كتير

[grumby78]

أحييك على الموضوع
للأسف العبادات أصبحت طقوس روحانية لدى الكثيرين ..يؤدونها دون أن تتغلغل معانيها في قلوبهم و عقولهم ..

الدين المعامله .... كلام غاب عن الكثير من الناس

[FunnyMickey]

انا شخصيا لو جايب ابني معايا صلاه التراويح او اي صلاه
لو مقعدش ساكت حروحه البيت ومش حجيبه المسجد تاني غير اما يتعلم ان ده بيت ربنا مش مدرسته
وحيتعاقب
وححسسه ان المسجد ده حاجه جميله واما يتساب في البيت لوحده كده مينزلش ويتحرم من النزول في المسجد حيبتدي يفهم ويستوعب ان المسجد مش للعب

ويبتدي يحترم نفسه
ومش حروح انزله المسجد وهوا اقل من اربع سنين واقول حيفهم

الناس اللي بتسيب عيالها تجري وتلعب وتأذي المصليين دي المفروض تطرد من المسجد عشان دي ناس مبتفهمش

والستات اللي بتيجي باطفال رضع المسجد دي المفروض متدخلش اصلا
لانها حتعمل حاجه من الاتنين
ياحتسيب الطفل يخبط دماغه في اتخن حيط ودي ساعتها حلال فيها القتل لانها منعدمه الامومه
يااما حتيجي وتقعد في المسجد ومش حتصلي وتقعد تسمع

طب لزمته ايه يعني
متقعدي في بيتك لحد ما ابنك يكبر ويفهم ويستوعب

لا ازاي
الست الشيخه لازم تنزل تصلي التراويح
وتوجع دماغ البني ادمين اللي حواليها ويكسرولهم شويه موبايلات علي نضارات

البرود ده بلاقيه في ستات ورجاله
سايب ابنه عمال يجري ويهبل في المسجد وهوا قال ايه بيصلي
هوا انتا رايح رحله
جايب ابنك ومراتك وعيالك

عندك طفل صغير صلي في بيتكو
صلاه التراويح سنه مش فرض

مش انتا عامل فيها شيخ ومركز في الصلاه
وسايب ابنك يخنق عالناس

وياسلام بقي لو جه بيعيط عشان فلان ضربه من اللي بيعمله

يقف يجعر عشان يعرف مين اللي ضربه وتتقلب خناقه وقله ادب
وكل ده فين
في المسجد


وانتي زعلانه ياازميرالدا من الي بيحصل

تعالي شوفي الاعتكاف بيحصل فيه ايه
تحسي انك واخده شاليه في العجمي
والناس بتصيف

رغي بقي مش عاوز اقولك
وفيه ناس اصلا مبتقومش تصلي
وتبقي نايمه
وحاسس انه قاعد في بيتهم
وناقص كمان يجيب تلفزيون عشان قبل الاعتكاف كان متابع زهره وعيالها الخمسه


جميع السلبيات دي جايه من انعدام الدين والاخلاق الاسلاميه عندنا في ديننا
محدش عارف حاجه
ومحدش فاهم حاجه
وكله ماشي علي هواه

[M.Osman]

للأسف ... معظم البنات بيروحوا يصلوا في الجامع كعادة و ليس عبادة ... او "بالمرة" لأن الجامع في النادي ... كدا يعني فبيكونوا فل ميك اب و حاجة تفرس !!

[dr.hazem]

انا والله تجاربي سيئه جدا هنا في مصر

انا اتولدت في السعوديه واتربيت هناك
رمضان ده بالنسبالي شهر غير عادي

بقالي 6 سنين سايب السعوديه
وفي كل سنه بشوف الويل في رمضان!!!
انا بشوف هنا في جوامع كتير عادات اغلبها بدع وحاجات مش صح
لدرجة اني بقيت ساعات مبقاش عايز انزل اصلي في الجامع
ممكن ده مدخل لابليس عندي لكن انا للاسف بتنرفز جدا لما الامام يقرأ قراءه مش صحيحه او يقرا قراءه رائعه وبعد ما يسلم يعمل او يشجع على احدى البدع
ودول كتير منها انه يقول متصلو عالنبي وزيدوه واقرؤوا كذا او اعملو كذا
ده كله مش موجود ومحدش عمله قبل كده

انا كذا مره اكون بصلي ولما يحصل حاجه كده او القراءه بتاعة الامام تخل بالمعنى بطلع من الصلاه وبمشي


ياجماعه رمضان في السعوديه غير تماما
ده فيه هناك جوامع بجد لو صلى الامام 100 ركعه مش هتحس عليه
ده غير حاجات كتير تساعدك على الخشوع
مفيش موبايلات ترن مفيش روائح عجيبه

انا نفسي ارجع السعوديه بس عشان رمضان

ربنا يسترها علينا

آمين

[Mzeid]

للأسف عندك حق في اللي ذكرتيه و أحب أضيف بعض الأمور اللي بتضايقني برضه

أثناء الصلاة ألاقي واحد فاتح رجله جدا و اللي جنبه مش عارف يقف و غالبا بيكون انا
الحاجة التانية في الركوع الاقي واحد فارد لي دراعه لبرة و انا مش عارف اصلي و المفروض متكنش كوعي ملامس لاعلى الركبة و تاني وسطي جدا حتى لا يكون تشبه بالكلب و هو حرام طيب أصلي انا فين و لا أخدها بقى بلطجة و انزل قبله و أخد أكبر مساحة
الحاجة التالتة الاقي اللي جانبي لازق في جدا مع سايب مساحة بيني و بين اللي واقف جانبه علشان نعرف نصلي احنا ال 2 يقوم اللي جاي جانبي يقوم زانقني

و اللي بيعمل كدة احب أقوله لو حضرتك بتعمل كدة علشان مستريح كدة فيه غيرك برضه عايز يستريح واحنا مش ولاد البطة السودا

الحاجلة الاخيرة موقف حصل معايا كنت انا و واحد صاحبي أثناء صلاة التهجد بعد السحور دخلنا لقينا المسجد فاضي علشان الناس لسة مجتش فجلسنا في أول صف المهم بعدها على واحد دخل راجل كبير و لابس جلابية بيضاء و هو في سن والدي فلقيته جاي ناحيتنا و لقيته بيقولي دة مكاني مع العلم أنه كان شخص مصلي عادي و ليس تبع المسجد او الإمام .. طب بالله عليك دة مسجد يعني بيت الله و محدش كاتب كل منطقة باسمه هي مش أرض هنسجلها باسمنا يعني .. و الله انا إحترمت نفسي و روحت مكان تاني بهدوء إحتراما للشهر المقدس

[M.Osman]

للأسف عندك حق في اللي ذكرتيه و أحب أضيف بعض الأمور اللي بتضايقني برضه

أثناء الصلاة ألاقي واحد فاتح رجله جدا و اللي جنبه مش عارف يقف و غالبا بيكون انا
الحاجة التانية في الركوع الاقي واحد فارد لي دراعه لبرة و انا مش عارف اصلي و المفروض متكنش كوعي ملامس لاعلى الركبة و تاني وسطي جدا حتى لا يكون تشبه بالكلب و هو حرام طيب أصلي انا فين و لا أخدها بقى بلطجة و انزل قبله و أخد أكبر مساحة
الحاجة التالتة الاقي اللي جانبي لازق في جدا مع سايب مساحة بيني و بين اللي واقف جانبه علشان نعرف نصلي احنا ال 2 يقوم اللي جاي جانبي يقوم زانقني

و اللي بيعمل كدة احب أقوله لو حضرتك بتعمل كدة علشان مستريح كدة فيه غيرك برضه عايز يستريح واحنا مش ولاد البطة السودا

الحاجلة الاخيرة موقف حصل معايا كنت انا و واحد صاحبي أثناء صلاة التهجد بعد السحور دخلنا لقينا المسجد فاضي علشان الناس لسة مجتش فجلسنا في أول صف المهم بعدها على واحد دخل راجل كبير و لابس جلابية بيضاء و هو في سن والدي فلقيته جاي ناحيتنا و لقيته بيقولي دة مكاني مع العلم أنه كان شخص مصلي عادي و ليس تبع المسجد او الإمام .. طب بالله عليك دة مسجد يعني بيت الله و محدش كاتب كل منطقة باسمه هي مش أرض هنسجلها باسمنا يعني .. و الله انا إحترمت نفسي و روحت مكان تاني بهدوء إحتراما للشهر المقدس

ده مكاني

!!!!!!!

يا سلام ؟؟

الناس دي مخها صددا ولا أية ؟؟

[Mzeid]

الحمد لله


انا هلحق قبل ما أصدي انا كمان

[misoalex]

بجد فعلا انا كنت عاوز اتكلم على بعض الحاجات الى بشوفها تنرررررررررررررررفز بجد وفى الايام العاديه كمان مش فى رمضان والناس فاكره كده صح

يعنى زى محضرتك ذكرتى موضوع تساوى الصفوف ده بقا حاجه عاديه

وموضوع الصف يبتدى من اليمين ده المفروض ده الصح
اجى اقف اول واحد فى اليمين الاقى الى جاى بعدى وقف فى النص لوحده ولا كأن فيه صف ابتدى من اليمين والمفروض تكمل عليه
كأن الباشا بيصلى لوحده ومش عارف ان دى صلاه جماعه
لا والى يغيظ تلاقى واحد وقف جنبه فى النص وبيشدك او بنده عليك عشان انت الى ابتديت الصف من اليمين تقطع صلاتك وتروح تكمل الصف من النص بجد حاجه تحرق الدم

والجديد بقى الى يجى يعمل صف يسيب صف تانى فى النص فاضى ويعمل صف وتلاقى مسافه 3 متر مثلا بين الصف والى ادامه
زى الى بيكتب على سطر ويسيب سطر طب ليه عشان يجيب طراوه مثلا ول عشان ايه مش فاهم لحد دلوقتى السبب فى كده

والشيخ امام الجامع الى ميعديش يومين تلاته الا لما يغلط فى ركعه او سجده اما زياده او ناقصه او يغلط فى الايات ويفضل يعيد او المصلين تصلحله
طب سايبينه امام جامع ليه
وميهونش عليه يصحح لحد موضوع الصفوف ده او يتكلم على اى حاجه حد عملها فى الصلاه

لا واللى جايب ولاده يلعبو بين الصفوف والناس بتصلى والمفروض انهم مركذين فى الصلاه والخشوع
طب مره عيل بتاع 4 سنين كده وصلت الجرئه بيه انه طلع المنبر ومسك الميكرفون واحنا بنصلى وفضل يتكلم والصلا شغال واحنا بنصلى وعادى ولا ابوه كلمه ولا الشيخ علق على الى حصل بعد الصلاه
وتانى يوم الراجل جايب ابنه تانى معاه برضه ولا اكن فيه حاجه

وغيره وغيره وغيره

[Mzeid]

misoalex بالنسبة لبداية الصف الجديد بتكون خلف الإمام و بما أن الإمام في أغلب الاحوال بيكون واقف في مكان منتصف فبداية الصف بتكون من النصف مش من اليمين و أي مصلي جديد يدخل جنب الشخص اللي في المنتصف و يحازي عليه و اللي على يمين الشخص يحازوا عليه و اللي على يساره بحازوا عليه برضو